2 Timooti 4 - Gooti Toolluro Yogalokwono

Timootiyol Krais toolluro yogalo tokwe neya yodubwosumovlaiyo'moneyokwe Poolol adumul'mwojoka tovinokwono

¹ Krais Jisasol kwako akavi aikomgu nobiyalo'nonekono. Toro abiyalo'no'ji toga aguto kig su toolluro mido mollomwalo tov nobwolomolludapiyonekono. Su toro toga a'mwo abolo aiyo amwalpi togai'aro me'no abolpi togai'aro yiuwi'nokai su tonyuro pasudo toorai nojainyubworonekono. Toro tovino tov nuu Gooti tooke'aro Krais Jisaseke'aro tooralluro sumdo tovi gumi kuu'maiyo toru'no duudapi yogalo aro gudumo'mokwono.

² Guu Gooti toolluro yogalo tokwe modomollo'moneyokwe neya jovraimonyogawono. A'mwo abolo ton Gooti toolluro yogalo su tovi kaduko wiyo'mo kwinpiyoga'deyo oo kaduko wiyo'mo mwinpiyoga'deyo kuga kuruv yiuwi'nokai toga guu Gooti toolluro yogalo tokwe modomollo'moneyokwe neya jovraimonyogawono. Aki toro tooku kavo to'no mwalo'bi Gooti toolluro yogalo su tokwe neya jodubwasogawono. Toro yodubwasodo'bure tovi'aro a'mwo abolo tobuurai mollado'movo'bi aki yogalo mojurugolo'bi aki jurogudo duuwimwojo'bi tono tono imwalbinekugono. Aki toro tobuurai Krais toolluro yogalo tokwe yodubwasodumdo tovi miyuu'dapimwalbinekugono. Toro kweku kuruv yiuwi'nokai toga neya jodubwosumovlavogawono.

³ Su tov aro tovinokwono. Lukomgu Gooti toolluro kuuguudo idopto'nodo tovino yodubwasodopure toga a'mwo abolo ton kaduko mwiyo'moneyokwe tov nobai'mowonokwono. Aki su toro toga a'mwo abolo ton yogalo muuduko toorai yiuwi'nokai toga wuu'nyo'mo winmwalpinogano. Su tov igwoga to'busuko uumodumwalonogano. Aki toro ton kevnokwenyuro ilaiyo igollunyo'mo tovi uumjunpinogano. Toro ton ilaiyo igollunyo'mo kuuguudo tovi wuu'nyo'moneyokwe a'mwo ibwasokwe bwotonyago toorai molludapipinogano.

⁴ Aki su toro toga a'mwo abolo ton kuuguudo nebal'nodo tovi wuu'nyo'mo mwinopi yiuno buulo to'no uugunyumopimwalpinogano. Aki toro ton kemi jupweyo kuuguudo toorai wuu'nyo'moneyokwe kinamjumwalpinogano.

⁵ Toro kuvi kuruv guvno'gwowi yiuwi'nokai toga guvnokwe tooku neya domollomwalnogawono. Aki gumi kaiyako yagujugolodopure kuga kuruv guu womdo tovi nyuu'dapimwalbiyo. Toro kweku kuruv Gooti toolluro kuuguudo sugudo tokwe modomollo'moneyokwe womdo su tovi yiuwi'nokai toga neya domomjumovlavogawono. Aki toro tooku yiuwi'nokai Gooti toolluro womdo me'no agubweyungiko su tonyu neya yopibinekugono.

⁶ Kuudo neya jaurono. Aga mi romiyanubweyopi moro mujako tov kimowoso'mo wobo togakono. Moro mujako su tov Gooti toollu wiroudapiyo'moneyokwe wain wonyo kimowosodupudo to'busukokwono. Aki nuu kwako akavi wuugollu'meyo'mo tov aga me'no abai'mo'mwallukokwono.

⁷ Moro mujomwekelabodumdo tov aga aiyowo'mo do'gwapiyo tomuu abai'mo'mwakono. Toro toonyu kuuguudo sugudo tovino kuudo uubweyodumdo su tovi guureji to'no gudupola'dumdonyugono. Aro to'busukokwono. Nuu molo sugudo tovi me'no yopiyodumdo toonyubusukonyugono. Aki nuu resis tovi me'no yopiyodumdo toonyubusukonyugono.

⁸ Toro te aga resis su tovi me'no uuwolo'mdupudo toorai mubiyo tov Aguto tool me'no mollovrowosodowodekono. Toro mollovrowosodowodo tovida'ai numiyo'moneyokwe tov mino sogwollo ainyunadopiyo. Numiyo'moneyokwe mubiyo su tov arokwono. A'mwo aguto kig tooravuro miguto yesodupudo tokwono. Miguto su tov yiuwi'nokai a'mwo abolo Gooti toolluro sumdo tovi sugudo wimo'nodupudo tonyuno to'no mapinokwono. Aguto tool a'mwo abolo tonyu pi'mwono jainyubwo'dowodo su toolluro iruko kwolabwo'ji toga miguto su tov kuvinono nonyabwonekono. Aki yiuno nuu judo toonyuno to'no nyabwonolmaiyo. Toro kwol kuruv yiuwi'nokai a'mwo abolo Aguto Jisasolluro aikomgu wolabwono tovino sogwollo kinodupudo kubuurai kuruv miguto su tov nuuwiyonekono.

Poolol Timootiyollu yogalo aiyowo'mo kuudoka tovinokwono

⁹ Guu Timootiyeku miyomno bubino'moneyokwe tovino anyunadopiyo. Toro te guu yere biyo'mo su tovino womdo guureji neya jogawono.

¹⁰ Duu'nono. A'mwo Demasolo dodupudo tool kwako akavida'ai noonyumwonyu tonyuno kalo buuropino winodowodo tovino tov numi anyugollu'movokaikono. Toro nugollu'mo'mno sumaiyokwe wagwolago Tesaloonaika tomuuno me'no avlavokaikono. Aki Kresensol wagwolago Galesiya tomuuno me'no avlavoka tovino tov nuuge mamwallo. Aki Taitosol kwako Dalmesiya tomuuno me'no avlavoka tovino tov nuuge mamwallo.

¹¹ Yiuno Luukolno'gwowi nuuge amwallo. Toro te guu abubi toga Makolluda'ai momworaro'bi guuge neya dobilo. Aro tovinokwono. Makol nuu Gooti toolluro womdo tovi yodo'mure toonyu nonyo'mwojumwalonekono.

¹² Nuu Tikikosollu wagwolago Efesos tomuuno me'no amodapimwa'jekono.

¹³ Guu abubi toga moro nobwaiyo tokwe neya donumokabono. Nobwaiyo su tov wagwolago Troowasda'ai Karposolluro ago tovi kwoso su tov neya donumokabono. Aki moro buukiyo togai'aro donumokabono. Buukiyo su ton sipsip kulako tovida'ai sakwollungikogano. Toro tonyu mokabiyo'moneyokwe kuudo nyallulo'gwonbiyo.

¹⁴ A'mwo aiyon sallukwa'jo tokwe womdo yodowodo pwolluno yovo tov Aleksaderolekono. A'mwo su tool mi kaiyako bwotonyo sanyugolokaikono. Aguto tool a'mwo su toollu gamoro pasudo tovino kirumwallo'moneyokwe mubiyo tov nuuwiyonekono.

¹⁵ Aki a'mwo su tool nemoro kuuguudo moruudodowado tovi molo guureji wiyodowodekono. Toro tovino tov guvnokwe tooku a'mwo su toolluno wako neya dou'nogawono.

¹⁶ Sumdomgu nuu kooti yogalo tovi kworado jumwonyo'moneyokwe da'mdore toga a'mwo pwolnodo kwol kuruv numi sobanyo mamollonyudavoporogano. Toro kuvi kuruv yiuwi'nokai tooro numi anyugollu'movoporogano. A'mwo su tooraino nuu aro anyunadopiyo. Gooti tool a'mwo su tooravuro pasudo tovino kirumwallo'moneyokwe mubiyo tov nuubweyo'jo. Su toro anyunadopiyo.

¹⁷ Toro kuvi kuruv Aguto toolno'gwowi numi sobanyo mollonyudavo'no jurogudo adanyumwojokaikono. Toro tovino tov nuu Gooti toolluro kuuguudo sugudo tokwe moruujuno sumoneyokwe yiuwi'nokai Juu tooravuro miyawosunodupudo ton me'no kuu'nopiyopokwono. Aki su toro toga a'mwo pworo me'no aromiyanubweyopujuko kuvi kuruv Aguto tool mi abomollurolovonumokalokwokaikono. Su tov aro to'busukokwono. Nuu laiyon pwolluro mago tovi me'no mwalodore toonyu Aguto tool agalouro'mwojonumarokanyugono.

¹⁸ Toro te yiuwi'nokai judo'no judo'nodo tomgu'aro kaiyako yanyugolodupudo kuvi kuruv Aguto toolno'gwowi bomollurolovonumokalokwowo'ji gamoro ago muunyu kai'muuno nonumokailawonekono. Toro anumokailawo'ji toga aguto kig su tool gamoro mido mollomwalodowodo toru ilaiyo to'no nomonumwallonekono. Nevu Aguto su toolluno yiuwi'nokai toga yovo aguto to'no wiyowa'ji yiunokuudo ilomoropimwolowanekono. Nebal'nodokwono.

¹⁹ Nuu Prisilakwe Akwila'weke teyaullu, “Ilaiyokwono,” aduuwopiyamono. Aki a'mwo abolo Oonesifoorosolluro ago tovi mwalodupudo kubuurai kuruv, “Ilaiyokwono,” aduuwopiyamono.

²⁰ Erastosol wagwolago Koorin toru kuuno amwallo. Aki Troofimasol nobollokwe toollu wagwolago Mailetos toru kuuno mwaloduke toga kuugollu'movekono.

²¹ Toro te lukuu'wuulo tov yere mimo'nodowo'jure toga guu numiyomno biyo'moneyokwe tovino womdo guureji neya jogawono. Yiubuloseke'aro Puudenseke'aro Lainoseke'aro Klaudiyakwe'aro aki yiuwi'nokai gumi jugwai'yago jo'mwo tonbusuko gujumo'nodupudo tobuurogai'aro ton gumi, “Ilaiyokwono,” adogwopiyamavo.

²² Oo Aguto tool gumoro kuullo tekwoji nokwo mollogumwalmwalonekono. Gooti toolluro yasuwa'wino sugumaluko tov kemi nekwo'movla'mwalonokwono.