Efesos 3 - Gooti Toolluro Yogalokwono

Poolol a'mwo abolo Juu tooravuro miyawosunodupudo tonyu kuuguudo sugudo tokwe modomollodowodo tovinokwono

¹ Nuu Poolonyu Krais Jisasolluro womdo tovi momjumovla'mdum kevu a'mwo abolo Juu toonolluro miyaikuuwosunodowado togaikullu modekumollodumdonyugono. Krais Jisasolluro womdo yodumdo tovino tov aga nuu wuulo killo'mo ago tovi aule'na'mwakono.

² Gooti tool gamoro womdo tovi momjumovlaiyo'moneyokwe mi me'no ajanubweyoka tovino kevu kuudo youronuma'dupudogaikikono. Toro toonyu Gooti toolluro yasuwa'wino sugumaluko tov kemi ikubwemo'moneyokwe anyabokaikono. Toro anyaboka tokwe yodekubwasodumdonyugono. Su toro womdo tovi momjumovlaiyo'moneyokwe tov Gooti tool mi ajanubweyokanyugono.

³ Su toro janubweno sumaiyokwe Gooti tool yiulo yogalo pun kuu'maiyo toru'no bomollolupto'nanubweyo'no sodonubwasokaikono. Su toro sodonubwasoka tovino nuu puukwollo pun kemiyo'mo me'no ajokwollaikubwemonyugono.

⁴ Su toro sokwollaikubwemo tonyu mojagilopi kevu mino aro kuudo youronumapinogaikikono. Oo Poolol Krais Jisasolluno kuuguudo sugudo tov yiulo yogalo to'busuko sumo'nyajuko su tovi yiuno kuu'maiyo toru'no bomollolupto'nosodowodoldeyo. Kuudo yanuupinogaikikono.

⁵ Krais Jisasolluno yiulo yogalo su tov aiyogasuro amwallajupo tonyu Gooti tool kuu'maiyo toru'no mabomollolupto'nubweyajukekono. Toro kuvi kuruv aga'no'gwowi Gooti toolluro Kuullo tool nevu gavnokweyolluro kuurotokwe kuunodo toonogai'aro proofet kuunodo toorogai'aro toonollu kuu'maiyo toru'no me'no bomollolupto'nanekubweyodowodekono. Toro tovino tov nevu yiulo yogalo su tovi kuu'maiyo toru'no kuudo me'no youroma'dowadonogano.

⁶ Kuu'maiyo toru'no bomollolupto'nosodowodo su tov aro tovinokwono. Yiuwi'nokai Krais Jisasolluno kuuguudo sugudo tovino kuudo uubweyodowado tonol Gooti toolluro nonekullabwono dodowodo ton aval'no nomaranonogano. Kevu Juu toonolluro miyaikuuwosunodowadogaikuldeyo oo nevu Juuwonoldeyo yiuwi'nokai tonol aval'no nomaranonogano. Aki toro tonol aval'no guro'mwonyodowa kulako yiuno puru'monodo to'busuko imo'nodowadonogano. Aki toro tonol Gooti toolluro subuu'yamju yodowodo tovida'ai sugudo ton kuvinono nomaranonogano. Su tov yiuno Krais Jisasollu'aro kuvinono nonekullumo'nonokwono.

⁷ Kuuguudo sugudo su tokwe moruudomollo'moneyokwe womdo tov Gooti tool mi anubweyokaikono. Gooti tool gamoro yasuwa'wino sugumaluko tov nubweno sumaiyokwe aki jurogudo tokwe'aro anubweyokanyugono. Toro anubweyoka tokwe kuuguudo sugudo tov moruudomollo'mo gamoro womdokwe wimo'nodumdonyugono.

⁸ Nuu yiuwi'nokai Gooti toolluro a'mwo abolo tonyu kwako tomuu'aro iwapiyodumdekwonyugono. Toro kwekwonyu kuruv Gooti tool mi ilaiyo yanyugollo'moneyokwe gamoro kuuguudo sugudo tokwe a'mwo abolo Juu tooravuro miyawosunodupudo tonyu moruudomollo'moneyokwe womdo tov anyabokaikono. Toro te kevu Juu toonolluro miyaikuuwosunodowado togaikul yasuwa'wino sugumaluko su tollovo neya mapino'moneyokwe aro modekumollodumdonyugono. Kevu Krais toollu kuuguro'mwonyupi tovi'aro gamoro yasuwa'wino sugumaluko tollovo nekubweyonekono. Sugumaluko su tollovo maiyo'nopiyodupudogano.

⁹ Aki yiuwi'nokai noonyumwonyu tonyu sokwollosoka tool yiuno Gooti toolnodokwono. Aiyoga muudu'nodo togada'ai Gooti toolluro kuudo sovo'dogallaullajuko tov yiulo apuu'nallajukokwono. Toro apuu'nallajuko su tov a'mwo abolo tonyu yiuno kuu'maiyo toru'no bomollolupto'nubweyo'moneyokwe Gooti tool mi ajanubweyokaikono.

¹⁰ Kuvinono bomollolupto'nosodowodo su tov arokwono. Nevu Juu tonogai'aro a'mwo abolo Juu tonolluro miyaikuuwosunodowado togaikike'aro tonol aval'no i'bwo'nodowa Jisasolluro mollu'bwoto puru'mono imo'nodowadonogano. Mollu'bwoto puru'monodo su tovi'aro Gooti toolluro pi'mwo kuudo tovi kuu'maiyo toru'no bomollolupto'nosodowodokwono. Su toro bomollolupto'nosoduke tovi muunyu kai'muuda'ai ensel kworo kuruv muugona'dupudorogano. Ensel mido mollomwalokwe toorogai'aro ensel yovokwe toorogai'aro tooro Jisasolluro mollu'bwoto su tovi muugona'dupu aro kuudo youroma'dupudorogano. Oo Gooti tool pi'mwo kuudo bwotonyago kurukweyoldeyo. Kuudo youroma'dupudorogano. Gooti tool kuu'maiyo toru'no su toro bomollolupto'noso'moneyokwe kuudo me'no sovo'dogallaullajukekono.

¹¹ Aki aiyoga manyu togada'ai Gooti tool gavnokweyolluro kuudo sovo'dogallaullajuko tovi kuvinono yo'mo kwinyajukekono. Toro kwinyajuko su tov aga nemi Aguto Krais Jisasollu'aro kuvinono me'no sopiyokaikono. Krais Jisasolluro womdo sopiyoka su tov Gooti toolluro kwinyajuko tovi suwiyo kuvinono sumwojokakwono.

¹² Toro te nevu Krais toolluno kuudo me'no uubweyodowado tonol kweke guro'mwonyodowadonogano. Toro tonolluno tov nevu Gooti toollomno wobo toru kuullo'moneyokwe tovino luko miyanonogano. Toro kunol kuruv aro kuudo yau'mwalanonogano. Oo Gooti tool ilaiyo to'no mollonekumarononoldeyo. Kuudo yau'mwalanonogano.

¹³ Toro te aga nuu aro ikudumo'monyugono. Mi wuulo ameranubweyopo tovida'ai jul'nyo ama'mwako akav kemi ikullo'mwojo'moneyokwe tovi jurogudo daikullumwojonokwono. Toro tovino tov kevu jul'nyo mibwosunopi yiuno paiko to'no jumo'nogaulo.

Efesosda'ai a'mwo abolo ton jurogudo da'mwalpino'moneyokwe Poolol subusu'nyogalo adoka tovinokwono

¹⁴ Toro te Gooti toolluro kemiyo'mo womdo sopiyoka tonyuno tov nuu suduko inuguto'nodum nemi Nellunumiyago toollu subusu'nyogalo wuudodumdonyugono.

¹⁵ Gooti su tool a'mwo abolo gamoro ago muunyu i'muuda'ai mwalodupudo togai'aro a'mwo abolo kwako akavida'ai mwalodowado tonogai'aro tonollu Nellunumiyagekono. Nevu yiuwi'nokai tonol yiuno su to kwolluda'ai to'no billumo'nodowadonogano.

¹⁶ Toro toollu nuu subusu'nyogalo aro tovino wuudodumdonyugono. Nellunumiyago jurogudo kuunodo su tool noonyumwonyu punyuno supto miyodowodekono. Toro kwol kuruv bwotonyago ton kurukwekono. Toro tonyuda'ai pun kemi nokwo ikubwemwalonekono. Toro aikubweyo'ji su ton gamoro Kuullo kuulekumwalodowodo toollu'aro kemoro poowokalago tonyu jurogudo nokwo daikullumwojumwalpinogano.

¹⁷ Aki kevu kuudo me'no uubweyodupudo togaikullu Krais gavnokwe tool kemoro poowokalago kuudo tonyu nokwo mollekuda'mwalonekono. Toro mollekuda'mdowo'jure toga kevu Gooti toolluro kalo buuropino ikullunodowodo tovi guureji gudupola'mwalpinogaikikono. Toro togaikul ipuluko guureji gudupola'dowodo to'busuko kubalno guureji nokwo da'mwalpinogaikikono.

¹⁸ Aki kevuge'aro yiuwi'nokai Jisasolluro a'mwo abolo pugai'aro togaikul Gooti toolluro kalo buuropino winodowodo tovino kuudo neya youroma'mwalpinogaikikono. Kuvinono youromallo'moneyokwe jurogudo tov Gooti gavnokwe tool nekubwemwalonekono. Toro ikubweyodowo'jure tokwe aro kuudo nyouroma'mwalpinogaikikono. Oo Gooti toolluro a'mwo abolo tonyuno kalo buuropino winodowodo su tov bwotonyo kuunodokwono. Kalo buuropino winodowodo su tovuro ga'bwollo tokwe'aro ido'nyunodo tokwe'aro i'numdo tokwe'aro kuruv bwotonyo kumikokwono. Gooti toolluro kalo buuropino winodowodo tovino kevu su toro kuudo youromaropi kemoro poowokalago tonyu jurogudo nokwo daikullumwojumwalonokwono.

¹⁹ Aki Krais toolluro kalo buuropino winodowodo su tov kemi neya aikworono. Gamoro yiuwi'nokai kalo buuropino winodowodo su tovino nemoro kuudo ton supto iwapiyanonogano. Toro kuvi kuruv noonyumwonyu Gooti toollu kuullo'mowopiyodupudo ton kemi aiyowomno neya kuullo'movaikwopimwalpino'moneyokwe ilaiyo nyunodowodonyugono. Kemino tov su toro neya aikullumo'noneyokwe tovino nuu Gooti toollu subusu'nyogalo wuudodumdonyugono.

²⁰ Gooti tool gavnokweyolluro jurogudo tokwe nemoro poowokalago tonyu guureji danekullumwojodowodekono. Gamoro jurogudo su tov womdo nekulloduke tovi'aro buro'nyo buro'nyodeyo pun yo'mo kwino'ji kuvinono nokwo yonekono. Noonyumwonyu punyuno kuudogana'jo'mdeyo oo kuudo to'no saura'jo'mdeyo kuruv nokwo yonekono. Aki muunyu toru gavnokweyolluro pugai'aro nokwo yonekono. Toro toolluno to'no neya ilomoropiyogawano.

²¹ Aki nevu yiuwi'nokai Jisasolluro mollu'bwoto kunol kuruv Krais Jisasollu me'no uuguro'mwonyodowado tovino tov Gooti Jurogudo Kuunodo su toolluno to'no neya ilomoropimwolowanonogano. Nevu agasuro Jisasolluro mollu'bwoto tonogai'aro lukomguda'ai sumo'nugelabupi kugai'aro yiuwi'nokai tonol kwolluno neya ilomoropimwolowanonogano. Nebalokwono.