A'mwo Mido Mollomwalokwe 2 - Gooti Toolluro Yogalokwono

Joosuuwal aboloka tovinokwono

⁶ To'no'gwowi Joosuuwal Isuraiyolda'ai a'mwo abolo tonyu kemi kwako go'no go'no adovobweyoka toru'no kemiyo'mo amapureyokwe amodapiyokaikono. Toro amodapiyoka ton kemi kwako go'no go'nodo tomuuno avlavopogano. Toro plaino sumaveyokwe kwako su tonyu maro'mno amwalopogano.

^7-10 Lukomgu Nuunolluro muugunyo Joosuuwal Gooti Yawelluro womdokwe su tool 110 kworomo tobuul uuwolo'no'no abolokaikono. Toro aboloka toollu aro sopekono. Gavnokweyolluro kwako Timnatisera towai amolsosopekono. Kwako su tov muumuudo Gase toollu imgu wonyo kwolamoka noot tomguda'ai muumuudo Efreyum toorai tomuu wo'dowodokwono. Su toro towai amolsosopekono. Toro kuvi kuruv Joosuuwal yere maboloduke toga Isuraiyolda'ai ton Gooti Yawelluno ilomoropiyodapu kwollu kuumjunyajupogano. Aki lukomgu Joosuuwal me'no aboloka kuga kuruv Gooti Yawelluno kuuno kuumjunyajupogano. Toro uumjunodupu Joosuuwaike sagullumo'nopo a'mwo mido mollomwalokwe tooro Gooti Yawelluro Isuraiyolda'ai tonyu wiyo'mwojoduke tovi me'no kwonyajupo su to kworo kuruv yere mabolodopure toga a'mwo abolo ton Gooti Yawelluno kuuno sulomoropiyajupogano. Toro ilomoropiyodapu lukomgu yiuwi'nokai Joosuuwaike sagullumo'nopo a'mwo tooro abollajuporogano. Toro me'no abolopiyopo toga'no'gwowi kemoro lukomguda'ai kwolaiyo taiyo ton aguto bilodukovimo'nodupu Gooti Yawelluno kuudo sallulo'gwonyajupogano. Aki aiyoga Gooti Yawelluro me'no kwiyo'mwojajuko tonyuno kuudo miyaullajupogano.

Isuraiyolda'ai ton Gooti Yawelluno milomoropiyajupo tovinokwono

^11-13 To'no'gwowi Isuraiyolda'ai ton kemi kwikweyago tooravuro Gooti Yawellu ma'no ma'no wiyodupu kwolluno milomoropiyapogano. Gooti su tool aiyoga Isuraiyolda'ai tonyu Ijupda'ai abomollurolovomokalokwoka su toollu buulo uugunyumopiyodupu kuunano gooti pworai sulomoropiyajupogano. Kuunano gooti su tooro kevuge avalo toru so'mo'nomwallajupo tonyuro kuumjunyajuporogano. Toro kuumjunyajupo kuunano gooti su tooro pworo Baiyaloravorogano. Pun Asetatoveyogano. Toro tonyu suduko winuguto'nodupu Gooti Yawelluro sumdo tovi su toro sulomoropiyajupogano. Toro ilomoropiyodapu Gooti Yawellu surodo su'gwollajupogano.

¹⁴ Toro tovino tov Gooti Yawel Isuraiyolda'ai a'mwo abolo tonyuno surodo bwotonyo kuunokaikono. Toro wuunyuno sumaiyokwe kemi ikomago tooro molo bwiyodopure toga nokwo wonyapino sokaikono. Toro te ikomago tooro Isuraiyolda'ai tonyu molo tovi buuwolo'mno sumaveyokwe kemoro kuto ivito ton avipolomokavlaiyajuporogano.

¹⁵ Toro te Isuraiyolda'ai tooro yiuwi'nokai toga molo wiyo'moneyokwe pla'mdopure toorai Gooti Yawel mamolluulodowo kaiyako amapureyokwe nokwo wonyapino sajukekono. Gooti Yawel sumdomgu duudapi yogalo aro me'no kwiyokaikono. “Kevu moro yogalo tovi muumjunpi tov kaiyako nyaikullugolmonyugono.” Duudapiyo kwiyokaikono. Toro kwiyoka su tovi kaiyako kuvinono sugollajukekono. Toro te Isuraiyolda'ai tobuuro kaiyako bwotonyo togai somjomwekovlaiyajupobuurogano.

¹⁶ Toro somjomwekovlaiyajupo kuvi kuruv Gooti Yawel Isuraiyolda'ai tonyu mollurolovomokabiyo'moneyokwe a'mwo mido mollomwalokwe pworai amolludapiyajukekono. Toro amolludapiyajuko su tooro Isuraiyolda'ai tobuuro kemi ikomago toorai dolago tomuu mwalodopure tobuurai kuvinono amollurolovomokabiyajuporogano.

¹⁷ Toro kuvi kuruv Isuraiyolda'ai a'mwo abolo ton kemi a'mwo mido mollomwalokwe su toorai muu'nyubusuko to'no kwiyajupogano. Toro ton aiyoga kemi kwikweyago ton Gooti toolluro yogalo tovi po'dogalo kuumjunyajupo tonbusuko muumjunyajupogano. Toro kuvi kuruv Gooti Yawellu buulo yere uugunyumopiyodupu kuunano gooti toorai sulomoropiyajupogano.

¹⁸ Toro tonyu mollurolovomokabiyo'moneyokwe Gooti Yawel a'mwo mido mollomwalokwe judo'no judo'nodo toorai amolludapiyajukekono. Gooti Yawel toro molludapiyodowo a'mwo su toorai amolluullajukekono. Toro tooro judo'no judo'no abillumo'nyajuporogano. Judo'no judo'no toro billumo'nodupu Isuraiyolda'ai tonyu mido amollomwallajuporogano. Toro mollomwalodopure toga Isuraiyolda'ai ton kemi ikomago toorai dolago tomuu mwalodupu kwaru'kwarupto dai'dopure tonyu Gooti Yawel kalo winodowo a'mwo mido mollomwalokwe su toorai'aro amollurolovomokabiyajukekono. Toro te a'mwo mido mollomwalokwe su tooravuro pwol aiyo kuuno mwaloduke toga Isuraiyolda'ai ton kemi ikomago toorai molo wiyodupu kuuwoleyajuporogano.

¹⁹ Toro kuvi kuruv a'mwo mido mollomwalokwe su tooravuro pwol boloduke toga'no'gwowi Isuraiyolda'ai ton kemi sumdomguda'ai ma'no ma'no sajupo tonyu aki aiko te sajupogano. Toro ton kemi kuunano gooti toorai aiko te uumjunodupu sulomoropiyajupogano. Aki kemoro poowokalago ton lumdo kuulopiyodupu kemi ma'no ma'no yodupudo su tovi guureji kuumjungovlaiyajupogano. Toro tonyuro ma'no ma'no sajupo su tov kemi kwikweyago tooravuro sajupo tovi kuuwoleyajupogano.

²⁰ Toro tovino tov Gooti Yawel Isuraiyolda'ai tonyuno surodo bwotonyo wuuno'no aro adokaikono. “A'mwo abolo dogaipo'nyo kuumwiyo akan moro subuu'yamju tonyu muumjunodupudogano. Subuu'yamju su ton aiyoga kemi kwikweyago toorai me'no kwiyajogano. Aki a'mwo abolo akan moro yogalo wuudodore kunyu kuruv kisuvolo yodupudogano.

²¹ Toro tovino tov aga aki aiko te mwiyo'mwojumwalmonyugono. Aiyoga Joosuuwal aiyo kuuno mwaloduke toga nuu kwako su toruda'ai a'mwo abolo bwotonyago punyu me'no amovomjapiyonyugono. Toro kuvi kuruv punyuno'gwowi mamovomjapiyonyugono. Toro ton aga kwako su toru kuuno amwakovo. Toro amwakopo su tonyu nuu mamovomjapiyo'mi Isuraiyolda'ai ton kemoro kwako tovi ku'nono mamapinogano.

²² Toro tov aro tovinokwono. Nuu Isuraiyolda'ai ton yamju wiyoganyo'moneyokwe aro tovino wonoma'monyugono. Agasuro Isuraiyolda'ai su ton aiyoga kemi kwikweyago tooro mi anumjunyajupo kubalno po'dogalo numjunpinodukono oo manumjunpinodukono. Toro tovino wonomallo'moneyokwe kemi ikomago toorai mamovojapimonyugono.” Gooti Yawel toro adokaikono.

²³ Toro juno sumaiyokwe Gooti Yawel Isuraiyolda'ai tonyuro ikomago toorai mabilomovomjopiyodowo amwalpureyokwe wonyapino sajukekono. Aiyoga Joosuuwal kuuno mwaloduke toga ikomago su toorai mamovomjapiyajukorogano. Aki Joosuuwal me'no aboloka kuga kuruv Gooti Yawel ikomago su toorai yere mabilomovomjopiyokarogano.