2 Pita 2 - Gooti Toolluro Yogalokwono

A'mwo kuunano ibwasokwe tooro kemi nojolukuulovekuma'mwalpiyokwe tovinokwono

¹ Toro kuvi kuruv sumdomgu toga kuunano proofet pworo Isuraiyolda'ai a'mwo abolo tonyu akuuto toruda'ai abillumo'nyajuporogano. Toro to'busuko kubalno kuunano ibwasokwe pworo kemi akuuto toruda'ai nyumo'numwalpinorogano. Toro sumo'nupi su tooro kuunano yogalo pugai yekubwasupinorogano. Kuunano yogalo su ton Gooti toolluro nebal'no yogalo tovi kuvinono mainamjupinogano. Toro tovino tov kuunano yogalo su ton a'mwo abolo tonyu kaiyako mollugolamopinogano. Kuunano ibwasokwe su tooravuro ma'no ma'nodo tovino mubiyo tov Aguto tool me'no amobiyopingiko kuvi kuruv Aguto su to kwollu buulo to'no uugunyumopipinorogano. Su toro tomgu'aro kevnokwe tooro kaiyako yere i'nopipinorogano.

² Kuunano proofet su tooravuro mujeroungovla'mdopure tovida'ai Jisasolluro mollu'bwoto tonyuda'ai a'mwo abolo bwotonyago ton uumjunopi aval'no mujeroungovla'mwalpinogano. Aki Jisasolluro a'mwo abolo pun su toro mujeroungovla'mdopure tovino tov a'mwo abolo gabovo punyuro sumdo tovi puuto nebal'nodo uumjunodowado toolluno kaiya'no yogalo bwolomorumwogapiyapinogano.

³ A'mwo kuunano ibwasokwe su tooro nuugwiyo bwotonyago tonyu ki'nomallo'mo guureji winyokwerogano. Toro tooro kemoro nuugwiyo tonyu ki'nekumallo'moneyokwe kuunano yogalo togai yekubwasupinorogano. Gooti tool kooti yogalo tovi mollomwalokwekono. Toro tool a'mwo kuunano ibwasokwe su toorai nerumwallo'moneyokwe tovino aiyoga me'no adomdukuurosokaikono. Toro te kuunano ibwasokwe su toorai kaiyako nomollounapiyono tool sa mwollokwekono. Toro kwol kuruv a'mwo su toorai lukomgu nerumwallono tovino yiuwi'nokai toga sogwollo to'no kinyokwekono.

⁴ Kuudo neya jaullulo. Ensel pworo ma'no ma'no sopo toga Gooti tool ensel su toorai wonyapino miyokaikono. Toro kwol kuruv kirumwallo'moneyokwe du'muudo tomuuno kwolomogalowopiyabokaikono. Aki Gooti tool aiyowo'mo kooti yogalo tov yere maduuwiyodowo'jure toga ensel ma'no ma'nodo su tooro dugumwuulo bwotonyo tovi anakuuto tomuu senyo wuulo to'busuko amogalerosokaikono. Toro tooro aiyowo'mo kooti yogalo tovino sogwollo kinmwalpino'moneyokwe kuule'na'dupudorogano.

⁵ Aki aiyogasuro a'mwo abolo kwako akavi amwallajupo tonyu Noowal aro amoruujajukekono. “Kevu Gooti toolluro ilaiyo winodowodo pasudo idopto'nodo tonyu neya duumjungovlavogaulo.” Toro moruudoduke kuvi kuruv a'mwo abolo kwako akavi amwallajupo su ton kisuvolo to'no kwiyajupogano. Toro te Gooti tool a'mwo abolo su tonyu wonyo allako tokwe airumwallokaikono. A'mwo abolo kwako akavi amwallajupo su ton Gooti toolluro kirumwallo su tovi mirukuruwolovopogano. Toro kuvi kuruv Noowaike'aro gami 7-pela a'mwo abolo togai'aro tonumdotono'gwowi Gooti tool amollovi'mwojomokavlavokaikono.

⁶ Aki Gooti tool wagwolago Soodoomke Goomoorake tovalluda'ai a'mwo abolo amwallajupo tonyu kirumwallo'moneyokwe duko bwotonyo tov kwolomoropiyabokaikono. Wagwolago su tovallu duko kwolomoropiyaboka tovida'ai monoso'no yiuno kwagupto to'no sumo'nolovakono. Kuudo neya jaullulo. Gooti tool yiuwi'nokai a'mwo abolo gami kisuvolo wiyodopure tonyu kirumwallokwekono. Su toro tovino kuu'maiyo toru'no bomollolupto'noso'moneyokwe tov wagwolago su tovalluda'ai a'mwo abolo amwallajupo tonyu yiuno'no aromiyebuuropiyokaikono.

⁷ Aki su toro toga Gooti tool a'mwo idopto'nodo Lootollu kirumwallo su tovi nomaro'jokweyo'mo abomollurolovomokalokwokaikono. Lootol a'mwo abolo tonyuro kemi kulako togai yasuwa'no luverounomollo'moneyokwe pasudo yodopure toorai wonyapino to'no yodowo jul'nyo bwotonyo subwosungovlaiyajukekono.

⁸ Su tov aro tovinokwono. A'mwo idopto'nodo su tool a'mwo abolo kaiya'no pasudo kiroungovla'mdopure tonyuro akuuto toru amwallajukekono. Toro tool a'mwo abolo su tonyuro kirovanyuvanyu pasudo toorai yiuwi'nokai iruko tollovai amuugonallajukekono. Aki a'mwo abolo su ton kemi kirovanyuvanyu pasudo kiroungovla'mdupudo tooraino kuuguudo bomjodumoulodopure toorai yiuwi'nokai iruko tollovai au'nallajukekono. Toro yodopure kuvi kuruv Lootol gavnokwe toolno'gwowi Gooti toolluro ilaiyo winodowodo pasudo idopto'nodo tonyuno to'no uumjungovlaiyo'mo kwinyajukekono. Toro te a'mwo su tool a'mwo abolo tonyuro kisuvolo pasudo kiroungovla'mdopure tooraino jul'nyo bwotonyo subwosunyajukekono.

⁹ Aiyogasuro Aguto toolluro airumwalloka su tov aro tovino nekuduuwallodowodokwono. Aguto toolluro a'mwo abolo uumjunyokwe ton jul'nyo amapi toga jul'nyo su tooro kaiyako nyugolpiyokwe tovino nokwo bomollurolovomokalokwonekono. Aki Gooti tool aro kuudo me'no yau'dowodekono. Oo nuu a'mwo abolo mi manumjunodupudo tonyu kirumwallo'moneyokwe iruko pullugwoji kooti yogalo noduuwimonyudeyo. Su toro kuudo me'no yau'dowodekono. Toro tovino tov a'mwo abolo su ton Gooti toolluro kirumwallo su tovi yere mama'dopure kuga kuruv Gooti toolno'gwowi wonyapino to'no nokwo imwalonekono.

¹⁰ Aki a'mwo kuunano ibwasokwe tooro kemi kulako tokwe kwonyalo yo'moneyokwe pasudo tooraino kwanyu sumdo to'no kinuwiyodupudorogano. Toro kinuwiyodupudo su tov Gooti toolluro sumdo tovi kaiyako igolamo'nodupudorogano. Aki toro tooro kemi mido mollomwalokwe toolluro yogalo tovi dolago tomuu mwallo'mo kwoda'molo to'no yodupudorogano. A'mwo su tooro kemi kirumwallo tov yere mama'dopure kuvi kuruv lukomgu Gooti tool guureji nerumwallonekono. Aki kemoro kirovanyuvanyu pasudo kiroungovla'mdupudo tovino luko miyodupudorogano. Aki kevnokwe tooravuro kuudo tovino to'no uumjunodupudorogano. Toro tooro Gooti toolluro bako bwotonyo pwopiyodowodo tomuuda'ai ensel tooraino burolyogalo bwolomorumwogapiyodapudorogano. Toro abwolomorumwogapiyapi kuga kuruv luko bu'buto miyodupudorogano.

¹¹ Ensel su tooro jurogudo bwotonyokwerogano. Aki toro tooro yovo aguto kurukwerogano. Toro te ensel su tooro a'mwo kirovanyuvanyokwe toorai uuwolo'mdupudorogano. Toro uuwolo'mdupudo kuvi kuruv Aguto toolluro sumdo muugona'dowo'jure toru ensel jurogudokwe su toorono'gwowi a'mwo kirovanyuvanyu tooraino bwolomorumwogapiyo'mo yogalo pun ku'nono majokwerogano.

¹² Toro kuvi kuruv a'mwo kuunano ibwasokwe su toorono'gwowi ibesa'aiyo kuudo nonagutokwe toorobusukorogano. Ibesa'aiyo tooro kevnokwe tooravuro kulako tobuuraino to'no uumjunyokwerogano. Ibesa'aiyo su toorai aro wimo'nonorogano. A'mwo pworo su toorai galomworaropi kaiyako mollounapipinorogano. Su toro to'busuko kubalno a'mwo kuunano ibwasokwe su tooro kevnokwe tooro kaiyako i'nopipinorogano. Aki toro tooro noonyumwonyu punyuno kuudo miyouroma'dupudo su tonyuno yere bwolomorumwogapiyodapudorogano. Toro te Gooti tool a'mwo kaiyako i'nodupudo su toorai kaiyako noromiyebuuropiyonekono.

¹³ A'mwo su tooro a'mwo abolo gabovo tobuurai kaiyako igolodupudorogano. Toro igolodupudo to'busuko kubalno lukomgu Gooti tool a'mwo su toorai kaiyako aval'no nyugolonekono. Toro te a'mwo su tooravuro kaiya'no pasudo tovuro mubiyo tov lukomgu kuvinono nomapinorogano. A'mwo su tooro iruko kuu'maiyo kuga kuruv kirovanyuvanyu pasudo to'no kiroungovla'mdupudorogano. Aki kemi kuunano yojolukuulovekumallo'mo tooro kevu i'bwo'nonomwalodopure togaikike kuulomwalodupudorogano. Toro tooro kemi kuunano youkuu'naikudodupudorogano. Aki kevnokweravuro youkuu'naikudodopure su tovino ilaiyo to'no yokwerogano. A'mwo su tooravuro kemi akuuto toru su toro yodopure tovida'ai kemi wogulo yekuwo'galopi kaiyako mollugolaikumo'mdupudorogano.

¹⁴ A'mwo kuunano ibwasokwe su tooro kemi sumdo togai kwonyalabolo punyu yo'mgonomallo'mo guureji ya'mgonodupudorogano. Aki su tooro aro to'busukorogano. A'mwo sumwoluko manyuto'nodowodo pwol yiuwi'nokai toga wosamujuko tov guureji nugovlaiyo'mo winodowodekono. Toro toolbusuko kubalno a'mwo su tooro ma'no ma'no pasudo tonyuno yiuwi'nokai toga nonyuto'nugovlaiyo'moneyokwe guureji winodupudorogano. Aki a'mwo su tooro a'mwo abolo pubuurai ki'nomallokwerogano. A'mwo abolo su tobuuro Gooti toolluno kuudo me'no uubweyodupudo kuvi kuruv guureji magudupola'dupudogano. Toro magudupola'dupudo tobuurai ma'no ma'no ipureyokweyo'mo a'mwo kuunano ibwasokwe su tooro ki'nomallokwerogano. Aki a'mwo kuunano ibwasokwe su tooravuro poowokalago tonyu nuugwiyo bwotonyago ki'nomallo'mo kuudo tov kuullo'mowopiyodowodokwono. A'mwo su tooro Gooti toolluro tabunyuwuulo nuubweyono tovi dolago tomuu me'no mwalodupudorogano.

¹⁵ Toro tooro puuto idopto'nodo tovi me'no bwolodukwopiyodapudorogano. Toro bwolodukwopiyodapu puuto kaiya'nodo tovi uumjunodupudorogano. Toro tooro Beyoorolluro muugunyo Balamolluro puuto kuumjunoka to'busuko tovi aval'no uumjunodupudorogano. Aiyoga Balamol ma'no ma'no pasudo yoduke tonyuda'ai nuugwiyo pun ai'nomallajukekono. Toro tool nuugwiyo ai'nomallajuko pasudo su tonyuno kalo buuropino kwinyajukekono.

¹⁶ Toro kuvi kuruv proofet Balamol a'mwo amomo pwolbusuko nuumjuno'jokwe doonki yogalo majokwe pwol a'mwo toonolluro yogaimaguurai tokwe Balamollu aduumjukurokaikono. Gooti tool Balamollu gami ma'no ma'no pasudo tovino doonki su toollu'aro yogalo amojurugolokaikono.

¹⁷ A'mwo kuunano ibwasokwe su tooro yovekurajo akavalbusuko imo'nodupudorogano. Wonyo sumdo puruv yaluko me'no kiyo'nopiyodowodo tokwe'aro aki sulu'wo puruv dole'manollo molobeyomokwodowodo tokwe'aro tovalbusuko kuunano to'no imo'nyokwerogano. A'mwo su tooro dugumwuulo kuunodo tomuu neya kuulomwalmwalpino'moneyokwe Gooti tool me'no sovroubweyokaikono.

¹⁸ Toro te a'mwo kuudo maiyokwe su tooro yasuwa'yogalo to'no derounomollodupudorogano. A'mwo kuunano ibwasokwe su tooro a'mwo abolo pubuurai kemi kulako tovuro ilaiyo igollunyo'mo kwonyalpasudo toorai'aro ki'noma'dupudorogano. A'mwo abolo su tobuuro kwako akavida'ai a'mwo abolo ma'no ma'no pasudo kiroungovla'mdupudo tonyuro akuuto tomuuda'ai aga toga'gwo abirolo'nugolokuumwa'jupobuurogano. Toro abirolo'nugolokuumwa'jupo kubuurai kuruv kuunano ibwasokwe su tooro ai'noma'mwakoporogano.

¹⁹ A'mwo su tooro a'mwo abolo ki'noma'dupudo tobuurai subuu'yamju aro duuwiyodupudorogano. “Oo kevu nemi anekumjunpi tov loowo tovi dolago tomuuda'ai birolo'nugolokwopi kevnokwe togaikulluro kuudo saupi tomgu'aro nokwo yomjomwekovla'mwalpinogaikikono.” Subuu'yamju toro duuwiyodupudorogano. Toro kuvi kuruv a'mwo kevnokwe tooro kaiyako igolamo'nyo'moneyokwe wuulo to'busuko me'no galerosunodupudorogano. Su tov aro tovinokwono. Pasudo pworo nemi anekuuwolopi tov pasudo su tooro nomogaibworonekumokavla'mwalpinorogano. Toro mogaibworonekumokavla'mdopure su toorai nevu ki'nato womdokwe tonolbusuko wimo'numwalanonogano.

²⁰ Toro te a'mwo abolo pun Aguto Jisas Kraisolluno kuudo me'no youroma'dupudogano. Su tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Toro toolluno kuudo youroma'dupudo tovi'aro kwako akavuro kaiyako mollugolameyo'mo pasudo tooraida'ai me'no birolo'nugolokwodupudogano. Toro kuvi kuruv lukomgu kaiya'no pasudo toorai wuulo to'busuko awapi tov kaiya'no pasudo su tooro a'mwo abolo tonyu aki aiko te nomollubworomokavlapiyo. A'mwo abolo su ton kaiya'no pasudo toorai aiko te awapi tov kirumwallo bwotonyo nomapinogano. Kirumwallo su tov kemoro sumdomguda'ai kirumwallo amaropujuko tovi nuuwolowonokwono.

²¹ Toro te a'mwo abolo kaiya'no pasudo toorai wuulo awapi ton puuto idopto'nodo tovino sumdomgu kuudo miyouromaropujuko'mno'juki ilaiyo sumo'nopujukogano. Su tov aro tovinokwono. A'mwo abolo su ton puuto idopto'nodo tovino kuudo me'no youroma'dupudogano. Toro kun kuruv Gooti gavnokwe toolluro kinamjo'moneyokwe yogalo tovi buulo kuuguunyumopipi to'gwowi kaiya'no bwotonyokwono. Toro tovino tov a'mwo abolo buulo kuuguunyumopipi su tobuuro sumdomgu puuto idopto'nodo tovino kuudo miyouromaropujuko'mno'juki kaiya'no bwotonyo su tov mwimo'nowo'jujukogano.

²² Kaiya'no pasudo tov aki aiko te mollubworomokavlaiyo'moneyokwe a'mwo abolo wuulo awapi su tov yovekurajo nebal'nodo puruval nekuduuwallodowodokwono. Puruv arokwono. “Juluko pwol kwodako me'no amuudoso'ji tovi lukomgu kwodako su tomuuno aki aiko te plavowo'ji luvanonekono.” Aki puruv arokwono. “Sa'ai abollamwiyo tov gami kulako tovi wonyo me'no sal'mo'no'ji toga lukomgu kwonolo tomuuno aki aiko te plavowo'ji kuulolukumowopiyonokwono.”