2 Timooti 2 - Gooti Toolluro Yogalokwono

Krais Jisasolluro a'mwo mollurogudo sugudo pwolbusuko neya imo'nyo'mo tovinokwono

¹ Moro kwolaiyo Timootiyoloo, Krais Jisasolluro yasuwa'wino sugumaluko gubweyodowodo tov gumi jurogudo nokwo dagujumwojumwalonokwono. Toro dagujumwojodowo'jure tovida'ai guu jurogudo neya jumo'nugovlavogawono.

² Aki toro tooku moro kuuguudo tov a'mwo abolo bwotonyago tonyuro sumdo toru yodubwasodore tovi me'no kuu'nyajudekugono. Toro tooku a'mwo kuuguudo tovi guureji uumjunodupudo toorai guu neya jodubwasogawono. Toro sodubwasubi su tonyuda'ai pworo a'mwo gabovo kworai kuruv kuuguudo su tokwe nokwo yodubwasumwalpinorogano.

³ Yovekurajo puruv arokwono. A'mwo mollurogudo pwol noonyumwonyu jul'nyo wimo'nodopure toorai ilaiyo to'no mollukweyokwekono. Su toro to'busuko kubalno guvu a'mwo mollurogudo sugudo pwolbusuko neya jumo'nogawono. Toro tooku Krais Jisasolluro a'mwo abolo tobuuravuro jul'nyo bwimo'nodopure tonyu neya domollukwovogawono.

⁴ A'mwo mollurogudo pwol noonyumwonyu kwako akavida'ai womdo pworo ki'noma'dopure su toorai mavorugwo'mo'nallokwekono. Su tov aro tovinokwono. A'mwo mollurogudo su tool gami a'mwo mido mollomwalokwe toollu ilaiyo igollo'mo kuudo to'no yaullokwekono. Su toro tovinokwono.

⁵ Aki puruv a'mwo pwol resis tovi yonekono. Toro kwol kuruv resis tovuro loowo tonyu pi'mwono muumjunowo'ji to'gwowi kuuwolowo'ji kuruv gami mubiyo tov mamaronekono.

⁶ Aki puruv a'mwo pwol wosamuju'womdo guureji yaujokwekono. Toro tool wosamuju'womdo su ton suuwiyo supi toga gavnokwe tool muudu'no mulanyokwekono. Su toro to'busuko kubalno guu kweku kuruv womdo guureji subi tov gumi muunyu kai'muuda'ai mubiyo tov kuvinono noma'binekugono.

⁷ Toro te guu moro kuuguudo gudodumdo su tonyuno kuudo neya jou'movlavogawono. Neya duu'nono. Guu yiuwi'nokai su tonyuno kavlo tovi kuudo youroma'mwalbino'moneyokwe tov Aguto tool nyodogubwasumwalonekono.

⁸ Guu Jisas Kraisolluno yiuwi'nokai toga kuudo nyallulo'gwonmwalbiyo. Jisas Kraisol bolo'no aiyo aiko te me'no adukavokaikono. Aki toro tool Devitolluro iko tovasuda'ai abokaikono. Yiuno Jisas Krais su toolluro kuuguudo sugudo tokwe to'no moruudomollodumdonyugono.

⁹ Nuu kuuguudo sugudo su tovi modomollodumdo tovino tov a'mwo ma'no ma'nodokwe pwonyubusuko kaiyako yanyugolodupu senyo wuulo togai ameranubwemwakoponyugono. Toro kuvi kuruv Gooti toolluro yogalo su tovino'gwowi senyo wuulo tokwe ku'nono mamogalerosupinokwono.

¹⁰ Su toro tovino a'mwo pworavuro yiuwi'nokai buro'nyo buro'nyo kaiyako yanyugolodopure kuruv nuvu kavo to'no mwalodum mido mamallokwenyugono. Moro su toro yodumdo tov a'mwo abolo Gooti toolluro me'no ajesungiko tobuuraiyo'mokwono. A'mwo abolo su ton Krais Jisasollu kuuguro'mwonyupi tovi'aro kemi ma'no ma'nodo tovuro kirumwallo tovida'ai nokwo abirolo'nugolokuupuro. Aki a'mwo abolo su ton Gooti tooke gamoro bako bwotonyo anakuuto tomuu aiyo yiunokuudo mujomwekovlaiyo'moneyokwe kuruv nokwo amapuro.

¹¹ Kuuguudo ikudumo'mo akav yiuno nebal'nodokwono. Kuuguudo tov arokwono. Nevu Krais tooke abollunguuwo tonolbusuko sumo'na'ji tov aiyo yiunokuudo mwallo'mo kuruv gavuge nomjomwekovla'mwalanonogano.

¹² Aki a'mwo pworo nemi kaiyako sanekullugolpi toga kavo mwalowa'ji mido mamara'ji tov lukomgu nevu Krais tooke a'mwo aguto kig aval'no imo'nowa'ji a'mwo abolo kwako akavi mwalodupudo tonyu mido nomollomwalmwalanonogano. Toro kuvi kuruv nevu Krais toollu buulo kuuguunyumopiya'ji to'gwowi Krais tool nemi buulo nonekugunyumopiyonekono.

¹³ Aki puga nevnokwenolluro yogalo ada'ji tovi kuvinono muumjunyokwenogano. Nevu muumjuna'ji kuruv Krais toolno'gwowi gami yogalo tovi kuvinono uumjunyokwekono. Su tov aro tovinokwono. Krais tool gavnokweyolluro yogalo me'no ado'ji tovi kisuvolo miyokwekono. Toro kwol kuruv kuvinono uumjunyokwekono.

Timootiyol Gooti toolluro womnyago neya wimo'numwalono tovinokwono

¹⁴ Guu Jisasolluro a'mwo abolo tobuuro kuuguudo akavino kuudo po'dogalo yau'mwalpino'moneyokwe duudapi yogalo neya duuwiyogawono. Aki guu Gooti toolluro sumdo tovi aro tovino kuu'maiyo toru'no neya dodumul'mwojogawono. A'mwo abolo su tobuuro yogalo judo'no judo'no pwekwojo ku'nono mwiyo'mwojokwe su tekwojaino nyoullajunmwalpiyo. Yogalo su tekwojaino soullajunpi to'gwowi a'mwo abolo kuu'nupi tonyu jurogudo ku'nono maduuwimwojonokwono. Toro kuvi kuruv a'mwo abolo kuu'nupi su tonyu yiuno kaiyako to'no jugolonokwono.

¹⁵ Aki Gooti tool gumoro womdo tovino ilaiyo neya amollogumaroneyokwe guu gamoro womnyago neya duuwimo'nogawono. Gooti toolluro womdo tovi pi'mwono subi tov Gooti toolluro yogalo nebal'nodo tovuro kavlo kunyu kuruv po'dogalo nokwo yainyubwo'mwalbinekugono. Yogalo ajainyubwo'bi su tokwe guu pi'mwono nokwo yodubwasumwalbinekugono. Toro subi tooku Gooti toolluro sumdo tovi wogulo mimwalbinekugono.

¹⁶ Aki guu kwako akavida'ai yasuwa'yogalo toorai manyu tomuu'aro neya jurukuruwolovogawono. A'mwo abolo pun yasuwa'yogalo su toorai kaduko kwipi tov Gooti toolluno'gwowi kaduko mwimwalpinogano. Aki yasuwa'yogalo su tooro a'mwo abolo tonyu Gooti toollu buulo uugunyumopiyo'moneyokwe tov manyu tomuu guureji me'nomokavla'mwalpinorogano.

¹⁷ A'mwo abolo tonyuro yasuwa'yogalo su tooro aro to'busukorogano. Nogrojo sokwovanyo tov aiyowomno yo'mowopiyodowodo to'busuko kubalno yasuwa'yogalo su tooro aiyowomno yo'mowopiyodupudorogano. A'mwo abolo yasuwa'yogalo bomjodumoulodapudo su tonyuda'ai a'mwo pworalluno yovo tov Himeneyoseke Filetoseke toorakono.

¹⁸ Yiuwi'nokai a'mwo su tooral nebaikuuguudo tovuro puuto tovi me'no kuugollu'movolorakono. A'mwo su tooral kuunano yogalo aro yodubwosomollodubulorakono. “A'mwo abolo abollungopo ton aiyo aiko te dukaiyo'moneyokwe tov me'no abai'movokakwono.” Kuunano yogalo su toro yodubwosomollodubulo tov Jisasolluro a'mwo abolo pubuuravuro kuudo uubweyodupudo tovi kaiyako mollugolamo'mdubulorakono.

¹⁹ Toro kuvi kuruv Gooti tool gamoro mollu'bwoto tovi mojudapiyo'moneyokwe nebaikuuguudo to'gwowi sulo bwotonyo toolbusuko jurogudo me'no kuudapingikokwono. Toro kuudapingiko su tovi aro sakwollungikokwono. “Aguto tool gamoro a'mwo abolo tonyuno kuudo me'no youroma'dowodekono.” Aki puukwollo sakwollungiko puruv arokwono. “Yiuwi'nokai a'mwo abolo ton, Oo nevu Aguto toolluronogano, dodupudo su tobuuro kaiya'no pasudo toorai buulo neya uugunyumopiyogapuro.” Sakwollungikokwono.

²⁰ Nuu Jisasolluro mollu'bwoto tovuro a'mwo abolo tobuuraino yovekurajo akav ikudumo'mokwono. Ago bwotonyo puvi anakuuto tomuu disodeyo puuwoso kuuloda'mdupudogano. Dis su towoso goolodeyo oo silvadeyo tokwe sokwollosungopogano. Dis su towoso womdo aguto tonyu yo'moneyokweyogano. Toro kuvi kuruv dis puuwosono'gwowi ikodeyo oo kunaikwakodeyo tokwe sokwollosungopogano. Dis su towoso womdo kula'nyo tonyu yo'moneyokweyogano.

²¹ Dis su to'busuko kubalno a'mwo pwol kaiyako mollugolamo'nyokwe pasudo toorai amollol'movodukwopino'ji tov womdo aguto tovi nokwo yonekono. Aki toro tool ago su tovi mido mollomwalokwe toolluro a'mwo kuunodo nuuwimo'nonekono. Toro tool a'mwo mido mollomwalokwe toolluro yiuwi'nokai womdo sugudo tonyu mujumovlaiyo'moneyokwe nokwo yovraimwonyumwalonekono.

²² Guvnokwe tooku muugunyekugono. Toro tooku muugunyo tooravuro pasudo pworo kulako tokwe ilaiyo igollunyo'moneyokwe uumjunodupudo tooraida'ai guu manyu tomuuno lukado neya dovlavogawono. Toro kuvi kuruv guu pasudo idopto'nodo tokwe'aro Gooti toolluno kuudo uubweyo'mo tokwe'aro kalo buuropino mollo'mo tokwe'aro sumwoluko noullo wosunyo'mo tokwe'aro pasudo su tonyuno'gwowi neya denamjogawono. Aki a'mwo kemi poowokalago kuunodo tokwe Aguto toollu subusu'nyogalo wuudodupudo su toorogai aval'no neya denamjogaulo.

²³ Toro te nuu aki aiko te aro gudumo'mokwono. Guu a'mwo junorukuudokwe pworavuro yogalo go'no go'nodo tooraino yogalo noullajunmwalpiyo. A'mwo su tooro kemi yogalo su tooraino kavlo ton kuudomaiyorogano. Guu aro tovino kuudo me'no youroma'dumdekugono. Guu a'mwo su toorogai yogalo soullajunpi tov a'mwo su tooro yiuno molo'mo to'no kuudo yaupinorogano.

²⁴ Toro te kuudo neya jaurono. Aguto toolluro a'mwo womdokwe pwol molo nyumwalo'jo. Toro kwol kuruv yiuwi'nokai a'mwo abolo tonyu ilaiyo to'no neya igolmovla'mwalonekono. Aki toro tool nebal'no yogalo tokwe nokwo yodubwasonekono. Aki toro tool a'mwo pworavuro amolloluwosupi kuga kuruv sumwoluko su'mno yere mimo'nonekono.

²⁵ Toro te guu nebal'no yogalo yodubwasodo'bure tovi a'mwo pworo kisuvolo agujupi tov guu a'mwo su toorai yovo'dogallo'moneyokwe yogalo kavo togai duubemwojo'bi domojurugologawono. Su tov aro tovino'mokwono. A'mwo su tooro Gooti toollomno kuudo youragunyumo'nupureyokwe tovino Gooti tool nokwo wiyo'mwojonorodukono. Kuvinono kwiyo'mwojo'ji to'gwowi nebal'no yogalo tovuro kavlo tovino kuudo nokwo youromapinorogano.

²⁶ Aki kevnokwe tooro nebal'no yogalo su tovino aki aiko te kuudo po'dogalo sovo'dogallaupi tov Satanyolluro wuulo kuurovabwo'dowo'jure tovida'ai nokwo birolo'nugolokuupinorogano. Neya duu'nyulo. Satanyol aro kuudo yau'dowodekono. Oo yiuwi'nokai a'mwo abolo ton nuvnokwenyuro ilaiyo nyunodowo'jure tovi neya uumjunpuro. Satanyol su toro kuudo yaurowo'ji a'mwo abolo tonyu movagu'mwojo'moneyokwe wuulo kuurovabwo'dowodekono. Toro te a'mwo abolo ton Satanyolluro wuulo kuuro'mdowo'jure su tovida'ai neya abirolo'nugolokuupuro.