Aisaiya 53 - Gooti Toolluro Yogalokwono

Danyu'nyuwuulo ton nevnokwe tonol nokwo amarowa'jujuko kuvi kuruv Gooti toolluro womdokwe tekwo amaroka tovinokwono

¹ Aga nevu kuuguudo amoruudumwakuuwo akavi ala'mworuvo kuudo uubwepino'mdukono? Aki agasuro sumo'nadopiko akavi a'mwo abolo pun wonopi aro nokwo dupino'mdukono? “Oo Gooti Yawelluro jurogudo tovida'ai jumo'nadopiyo.”

² Gooti Yawel gamoro a'mwo tekwoji aro tomgu'aro amollajukekono. Gavnokweyolluro sumdo muugona'duke toga a'mwo su tekwo jurogudomaiyokwe imo'nodowo agullajukekono. Toro tekwo kwako yalukullo tomuuda'ai iko sodolo kula'nyo pwekwobusuko kubalno agullajukekono. Toro tekwo a'mwo yovokwe pwolbusuko mwimo'noduke toolluno tov a'mwo abolo ton kwolluno kuudo miyaullajupogano. Aki toro tekwo a'mwo abolo tonyuro sumdo tovi a'mwo sugumaluko pwolbusuko mwimo'noduke tekwojuno tov ilaiyo sumdo mainuwiyajupekono.

³ Toro tekwojuno ilaiyo mwinodupudo ton buulo uugunyumopiyodupu kaiyako sugollajupekono. Toro igolodopure tekwo jul'nyo ibwosunodowo danyu'nyuwuulo tovi amjomwekovlaiyajukekono. Kaiyako toro igolodopure tekwoji a'mwo abolo ton mwonyubusuko yodupu kemi sumdomago ton yiulo to'no sobwoto'nuwoleyajupogano. Toro te nevu a'mwo su tekwojuno aro adowonogano. “Oo a'mwo yasuwa'nodo pwoldeyo.” Toro juno sumawoneyokwe buulo kuugunyumopiyowonogano.

⁴ Aki aro kuudo saurowonogano. A'mwo su toolluro jul'nyo dado ama'mwalluko su ton Gooti tool deromwalladopiyo. Toro kuudo saurowo kuvi kuruv a'mwo su toolluro jul'nyo dado amaroka su tono'gwowi nevnokwe tonol nokwo amarowa'jujukogano.

⁵ Toro amaroka su ton yiuno nemoro ma'no ma'no yodowado tonyuno tov kwimo'nokaikono. Toro te nemoro ma'no ma'no sajuuwo tonyuno tov a'mwo su tekwoji iwago romiyo'mno gamoro kulako tovi kwa'dalo bwotonyo kwiyopekono. Toro tekwo nevu ilaiyo amwalaneyokwe tovino kirumwallo'mo danyu'nyuwuulo ton subwosunokaikono. Aki toro toolluro kwa'dalo amaroka tovida'ai nevu ma'no ma'nodokwe tonollu nekullukulodowodonogano.

⁶ Nevu ma'no ma'nodokwe tonol aro yodowadonogano. Sipsip tooro kemi kuudo tovida'ai gomno gomno younopiyodupudo to'busuko kubalno nevu ma'no ma'nodokwe tonol nemi kuudo tovida'ai to'no kirounomollodowadonogano. Toro kirounomollodowado tonollu Gooti Yawel nokwo aironekumwallowo'jujuko kunollu kuruv nemiyo'mo kirumwallo su tov a'mwo su tekwoji kuubweyokaikono.

⁷ Toro tekwoji kaiyako igolodopure toga dado ibwosuno'no yogalo puru'monodo kuruv maravokaikono. Toro tool sipsip deko madodowodo pwolbusuko sumo'nokaikono. Sipsip pwol noromiyoso'moga'deyo oo ato kuurupiyomallo'moga'deyo toga deko madonekono. Toro toolbusuko kubalno a'mwo su tekwoji noromiyoso'mo yodopure toga yogalo puru'monodo kuruv maravokaikono.

^8-9 Toro tekwo kuunano yogalo madodowo ma'no ma'no puru'monodo kuruv miyoka toollu kooti yogalo duuwiyo'moneyokwe amogaibworomokavlavopekono. Toro mogaibworomokavla'mno sumaveyokwe kooti yogalo duuwiyo'mno aromiyosopekono. Toro aromiyosopo toolluno gavuge avalo ton aro kuudo miyauropogano. Oo a'mwo su tekwojuro dado ama'mwalluko tov nevu ma'no ma'nodokwe tonol marowa'ji nokwo abolowa'jujukonogano. Toro kuvi kuruv nemi kironekumwallo'mo su tovi ma'dowo dobolmaiyo. Kuudo miyauropogano. Toro kuudo miyauro'mno a'mwo me'no aboloka su tekwoji a'mwo ma'no ma'nodokwe toorogai avalo toru amolsosopujuko kwollu kuruv a'mwo nuugwiyo bwotonyagokwe toorai molsosodupudo avalo toru amolsosopekono.

¹⁰ Toro sumo'noka su tov yiuno Gooti Yawelluro yoduke tovida'ai sumo'nokakwono. Gooti Yawel gamoro me'no adomduukuurosoka tovi kuvinono imo'nyo'moneyokwe a'mwo su tekwoji danyu'nyuwuulo tov kuubweyokaikono. Toro kuubweyoka tekwo Gooti Yawelluro ilaiyo winodowodo tovi uumjuno'no yiuno'no sopiyokaikono. Toro tekwo a'mwo abolo tonyuro ma'no ma'nodo tovi modukwopiyo'moneyokwe gamoro aiyo mwalodowodo tov Gooti Yawellu me'no kwiyokaikono. Aro to'busukokwono. Gooti Yawellu wiyo'moneyokwe dukwagupto tovi aromiroudapiyajupo pworobusuko kubalno a'mwo su tekwojuro aiyo mwallo'moneyokwe tov Gooti Yawellu wiyo'no abolokaikono. Toro aboloka kwol kuruv lukomgu aiyo yiunokuudo mujomwekovla'mwalonekono. Toro mujomwekovlavowo'ji gamoro kwoloraiyo wimo'nodopure tonyu nokwo wonmwalonekono.

¹¹ Toro tekwo a'mwo abolo bwotonyago ton sugudo imo'nupino'moneyokwe kemoro ma'no ma'nodo tonyuro jul'nyo tov maro'no danyu'nyuwuulo tov subwosunokaikono. Toro ibwosunoduke toollu Gooti Yawel wono'no adokaikono. “Moro a'mwo womdokwe su tekwojuno ilaiyo yodum a'mwo abolo ma'no ma'nodokwe tonyuno surodo nuunodowodo tov dugoga anyulmaiyo.” Adokaikono. Toro te a'mwo womdokwe yiuno sugudo to'nodo su tekwo a'mwo abolo tonyu sugudo wimo'nodowo'jure tovi wonowo'ji kuudo youromaronekono. Oo moro danyu'nyuwuulo amaro tov yasuwa'nodo'maiyo. Kuudo youromarowo'ji ilaiyo nokwo yomjomwekovla'mwalonekono.

¹² Aki toro tekwojuno Gooti Yawel aro adokaikono. “A'mwo ma'no ma'nodokwe pworai kaiyako igolodupudo to'busuko kubalno moro a'mwo womdokwe su tekwoji kaiyako igolo'mno aromiyosopekono. Toro romiyosodopure toga a'mwo womdokwe su tekwo aromiyanubwepureyokwe nokwo wonyapino sokaikono. Toro tekwo a'mwo abolo ma'no ma'nodokwe bwotonyago tonyuro aiko toru maro'no a'mwo abolo su tonyu wiyo'mwojo'moneyokwe subusu'nyogalo adokaikono. Toro soka tekwojuno tov yovo agutokwe imo'nyo'mo uubweyo'mi a'mwo jurogudokwe toorogai uumwallumekono. Toro kuumwallumi tool molo uuwolo'mdupudo tooravuro kuto ivito ipoloma'dopure tonyuda'ai pun nomo'movla'mwalonekono.” Adokaikono.