Efesos 2 - Gooti Toolluro Yogalokwono

Nevu me'no abollunguuwo tonolbusuko sumo'nyajuuwo kunol kuruv Krais tooke aiyo aiko te adukavowo tovinokwono

¹ Sumdomgu kevu aiyo aiko te yere mimo'nodopure toga kevnokweyogaikulluro kisuvolo sajupo togai'aro ma'no ma'nodo togai'aro tonyuda'ai me'no abollungopo togaikulbusuko sumo'nyajupogaikikono.

² Toro togaikul kwako akavida'ai a'mwo abolo punbusuko ma'no ma'no pasudo toorai amjeroungovlaiyajupogaikikono. Su toro amjeroungovlaiyajupo toga Satanyollu kuumjunyajupogaikikono. Satanyol kuullo ma'no ma'nodo pworo dolo tovi muunyu toru yomollodupudo toorai mido mollomwalodowodekono. Aki Satanyol kwol kuruv kuullo pwekono. Toro tool yiuwi'nokai a'mwo abolo Gooti toolluro yogalo tovi kisuvolo wiyodupudo su tonyuro poowokalago tonyu womdo wiyodowodekono.

³ Su toro to'busuko kubalno ne kunol kuruv sumdomgu nevnokwenolluro kulako tovuro winoduke tomgu'aro kuumjungovlaiyajuwonogano. Su toro kuumjungovlaiyajuuwo toga nevnokwenolluro kulako tonyu ilaiyo igollunyo'mo pasudo togai'aro kaiya'no kuudo toorogai'aro toorai kuumjungovlaiyajuwonogano. Su toro toga Gooti toolluro surodo wuunodowodo tov nemi wobo toru kwollajukokwono. Gooti tool yiuwi'nokai kwako akavida'ai a'mwo abolo ma'no ma'nodokwe tonyuno surodo wuunodowodekono. Su toro to'busuko kubalno sumdomgu ne kunolluno kuruv Gooti tool surodo aval'no kuunyajukekono.

^4-5 Nevu nemi ma'no ma'nodo tooraida'ai me'no abollunguuwo tonolbusuko sumo'nyajuuwonogano. Toro kubuuronollu kuruv Gooti tool nemino kalo manekumwonyodowodekono. Aki gamoro kalo buuropino aguto kuunodo tokwe nemino winodowodekono. Toro toolluno tov Krais toollu aiyo aiko te amodukavoka toga nevu me'no abollunguuwo kunollu kuruv kweke aval'no amonekudukavokaikono. Kuudo neya jaullulo. Gooti tool yiuno gavnokweyolluro yasuwa'wino sugumaluko ikullabodowodo tovi'aro kemi kirumwallo tovida'ai kuvinono abomollurolovekumokalokwokaikono.

⁶ Toro tonol Krais Jisaseke me'no guro'mwonyodowado tonolluno tov Gooti tool Krais toollu aiyo aiko te modukavo'no gamoro ago muunyu kai'muuno amokailoka toga ne kunollu kuruv aval'no monekudukavo'no anekumokailokaikono. Toro nekumokailno sumaiyokwe Krais toollu amorumwalloka toga ne kunollu kuruv kweke avalo toru amonekumwallokaikono.

⁷ Gooti toolluro nemi su toro amonekumwalloka tov aro tovino wuuduuwallo'mokwono. Krais Jisasolluro nemi ilaiyo yanekullugollo'moneyokwe womdo sopiyoka su tovi'aro Gooti tool gamoro yasuwa'wino sugumaluko tollovo nonekubweyodowodekono. Su toro tollovo maluko'nyonmaiyo. Bwotonyo kuunodollovogano. Aki toro tollovo nemi yiuno ilaiyo to'no yanekullugolodupudogano. Su toro tollovaino yiuwi'nokai lukomgu kuga kuruv kuuno wuuduuwollumovlaiyo'moneyokweyogano.

⁸ Kevu Krais toolluno kuudo kuubweyopo toga Gooti tool gamoro yasuwa'wino sugumaluko aikullaboka tovi'aro kemi ma'no ma'nodo tovuro kirumwallo tovida'ai me'no abomollurolovekumokalokwokaikono. Su tov kevnokweyogaikulluro womdo tovida'ai aikullo'mwojokalmaiyo. Toro kuvi kuruv Gooti tool gavnokweyolluro yasuwa'wino tovida'ai aikullo'mwojokaikono.

⁹ Gamoro aikullaboka su tov kevnokwe togaikulluro womdo yodupudo tovida'aiyo'maiyo. Toro tovino tov a'mwo pwolnodo kwol kuruv ilomoropunyu ku'nono miyawonekono.

¹⁰ Toro te neya duu'nyulo. Nevu yiuwi'nokai toga sugupasudo tonyu mujumovlaiyo'moneyokwe Gooti tool aiyogada'ai me'no sovrovanekubweyajukekono. Sugupasudo su tonyu kuvinono uumjungovlaiyo'moneyokwe Gooti tool nevu Krais Jisasollu uuguro'mwonyodowado tonollu aiyo aiko te me'no yokwollanekubweyodowodonogano.

Krais tool Juu togai'aro a'mwo abolo Juu miyawosunodupudo togai'aro tonyu yiuno puru'mono amoguro'mwojosoka tovinokwono

¹¹ Toro tovino tov kevu kuudo neya jaurogaulo. Muudu'nodo toga kevu a'mwo abolo Juu tooravuro miyaikuuwosunodupudo togaikul kwa'mgu tomuu amwallajupogaikikono. Toro togaikulluno Juu tooro burolyogalo aro aikujajuporogano. “Oo lakulkulako mado'nodupudorogano.” Aikujajuporogano. Juu su toro aikujajupo tooro lakulkulako do'nodupu kevnokwe tooro ilomoropunyu bwotonyo yodapudorogano. Juu su tooravuro lakulkulako do'nodupudo tov kemi poowokalago anakuuto tovino'mo do'nodupudoromaiyo. Toro kuvi kuruv yiuno kemi kwa'mgu kulako tovino to'no do'nodupudorogano. Su toro tovino Juu tooro kuudo po'dogalo miyouroma'dupudorogano.

¹² Kevu a'mwo abolo gabovo togaikul kwa'mgu tomuu amwallajupo toga Krais tooke manyu tomuu'aro somuudeyomwallajupogaikikono. Aki toro togaikul Gooti toolluro a'mwo abolo Isuraiyol su tonyuda'ai mabodupudogaikikono. Aki Gooti toolluro subuu'yamju kwiyajuko kunyuno kuruv kuudo miyouromallajupogaikikono. Aki su toro toga kevu Gooti toolluro ikullo'mwojono tovino sogwollo mainyajupogaikikono. Aki su toro toga kevu kwako akavi mwalodupudo togaikul Gooti tooke wobo toru mamwallajupogaikikono. Su toro tonyuno kevu kuudo nyallulo'gwonmwalpiyo.

¹³ Kevu aiyoga Gooti tooke manyu tomuu'aro su toro somwallajupo kuvi kuruv aga'no'gwowi kevu Krais Jisasollu me'no kuuguro'mwonyopogaikikono. Toro togaikulluno tov Gooti tool Krais toolluro mujako abwoloka tovi'aro kemi ikumokabodowo gami wobo toru me'no bomekumwallodowodekono.

¹⁴ Sumdomgu nevu Juu tonogai'aro kevu a'mwo abolo Juu toonolluro miyaikuuwosunodowado togaikike'aro tonol ikomago sunyajuwonogano. Nemoro ikomago sunyajuuwo pasudo su tov akuuto toru kuurupto to'busuko anekuwollajukokwono. Toro nekwo'duke kuvi kuruv Krais tool gavnokweyolluro kulako aboloka tovi'aro kuurupto su tovi yiunokuudo airowo'dolapiyokaikono. Toro kirowo'dolapino sumaiyokwe nevu judo'no judo'no amwallajuuwo kunollu kuruv sumwoluko yiuno puru'mono wosunyo'moneyokwe avalo toru amogurokuuranekubweyokaikono. Toro te aga'no'gwowi nevu yiuwi'nokai tonol sumwoluko puru'mono wosunyo'moneyokwe tov Krais Jisasol me'no anekumokabokakwono.

¹⁵ Krais toolluro kulako tov aboloka toga Moosesolluro loowo tonyu amodukwopiyokaikono. Yiuwi'nokai loowo su tonyuro yogalo ton, “Oo toro mipinono. Toro julo.” Dodupudo su tonyu Krais tool amodukwopiyokagano. Loowo su tonyu toro modukwopino sumaiyokwe Juu yovodolobunyo tokwe'aro a'mwo abolo Juu miyawosunodupudo yovodolobunyo tokwe'aro su tovallu maro'no yovodolobunyo muuduko puru'mono amollumo'nosokaikono. Toro te sumdomgu go'no go'no sumo'nyajuuwo kunol kuruv aga'no'gwowi yiuwi'nokai tonol sumwoluko aval'no wosunodowadonogano.

¹⁶ Yovodolobunyo go'no go'nodo su toval muuduko puru'mono mollumo'noso'no aki yiuwi'nokai tonol Gooti tooke sumwoluko puru'mono wosunyo'moneyokwe Krais tool nemoro ikomago pasudo anekwollajupo toorai gavnokweyolluro kulako aboloka tokwe i'noguropte tovi yiunokuudo aromiyebuuropiyokaikono. Toro romiyebuuropino sumaiyokwe nevu Gooti tooke ibwoto'nyo'moneyokwe kwollomno kuumokabokaikono.

¹⁷ Kevu Gooti toollu manyu tomuu'aro amwallajupo togaikike'aro nevu wobo toru mwalodowado Juu toonogai'aro tonollu gamoro kuuguudo sugudo tov amodonekumollokanogano. Kuuguudo sugudo su tov nevu yiuwi'nokai tonol sumwoluko aval'no wosunyo'moneyokwe tovino amodonekumollokaikono.

¹⁸ Toro te nemi nonekullo'mwojo'moneyokwe Krais toolluro womdo me'no sopiyoka tovino tov nevu Juu tonogai'aro kevu Juu miyaikuuwosunodowado togaikike'aro yiuwi'nokai tonol Gooti toolluro Kuullo toollu aval'no ma'dowadonogano. Gooti toolluro Kuullo pwolnodo su tool nevu yiuwi'nokai tonollu Nellunumiyago Gooti toollomno wobo toru'no kuullo'moneyokwe puuto tovi kuusanekubweyodowodekono.

Nevu Jisasolluro a'mwo abolo tonol Gooti toollu ilomoropiyo'moneyokwe ago to'busuko imo'nodowado tovinokwono

¹⁹ Sumdomgu kevu a'mwo abolo pumuuda'ai tonbusuko bomwallo imo'nodupu Gooti toolluro kuurupto tovi kwa'mgu tomuu amwallajupogaikikono. Toro kugaikullu kuruv aga'no'gwowi Gooti tool gavnokweyolluro kuurupto tovi anakuuto tomuu kemi me'no boolomekumwallodowodekono. Toro togaikulluno tov kevu Gooti toolluro yovodolobunyo puru'monodo tovi me'no uuguro'mwonyodupu gamoro a'mwo abolo kuunodo wimo'nodupudogaikikono. Aki kevu Gooti toolluro julkwolaiyo me'no wimo'nodupudogaikikono.

²⁰ Aki toro togaikul Gooti toolluro ago to'busuko wimo'nodupudogaikikono. Nevu kuurotokwe toonogai'aro proofet toorogai'aro kemi yodekubwosumelabodowado toonol ago tovi mojo'moneyokwe sulo luvogilo'melabodupudo to'busuko imo'nodowadonogano. Aki sulo jurogudo toollu muunyu toru ago mododupudo to'busuko kubalno nemi sulo jurogudo toolbusuko nekullumo'nodowodo tool Krais Jisasekono.

²¹ Toro te nevu pwolno puru'mono kwolluno kuudo uubweyodowado tonollu Jisasol nekuma'dowo pi'mwono momunyutovonekubweyodowodekono. Tono tono momunyutovonekubweyodowo Aguto toollu ilomoropiyo'moneyokwe gavnokweyolluro ago to'busuko imo'nugelabodowadonogano.

²² Aki kevu Juu tooravuro miyaikuuwosunodupudo kugaikul kuruv Krais toollu uuguro'mwonyodupu Gooti toolluro ago avalo su to'busuko imo'nugelabodupudogaikikono. Kevu ago to'busuko imo'nodupudo togaikullu Gooti tool gavnokweyolluro Kuullo toollu'aro kuulekumwalodowodekono.