2 Timooti 3 - Gooti Toolluro Yogalokwono

Aiyowo'mo toga kirovanyuvanyu pasudo bwotonyo tooro mujeroungovlapino tovinokwono

¹ Guu aro kuudo neya jouromarogawono. Aiyowo'mo iruko tollovo abai'mopi toga tabunyuwuulo bwotonyago ton nyumo'nugovla'mwalpinogano.

² Aro tovinokwono. Su toro toga a'mwo abolo ton kaiya'no pasudo go'no go'nodo toorogai mujeroungovlapinogano. Toro ton yiuno kevnokwenyuno to'no kalo buuropino wingovla'mwalpinogano. Aki nuugwiyo bwotonyo ki'nomallo'moneyokwe guureji winmwalpinogano. Aki kevnokwenyuno ilomodomoropinyo'moneyokwe yogalo dumwalpinogano. Aki toro ton kevnokwenyuno aro ilomoropinapinogano. “Oo nevu tovosonol kuuwolo'mwakuuwono.” Toro dopi aki Gooti toollu bwolomorumwogapiyo'moneyokwe kaiya'no yogalo dumovla'mwalpinogano. Aki kemi kuunum kwolabolo tonyu kisuvolo wimwalpinogano. Aki noonyumwonyu pun amapi toga, “Nenyoo,” muudumwalpinogano. Aki Gooti gavnokwe toolluro pasudo idopto'nodo tonyu buulo uugunyumopimwalpinogano.

³ Aki kemi avalo tobuurai kalo mwinpinogano. Aki kevnokwenyuro surodo'mo tov piyarupto mamokwolamwalpinogano. Aki pubuuraino buulo yogalo dumwalpinogano. Aki kevnokwenyuro kulako tovi pi'mwono mamollomwalnupinogano. Aki magu'nyo pasudo toorogai yomjomwekovla'mwalpinogano. Aki sugupasudo tonyuno biyolo uu'mwojupinogano.

⁴ Aki kemi ibwoto'nyo tonyu ikomago pworavuro ato tovi morubwepinogano. Aki duudapi yogalo tonyu kisuvolo to'no mujumovla'mwalpinogano. Aki kevnokwenyuno ilomoropunyo'mo kuudo tov muunyu toru'aro bwotonyo ilomoropinapinogano. Aki Gooti toolluno kalo buuropino mwingovlapinogano. Toro kun kuruv yiuno kevnokwenyuro ilaiyo igollunyo'moneyokwe pasudo tooraino'gwowi kalo buuropino wingovla'mwalpinogano.

⁵ Aki a'mwo abolo su ton kevnokwe tonyuno aro youkuu'nuuduuwallunupinogano. “Oo nevu Gooti toolluro a'mwo abolo wimo'nodowadonogano.” Su toro youkuu'nuuduuwallunopi kuvi kuruv Gooti toolluro jurogudo tovino'gwowi buulo uugunyumopipinogano. Toro te guu a'mwo abolo su toro tonyu manyu tomuu'aro neya jurukuruwolovogawono.

⁶ Neya duu'nono. A'mwo su tooraida'ai pworo abolo wollainyo tobuurai galomworallo'moneyokwe kemoro ago tonyu dukuu'nugoulodapudorogano. Abolo su tobuuro kevnokwenyuro ma'no ma'no pasudo tooro jul'nyo to'busuko wiroubweyodowodogano. Aki kemi kulako tonyuda'ai kwanyu kinuwiyodupudo pasudo judo'no judo'nodo tooro abolo su tobuurai kaiya'nodo tomgu'aro mollubworomokavla'mdupudorogano.

⁷ Yiuwi'nokai toga abolo su tobuuro a'mwo pworavuro noonyumwonyu muuduko punyuno yodubwasodopure tovi kaduko wiyodupudogano. Toro kun kuruv Gooti toolluro nebaikuuguudo tovuro kavlo tovino'gwowi kuudo ku'nono miyouromo'movla'dupudogano.

⁸ Toro te a'mwo kuunano ibwasokwe tooraino gudumo'mokwono. A'mwo kuunano ibwasokwe su tooro aiyoga Janeseke Jabreseke tooral Moosesollu kisuvolo kwiyajulo to'busuko kubalno aval'no ibwasodupudorogano. Toro tooro nebaikuuguudo tovi kisuvolo wiyodupudorogano. Aki a'mwo su tooravuro kuudo tov kaiya'no me'no i'nopiyodowodokwono. Aki toro tooro Gooti toolluno kuudo kuunodo muubweyodupudorogano.

⁹ Toro tooro subwasupi kuvi kuruv kemoro yogalo to'gwowi ku'nono mabomje'nugoulawonokwono. Su tov aro tovinokwono. Iruko pullugwoji yiuwi'nokai a'mwo abolo ton a'mwo su tooraino aro nyuworovomapinogano. Oo a'mwo ibwasokwe su tooro kuudomaiyorodeyo. Nyuworovomapinogano. Su to'busuko kubalno aiyoga Janeseke Jabreseke toorallu aval'no me'no suworovomallajuporakono.

Poolol Timootiyollu jurogudo aduuwimwojoka tovinokwono

¹⁰ Toro kuvi kuruv guu tookuno'gwowi numi pi'mwono numjunodumdekugono. Moro gumi yodogubwasodumdo tokwe'aro moro yomjomwekovla'mdumdo tokwe'aro moro yomjomwekovla'mdumdo tovuro kavlo tokwe'aro moro Krais toolluno kuudo uubweyodumdo tokwe'aro moro kalo mamwonyo'moneyokwe pasudo tokwe'aro moro kalo buuropino mollodumdo tokwe'aro aki jul'nyo banyumo'mdopure kuga kuruv womdo tovi mimwogapiyodumdo tokwe'aro su tonyuno guu kuudo nyau'mwakuno.

¹¹ Aki mi kaiyako yanyugolodupudo togai'aro danyu'nyuwuulo banyumo'nodupudo togai'aro kunyuno kuruv guu kuudo me'no yanuu'dumdekugono. Jul'nyo su ton nuu wagwolago Antiyook toruke'aro Aikooniyam toruke'aro Listra toruke'aro su tonyu mwalodore toga abanyu'meyajupogano. Aki numi kaiyako sanyugollajupo su toga nuu kavo mwalodum mido mamallajonyugono. Toro kuvi kuruv Aguto toolno'gwowi yiuwi'nokai kaiyako yanyugolodopure su tonyuda'ai amollurolovonumokalokwiyajukekono.

¹² Nebalokwonoo. A'mwo abolo Krais Jisasollu uuguro'mwonyodupudo tobuuro Gooti toolluro pasudo tonyu yomjomwekovlaiyo'mo winyokweyogano. Yiuwi'nokai su toro yomjomwekovla'mdopure tobuurai a'mwo pworo kaiyako to'no nyugolmwalpinorogano.

¹³ Toro kuvi kuruv a'mwo kirovanyuvanyu kiroungovla'mdupudo toorogai'aro kuunano yogalo youkuu'nuudodupudo toorogai'aro tooravuro ma'no ma'no pasudo tooro kuuno mujumo'nugelabino mujumo'nugelabino yopi yiuno ma'no ma'no kuumwiyo to'no imo'nugelamwalpinorogano. Aki kevnokwe su tooro imgu amgu kuunano yogalo to'no youkuu'najunmwalpinorogano.

¹⁴ Toro kuvi kuruv guvno'gwowi nebal'no yogalo tovi wuu'nyuno sumoneyokwe kuudo guureji me'no kuubweyodekugono. Toro kuubweyodo tovi neya dogudupolarogawono. Su tov aro tovinokwono. Nevu gumi yodogubwasodowore toonolluno guu kuudo me'no yanekuu'dumdo tovino tov yogalo su tovi neya dogudupolarogawono.

¹⁵ Guu kwolaiyo amwallajudo togada'ai Gooti gavnokweyolluro buukiyo tovida'ai yogalo anekullaboka tonyuno yodogubwosumelabodopure tovi kuudo me'no souromallajudekugono. Yogalo su tov pi'mwo kuudo aro gujabodowodokwono. Guu Krais Jisasollu kuudo kuubwebi tov Gooti tool gumi ma'no ma'nodo tovuro kirumwallo tovida'ai nobomollurolovogumokalokwonekugono. Su toro gujabodowodokwono.

¹⁶ Gooti toolluro yiuwi'nokai yogalo sakwollungiko su ton Gooti gavnokwe toolluro mago tovida'ai alokabingikogano. Toro te yiuwi'nokai yogalo su ton a'mwo abolo tonyu nokwo wiyo'mwojo'mogano. Aki yogalo su ton a'mwo abolo punyu yodubwaso'mogano. Aki yogalo su togai mojurugollo'mogano. Aki yogalo su togai mollado'meyo'mogano. Aki yogalo su ton pasudo idopto'nodo tonyu jogauleyokwe tovino jurogudo duuwimwojo'mogano.

¹⁷ Gooti toolluro yogalo su togai gamoro a'mwo abolo ton neya yovraimwonyogapuro. Toro te Gooti toolluro a'mwo abolo ton me'no sovraimwonyupi toga yiuwi'nokai womdo sugudo tonyu nokwo mujumovla'mwalpinogano.