Da'buukiyo 139 - Gooti Toolluro Yogalokwono

Gooti Yawel nemino kuudo me'no youronekuma'dowodo tool ilaiyo to'no mollonekumwalodowodo tovinokwono

Devitolluro dato ajakwolloka akav a'mwo dato tovi mollubworomokavla'mdupudo tooraiyo'mokwono

¹ Gooti Yaweloo, guu mi gallenyubworonuma'dumdo tooku kuudo me'no yanuu'dumdekugono.

² Guu manyu tomuu mwalodumdo kweku kuruv moro kuudo tonyuno'gwowi me'no youronuma'dumdekugono. Aki moro yiuwi'nokai yodumdo kunyu kuruv me'no nuwonodumdekugono.

³ Aki nuu womdo yodo'mureyoga'deyo oo sa wo'do'mureyoga'deyo kuga kuruv guu me'no nuwonodumdekugono. Toro tooku moro yiuwi'nokai yodumdo tonyu me'no youronuma'dumdekugono.

⁴ Gooti Yaweloo, guu moro yogalo tov yere madodo'mure kuvi kuruv guvno'gwowi yogalo su tovi sumdomgu me'no youroonodumdekugono.

⁵ Aki kuurupto kirogabolosodupudo to'busuko kubalno guu mi aiyowomno mwodovonuma'dum guvnokwekujuro jurogudo tokwe mollonumwalodumdekugono.

⁶ Toro te guu mino yiuwi'nokai kuudo youronuma'dumdo su ton ilaiyo kuunodogano. Gumoro kuudo su ton muunyu kai'muu'aro kuunodo tonyuno tov nuu ku'nono miyouroma'mekwonyugono.

⁷ Aki gumi gugollu'meyo'mo pumuu nonagutomuugono. Aki guu tookujuno yiulo kupuu'nallo'mo kuruv nonagutomuugono.

⁸ Toro te nuu gumoro ago muunyu kai'muuno sulami tov guu Gooti tooku nomwakuno. Aki nuu a'mwo me'no bolodupudo tooravuro tomuuno avla'mi kuruv guu Gooti tooku nomwakuno.

⁹ Nuu kuujo tool sulopiyamoka manyu tomuu ki'mo'mdo'mureyo'mdeyo oo kuujo tool kwolmoka manyu tomuu mwalodo'mureyo'mdeyo

¹⁰ kumuu kuruv nomwalbinekugono. Toro tooku gumoro jurogudo tokwe mi mollonumwalo'bi mogaibworonumokavla'mwalbinonyugono.

¹¹ Aki nuu yiulo kupuu'nallo'mo toonyu aro adumi tov, “Oo dugumdo tov neya abu'duvolonumarono oo kuujo tool dugumdo kimwonyopiyowo'ji mi abu'duvolonumarono.”

¹² Toro adumi kuvi kuruv guu Gooti tookujuno'gwowi dugumdo kuga kuruv yiuno bako to'busuko to'no gujumo'nyokwekugono. Toro tookujuro sumdo tovi dugumdo tokwe'aro bako tokwe'aro toval yiuno avalo puru'mono gujumo'nyokwekugono.

¹³ Toro tooku moro yiuwi'nokai kulako tokwe'aro poowokalago tokwe'aro ton mi nyuneyago tovuro sumwoluko tovi kuuno kuula'dore toga sanuukwollodekugono.

¹⁴ Pi'mwono toro sanuukwollodo tookujuno luko yodum ilomogwopi yodamdonyugono. Aki gumoro yiuwi'nokai yakwollodumdo tonyuno mi poowokalago tokwe kuudo yau'dumdonyugono. Oo ilaiyo kuunodo sokwollosokagano. Kuudo yau'dumdonyugono.

¹⁵ Aki toro toonyu mi nyuneyago tovuro sumwoluko tovi kuuno kuula'dore toga moro yogudo ton bogullumolokwodopure tonyu kwonyajudekugono.

¹⁶ Toro tooku mi nyuneyago tov yere miyonuma'duke kugada'ai mi me'no anuwonodekugono. Toro nuwonodumdo toonyu yere mimo'nyodore kugada'ai moro yiuwi'nokai mujomwekovlaiyo'moneyokwe iruko tobuulluno guu me'no youronuma'dumdekugono. Toro tonyuno gumi buukiyo tovi me'no sokwollosodekugono.

¹⁷ Oo Gooti tookujuro mino kuudo sugudo yanuu'dumdo su ton pwekwonodonmaiyo. Toro kun kuruv bwotonyago kuunodogano. Toro tonyuno nuvnokwe tekwonyu ku'nono miyouroma'monyugono.

¹⁸ Aki gumoro kuudo yanuu'dumdo su tonyu nuu ku'nono majagilmonyugono. Nuu ajagilmi to'gwowi soolwaravuro wolo tomuuda'ai we'gullugulludo wo'dupudo tonyu nuuwolopinogano. Toro kwonyu kuruv ku'nono majagilmonyugono. Oo toro yanuu'dumdo tookujuno kuudo nyouroguma'mono. Nuu sa woro'mi dukavo'mi kuga kuruv guuge kuuno mujomwekovla'mwalmonyugono.