2 Tesaloonaika 2 - Gooti Toolluro Yogalokwono

Kirovanyuvanyu kuumwiyo tool kuu'maiyo toru'no nobiyalo'nono tovinokwono

¹ Nemi avalobuuravoo, nemi Aguto Jisas Kraisol aikomgu noolabwonekono. Aki toro abwo'ji toollu wuuru'mallo'moneyokwe nemi nomollu'bworonekumwallonekono. Toro tovino tov kevu neya duu'nyulo.

² A'mwo pworo dodupudorogano. “Oo Aguto toolluro iruko tollugwo me'no abai'movokakwono.” Toro dodupudo tov kuvimaiyo. Toro tovino tov kevu yogalo su tovi kuu'nupi toga kemoro kuudo ton yere noduka'bwo'numwalpiyo. Toro kugaikul kuruv dugoga wosopi yiuno kavo to'no jou'movlavogaulo. Aki kuunano yogalo su tovino a'mwo pworo aro aikudupi tov, “Oo yogalo su tov Gooti toolluro Kuullo tool anekudokakwono” oo “Jisasolluro a'mwo abolo pun anekudopokwono” oo “Pooleke tooro pas tovida'ai anekudopokwono.” A'mwo pworo su toro aikudupi kuvi kuruv kevu yogalo su toro tovino kuudo muubwepinono.

³ A'mwo pworo kuunano yogalo su toro tokwe nyoukuu'naikudupiyokwe tovino kevu wako neya dou'nogaulo. Neya duu'nyulo. Aguto toolluro aikomgu bwono iruko su tollugwo yasuwa'no mabai'mowonokwono. Toro kuvi kuruv sumdomgu a'mwo abolo bwotonyago ton Gooti toollu kisuvolo bwotonyo wipinorogano. Toro wiyodopure toga kirovanyuvanyu kuumwiyo pwol kuu'maiyo toru'no nobiyalo'nonekono. Puga Gooti tool kirovanyuvanyu kuumwiyo su toollu kaiyako yiunokuudo mollounapiyonekono.

⁴ Kirovanyuvanyu kuumwiyo su tool a'mwo abolo tonyuro noonyumwonyu ilomoropiyodapudo toorai ikomago wimo'nonekono. Aki a'mwo abolo tonyuro, “Oo nemi gootorodeyo,” dodupudo su toorai bwolomorumwogapiyawo'ji gavnokwe toolluno ilomoropunyu yawonekono. Aki toro tool wagwolago Jeruusalemda'ai Gooti toollu ilomoropiyo'moneyokwe ago tovi anakuuto tomuu kuulodavowo'ji kuu'maiyo toru'no aro donekono. “Oo nuvnokwe toonyu Gooti toonyugono.” Donekono.

⁵ Su toro tovino nuu kevuge amwallajo toga me'no sodekubwasajonyugono. Su toro tonyuno kevu kuudo nyallulo'gwonmwalpiyo. Toro kugaikul kuruv neya jou'movlavogaulo.

⁶ Aki kirovanyuvanyu kuumwiyo su tool yere nobiyalo'no'jokwe tov pwol uumjuku'dowodekono. Toro toolluno kevu kuudo me'no youroma'dupudogaikikono. Kirovanyuvanyu kuumwiyo su tool yiuno Gooti toolluro iruko me'no ajesungiko toga'no kuvinono nobiyalo'nonekono.

⁷ Aga kirovanyuvanyu kuumwiyo su tool yere mabiyalo'noduke kuvi kuruv gamoro jurogudo to'gwowi yiulo tomuu womdo me'no bomjumoulodawodokwono. Su toro bomjumouloduke tovi a'mwo abolo pun uumjunodupu Gooti toollu kisuvolo wiyodupudogano. Kirovanyuvanyu kuumwiyo toolluro jurogudo tov womdo me'no bomjumoulodawodo kuvi kuruv kirovanyuvanyu kuumwiyo su toolluno'gwowi pwol kuuno uumjuku'dowodekono. Toro uumjuku'dowodo su tool me'no sovo'bworodawo'ji toga'no'gwowi

⁸ kirovanyuvanyu kuumwiyo su tool yiuno kuu'maiyo toru'no nobillalo'nonekono. Su toro abillalo'no'ji toollu Aguto Jisasol gami mago tovida'ai suumjudo lokabodowodo tokwe noromiyosonekono. Aki Aguto Jisasolluro abwo'ji togasuro bako bwotonyo pwopiyono tokwe kirovanyuvanyu kuumwiyo su toollu kaiyako yiunokuudo nomollounapiyonekono.

⁹ Toro mollounapiyono kuvi kuruv sumdomgu kirovanyuvanyu kuumwiyo su tool Satanyolluro womdo tovi momjumovlaiyo'moneyokwe Satanyol gamoro jurogudo tov uubweyonekono. Toro uubweyodowo'jure tokwe kuunano duuwallo togai'aro aki judo pumgu'aro yalugunyo'moneyokwe womdo jurogudo togai'aro togai nobiyalo'nonekono.

¹⁰ Toro abiyalo'no'ji toolluro kirovanyuvanyu womdo su togai a'mwo abolo puuto kaiyako i'nopiyo'moneyokwe tovi pla'mdupudo tonyu youkuu'nuudonekono. A'mwo abolo su ton kemi ma'no ma'nodo tovuro kirumwallo tovida'ai birolo'nugolokwiyo'moneyokwe nebaikuuguudo tovino kalo buuropino nokwo amollopujukogano. Toro kun kuruv biyolo to'no uu'mwojodupudogano. Su ton kaiyako yiunokuudo i'nopipinogano.

¹¹ Toro tonyuno tov Gooti tool a'mwo abolo su tonyomno kuunano bwotonyo pwollu nomoropiyabwonekono. Toro amoropiyabwo'ji su toolluro youkuu'nuudodowo'jure tovi kuudo nuubwepinogano.

¹² Toro te a'mwo abolo su ton nebaikuuguudo tovino kuudo uubweyo'mo mwinopi yiuno kirovanyuvanyu pasudo tooraino'gwowi ilaiyo winpinogano. Toro tovino tov Gooti tool yiuwi'nokai su tonyu kooti yogalo duuwiyowo'ji nerumwallonekono.

Gooti tool Tesaloonaikada'ai Jisasolluro a'mwo abolo tonyu me'no ajesoka tovinokwono

¹³ Nemi avalobuuravoo, Aguto tool kemino kalo buuropino winodowodekono. Toro togaikullu kemi ma'no ma'nodo tovuro kirumwallo tovida'ai bomollurolovekumokalokwiyo'moneyokwe muudu'nodo togada'ai me'no ajaikubweyokaikono. Toro te kevu Gooti toolluro ilaiyo winodowo'jure tonyu neya uumjunpino'moneyokwe tovino'mo gamoro Kuullo tool kemi me'no aikubweyokaikono. Aki kevu nebaikuuguudo tovino kuudo me'no kuubweyopogaikikono. Toro togaikullu Gooti tool kemi ma'no ma'nodo tovuro kirumwallo tovida'ai me'no abomollurolovekumokalokwokaikono. Gooti su tool nemoro nebaikuuguudo amodekumollajuuwo su tovi'aro kemi aikullo'mwojokaikono. Toro togaikulluno Gooti toollu, “Nenoloo,” subusu'nyogalo neya wuudumwalano'monogano.

¹⁴ Kevu Aguto Jisas Kraisolluro bako bwotonyo tomuu mujomwekovla'mwalpino'moneyokwe Gooti tool kemi me'no adekumarokaikono. Su tov nemoro kuuguudo sugudo amodekumollajuuwo tovi'aro aikullumo'nokakwono.

¹⁵ Toro te nevugebuuravoo, nemoro kuuguudo me'no sodekubwasumwakuuwo togai guureji neya dodavogaulo. Aki sumdomgu kevuge amwallajuuwo togasuro nemoro mago tovida'aiyo'mdeyo oo pas tovida'aiyo'mdeyo yiuwi'nokai nebaikuuguudo sodekubwasajuuwo su tonyu guureji neya dogudupolarogaulo.

¹⁶ Nemi Nellunumiyago Gooti tool kevuge'aro ne kwonogai'aro tonolluno kalo buuropino winodowodekono. Toro tool gamoro yasuwa'wino sugumaluko nemi nekullabodowodo tovida'ai aro toval nonekullumo'nodubulovakono. Puruv jurogudo yiunokuudo danekullumwojodowodekono. Aki puruv aro kuudo youroma'dowadonogano. Gamoro yiuwi'nokai sugudo nonekullabwono tollovai kuvinono nomaranonoldeyo. Kuudo youroma'dowadonogano. Toro kuudo yaurowa'ji sogwollo to'no kinodowadonogano. Toro te Gooti tooke'aro nemi Aguto Jisas Krais gavnokweke'aro tooral kemi nokwo ikullo'mwojubullunorakono.

¹⁷ Toro ikullo'mwojodo'bullure tovida'ai kemoro poowokalago ton paiko nokwo ibwosunopi aki kemoro sugupasudo togai'aro yogalo togai'aro ton yiuwi'nokai sugudo tonyuno to'no porugwo'mo'na'mwalpinogaikikono.