Efesos 5 - Gooti Toolluro Yogalokwono

Bako tomuu neya yomjomwekovla'mwalano tovinokwono

¹ Kevu Gooti toolluro kwoloraiyo me'no wimo'nodupudogaikikono. Toro togaikulluno tov kemi Tellunumiyago Gooti su tool kemino kalo buuropino winodowodekono. Toro te kevu gamoro sugupasudo molludo'movla'mdowodo to'busuko kubalno aval'no neya domjumovlavogaulo.

² Aki Krais tool nevu yiuwi'nokai tonolluno kalo buuropino winodowodekono. Toro toolluno tov nemi nonekullo'mwojo'moneyokwe Gooti toollu sipsip pwolbusuko wiroudapino'no Gooti toollu wobeya sudo kuunyokwe to'busuko kwimo'nokaikono. Krais tool nemino kalo buuropino wino'no toro sokaikono. Su toro to'busuko kubalno kev kugaikul kuruv yiuwi'nokai a'mwo abolo tonyuno kalo buuropino neya domollogaulo.

³ Aki kevu Gooti toolluro a'mwo abolo kuunodo me'no wimo'nodupudo togaikulluno tov kaiya'no pasudo akarai nomjumovla'mwalpiyo. Kwonyalo yo'mo toorogai'aro kemi kulako tokwe kaiyako igolamo'nyo'mo pasudo toorogai'aro kwanyu sumdo kinuwiyo'moneyokwe toorogai'aro ma'no ma'no pasudo su toorai kemida'ai pwolnodo kwol kuruv nyumwalo'jo.

⁴ Aki kwoda'mollunyogalo toorogai'aro junoru'yogalo toorogai'aro ipa'nyogalo kaiya'nodo toorogai'aro su to kworo kuruv kevu nodumwalpiyo. Kaiya'no yogalo su tooro kevu Jisasolluro a'mwo abolo togaikulluro mollajo'moneyokweyoromaiyo. Toro kuvi kuruv kemiyo'mo to'gwowi Gooti toollu, “Nenoloo,” to'no wuudumwalpinogaikikono.

⁵ Kevu kuudo neya jaullulo. A'mwo pwol kwonyalo yodowodoldeyo oo kaiyako igolamo'nodowodoldeyo oo kwanyu sumdo kinuwiyodowodoldeyo pasudo su toorai yodowodo tool Gooti tooke'aro Krais tooke'aro tooralluro aguto kig mido mollomwalo tomuu ku'nono maulomwalonekono. A'mwo abolo kwanyu sumdo kinuwiyodupudo ton kwako akavida'ai noonyumwonyu pun kemi kuunano gooti pwollubusuko ilomoropiyodapudogano.

⁶ Aki a'mwo pwol ma'no ma'no pasudo su tooraino junoru'yogalo aro nyoukuu'naikudo'jo. “Oo pasudo su ton nokwo'mogano.” Nyoukuu'naikudo'jo. Kevu kuudo neya jaullulo. Gooti tool yiuwi'nokai a'mwo abolo kisuvolo wiyodupudo tonyuno surodo wuunodowodekono.

⁷ Toro tovino tov kevu a'mwo ma'no ma'no pasudo su toro yodupudo toorogai guro'mwonyopi nyomollumwalpiyo.

⁸ Su tov aro tovinokwono. Sumdomgu kemoro poowokalago ton dugumwuulo toollu anakuuto tomuu kwollajupogano. Toro kuvi kuruv aga'no'gwowi Aguto toolluro a'mwo abolo me'no wimo'nodupudo togaikulluno tov gamoro gworeko to'busuko me'no wimo'nodupudogaikikono. Toro togaikul kemi Aguto su toolluro bako tov kuu'maiyo toru'no pwopiyo'moneyokwe pasudo tollovo neya domjumovlavogaulo.

⁹ Bako su tov sulo ilaiyo ton ki'nodowodokwono. Toro te bako su tov kemoro poowokalago tonyu pwopiyodowo'jure toga sulo aro ton ki'nonokwono. Yiuno ilaiyo mujumovlaiyo'moneyokwe togai'aro sugupasudo togai'aro nebaikuuguudo togai'aro ton kemoro poowokalago tonyuda'ai nolokabupinogano.

¹⁰ Kevu su toro tomgu'aro somjomwekovlapi tov yiuwi'nokai toga Aguto toolluro ilaiyo winodowo'jure tonyuno yo'mgonomallo'moneyokwe to'no yamju neya duuwiyoganogaulo.

¹¹ Aki kevu kuudo neya jaullulo. A'mwo abolo dugumwuulo tomuu mwalodupudo tonyuro ma'no ma'no pasudo tooraida'ai sulo ilaiyo puru'monodo kuruv mai'nodupudorogano. Toro tovino tov kevu a'mwo abolo su togai nyo'mo'nomollumwalpiyo. Toro kugaikul kuruv dugumwuulo tomuuda'ai bako pwopiyodowodo to'busuko kubalno neya jumo'nogaulo. Bako su tov ma'no ma'no pasudo toorai kuu'maiyo toru'no nobomollolupto'nubweyonokwono.

¹² Neya duu'nyulo. Nevu yiulo tomuuda'ai kaiya'no pasudo yodupudo su tooraino yogalo nodumwala'jo. Punol su toro tooraino ada'ji tov wogulo nyubwosunanonogano.

¹³ Toro kuvi kuruv yiuwi'nokai dugumwuulo tomuuda'ai pasudo su toorai bako tov kuu'maiyo toru'no abomollolupto'nubweyo'ji to'gwowi a'mwo abolo ton kemi ma'no ma'nodo tonyuno nokwo yainyunpinogano.

¹⁴ Aro tovinokwono. Bako pwopiyodowo'jure tomuu yiuwi'nokai ton kuu'maiyo toru'no bomollolupto'nosodowodogano. Su toro tovino yogalo puruv aro dodowodokwono. “Guu a'mwo me'no bolodupudo tooravuro tomuu sa wo'dumdo tooku aiyo aiko te neya dodukavono. Toro aduka'bi tookuji Krais tool gworeko toolbusuko gujumo'nowo'ji gumi bako noguuwonekono.” Dodowodokwono.

¹⁵ Toro tovino tov kevu a'mwo kuudo maiyokwe toorobusuko nyomjomwekovla'mwalpiyo. Toro kugaikul kuruv wako neya kuu'nopi a'mwo pi'mwo kuudokwe toorobusuko po'dogalo neya jomjomwekovlavogaulo.

¹⁶ Aga ma'no ma'no bwotonyo kiroungovla'mdupudogakono. Toro tovino tov iruko pun yasuwa'no nobaumwalo'jo. Toro kuvi kuruv kevu Gooti toolluro womdo tovi pi'mwono neya domjumovlavogaulo.

¹⁷ Aki kevu kwolaiyo muudoga toorobusuko kuudo nyau'mwalpiyo. Toro kugaikul kuruv yiuwi'nokai toga Aguto toolluro ilaiyo winodowodo tonyu uumjungovlaiyo'moneyokwe kuudo to'no neya jou'movlavogaulo.

¹⁸ Aki kevu wain wonyo bwotonyago anpi tovida'ai amomo yopi kaiyako nyaikullugolo'jokwe nonumwalpiyo. Toro kuvi kuruv kemoro poowokalago tonyuno'gwowi Gooti toolluro Kuullo toollu uumjungovlaiyo'moneyokwe kuudo to'no neya aullo'movaikwopiyogawono.

¹⁹ Aki kevu Jisasolluro a'mwo abolo pubuurogai yogalo adomwalpi toga Da'buukiyo tovida'ai yogalo togai nokwo yajunmwalpinogaikikono. Aki dato pun Gooti toollu ilomoropiyo'moneyokwe togai'aro Gooti toolluro Kuullo tool ikubweyodowodo togai'aro tonyu neya dodomwalogaulo. Dato su toro tonyu kemi mago togai adupi tov kemoro poowokalago kun kuruv da'maguurai to'busuko Aguto toollu ilomoropimwolapinogano.

²⁰ Aki yiuwi'nokai toga buro'nyo buro'nyodeyo kemi aikullumo'no'ji tonyuno nemi Aguto Jisas Kraisolluno yovo tovida'ai nemi Nellunumiyago Gooti toollu, “Nenoloo,” neya duudogaulo.

Poolol kwolabolo yoma'nodupudo tovino kuuguudo adoka tovinokwono

²¹ Kevu Krais toollu kwako tomuu'aro me'no wiyodupudo togaikulluno tov gamoro yiuwi'nokai a'mwo abolo kubuurogai kuruv imgu amgu kwako tomuu'aro neya duuwinogaulo.

²² Aki abolo togaikul Aguto toollu dolago tomuu mwalodupudo to'busuko kubalno kemi kwolo toorai dolago tomuu neya domwalogaulo.

²³ Aki Krais tool nevu gamoro mollu'bwoto tonollu mido nonekullumo'nodowodo to'busuko kubalno a'mwo tool gami abolo tovi mido wimo'nodowodekono. Aki gamoro kulako to'busuko imo'nodowado tonollu ma'no ma'nodo tovuro kirumwallo tovida'ai bomollurolovonekumokalokwiyo'moneyokwe Krais su tool kwekono.

²⁴ Toro te nevu Krais toolluro mollu'bwoto tonol kwollu dolago tomuu mwalodowadonogano. Su toro to'busuko kubalno abolo togaikul yiuwi'nokai toga kemi kwolo toorai dolago tomuu neya domwalogaulo.

²⁵ Aki Krais tool gamoro mollu'bwoto tonolluno kalo buuropino winodowodo to'busuko kubalno kevu a'mwo toorekul kemi abolo tonyuno kalo buuropino aval'no neya domollogaulo. Aki Krais tool gamoro mollu'bwoto tonolluno bollo'moneyokwe gavnokwe tool amorubwenoka to'busuko kubalno a'mwo toorekul kemi abolo tonyuno kalo buuropino aval'no neya duuwinogaulo.

²⁶ Aki gamoro mollu'bwoto tonol gamoro sumdo tovi sugudo wimo'nyo'moneyokwe abolokaikono. Toro te Krais tool gamoro yogalo tokwe nemi wonyo to'busuko amollol'movonekumarokaikono.

²⁷ Su toro amollol'movonekumaroka tov aro tovino'mokwono. Nevu Krais toolluro mollu'bwoto tonol gavnokweyolluro sumdo tovi davowa'ji toga sugumaluko neya wimo'nyo'moneyokweyokwono. Aki gamoro sumdo tovi nevu muu'imuulokweyo'mdeyo oo iwakuumwiyokweyo'mdeyo oo kaiya'no kuumwiyokweyo'mdeyo nuuwimo'na'jokweyo'mokwono. Toro kunol kuruv gamoro sumdo tovi sugudo to'no wimo'nyo'moneyokwe amollol'movonekumarokaikono.

²⁸ Su toro tomgu'aro Krais tool gamoro mollu'bwoto tonollu kalo buuropino winodowodekono. Toro to'busuko kubalno kevu a'mwo toorekul kemi abolo tonyuno kalo buuropino neya domollogaulo. Kevnokwerekulluro kulako tovino kalo buuropino ikullunodowodo to'busuko kubalno kemi abolo tonyu aval'no neya domollogaulo. Aki a'mwo pwol gami abolo tovino kalo buuropino kwino'ji su tool gavnokwe kwolluda'ai kalo buuropino aval'no winonekono.

^29-30 Kevu kuudo neya jaullulo. A'mwo pwol gavnokweyolluro kulako tovino ilaiyo mwinodowodo pwolnodo kwol kuruv nonagutomuugono. Toro kuvi kuruv yiuwi'nokai a'mwo tooro kemi kulako tonyuno ilaiyo winopi po'dogalo mollomwalnodupudorogano. Su toro to'busuko kubalno Krais kwol kuruv nevu gamoro kulako tovuro suvlato tonbusuko wimo'nodowado tonolluno tov gamoro mollu'bwoto tonollu po'dogalo mollonekumwalodowodonogano.

³¹ Su toro tovino Gooti toolluro yogalo sakwollungiko puruv aro dodowodokwono. “A'mwo pwol gami kuunum kwolabolo teyaullu wuugollu'movowo'ji abolo puruv maronekono. Toro teyaul guro'mwonyo'bullu kulako yiuno puru'mono imo'nubulluneyaukono.” Dodowodokwono.

³² Kwolabolo yoma'nyo'moneyokwe su tovino kavlo tov yiulo apuu'nallajukokwono. Toro kuvi kuruv kavlo bwotonyokweyokwono. Kwolabolo yoma'nyo'moneyokwe su tovino kavlo tov aro tovino yovekurajo'mokwono. Nevu Krais toolluro mollu'bwoto tonol kweke guro'mwonyodowa kulako yiuno puru'mono imo'nodowadonogano. Su toro tovino yovekurajo'mokwono.

³³ Aki puruv nevu kwolabolo yoma'nodowado tonolluno dodowodokwono. Su tov arokwono. Kevu yiuwi'nokai a'mwo pwolno pwolnodo toorekul kemi abolo tonyuno kalo buuropino neya domollogaulo. Kevnokwerekulluro kulako tovino kalo buuropino ikullunodowodo to'busuko kubalno domollogaulo. Aki abolo togaikul kemi kwolo toorai dolago tomuu ilaiyo neya jomjomwekovlavogaulo.