Efesos 6 - Gooti Toolluro Yogalokwono

Kwoloraiyo togai'aro kemi kuunum kwolabolo togai'aro tonyunokwono

¹ Kevu kwoloraiyo togaikul Aguto toollu me'no uuguro'mwonyodupudo tovino tov kemi kuunum kwolabolo tonyuro yogalo tovi kaduko neya duuwiyogaulo. Kevu kaduko kwipi tov kuvi kuuno ipinogaikikono.

^2-3 Aki Gooti toolluro loowo puruv kuu'maiyo toru'no nekudodowodo tovino tov neya duumjunogaulo. Loowo su tov aro dodowodokwono. “Kemi kuunum kwolabolo tonyu dolago tomuu ilaiyo to'no jomjomwekovlavogaulo. Kevu su toro kuumjunpi tov ilaiyo to'no mwalopi kwako akavi manyu toga nokwo yomjomwekovla'mwalpinogaikikono.” Loowo su tov toro dodowodo tovino tov kemi kuunum kwolabolo tonyu kaduko neya duuwiyogaulo. Gooti toolluro loowo pun subuu'yamju kurukwe imo'nyo'moneyokwe tov lukomgu sumo'nopogano. Toro kuvi kuruv loowo su to'gwowi subuu'yamju kurukwe imo'nyo'moneyokwe tov sumdomgu ku'mda'ai sumo'nokakwono.

⁴ Aki kevu kuunumiyago toorekul kemi kwoloraiyo tobuurai surodo nyu'gwolmwalpiyo. Toro kworekul kuruv kemi kwoloraiyo su tobuuro Aguto toolluro sumdo tovi jurogudo yogullumovlaiyo'moneyokwe ilaiyo to'no neya jugologaulo. Toro tobuuro kisuvolo nekullupiyokwe tovino kuudo neya duuteyogaulo. Aki Aguto toolluro kuuguudo togai jodubwasogaulo.

A'mwo ki'nato womdokwe togai'aro a'mwo mido mollomwalokwe toorogai'aro tonyuro yomjomwekovla'mwalpino tovinokwono

⁵ Aki kevu ki'nato womdo yodupudo togaikul kemi mido mollekumwalokwe tooraino luko neya jogaulo. Yopi kemi mido mollekumwalokwe su toorai kemi poowokalago kuunodo tokwe dolago tomuu mwalopi yiuwi'nokai toga kaduko neya duuwimovlavogaulo. Kevu Krais toollu kaduko wiyodupudo to'busuko kubalno kemi kwako akavida'ai mido mollekumwalokwe kworai kuruv kaduko duuwimovlavogaulo.

⁶ Aki toro togaikul kemi mido mollekumwalokwe toorai ilaiyo igollo'moneyokwe kevnokwe tooro muugonaikwo'dopure toga'no to'no womdo guureji nyumwalpiyo. Kevu su toro supi tov sugudo mipinogaikikono. Toro kuvi kuruv kevu Krais toolluro ki'nato womdokwe togaikulno'gwowi Gooti toolluro ilaiyo winodowodo ton kemoro poowokalago tovi kuulaikwo'dowodokwono. Su toro kuulaikwo'dowodo tovi uumjunopi kemi mido mollekumwalokwe tooravuro womdo tovi ilaiyo to'no neya duuwimovlavogaulo.

⁷ Kemoro ki'nato womdo yodupudo su tov yiuno kwako akavida'ai a'mwo tooraino to'no wiyodupudogaikulmaiyo. Toro kugaikul kuruv kemi Aguto kwolluda'ai wiyodupudogaikikono. Su toro kuudo yauropi womdo tovino ilaiyo nokwo ibwosunopi yiuwi'nokai toga guureji neya domjumovlavogaulo.

⁸ Kevu kuudo neya jaullulo. Nevu ki'nato womdo yodowadonoldeyo oo yasuwa'no mwalodowadonoldeyo yiuwi'nokai tonol sugudo sa'ji tov lukomgu Aguto tool gavnokweyolluro sugudo pugai nonekubiyonekono.

⁹ Neya duu'nyulo. Kevu a'mwo mido mollomwalokwe toorekike'aro a'mwo abolo ki'nato womdokwe tobuurogai'aro yiuwi'nokai togaikullu muunyu kai'muuda'ai Aguto tool mido aval'no mollekumwalodowodekono. Aki toro tool a'mwo mido mollomwalokwe toorekike'aro ki'nato womdokwe tobuurogai'aro yiuwi'nokai togaikullu nogallainyubworekumallo'mo tool yiuno aval'nodo tomgu'aro yaikullugolodowodekono. Toro tovino tov kevu a'mwo mido mollomwalokwe toorekul kemi ki'nato womdokwe tobuurai ilaiyo to'no neya domollomwalogaulo. Yopi kemoro luko irugolodupudo pasudo su tov neya dodukwopiyulo.

Nevu Jisasolluro a'mwo abolo tonol a'mwo mollurogudo toorobusuko imo'numwalano tovinokwono

¹⁰ Aga nuu moro kuuguudo akavuro aiyowo'mo toru bai'mo'mdum kemi aro ikudumo'monyugono. Kevu Aguto tooke me'no guro'mwonyodupudogaikikono. Toro togaikul gavnokweyolluro jurogudo daikullumwojodowo'jure tokwe kevu jurogudo imo'nopi guureji nokwo mujodo'movla'mwalpinogaikikono.

¹¹ Toro togaikullu Satanyol youkuu'naikudodowo'jure toga kevu jurogudo daiyo'moneyokwe tov Gooti tool yiuwi'nokai ton me'no ikullabodowodekono. Toro ikullabodowodo su ton a'mwo mollurogudo tooravuro youro jurogudo to'busuko ikullumo'nodupudogano. Toro togai kevu mollosopi jurogudo neya dodavogaulo.

¹² Kevu kuudo neya jaullulo. Nemi ikomago toorogai molo mujumovla'mdowado su tov nebal'no kulako tokwe yodowado'maiyo. Toro kuvi kuruv kwako akavuro dugumwuulo tomuuda'ai kuullo ma'no ma'nodo toorogai ingovla'mdowadokwono. Kuullo ma'no ma'nodo su toorai nevu sumdo mwonodowado kuvi kuruv kworogai molo ingovla'mdowadonogano. Kuullo ma'no ma'nodo su tooravuro pworo kwako akavi mido mollomwalokwe imo'nodupudorogano. Aki pworo yovo agutokwe imo'nodupudorogano. Aki pworo jurogudo kuunodokwe imo'nodupudorogano. Kuullo ma'no ma'no sulugumdo tovi muunyu tomuu mwalodupudo su toorogai molo ingovla'mdowadonogano.

¹³ Toro tovino tov buro'nyo buro'nyo ma'no ma'nodo'mdeyo ton kemi baiki'mo'mdowo'jure toga kevu guureji uuwoleyo'moneyokwe tov Gooti tool yiuwi'nokai ton me'no ikullabodowodekono. Su toro ikullabodowodo togai kevu a'mwo mollurogudo tooravuro youro jurogudo yesodupudo to'busuko kubalno kevu po'dogalo mollosopi jurogudo neya dodavogaulo. Toro mujodo'movlavopi molo tov me'no abawo'ji kuga kuruv guureji nokwo da'mwalpinogaikikono.

¹⁴ Toro te kevu guureji daiyo'moneyokwe tov a'mwo mollurogudo tooravuro muulo jurogudo mollosodupudo to'busuko kubalno kevu nebaikuuguudo tokwe guureji neya domollosogaulo. Aki a'mwo mollurogudo tooravuro kupolmdo toruda'ai youro jurogudo mollosodupudo to'busuko kubalno kevu Gooti toolluro sumdo tovi sugudo me'no wimo'nodupudo tovino to'no kuudo jou'movlavogaulo.

¹⁵ Aki a'mwo mollurogudo tooravuro suulpweyo mollosodupudo to'busuko kubalno kevu kuuguudo sugudo tokwe moruujo'moneyokwe neya yovrowosunopi domwalogaulo. Kuuguudo nomoruujo'mo su tov arokwono. Yiuwi'nokai a'mwo abolo kuuguudo sugudo tovi'aro abupi tono Gooti tooke sumwoluko aval'no nokwo wosunpinogano.

¹⁶ Aki a'mwo mollurogudo tooro sabiyo molluulodupudo to'busuko kubalno kevu yiuwi'nokai toga Krais toolluno kuudo uubweyodupudo su tovi guureji dovorugwo'mo'narogaulo. Toro porugwo'mo'na'dopure togaikullu Satanyolluro du'wiyokwe iroka ton abupi toga kemi sabiyo to'busuko molluulodupudo su tokwe nokwo kibuulowosumwalpinogaikikono.

¹⁷ Aki a'mwo mollurogudo tooravuro miguto jurogudo yesodupudo to'busuko kubalno kevu ma'no ma'nodo tovuro kirumwallo tovida'ai Gooti tool me'no abomollurolovekumokalokwoka tovino kuudo su tov kemoro mido tonyu neya aikworogawono. Aki molo'mo kwallu'mopto jurogudo gudupola'dupudo to'busuko kubalno kevu Gooti toolluro yogalo tokwe guureji neya dogudupolarogaulo. Kwallu'mopto su toul Gooti toolluro Kuullo tool ikullabodowodokwono.

¹⁸ Kevu yiuwi'nokai toga Gooti toolluro Kuullo tool jurogudo ikubweyodowo'jure tokwe subusu'nyogalo neya duudogaulo. Buro'nyo buro'nyodeyo ton ikullumo'nodowo'jure kuga kuruv kevu Gooti toollu, “Oo neya donekullo'mwojono,” subusu'nyogalo duudogaulo. Aki Gooti tool yiuwi'nokai tomuuda'ai gamoro a'mwo abolo tobuurai wiyo'mwojumwalono'moneyokwe kevu wako neya kuu'nomwalopi yiuwi'nokai toga subusu'nyogalo neya duudumovlavogaulo.

¹⁹ Aki nuu kwonyu kuruv Gooti tool anyo'mwojoneyokwe kevu aro tovino subusu'nyogalo neya duudogaulo. Moro mago tov ara'mi toga Gooti tool gavnokweyolluro yogalo tov neya anubweyono. Toro nubweyodowo'jure tokwe yiulo yogalo sumo'nyajuko kuuguudo sugudo tovino neya moruudumwalmonyugono. Toro te nuu luko nyumiyokwe tovino kevu subusu'nyogalo neya duudogaulo.

²⁰ Nuu Gooti toolluro mago tovida'ai molloda'mdum kuuguudo sugudo su tokwe moruudomollodore tovino tov wuulo ameranubweyoponyugono. Toro ameranubweyopo kuvi kuruv nuu luko miyo'mi kuuguudo sugudo tokwe guureji kuuno moruudomollumwalmo'moneyokwe kevu subusu'nyogalo duudogaulo.

Poololluro aiyowo'mo yogalo adoka tovinokwono

²¹ Nuu a'mwo pwollu kemiyomno mekwopiyamonyugono. Toro amekwopiyami su tool moro somjomwekovla'mwako tonyuno kuuguudo ikudodowo'jure tovi wuu'nopi mino kuudo youronumapinogaikikono. A'mwo su toolluno yovo tov Tikikosolekono. Toro tool mi nyugwai'yago tekwobusuko nyumo'nodowo aki Aguto toolluro womdo tovi guureji porugwo'mo'na'dowodekono.

²² Toro te kevu nemino kuudo youronekumapino'moneyokwe nuu a'mwo su toollu amekwopiyamono. A'mwo su tool nemoro yiuwi'nokai yomjomwekovla'mdowado tonyuno kuuguudo ikudodowo'jure toga kemoro poowokalago tonyu jurogudo nokwo daikullumwojonekono.

²³ Oo miyobuuravo, kevu sumwoluko kavo to'no neya dousunogaulo. Aki kevu yiuwi'nokai Jisasolluro a'mwo abolo tonyuno kalo buuropino domollogaulo. Aki toro togaikul Jisas Kraisolluno kuudo uubweyodupudo tovi guureji neya dogudupolarogaulo. Kevu yiuno Gooti Ganumiyago tooke'aro Aguto Jisas Kraiseke'aro tooralluro jurogudo ikubweyodo'bule tokwe kuvinono nokwo mujumovla'mwalpinogaikikono.

²⁴ Kevu pugaikul nemi Aguto Jisas Kraisolluno kalo buuropino mollodupudo su tovi miyuu'dapiyodupu yiunokuudo wingovla'mdupudogaikikono. Toro togaikullu Gooti toolluro yasuwa'wino sugumaluko tollovo nokwo ikubwemwalonekono.