Adodolukuu'nosungiko 3 - Gooti Toolluro Yogalokwono

Kuuguudo akav Sadisoda'ai Jisasolluro mollu'bwoto tovino sokwollapiyokakwono

¹ “Aki guu pas akavi wagwolago Sadisoda'ai Jisasolluro mollu'bwoto tovuro ensel moduvomwallokwe toollu aro jokwollapiyono. Kuuguudo akav amogwopiyamo toonyu 7-pela kuullo toorobusuko imo'nyokwe Gooti toolluro Kuullo su tool kuulonumwalodowodonyugono. Aki toro toonyu 7-pela sullugabwo tonyu mwora'dumdonyugono. Toro toonyu kuuguudo tov aro aikudumono. Nuu kemoro yiuwi'nokai pasudo yodupudo tonyuno kuudo nyau'mwakono. A'mwo abolo pun kemi yiuno kwa'mgu tomguno to'no ikwonopi aro dodupudogano. Oo a'mwo abolo akan aiyo mujomwekovla'mdupudogano. Su toro dodupudo kuvi kuruv moro sumdo tovino'gwowi kevu a'mwo abolo me'no abollungopo togaikulbusuko nyumo'nodupudogaikikono.

² Nuu kemoro pasudo airoongovla'mwakopo toorai me'no wonoma'dumdonyugono. Toro toonyu aro aikudadokwono. Kemoro pasudo su tooro mi Gooti toolluro sumdo tovi sugudo mwimo'nodupudorogano. Toro te kevu sa kwo'mwakopo togaikul neya dodukavogaulo. Kevu sugupasudo tov yiuno pwekwonodo to'no kuuno mujumovla'mdupudogaikikono. Toro te kemoro sugupasudo pwekwonodo su tekwo nobollo'mo wobo toru sadopiyo. Toro te sugupasudo pwekwonodo su tekwoji jurogudo duuwimwojopi aki aiko te guureji neya domjumovlavogaulo.

³ Kevu muudu'nodo toga kuuguudo sugudo tovi wuu'no'mno kuudo me'no kuubweyopogaikikono. Kuuguudo sugudo me'no kuubweyajupo su tovino aga aki aiko te kuudo neya jaurogaulo. Aki toro tovi guureji neya gudupolaropi miyomno aki aiko te neya jodu'mwonyugobilo. Kevu su toro tomgu'aro madukapi to'gwowi nuu kemi kirekumwallo'moneyokwe yere nobwolekuru'ma'monyugono. Su tov a'mwo kuuko pwol kevu kuudo miyau'dopure toga bowo'ji galekumwora'dowodo to'busuko kubalno nuu kemi nobwolekuru'ma'monyugono.

⁴ Toro kuvi kuruv wagwolago Sadisoda'ai Jisasolluro mollu'bwoto tovuro a'mwo abolo puno'gwowi ma'no ma'no mamjumovla'mdupudogano. Su tov aro to'busukokwono. A'mwo abolo su ton kemi youro wiya'jo tousai guruko mamollugolamo'mdupudo to'busukokwono. Toro tovino tov lukomgu youro wiya'jo to'busuko tousogai nokwo mollosopi nuuge wobo toru nyomollumwalpinogano.

⁵ Nuu yiuwi'nokai a'mwo abolo Satanyolluro molo tovi kuuwolopi su tonyu youro wiya'jo tousogai nuuwiropimonyugono. Aki kemi yovo ton Aiyo Yiunokuudo Mujomwekovla'mwalpino tonyuno Buukiyo tovi puukwollo me'no sokwollosungiko su tonyu mamollouropimonyugono. Toro kuvi kuruv nuu mi Nyunumiyago tooke'aro gamoro ensel toorogai'aro toorai kuu'maiyo toru aro nuudumonyugono. “Oo a'mwo abolo akan numorogano.” Nuudumonyugono.

⁶ A'mwo pwol kaduko nyabiyo'mo kwino'ji tov Gooti toolluro Kuullo tool moro mollu'bwoto go'no go'nodo tonyu kuuguudo wuudodowo'jure akavi neya wuu'nono. Toro wuu'nowo'ji kuudo neya youromarono.”

Kuuguudo akav Filadelfiyada'ai Jisasolluro mollu'bwoto tovino sokwollapiyokakwono

⁷ “Aki guu pas akavi wagwolago Filadelfiyada'ai Jisasolluro mollu'bwoto tovuro ensel moduvomwallokwe toollu aro jokwollapiyono. Nuu yiuno sugudo to'no yodumdonyugono. Aki nebal'no yogalo to'no dodumdonyugono. Toro toonyu aiyoga a'mwo aguto kig Devitol gamoro mido mollomwalo tomuu kuulomwallo'moneyokwe ki tovi amworallajuko to'busuko kubalno nuu aguto kig toonyuro mido mollomwalo tomuu kuulomwallo'moneyokwe ki tovi mwora'dumdonyugono. Toro toonyu kudo'aiko ausosumi tovi a'mwo pwolnodo kwol kuruv ku'nono mamallukuronekono. Aki toro toonyu kudo'aiko me'no amollukurosumi su tovi a'mwo pwolnodo kwol kuruv ku'nono mausonekono.

⁸ Toro toonyu kemoro yiuwi'nokai pasudo yodupudo tonyuno kuudo me'no yaikuu'dumdonyugono. Kevu kuulomwalmwalpino'moneyokwe kudo'aiko tov me'no ausaikubweyonyugono. Kudo'aiko ausaikubweyo su tovi a'mwo pwolnodo kwol kuruv ku'nono mamallukuronokwono. Aki nuu kemino kuudo yaikuu'dumdonyugono. Kemoro jurogudo tov bwotonyo'maiyo. Toro kugaikul kuruv moro yogalo tovi kuvinono uumjunodupudogaikikono. Aki mino yovo tovi suvlo milomaveku'dupudogaikikono. Aki toro togaikul mi buulo manugunyumopiyodupudogaikikono.

⁹ Toro te kevu neya duu'nyulo. Nuu Satanyolluro mollu'bwoto tonyu molleroudapiyodo'mure tovida'ai a'mwo abolo su ton kev togaikulluro suvlo dolago tomuu nobomuulo'napinogano. A'mwo abolo su ton kuunano aro dodupudogano. “Oo nevu Juu kuunodonogano.” Su toro dodupudo kuvi kuruv a'mwo abolo su ton Juu kuunodonmaiyo. Su toro ton kemoro suvlo dolago tomuu bomuulo'naropi aro tovi noonomapinogano. Nuu toonyu kevu togaikulluno'gwowi kalo buuropino nyunodowodonyugono. Su toro tovino noonomapinogano.

¹⁰ Kevu moro yogalo adaikullo tovi me'no uumjunodupudogaikikono. Toro togaikul kaiya'no yaikullugolodopure kuga kuruv kevu moro yogalo tovi guureji neya dogudupolarogaulo. Lukomgu yamju wiyoganyo'moneyokwe puruv yiuwi'nokai a'mwo abolo kwako akavi mwalodupudo tonyu nobwi'mowonokwono. Su toro abwi'mowo'ji toga kevu moro yogalo tovi gudupola'dupudo togaikulluno tov kaiyako nomapiyokwe tov nuu po'dogalo nomollekumwalmonyugono.

¹¹ Nuu wobo toga noolamonyugono. Toro te kevu kuuguudo sugudo me'no kuu'nopo tovi guureji neya dogudupolarogaulo. Toro kuvi kuruv kevu guureji magudupolapi to'gwowi kemoro mubiyo sugudo tov a'mwo abolo pun nyupolekumapinogano. Toro te kemi nyupolekumapiyokwe tov kevu kuuguudo sugudo tovi guureji neya dogudupolarogaulo.

¹² A'mwo pwol Satanyolluro molo tovi kuuwolowo'ji su tool mi Gooti toollu ilomoropiyo'moneyokwe ago tovuro anyutuko aguto tollugwobusuko molludapimekono. Toro aulomuulludapimi tool ago su tovi anakuuto tomuu yiunokuudo kuuloda'mwalonekono. Toro me'no aulodawo'ji tool aki aiko te mabolokuumwalonekono. Aki toro toollu nuu mi Gooti toolluro yovo tokwe'aro mi Gooti su toolluro wagwolago muuduko tovino yovo tokwe'aro toval a'mwo su toollu puukwollo nyokwollubwemonyugono. Wagwolago muuduko su tovino yovo tov Jeruusalemovokwono. Jeruusalem su tov kwako akavida'ai wo'dowodo tovino madadopiyo. Toro kuvi kuruv wagwolago muuduko Jeruusalem su to'gwowi Gooti toolluro ago muunyu kai'muuda'ai noolabwonokwono. Toro te wagwolago muuduko su tovino yovo tokwe'aro nuvnokwenyuno yovo muuduko purukwe'aro tovake a'mwo kuuwolowo'ji su toollu nyokwollubwemonyugono.

¹³ A'mwo pwol kaduko nyabiyo'mo kwino'ji tov Gooti toolluro Kuullo tool moro mollu'bwoto go'no go'nodo tonyu kuuguudo wuudodowo'jure akavi neya wuu'nowo'ji kuudo youromarono.”

Kuuguudo akav Leyadisiyada'ai Jisasolluro mollu'bwoto tovino sokwollapiyokakwono

¹⁴ “Aki guu pas akavi wagwolago Leyadisiyada'ai Jisasolluro mollu'bwoto tovuro ensel moduvomwallokwe toollu aro jokwollapiyono. Nuu Gooti toolluro subuu'yamju tonyu suuwiyo imwojodumdonyugono. Subuu'yamju su tonyuno, “Nebal'nodogano,” dodumdonyugono. Toro toonyu Gooti toolluro yogalo tovino kuu'maiyo toru bomollolupto'noso'moneyokwe nebal'no yogalo togai pi'mwono dodoluwosokwenyugono. Gooti tool yiuwi'nokai kwako tokwe sulugumdo tokwe toval sokwollosoka su tov yiuno mi'aro to'no sokwollosokagano. Su toro toonyu kuuguudo tov aro agudumono.

¹⁵ Nuu kemoro yiuwi'nokai pasudo yodupudo tonyuno kuudo nyau'mwakono. Kemoro poowokalago ton lukuuto yiunokuudo mabolopiyodupudogano. Aki toro ton du'muujudo yiunokuudo minopiyodupudogano. Kemoro pasudo su tonyuno ilaiyo manyunodowodonyugono.

¹⁶ Kevu du'muujudo tokwe'aro lukuuto tokwe'aro yiuno pwekwono to'no imo'nodupudogaikikono. Kevu lukuuto'mdeyo oo du'muujudo'mdeyo yiunokuudo mimo'nodopure tovino tov nuu kemino kwoda'molo ibwosunodumdonyugono. Toro toonyu moro mago tovida'ai ibupto ikupuro'mi nomollaikuduvolmonyugono.

¹⁷ Kevu aro dodupudogaikikono. “Oo nevu kuto ivito nuugwiyo bwotonyagokwe tonolluno tov noonyumwonyu punyuno supto mimwakuuwono.” Su toro dodupudo tov kuvimaiyo. Kevnokwe togaikul po'dogalo miyainyunodupu aro tovino kuudo miyouroma'dupudogaikikono. Kevu kaiya'no yomjomwekovla'mdupudobuurekikono. Toro tobuurekulluno a'mwo abolo ton kalo neya aikullunogapuro. Kevu apoo'nyaiyo toorobusuko me'no imo'nodupudobuurekikono. Aki a'mwo sumnowojokwe toorobusuko imo'nodupudobuurekikono. Aki toro tobuurekul a'mwo muukanyulmaiyo toorobusuko kevu wogulo yowo'gallunodupudobuurekikono.

¹⁸ Su toro tobuurekulluno tov nuu aro daikumul'mwojumo'monyugono. Moro gool pun duko tokwe me'no adovelogullumowopingiko tollovai kevu neya dobiyonumarogaulo. Su toro abiyonumapi togaikulno'gwowi muunyu kai'muuda'ai noonyumwonyu bwotonyagokwe imo'nupinogaikikono. Aki kevu muukanyulmaiyo tonbusuko imo'nodupudo tobuurekul wogulo nyowo'gallunmwalpiyokwe tov moro youro wiya'jo tousai biyonumaropi neya domollosogaulo. Aki kemi sumdo tonyu youroso'moneyokwe marasin ton neya dobiyonumarogaulo. Su toro biyonumaropi kemi sumdo tonyu sourosupi toga sumdo nokwo kinpinogaikikono.

¹⁹ Nuu yiuwi'nokai a'mwo abolo kalo buuropino nyunodowodo tonyu wonyapino miyodumdonyugono. Toro kwonyu kuruv a'mwo abolo su tonyu mollado'movo'mi po'dogalo tomgu'aro yomjomwekovla'mwalpino'moneyokwe kuudo wuuteyodumdonyugono. Toro tovino tov kevu mi numjunyo'moneyokwe guureji neya jogaulo. Aki kevu miyomno aki aiko te neya jodu'mwonyugobilo.

²⁰ Kevu duu'nyulo. Nuu kemoro anoullo tonyu wobo toru da'mdum kudo'aiko tonyu iwago romida'nodumdonyugono. Toro toonyu kevu kudo'aiko kuusonumapino'moneyokwe sogwollo kinodumdonyugono. Toro te a'mwo pwol moro yogaimaguurai tovi wuu'nowo'ji kudo'aiko ausonumaro'ji tov nuu a'mwo su to kweke kuulomwalo'mi yiuwi'nokai toonal ibwoto'nyo imo'nowosi wosamujuko tov aval'no kuulonomwalosunonakono.

²¹ Nuu sumdomgu Satanyolluro molo tovi kuuwolovo toga mi Nyunumiyago tooke gamoro sia kig toru me'no sulomwalonyugono. Su toro to'busuko kubalno a'mwo pwol Satanyolluro molo tovi kuuwolowo'ji su tool moro sia kig tovi nuuge avalo toru nomwalosunekono.

²² A'mwo pwol kaduko nyabiyo'mo kwino'ji tov Gooti toolluro Kuullo tool moro mollu'bwoto go'no go'nodo tonyu kuuguudo wuudodowo'jure akavi neya wuu'nowo'ji kuudo youromarono.”