Efesos 1 - Gooti Toolluro Yogalokwono

¹ Nuu Poolonyugono. Gooti tool gavnokweyolluro ilaiyo winoduke tovi uumjuno'no nuu Krais Jisasolluro kuurotokwe wimo'nyo'moneyokwe me'no ajanubweyokanyugono. Toro te moro pas sakwollumo akav kevu Efesosda'ai Jisasolluro a'mwo abolo togaikul Krais Jisasollu guureji uumjunyokwe togaikullomno sakwollumwakono.

² Nuu kemino aro nyunodowodonyugono. Nemi Nellunumiyago Gooti tooke'aro nemi Aguto Jisas Kraiseke'aro tooralluro yasuwa'wino sugumaluko wiyodubulo tov kemi nekwo'mwalonokwono. Su toro ikwo'dowo'jure tokwe kevu yiuwi'nokai togaikul kemoro sumwoluko ton aval'no nokwo wosungovla'mwalpinogaikikono. Nuu su toro tovino nyunodowodonyugono.

Nevu Krais toollu me'no uuguro'mwonyodowado tonollu Gooti tool gamoro muunyu kai'muuda'ai sugudo ton nonekullabwono tovinokwono

³ Oo nevu nemi Aguto Jisas Kraisolluro Ganumiyago Gooti toolluno yovo tov muunyu toru'aro neya ilomoropimwolowanonogano. Su tov aro tovinokwono. Nevu Krais toollu me'no uuguro'mwonyodowado tonol Gooti toolluro ago muunyu kai'muuda'ai sugudo wo'dowodo su togai nemoro poowokalago tonyu wiyo'mwojo'moneyokwe me'no nekubweyodowodekono.

⁴ Aiyoga Gooti su tool kwako akavi yere miyokwollosoduke kugada'ai nemino tov Krais Jisasollu neya uuguro'mwonyano'moneyokwe me'no ajanekubweyokaikono. Toro me'no ajanekubweyoka tonol aga gavnokweyolluro a'mwo abolo kuunodo me'no wimo'nodowadonogano. Aki ma'no ma'nodo maiyokwe tonollubusuko nekwonodowodekono. Gooti su tool nemino kalo buuropino wino'no

⁵ gavnokweyolluro ilaiyo winoduke tomgu'aro uumjunyuno sumaiyokwe nemino aro adomdukuuranekubweyokaikono. “Oo a'mwo abolo akan Jisas Kraisollu'aro kuulabopi moro kwoloraiyo kuunodo imo'nyo'moneyokwe mollumwojumogano.” Aiyoga su toro me'no adomdukuuranekubweyokaikono.

⁶ Toro te Gooti tool gami Kwolaiyo kalo buuropino winodowodo toollu'aro gamoro yasuwa'wino sugumaluko nekullabodowodo su tov kuvinono nonekubweyodowodekono. Yasuwa'wino sugumaluko su tov kula'nyo'maiyo. Bwotonyo kuunodokwono. Toro tovino tov nevu yiuwi'nokai toga Gooti su toolluno neya ilomoropiyogawano.

⁷ Krais tool gamoro yasuwa'wino sugumaluko ton nemi guureji nekubwemovlaiyo'moneyokwe abwolabolokaikono. Toro abwolaboloka su tool gavnokweyolluro mujako abwoloka tokwe nemoro ma'no ma'nodo tonyu mobiyanekudukwopiyo'no amollurolovonekwapiyokanogano.

⁸ Aki gamoro yasuwa'wino sugumaluko soullanekubweyoka su tovida'ai nevu kuudo go'no go'nodo togai'aro pi'mwo kuudo togai'aro tonyuno youromapino'moneyokwe anekullabokaikono.

⁹ Toro te Gooti tool gamoro womdo puruv Krais toollu'aro yo'moneyokwe tov nemi nekuduuwallo'mo kwinyajukekono. Gooti toolluro womdo sugudo yo'mo winodowodo su tov aiyoga yiulo kwollajukokwono. Toro kuvi kuruv aga'no'gwowi nemi me'no nekuduuwallodowodo tovino tov nevu kuu'maiyo toru'no kuudo youroma'dowadonogano.

¹⁰ Gooti toolluro womdo sugudo yo'mo winodowodo su tov arokwono. Gooti tool gamoro muunyu kai'muuda'ai sokwollosoka togai'aro aki kwako akavida'ai sokwollosoka kugai'aro yiuwi'nokai tonyu avalo puru mollu'bworosowo'ji Krais toollu dolago tomuu wollo'moneyokwe me'no adomduukuurosokaikono. Gooti toolluro adomduukuurosoka su tov gavnokweyolluro me'no ajesungiko toga kuvinono nyonekono.

¹¹ Kuudo neya jaullulo. Yiuwi'nokai ton Gooti tool gavnokweyolluro yo'mo tonyuno kuudo me'no yovo'dogallourosodowodekono. Toro tool buro'nyo buro'nyodeyo pun yo'mo kwino'ji tov kuvinono yokwekono. Toro te Gooti su tool nevu gamoro noonyumwonyu tollovai bilodukovomallo'moneyokwe sumdomgu me'no ajanekubweyokanogano. Toro ajanekubweyoka tovino tov nevu Krais tooke uuguro'mwonyodowado tonol Gooti toolluro a'mwo abolo kuunodo me'no wimo'nodowadonogano. Su tov Gooti gavnokwe toolluro aiyoga kuudo me'no sovo'dogallourosoka tovi kuvinono wimo'nodowadonogano.

¹² Toro te sumdomgu nevu Juu tonolda'ai Krais toolluno kuudo kuubweyowonogano. Krais su toolluno a'mwo abolo pun kuudo yere muubweyodopure kuga kuruv nevno'gwowi kwolluno sogwollo me'no kwingovlaiyajuwonogano. Toro tovino tov aga nevu sumdomguda'ai tonol yasuwa'no nomjomwekovla'mwala'jo. Toro kunol kuruv Gooti toolluno yovo jurogudo su tovi yiuwi'nokai toga neya ilomoropimwolowanonogano.

¹³ Aki kevu a'mwo abolo Juu toonolluro miyaikuuwosunodowado kugaikul kuruv nebaikuuguudo tovi me'no wuu'nodupudogaikikono. Toro togaikulluno tov Gooti toolluro a'mwo abolo kuunodo me'no wimo'nodupudogaikikono. Nebaikuuguudo su tov Gooti tool kemi ma'no ma'nodo tovuro kirumwallo tovida'ai bomollurolovekumokalokwiyo'moneyokwe kuuguudo sugudo tokwono. Aki aiyoga Gooti tool gamoro Kuullo toollu ikullabiyo'moneyokwe subuu'yamju me'no sajukekono. Toro te kevu Krais toolluno kuudo kuubweyopo toga Gooti tool gamoro subuu'yamju tovi kuvinono uumjuno'no Kuullo tool aikullabokaikono. Toro aikullaboka su tov gamoro a'mwo abolo kuunodo wimo'nyo'moneyokwe ajaikubweyokagaikikono.

¹⁴ Toro te Gooti tool gamoro kuunodo wimo'nyo'moneyokwe nemi me'no abiyonekumarokanogano. Toro tonollu gamoro Kuullo tool me'no anekubweyokaikono. Toro anekubweyoka su tool aro tovino nekuduuwallo'mekono. Gooti toolluro yiuwi'nokai nonekullabiyo'mo subuu'yamju yodowodo su tonyu aga yere mama'mwakuuwo kuvi kuruv lukomgu kuvinono nomaranonogano. Toro tovino tov Gooti jurogudo toolluno yovo tovi neya ilomoropimwolowanonogano.

Poolol Efesosda'ai a'mwo abolo tonyuno subusu'nyogalo adoka tovinokwono

¹⁵ Kevu nemi Aguto Jisasolluno kuudo me'no kuubwemwakopo tovino nuu me'no kuu'numwakonyugono. Aki kevu Gooti toolluro a'mwo abolo pubuuraino kalo buuropino mollodupudo kuvino kuruv me'no kuu'numwakonyugono.

¹⁶ Toro togaikulluno nuu Gooti toollu, “Nenyoo,” subusu'nyogalo wuudodumdonyugono. Aki Gooti tool kemi kuuno ikullo'mwojumovla'mwalono'moneyokwe subusu'nyogalo wuudodumdonyugono. Moro subusu'nyogalo wuudodumdo su tov muugollu'mo'monyugono.

¹⁷ Toro kwonyu kuruv nemi Aguto Jisas Kraisolluro Gooti toollu kuuno wuudumovla'mwalmonyugono. Gooti su tool bako bwotonyo pwopiyodowodo tomuuda'ai Nellunumiyago kuunodekono. Toro toollu nuu aro tonyuno subusu'nyogalo wuudodumdonyugono. Gooti toolluro Kuullo tool pi'mwo kuudo tov kemi nokwo ikubwemwalonekono. Gamoro pi'mwo kuudo ikubweyodowo'jure tokwe kevu Gooti toolluno kuudo bwotonyago nyouroma'mwalpinogaikikono.

¹⁸ Aki kemino subusu'nyogalo aro tovino dodumdonyugono. Gooti tool kemoro poowokalago kuudo tonyu kudo'aiko neya ausaikubweyono. Toro kuusaikubweyodowo'jure toga kevu gamoro bako bwotonyo pwopiyodowodo tovino kuu'maiyo toru nokwo wonmwalpinogaikikono. Toro kwonpi toga kevu aro kuudo yau'mwalpinogaikikono. Oo Gooti tool su toro kavlo tovino nemi adonekumarokaldeyo. Kuudo yau'mwalpinogaikikono. Aki lukomgu kemi ilaiyo ikullumo'nono tovino sogwollo kinodupudo kuvino kuruv kuudo nyouromapinogaikikono. Aki gamoro a'mwo abolo kuunodo tonollu gavnokweyolluro bako bwotonyo tomuuda'ai yiuwi'nokai sugumaluko bwotonyago tollovo nonekullabiyo'moneyokwe dodowodo tonyuno nyouromapinogaikikono.

¹⁹ Aki kevu Gooti toolluro jurogudo tovino kuudo you'movla'mwalpino'moneyokwe subusu'nyogalo wuudodumdonyugono. Gamoro jurogudo su tov maluko'maiyo. Bwotonyo kuunodokwono. Aki toro tov nevu yiuwi'nokai Krais toolluno kuudo uubweyodowado tonolluro poowokalago tovi womdo kuulanekullodowodokwono. Jurogudo bwotonyo su tokwe

²⁰ Gooti tool Krais toollu aiyo aiko te moduka'mno sumaiyokwe gamoro ago muunyu kai'muuno amokailokaikono. Toro mokailno sumaiyokwe gamoro anato toru sulomorumwallokaikono. Toro sulomorumwalloka su tool aga Gooti tooke wobo toru mwalodubulekono.

²¹ Gooti tooke wobo toru mwalodubulo Krais su tool yiuwi'nokai noonyumwonyu pworai uuwolo'mdowodekono. Muunyu kai'muuda'ai ensel toorogai'aro a'mwo mido mollomwalokwe toorogai'aro a'mwo aguto toorogai'aro a'mwo yovokwe toorogai'aro yiuwi'nokai su toorai Krais tool mido mollomwalodowodekono. Krais su tool aki aiko te mabolono toolluno tov yiuwi'nokai lukomgu kuga kuruv mido kuuno momjomwekovla'mwalonekono.

²² Krais tool yiuwi'nokai tonyu mido mollomwalmwalono'moneyokwe Gooti tool gamoro dolago tomuu me'no abomorubweyokaikono. Aki nevu Jisasolluro mollu'bwoto kunollu kuruv mido mollonekumwalmwalono'moneyokwe Gooti tool Krais toollu me'no amorumwallokaikono.

²³ Toro te Krais tool nevu gamoro mollu'bwoto tonollu mido mollonekumwalodowodonogano. Toro tonol gamoro kulako puru'monodo to'busuko wimo'nodowadonogano. Krais su tool yiuwi'nokai tomuu yo'mowopiyodowodekono. Toro tool nevu gamoro kulako puru'monodo wimo'nodowado su tonollu anakuuto tomuu aiyowomno kuullo'movanekwopiyodowodekono.