2 Pita 3 - Gooti Toolluro Yogalokwono

Aguto tool iruko pullugwoji aikomgu noolabwono tovinokwono

¹ Kevu moro kalo buuropino nyunodowodo tobuurekullu nuu sumdomgu pas puruv me'no sokwollekwopiyabonyugono. Toro te aga pas lukomguda'ai akakwe'aro sokwollekwopiyamono. Toro te pas su tovallu aki aiko te kuudo neya jaurogaulo. Toro saupi tomgu'aro kemoro kuudo idopto'nodo tonyuno ikuduka'bwollo'moneyokwe sokwollekwopiyamono.

² Kevu Gooti toolluro proofet tooravuro yogalo amodekumollajupo tonyuno aki aiko te kuudo neya jou'movlavogaulo. Aki nemi Aguto toolluro kinamjo'mo yogalo adaikullajuko kunyuno kuruv aki aiko te kuudo neya jou'movlavogaulo. Yogalo su ton gami kuurotokwe toorai'aro ikudodowodekono. Toro ikudodowodo tool Agutekono. Aki toro tool ma'no ma'nodo tonyuro kirumwallo tovida'ai nemi bomollurolovonekumokalokwodowodekono.

³ Toro te kuudo muudu'no youromapino'moneyokwe tov arokwono. Iruko aiyowo'mo toga a'mwo pworo biyalo'nopi kevu tobuurekullu burekakwo nome'naikwopipinorogano. Aki a'mwo su tooro kevnokweravuro kulako tonyu ilaiyo igollunyo'mo pasudo toorai uumjunopi kiroungovla'mwalpinorogano.

⁴ Toro tooro aro dupinorogano. “Jisasol subuu'yamju adokaikono. Nuu aikomgu noulamonyugono. Gamoro subuu'yamju adoka su tov ku'nono mimo'nonokwono. Aiyoga nemi nellukweyago tooro abolopo togada'ai yiuwi'nokai Gooti toolluro sokwollosoka ton judo pumgu'aro mimo'nodupudogano. Yiuwi'nokai ton yiuno aval'no mujo'melabino mujo'melabino yodupudogano.” Su toro dopi kemi burekakwo me'naikwopipinorogano.

⁵ Toro kuvi kuruv a'mwo su tooro aro tovino mwonyubusuko to'no yodupudorogano. Aiyoga muudu'nodo toga Gooti toolluro yogalo doduke tovi'aro sulugumdo tokwe kwako tokwe toval sumo'nolovakono. Gooti tool gamoro yogalo tokwe to'no wonyo kamiyo tovi anakuuto tomuuda'ai kwako yalukullo tov sokwollosokaikono.

⁶ Aki kwako sokwollosoka su tov amjo'melabiyajukokwono. Kwako tov su toro mujo'melabino sumaiyokwe lukomgu toga Gooti toolluro yogalo doduke tovi'aro wonyo allako puruv mobwokuruvollo'no kwako su tovi kaiyako amollounapiyokakwono.

⁷ Aki lukomgu Gooti toolluro yogalo avalo su tovi'aro sulugumdo tokwe kwako tokwe toval duko tovi noso'moneyokwe sogwollo to'no kinodubulovakono. Gooti tool gami kisuvolo wiyodupudo tonyu mollounapiyo'moneyokwe aiyowo'mo toga kooti yogalo duuwiyonekono. Iruko su tollugwo yere mabai'mo'mdowo'jure toga Gooti tool sulugumdo tokwe kwako tokwe tovallu kuuno mollomwalmwalonekono.

⁸ Kevu moro kalo buuropino nyunodowodo tobuurekul kavlo puru'monodo akavino kuudo nyallulo'gwonmwalpiyo. Kavlo su tov arokwono. Aguto toolluro sumdo tovi iruko pullugwonodo tollugwo wan tausen kworomo tobuulbusuko wimo'nodowodekono. Aki Aguto toolluro sumdo tovi wan tausen kworomo tobuul iruko yiuno pullugwonodo tollugwobusuko wimo'nodowodekono.

⁹ Toro te a'mwo pworo aro dodupudorogano. “Aguto tool gamoro subuu'yamju tonyu yere muumjunyokwekono.” Su toro dodupudo tov kuvimaiyo. Aguto tool gamoro subuu'yamju tovi kuvinono uumjunodowodekono. Toro kuvi kuruv agasuro a'mwo abolo tobuurekullu yere kirekumwallo'mo mwinodowodekono. Su tov Gooti tool a'mwo pwolnodo kwol kuruv yiunokuudo nyounapiyo'jokwe tovino kuudo yaullokwekono. Toro tovino tov Gooti tool a'mwo abolo gamiyomno kuudo youragunyumo'nupino'moneyokwe sogwollo to'no kinodowodekono. Su toro kinodowo'jure toga a'mwo abolo tonyu yere mairumwallodowodekono.

Kwako akakwe sulugumdo tokwe toval nyounopibulluno tovinokwono

¹⁰ Aguto toolluro wolabwono iruko tollugwo aro to'busuko imo'nonokwono. A'mwo abolo pun, “Oo kuuko tool nobwonoldeyo” kuudo miyau'dopure toga a'mwo kuuko tool bai'mo'mdowodekono. Su toro to'busuko kubalno a'mwo abolo ton kuudo miyau'dopure su toga Aguto tool nobai'mowonekono. Toro abai'mowo'ji toga sulugumdo tov uuwiyago bwotonyo ki'nowo'ji nyounopiyonokwono. Aki duko tov kuujo tooke'aro lobako tooke'aro sullugabwo togai'aro tonyu amonoso'ji toga noduuwiyopipinogano. Aki su toro toga kwako tokwe'aro kwako akavida'ai pasudo kworogai'aro kworo kuruv nyounopipinorogano.

¹¹ Yiuwi'nokai kwako akavida'ai su ton toro younopipino tovino tov kevu Gooti gavnokwe toolluro pasudo togai to'gwowi neya jomjomwekovlavogaulo. Aki kevu Gooti toolluno to'no neya duumjungovlavogaulo.

¹² Aki Gooti toolluro noolabwono iruko tollugwojuno sogwollo to'no neya kinomwalmwalpinogaikikono. Aki iruko noolabwono su tollugwo yere abai'mowoneyokwe tovino kevu Gooti toolluro womdo tovi guureji neya domjumovlavogaulo. Iruko su tollugwo abai'mowo'ji toga Gooti tool sulugumdo tovi duko lumuugutowo'ji noluvirowapiyonekono. Aki duko aluvirowapiyo'ji su tovida'ai kuujo tooke'aro lobako tooke'aro sullugabwo togai'aro ton noduuwiyopipinogano.

¹³ Toro kuvi kuruv Jisasolluro a'mwo abolo tonolno'gwowi sulugumdo muuduko tokwe'aro kwako muuduko tokwe'aro tovalluno sogwollo to'no kinodowadonogano. Toro tovalluno Gooti tool subuu'yamju me'no adanekullokaikono. Sulugumdo muuduko tokwe'aro kwako muuduko tokwe'aro su toval kuvinono sumo'nubullu toga a'mwo abolo pasudo idopto'nodokwe tonyuno to'no kuulomwalopi yomjomwekovla'mwalpinogano.

Nevu wako kuu'numwalowa'ji Aguto toolluno sogwollo kingovla'mwalano tovinokwono

¹⁴ Mi ibwoto'nyobuuravoo, kevu su toro ikullumo'nono tovino sogwollo to'no kinomwalodupudogaikikono. Toro tovino tov kevu Gooti toolluro sumdo tovi dosudosumaiyokweyo'mdeyo oo kaiya'nodomaiyokweyo'mdeyo wimo'nupino'mo womdo bwotonyo neya domjumovlavogaulo. Aki kevu yiuwi'nokai a'mwo abolo tobuurogai sumwoluko noullo wosungovlaiyo'moneyokwe kuruv womdo bwotonyo neya domjumovlavogaulo.

¹⁵ Aki aro kuudo neya jou'movlavogaulo. Aguto tool a'mwo abolo kwako akavi mwalodowado tonollu yere maironekumwalladopiko tovino kavlo tov arokwono. Aguto tool a'mwo abolo tobuurai ma'no ma'nodo tovuro kirumwallo tovida'ai bomollurolovomokalokwiyo'moneyokwe tovino sogwollo duuwinadopiyo. Toro tovino kuudo neya jou'movlavogaulo. Aguto toolluro pasudo su tovino nemi nellugwai'yago toolbusuko Poolol kwol kuruv kemi pas puruv me'no sokwollekwopiyabokaikono. Poolol nemoro kalo buuropino nekullunodowodekono. Toro tool Gooti toolluro pi'mwo kuudo wiyoduke tovi'aro to'no pas tov sokwollekwopiyabokaikono.

¹⁶ Kuudo neya jaullulo. Poolol Gooti toolluro pasudo tovino gamoro yiuwi'nokai pas tonyu sokwollapiyajuko toga kavlo su tonyuno kuu'maiyo toru'no dumwolabodowodekono. Toro kuvi kuruv gamoro pas sokwollapiyajuko su tonyuda'ai kuuguudo punyuno kavlo tov a'mwo abolo pun kuudo yere miyouroma'dupudogano. Aki kuuguudo su tonyu a'mwo kuunano ibwasokwe tooro pumgu'aro yomollovodo'mwojuudodupudorogano. Toro tooro kuudomaiyorogano. Aki kuudo noullo maullo yaullokwerogano. Su toro tooro Gooti toolluro yogalo sakwollungiko punyuno po'dogalo miyodubwasodupudorogano. Toro to'busuko kubalno Poololluro pas sokwollapiyajuko su tovida'ai yogalo kunyuno kuruv po'dogalo miyodubwasodupudorogano. Toro tovino tov Gooti tool a'mwo su toorai nerumwallonekono.

¹⁷ Mi ibwoto'nyobuuravoo, a'mwo kuunano ibwasokwe tooro kemi akuuto toru yere maullumo'nodopure kuga kuruv kevu su toro tooraino kuudo me'no souroma'mwakopogaikikono. Toro tovino tov a'mwo pworo kuunano puuto tovi nome'nekumokavlapiyokwe kevu wako neya dou'nomwalogaulo. Kemi kuvinono ame'nekumokavlapi tov kevnokwe togaikul kuudo noo'nookwo yopiyopi nebal'no yogalo gudupola'dupudo tovi nobwolodukwopiyapiyo.

¹⁸ Toro kuvi kuruv kevu nemi Aguto Jisas Kraisollu'aro jurogudo neya jogullumwoju'nugovlavogaulo. Su tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Kevu gamoro yasuwa'wino sugumaluko togai'aro Krais toolluno kuudo togai'aro tonyuno kuudo souromapi tovida'ai aguto yogullumwoju'nugovlavopi kwolluno nokwo ilomoropimwolapinekono. Agake'aro aki lukomgu aiyo yiunokuudo mujomwekovla'mwalano kugake'aro yiuwi'nokai iruko tollugwojai gamino yovo tov neya ilomoropiyo'moneyokwekono. Nebal'nodokwono.