2 Tesaloonaika 3 - Gooti Toolluro Yogalokwono

Poolol, “Nemino subusu'nyogalo duudogaulo,” kuudoka tovinokwono

¹ Nemi avalobuuravoo, aiyowo'mo yogalo tov arokwono. Kevu nemino subusu'nyogalo aro duudoganogaulo. Nevu Aguto toolluro yogalo modomollodowado tov yere neya abomje'nugoulawono. Aki kevu kuuguudo sugudo tovi ilaiyo amollomaropo to'busuko kubalno a'mwo abolo pun kuuguudo sugudo bomje'nugoulodowo'jure su tovi ilaiyo aval'no neya amollomapuro.

² Toro kuvi kuruv yiuwi'nokai a'mwo abolo ton nebaikuuguudo tovi kuudo uubweyo'mo mwinodupudogano. Toro tonyuda'ai a'mwo pworo ma'no ma'no kuumwiyo imo'nodupudorogano. Toro tooro nemi kaiyako nyanekullugolpiyo. Toro tooravuro ato tovida'ai Gooti tool neya bomollurolovonekumokalokwono'moneyokwe kevu subusu'nyogalo duudogaulo.

³ Aguto su toolno'gwowi gavnokweyolluro yogalo tovi kuvinono uumjunyokwekono. Toro tool kemi jurogudo daikullumwojowo'ji yellukuromollekumwalonekono. Toro yellukuromollekumwalodowo'jure togaikullu Satanyol kaiyako ku'nono miyaikullugolmwalonekono.

⁴ Aki Aguto tool kemino me'no nekuduuwallodowodo tovino tov nevu ilaiyo kuudo aro me'no saikuu'mwakuuwonogano. Oo nemoro yogalo me'no adaikullajuuwo tonyu aga kuvinono uumjunodupudodeyo. Aki lukomgu kuga kuruv yiuno'no uumjungovla'mwalpinodeyo. Kuudo saikuu'mwakuuwono. Toro tovino tov kemino kuudo noullo maullo miyau'dowadonogano.

⁵ Aga kemino tov aro anekullunadopiyo. Aguto toolluro mollubworekumokavla'mdowo'jure tovi kevu kemi poowokalago togai neya duumjunogaulo. Kevu su toro kuumjunpi togaikul Gooti toolluro kalo buuropino winodowodo to'busuko kubalno kev kugaikul kuruv aval'no neya duuwinogaulo. Aki Krais toolluro guureji da'mdowodo to'busuko kubalno kev kugaikul kuruv noonyumwonyu tagunyo abekumaro'ji toga guureji aval'no neya dodavogaulo.

Yiuwi'nokai a'mwo abolo ton burawo nyumo'numwalpiyokwe duudapi kuuguudo tovinokwono

⁶ Nemi avalobuuravoo, nemi Aguto Jisas Kraisolluno yovo tovida'ai guureji aro adaikullumawono. Kevu Jisasolluro a'mwo abolo togaikulluda'ai a'mwo pworo kevnokwero yomjomwekovlaiyo'mo burawo yopi yasuwa'no kirounomollodupudorogano. Aki a'mwo burawo su tooro nemoro yogalo me'no sodekubwasajuuwo tonyu kisuvolo wiyodupudorogano. Yiuwi'nokai su toro yodupudo toorai kevu manyu tomuu'aro neya duuwiyogaulo.

⁷ Kevu aro tovino kuudo me'no youroma'dupudogaikikono. Nevu kevuge amwallajuuwo toga burawo miyodowa yasuwa'no mamwallajuwonogano. Toro kwonol kuruv womdo guureji sajuwonogano. Nevu womdo ilaiyo sajuuwo toonolbusuko kubalno kev kugaikul kuruv nekumjunopi aval'no neya jogaulo.

⁸ Kevu nemoro sajuuwo tonyuno kuudo neya jaullulo. Kemoro wosamujuko ton yasuwa'no mamanyajuwonogano. Toro kwonol kuruv wosamujuko me'no biyoma'dowore tonyuno to'no amanyajuwonogano. Nemi mollonekumwallo'moneyokwe womdo tov kevu a'mwo abolo pubuurekullu jul'nyo nekubweya'jokwe tovino tov nevnokwe toonol iruko togake'aro surakuuto togake'aro womdo guureji to'no amjumovlaiyajuwonogano.

⁹ Kuudo neya jaullulo. Nevu kemoro ato tovida'ai wosamujuko ton anugovlavowa'jujuko'mno'juki ilaiyo sowa'jujukonogano. Toro kuvi kuruv kemi ikuduuwallo'moneyokwe tov nevnokwe toonol womdo guureji amjumovlaiyajuwonogano. Toro te nemoro su toro amjumovlaiyajuuwo su tovi kev kugaikul kuruv aval'no neya duumjunogaulo.

¹⁰ Kuudo neya jaullulo. Nevu kevuge amwallajuuwo toga aro me'no adaikullajuwonogano. “A'mwo pwol womdo yo'mo mwino'ji su tool wosamujuko ton yasuwa'no nomanumwalo'jo.”

¹¹ Su toro adaikullajuuwo kuvi kuruv kemida'ai a'mwo abolo pugaikulluno aro kuu'numwakuuwonogano. “Oo a'mwo abolo su tonyuro pun womdo yo'mo mwinodupu yiuno yasuwa'no worubovenodupudogano. Toro worubovenodupudo su ton a'mwo abolo punyuro yonomwalodopure tovino yiuno kuuguudo toorono luvomollodupudogano.” Kemida'ai pugaikulluno su toro me'no kuu'numwakuuwonogano.

¹² Toro te nevu a'mwo abolo womdo mimwakopo su togaikullu Aguto Jisas Kraisolluno yovo tovida'ai guureji aro daikullano'monogano. Kemoro yasuwa'no worubovenodupudo su tov imwogapiyopi kevnokwe togaikul womdo neya domjumovlavogaulo. Kevnokweyogaikulluro womdo supi tovida'ai neya jomjonomwekovlavogaulo.

¹³ Nemi avalobuuravoo, kevu womdo yodupudo togaikulluno'gwowi aro ikudano'monogano. Kevu sugupasudo me'no yodupudo tonyu kuuno mujumovlaiyo'moneyokwe burawo nyumwalpiyo.

¹⁴ Aki kemida'ai a'mwo pwol pas akavida'ai nemoro yogalo adaikullumwakuuwo tovi kisuvolo so'ji su tooke ibwoto'nyo mipinono. Kevu su toro supi tov a'mwo su tool gami ma'no ma'nodo tovino yainyunonekono. Toro tool wogulo ibwosunowo'ji gami ma'no ma'nodo tovi buulo nuuguunyumopiyonekono. Su toro tomgu'aro wiyo'mwojo'mo tovino tov kevu a'mwo su tooke ibwoto'nyo mipinono.

¹⁵ Toro kuvi kuruv a'mwo su tekwojuno aro kuudo nyaupiyo. Oo nemi ikomago anekullumo'nadopiyo. Kuudo nyaupiyo. A'mwo su tool Jisasolluro a'mwo abolo pubuurobusuko kemi avalo me'no ikullumo'nodowodekono. Toro tekwoji kevu duudapi yogalo aro neya duuwiyogaulo. “Oo guu wako neya dou'nogawono.” Duudogaulo.

Poolol pas akavi amodojugurosoka tovinokwono

¹⁶ Oo Aguto tool sumwoluko kavo wosunyo'moneyokwe tov yiuwi'nokai toga kemi nekubwemwalonekono. Toro te buro'nyo buro'nyodeyo pun kemi aikullumo'no'ji toga gamoro sumwoluko kavo wosunyo'moneyokwe tov nokwo ikullamwalonekono. Aki Aguto tool kevu yiuwi'nokai togaikike nokwo mujomwekovla'mwalonekono.

¹⁷ Nuu Poolonyu moro, Ilaiyokwonoo, tov pas akavi nuvnokwenyuro ato tokwe sakwollumono. Moro su toro yodumdo tov aro tovinokwono. A'mwo abolo ton moro puukwollo tovi kwonpi toga dupinogano. “Oo pas akav Poololluro'mdeyo.” Dupinogano.

¹⁸ Nemi Aguto Jisas Kraisolluro yasuwa'wino sugumaluko tov kevu yiuwi'nokai togaikullu nokwo ikubwemovla'mwalonekono.