Adodolukuu'nosungiko 2 - Gooti Toolluro Yogalokwono

Kuuguudo akav Efesosda'ai Jisasolluro mollu'bwoto tovino sokwollapiyokakwono

¹ Toro tool aro anyudokaikono. “Guu wagwolago Efesosda'ai Jisasolluro mollu'bwoto tovuro ensel moduvomwallokwe toollu pas akavi aro jokwollapiyono. Nuu moro anato tovi 7-pela sullugabwo tonyu mwora'dumdonyugono. Aki gool tovida'ai 7-pela gworeko gudupolallo'moneyokwe tonyu akuuto toru yomollodumdonyugono. Toro toonyu aro agudumono.

² Gumoro yiuwi'nokai pasudo yodumdo tonyuno kuudo me'no youroguma'dumdonyugono. Guu gumoro womdo guureji yodumdo tovi yere miyuu'dapiyodumdekono. Aki Gooti toolluno guureji to'no gudupola'dumdo su tovi nuu me'no gwonodumdonyugono. Aki guu a'mwo kirovanyuvanyokwe toorai wonyapino to'no miyodumdekugono. Toro tooku a'mwo kuunanokwe pworo, Oo nevu Krais toolluro kuurotokweyonogano, youkuu'naikudodopure su toorai guu pi'mwono kinodokwopiyoma'dumdekugono. Su toro kinodokwopiyoma'dumdo tovida'ai kuu'maiyo toru'no aro dodowiyoku'bworosodumdekugono. “Oo a'mwo akaro kuunanorodeyo,” dodowiyoku'bworosodumdekugono.

³ Aki guu mino yovo tovi guureji gudupola'dumdo tookuji a'mwo pworo kaiyako yagujugolodupudekugono. Toro yagujugolodopure tovida'ai guu danyu'nyuwuulo ton ma'dumdo kweku kuruv guureji to'no gudupola'dumdekugono. Aki toro tooku womdo tovi mimwogapiyodumdekugono.

⁴ Toro kuvi kuruv gumi yogalo puruv aro modagujurugolmo'monyugono. Muudu'nodo togasuro mino kalo buuropino bwotonyo agujunyajuko su tovi guu manyu tomuu'aro me'no suu'dapiyodekugono. Toro tovino tov aga mino kalo buuropino neya magujunodowodekugono.

⁵ Toro tooku aro kuudo neya jaurono. Gumi muudu'nodo togasuro kalo buuropino ilaiyo agujunyajuko su tovi me'no bwolo'dam aga pasudo su tovi manyu tomuu'aro amwakuno. Su toro tovino kuudo yauro'bi miyomno aki aiko te neya jodu'mwonyugobono. Su toro sodu'mwonyugobubi tov gumi sumdomguda'ai sugupasudo sajudo su tovi aki aiko te neya domolludovogawono. Guu su toro mibi to'gwowi moro mollu'bwoto tovida'ai gumoro gworeko gudupolallo'moneyokwe tovi nuu nobomagudukwopimonyugono.

⁶ Toro kuvi kuruv gumino ilaiyo nyunodowodo puru'gwowi arokwono. Guu a'mwo Nikoolasollu uumjunyokwe tooravuro kaiya'no pasudo kiroungovla'mdupudo tovino surodo guunodowodekugono. Nuu kwonyu kuruv a'mwo su toro tooraino surodo nuunodowodonyugono. Gumino ilaiyo nyunodowodo puruv su torokwono.

⁷ Toro te a'mwo pwol kaduko nyabiyo'mo kwino'ji tov Gooti toolluro Kuullo tool moro mollu'bwoto go'no go'nodo tonyu kuuguudo wuudodowo'jure akavi neya wuu'nowo'ji kuudo youromaronekono. Kuuguudo su tov arokwono. A'mwo pwol Satanyolluro molo tovi kuuwolowo'ji su tool iko aiyo yiunokuudo mujomwekovlaiyo'moneyokwe toolluro ikulsulo tovi nomuudanonekono. Iko aiyo yiunokuudo mujomwekovlaiyo'moneyokwe su tool Gooti toolluro ago muunyu kai'muu gamoro womdo sugumaluko tovi anakuuto toru da'mdowodekono.”

Kuuguudo akav Sumenada'ai Jisasolluro mollu'bwoto tovino sokwollapiyokakwono

⁸ “Aki guu wagwolago Sumenada'ai Jisasolluro mollu'bwoto tovuro ensel moduvomwallokwe toollu pas akavi aro jokwollapiyono. Muudu'nodo tool nuu kwonyugono. Aki aiyowo'mo tool nuu kwonyugono. Toro toonyu me'no abolo kwonyu kuruv aga'no'gwowi aiyo aiko te mujomwekovla'mdumdonyugono. Toro toonyu kuuguudo tov aro agudumono.

⁹ A'mwo pworo mino kuudo manubweyodupudorogano. Toro tooravuro gumi kaiyako yagujugolodopure tovi wonoguma'dumdonyugono. Toro yagujugolodopure tovida'ai guu danyu'nyuwuulo ma'dumdo tokwe'aro aki apoo'nyaiyo imo'nodumdo tokwe'aro tovalluno nuu me'no souroguma'mwakonyugono. Guu kwako akavida'ai tonyuno apoo'nyaiyo imo'nodumdo kweku kuruv gumoro poowokalago tovino'gwowi muunyu kai'muuda'ai noonyumwonyu bwotonyagokwe imo'nodumdekugono. Aki a'mwo pworavuro gumino mebweyogalo gudodopure kuvino kuruv nuu kuudo me'no souroma'mwakonyugono. A'mwo su tooro aro jokwerogano. “Oo nevu Juuwonogano.” Su toro dodupudo kworo kuruv Juu kuunodoromaiyo. A'mwo su tooro Satanyolluro mollu'bwoto wimo'nodupudorogano.

¹⁰ Neya duu'nono. Guu danyu'nyuwuulo pworo noma'binekugono. Toro ma'do'bure su tooraino luko nyubiyo. Satanyolluro womdokwe pworo kemoro kuudo uubweyodupudo tovi yamju ikulloganyo'moneyokwe kevu pugaikullu wuulo killo'mo ago tovi nomeraikubwepinorogano. Me'no meraikubweyopi iruko atousal tobuullu kaiyako yaikullugolodopure su toga danyu'nyuwuulo ton nyubwosunmwalpinogaikikono. Toro kuvi kuruv kemi kuudo uubweyodupudo tovi buulo nuugunyumopimwalpiyo. Kemi romiyaikubweyo'mo yodopure kuga kuruv guureji to'no gudupolaropi resis tovi kuuwolopi togaikullu nuu mubiyo tov aiyo yiunokuudo mujomwekovlaiyo'moneyokwe nekullamonyugono.

¹¹ A'mwo pwol kaduko nyabiyo'mo kwino'ji tov Gooti toolluro Kuullo tool moro mollu'bwoto go'no go'nodo tonyu kuuguudo wuudodowo'jure akavi neya wuu'nowo'ji kuudo youromaronekono. Kuuguudo su tov arokwono. A'mwo pwol Satanyolluro molo tovi kuuwolowo'ji su tool bolnodo naba 2 tov bai'mo'mdowo'jure kuga kuruv kaiyako mamaronekono.”

Kuuguudo akav Pegamomda'ai Jisasolluro mollu'bwoto tovino sokwollapiyokakwono

¹² “Aki guu pas akavi wagwolago Pegamomda'ai Jisasolluro mollu'bwoto tovuro ensel moduvomwallokwe toollu aro jokwollapiyono. Nuu molo'mo kwallu'mopto toul imgu amgu do'nyo do'nyokwe tousi mwora'dumdonyugono. Toro toonyu kuuguudo tov aro agudumono.

¹³ Gumoro ajumiyo mwalodumdo su tovino nuu kuudo nyau'mwakono. Ajumiyo su toru Satanyol a'mwo abolo tonyuro aguto kig wimo'nodowodorukono. Toro kuvi kuruv guvno'gwowi mino kuudo nubweyodumdo tovi guureji gudupola'dumdekugono. Aki a'mwo pwol mi numjunodowodo toolluno yovo tov Adipasolekono. A'mwo su tool a'mwo abolo tonyu mino kuu'maiyo toru'no amoruujajukekono. Toro toollu Satanyolluro mwalodowodo ajumiyo toruda'ai a'mwo pworo aromiyosopekono. Toro toollu romiyosodopure kuga kuruv guvno'gwowi mino buulo manugunyumopiyajudekugono.

¹⁴ Toro kuvi kuruv gumi yogalo pun aro mojurugologumollumo'monyugono. Aiyogasuro a'mwo pwolluno yovo tov Balamolekono. Toro tool a'mwo gabovo pwollu aro sodubwasajukekono. Isuraiyolda'ai a'mwo abolo ton ma'no ma'no yopi bwolorapino'moneyokwe guu neya dode'nomarogawono. Sodubwasajukekono. A'mwo gabovo su toolluno yovo tov Balakolekono. Toro tool Isuraiyolda'ai tonyu ki'nomallo'moneyokwe wosamujuko ton kuunano gooti toorai me'no kwiroudapingiko tonyu nonyo'mo tokwe'aro aki kwonyalo yo'mo tokwe'aro tovalluno sodubwasajukekono. Su toro yodubwasoduke tovida'ai Isuraiyolda'ai ton uumjunodupu kuunano gooti su toorai sulomoropiyajupogano. Agasuro kemida'ai a'mwo pworo Balamolbusuko pasudo su toorai aval'no yodupudorogano. Su toro yodopure toorai guu wonyapino to'no yodumdo tovino nuu yogalo amodagujurogolmono.

¹⁵ Aki su toro to'busuko kubalno kemida'ai a'mwo abolo pun a'mwo Nikoolasollu uumjunyokwe pworavuro yogalo tovi uumjunodupudogano. Su toro uumjunodopure tonyu guu nokwo wonyapino to'no yodumdekugono. Su toro yodumdo tovino yogalo amodagujurogolmono.

¹⁶ Toro te guu gumi pasudo su tovi buulo neya duuguunyumopiyono. Toro kuvi kuruv guu pasudo su tonyu buulo muugunyumopibi to'gwowi nuu gumiyomno yere nobumonyugono. Toro bo'mi moro mago tovida'ai lokabodowodo molo'mo kwallu'mopto to'busuko tokwe a'mwo su toorai molo nobuuwimonyugono.

¹⁷ A'mwo pwol kaduko nyabiyo'mo kwino'ji tov Gooti toolluro Kuullo tool moro mollu'bwoto go'no go'nodo tonyu kuuguudo wuudodowo'jure akavi neya wuu'nowo'ji kuudo youromaronekono. Kuuguudo su tov arokwono. A'mwo pwol Satanyolluro molo tovi kuuwolowo'ji tool bret mana pun kwimi tonyu nononekono. Bret mana su tov Gooti toolluro ago muunyu kai'muu yiulo tomuu wo'dowodokwono. Aki a'mwo kuuwolowo'ji su toollu nuu sulo wiya'jo tollugwo nuuwimonyugono. Sulo su tollugwoji yovo muuduko puruv puukwollo me'no sokwollosungikokwono. Yovo muuduko su tovino a'mwo yasuwa'no pwolnodo kwol kuruv kuudo ku'nono miyouromaronekono. Toro kuvi kuruv yiuno sulo su tollugwoji amaro'ji toolno yovo muuduko su tovino kuudo nokwo youromaronekono.”

Kuuguudo akav Taitairoda'ai Jisasolluro mollu'bwoto tovino sokwollapiyokakwono

¹⁸ “Aki guu pas akavi wagwolago Taitairoda'ai Jisasolluro mollu'bwoto tovuro ensel moduvomwallokwe toollu aro jokwollapiyono. Kuuguudo akav nuu Gooti toolluro Kwolaiyo toonyurokwono. Numoro sumdo toval widuko to'busuko guureji pwopiyodubulovakono. Aki moro suvlo toval aiyon sallukwa'jo ailogullumowopingiko tovida'ai yainyunyo to'busukovakono. Toro toonyu kuuguudo aro agudumono.

¹⁹ Nuu gumoro yiuwi'nokai pasudo mujumelabodumdo tonyuno kuudo me'no youroguma'dumdonyugono. Guu pasudo aro tonyu mujumelabodumdekugono. A'mwo abolo tonyuno kalo buuropino gujunodowodo tokwe'aro mino kuudo nubweyodumdo tokwe'aro a'mwo abolo punyu wiyo'mwojo'mo womdo yodumdo tokwe'aro aki tagunyo bagi'mo'mdowo'jure toga numi guureji to'no gudupolanuwo'dumdo tokwe'aro tonyuno nuu kuudo me'no youroguma'dumdekugono. Aki pasudo su tonyu tono tono mujumelabodum aga kuga kuruv muunyu toru'aro guureji mujumovla'mdumdo tovino kuudo youroguma'dumdonyugono.

²⁰ Toro kuvi kuruv gumi yogalo aro modagujurugolmo'monyugono. Abolo puruv moro a'mwo abolo womdokwe tobuurai ma'no ma'nodo tomuuno mogaibworomokavla'mdowodokwono. Toro mogaibworomokavla'mdowo'jure tovi guu wonyapino to'no yodumdekugono. Abolo su tov aguto kwin Jesebelo'busukokwono. Toro tov aro dodowodokwono. “Oo nuu proofet to'migono.” Dodowodokwono. Toro tov moro womdokwe a'mwo abolo tobuurai kuunano ibwaso tokwe youkuu'nuudodowodokwono. Toro tovuro youkuu'nuudodowo'jure tovi moro womdokwe pubuuro uumjunodupu kwonyalo yodupudogano. Aki wosamujuko pun kuunano gooti toorai ilomoropiyo'moneyokwe me'no kwiroudapingiko tonyu nodupudogano.

²¹ Abolo su tov gami ma'no ma'no pasudo yodowodo su toorai buulo uugunyumopiyo'moneyokwe tovino nuu sogwollo wingelabodumdonyugono. Toro kuvi kuruv abolo su tov gami ma'no ma'no pasudo su toorai buulo uugunyumopiyo'mo mwinodowodokwono.

²² Toro tovino tov moro igolodo'mure tovida'ai abolo su tov nobollo bwotonyo ton nomaronokwono. Aki abolo su tokwe yiuwi'nokai kwonyalo supi kworai kuruv danyu'nyuwuulo bwotonyo ton kuubwemi tovida'ai nyubwosunpinorogano. Toro kuvi kuruv abolo su tokwe kwonyalo yodupudo a'mwo pworo kemi ma'no ma'no pasudo tovi buulo kuugunyumopipi tooraino'gwowi nuu danyu'nyuwuulo tov ku'nono muubwemonyugono.

²³ Aki abolo su tovuro kwoloraiyo wimo'nodupudo tonyu nuu noromiyosumonyugono. Su toro aromiyosumi toga moro yiuwi'nokai mollu'bwoto go'no go'nodo ton mino aro kuudo yanuupinogano. Oo Krais tool yiuwi'nokai a'mwo abolo pwolno puru'monodo tonolluro kuudo togai'aro poowokalago togai'aro tonyu youranekwonodowodekono. Aki toro tool yiuwi'nokai pwolno puru'monodo tonolluro pasudo yodowado tonyuno mubiyo tov nonekubweyonoldeyo. Mino su toro kuudo yanuupinogano.

²⁴ Toro kuvi kuruv kevu wagwolago Taitairoda'ai pugaikul abolo su tovuro kuunano ibwasodowodo tovi muumjunodupudo togaikulluno'gwowi aro agudumono. Kevu abolo su tovi muumjunodupudo togaikul yogalo kaiya'nodo puvino kuudo miyouroma'dupudogaikikono. Yogalo kaiya'nodo su tovino yovo tov arokwono. Kuuraibuuso tomuuda'ai Satanyolluro yiulo yogalovo, dodupudokwono. Toro te nuu kevu yogalo kaiya'nodo su tovi muumjunodupudo togaikulluno tov jul'nyo pugai'aro maikubwemwalmonyugono.

²⁵ Toro kuvi kuruv kemi yiuno aro to'no daikullumo'monyugono. Nuu yere mabai'mo'mdo'mure toga kevu mino kuudo nubweyodupudo su tovi guureji to'no neya dogudupolarogaulo.

²⁶ Toro te a'mwo pwol Satanyolluro molo tovi kuuwolowo'ji su tool aiyowo'mo tov yere mabai'mo'mdowo'jure toga moro yogalo tovi yiunokuudo neya uumjunyuno uumjunyuno imwalonekono. Su toro so'ji toollu lukomgu nuu aikomgu me'no abai'mo'mi toga kantri go'no go'nodo tonyu mido mollomwallo'moneyokwe womdo tov nuuwimekono.

²⁷ Su toro kwimi tool kantri tonyu mido mollomwalo guureji to'no momjumovlawonekono. Aro to'busukokwono. A'mwo pwol aiyon yodeko tokwe kwa'bootoollu puuwasi kirowiyapiyodowodo to'busuko kubalno mido mollomwalo guurejuno momjumovlawonekono. Womdo su tovi yo'moneyokwe jurogudo tov mi Nyunumiyago tool me'no anyaboka to'busuko kubalno a'mwo Satanyolluro molo tovi kuuwolowo'ji su to kweke'aro aval'no nomaronekono.

²⁸ Aki a'mwo Satanyolluro molo tovi kuuwolowo'ji su toollu nuu lomwo iru'mago togasuro sulludo kabwo tollugwo nuuwimonyugono.

²⁹ A'mwo pwol kaduko nyabiyo'mo kwino'ji tov Gooti toolluro Kuullo tool moro mollu'bwoto go'no go'nodo tonyu kuuguudo wuudodowo'jure akavi neya wuu'nowo'ji kuudo youromarono.”