2 Koorin 8 - Gooti Toolluro Yogalokwono

Jisasolluro a'mwo abolo ton Juudiyada'ai Jisasolluro a'mwo abolo tobuuraiyo'mo nuugwiyo amollu'bworosajupo tovinokwono

¹ Mi avalobuuravoo, kevu aro tovino neya youromapinogaikikono. Kwako Masedooniyada'ai Jisasolluro mollu'bwoto go'no go'nodo pubuurai akuuto toru Gooti toolluro yasuwa'wino sugumaluko tov kuu'maiyo me'no bomollolupto'nosodowodokwono.

² Toro te Jisasolluro a'mwo abolo su tobuurai a'mwo abolo kuudo muubweyodupudo pun kaiyako bwotonyo igolodupudogano. Toro igolodopure tovida'ai Jisasolluro a'mwo abolo su tobuuro danyu'nyuwuulo ibwosunodupudobuurogano. Toro tobuuro jul'nyo tovi akuuto tomuu toro mwalodupudo kubuuro kuruv ilaiyo to'gwowi bwotonyo yodupudogano. Aki apoo'nyaiyo kuunodo imo'nodupudo kubuuro kuruv noonyumwonyu kuto ivito nuugwiyodeyo tono'gwowi i'bworosodupudogano. Toro i'bworosodupu a'mwo abolo supto yodopure pubuurai yado wiyodupudogano. Kemoro noonyumwonyu wiyodupudo su tov maluko'nyo'maiyo. Bwotonyago ton wiyodupudogano.

³ Toro te nuvnokwe toonyu a'mwo abolo su tobuurai me'no kwono tovino tov kuu'maiyo toru'no ikudumo'mokwono. A'mwo abolo su tobuuro kemi buro'nyo buro'nyo kuto ivito nuugwiyodeyo ma'dupudo pun momuudeyoso'mno kwimwa'jupogano. Su tov kuvi kuuno sumwa'jupogano. Aki a'mwo abolo su tonyuda'ai pubuuro yiuno kemi kuto ivito nuugwiyo ma'dupudo tovida'ai to'no kwimwa'juponmaiyo. Toro kuvi kuruv kemoro ma'dupudo tovi muunyu toru pugai'aro youlloso'mno bwotonyago kwimwa'jupogano. Su toro kwimwa'jupo tov a'mwo pworavuro dumuurolo'mdopure tovida'ai kwimwa'juponmaiyo. Toro kuvi kuruv kevnokwe tobuuro ilaiyo winodupudo tovi uumjuno'mno kwimwa'jupogano.

⁴ A'mwo abolo su ton nemi nekudoganyuno nekudoganyuno aro sumwa'jupogano. “Oo nevu Gooti toolluro a'mwo abolo supto sadokwopo tobuurai wiyo'mwojo'moneyokwe kevuge avaiwomdo nokwo yanonoldukono? Nemoro yasuwa'wino nuugwiyo ton morapiyowa'ji yiuno'no kwiyo'mwoja'ji tov ilaiyo bwotonyo yanonogano.” Anekudoganmwa'jupogano.

⁵ Toro te nevu kuudo sau'mwa'juwonogano. Oo Masedooniyada'ai su ton nuugwiyo pwekwono wipinogano. Toro kuudo sau'mwa'juwo kuvi kuruv nemoro kuudo sau'mwa'juwo su tovi uuwolovo'mno nuugwiyo bwotonyo kwimwa'jupogano. Su tov sumdomgu kevnokwe tobuuro Aguto toolluro ato tovi amorubwenopogano. Aki lukomgu kevnokwe tobuuro nemoro ato tovi amorosunopogano. Su tov Gooti toolluro ilaiyo winodowodo tomgu'aro uumjuno'mno kuvinono sopogano.

⁶ Kevu Koorinda'ai togaikullu muudu'nodo toga nuugwiyo ton mollu'bworoso'moneyokwe Taitosol me'no adaikumul'mwojajukekono. Toro te nevu Taitosollu aro aduuwimwojumwakuuwonogano. “Guu a'mwo abolo su tonyu aiko te wuuru'maro'bi dodumul'mwojono. Toro adumul'mwojubi tovi uumjunopi yasuwa'wino nuugwiyo tov nokwo mollu'bworosopipinogano.” Su toro aduuwimwojumwakuuwonogano.

⁷ Toro te kevu yiuwi'nokai pasudo akanyu pi'mwono molludo'movla'mdupudogaikikono. Gooti toolluno kuudo uubweyo'mo tokwe'aro Gooti toolluro yogalo tovino moruujo'mo tokwe'aro Kuullo toolluro yogalo ikudodowo'jure tovi kuudo youromallo'mo tokwe'aro aki yiuwi'nokai womdo sugudo tonyu guureji momjumovlaiyo'mo tokwe'aro nemino kalo buuropino ikullunodowodo tokwe'aro yiuwi'nokai pasudo su tonyu kevu pi'mwono molludo'movla'mdupudogaikikono. Toro tovino tov nuugwiyo tokwe yasuwa'wino mollu'bworoso'mo womdo aka kuruv kevu nuugollu'mopiyokwe tovino wako neya dou'nogaulo.

⁸ Moro yogalo aikudumo su tov kevu guureji uumjunpino'moneyokwe jurogudo madaikullumwakono. Toro kuvi kuruv aro tovinokwono. Masedooniyada'ai ton nuugwiyo mollu'bworosodupudo tonbusuko kubalno kev Koorinda'ai kugaikul kuruv wiyo'mwojo'mo nuugwiyo amollu'bworosupi tov kevnokwe togaikulluno aro wuuduuwallunupinogaikikono. Oo nevu Jisasolluro a'mwo abolo pubuuraino kalo buuropino kuunodo nekullunodowodonogano. Kevnokwe togaikulluno su toro wuuduuwallunupinogaikikono.

⁹ Kevu nemi Aguto Jisas Kraisolluro yasuwa'wino sugumaluko tovino aro kuudo me'no yau'dupudogaikikono. Gooti tooke amwallajuko Krais tool noonyumwonyu bwotonyagokwe sumo'nyajukekono. Toro kwol kuruv kemi ikullo'mwojo'moneyokwe apoo'nyaiyo pwolbusuko sumo'nokaikono. Aki apoo'nyaiyo pwolbusuko sumo'noka su tov kevu muunyu kai'muuda'ai noonyumwonyu bwotonyagokwe neya imo'nupino'moneyokwe tovino'mokwono.

¹⁰ Aki supto yodopure tobuurai wiyo'mwojo'mo amollu'bworosupi su tonyuno moro kuudo sau'mwako tov ikudumo'mokwono. Kworomo pullu me'no avlavoka toga kevu womdo su tovi muudu'no somaropogaikikono. Aki su toro toga womdo su tovi yo'mo kuudo kuruv muudu'no sauropogaikikono. Neya duu'nyulo. Kemoro womdo su tov kevnokwe togaikulluda'ai ikullo'mwojonokwono.

¹¹ Toro tovino tov kevu muudu'nodo togasuro womdo su tovi pi'mwono sajupo to'busuko kubalno aga kuga kuruv pi'mwono neya yopipinogaikikono. Toro togaikul kemoro buro'nyo buro'nyodeyo amwora'mwakopo tonyuda'ai wiyo'mwojo'mo neya domollu'bworosogaulo. Kevu mollu'bworoso'mo womdo su tovi pi'mwono supi tov kemoro sumdomguda'ai wiyo'mwojo'mo kuudo saullajupo tovi kuvinono uumjunpinogaikikono. Aki kemoro kuudo saullajupo su tokwe'aro agasuro womdo kuvinono supi tokwe'aro su toval yiuno aval'no imo'nubullunovakono.

¹² Kuudo neya jaullulo. Kevu Jisasolluro a'mwo abolo supto yodopure tobuurai wiyo'mwojo'moneyokwe nokwo yovraimwonyumwalpinogaikikono. Kevu toro sovraimwonyupi tov noonyumwonyu mwora'dupudo tonyuda'ai to'no nokwo mollu'bworosupinogaikikono. Toro amollu'bworosupi su tonyuno Gooti tool ilaiyo winonekono. Toro kuvi kuruv kevu noonyumwonyu mamwora'dupudo punyuno'gwowi ku'nono mamollu'bworosupinogaikikono. Toro mamwora'dupudo su tonyuno kevu kuudo kwolallo nyourukwapimwalpiyo.

¹³ Neya duu'nyulo. Kevu a'mwo abolo tonyu wiyo'mwojodopure tovida'ai nuu aro tovino ilaiyo manyunadopiyo. A'mwo abolo su ton bwotonyagokwe imo'nyo'mo manyunadopiyo. Aki kevu apoo'nyaiyo tobuurai kwiyo'mwojupi tovida'ai kevnokwe togaikul supto bwotonyo imo'nyo'mo manyunadopiyo. Toro kuvi kuruv kevu yiuwi'nokai Jisasolluro a'mwo abolo togaikulno'gwowi aval'no neya yomjomwekovla'mwalpino'moneyokwe tovino ilaiyo nyunodowodonyugono.

¹⁴ Toro te aga kevu bwotonyagokwe togaikul Jisasolluro a'mwo abolo supto yodopure tobuurai nokwo wiyo'mwojumwalpinogaikikono. Puga Jisasolluro a'mwo abolo su tobuuro bwotonyagokwe sumo'nupi toga'no'gwowi kevu noonyumwonyu punyuno supto yodopure togaikullu nokwo ikullo'mwojupinogano. Su toro tomgu'aro kevu yiuwi'nokai Jisasolluro a'mwo abolo togaikul yiuno aval'no nokwo yomjomwekovla'mwalpinogaikikono.

¹⁵ Su toro tovino Gooti toolluro yogalo puruv aro sakwollungikokwono. “Bwotonyago amollu'bworosopo kun kuruv kwalo pun mworopogano. Aki a'mwo abolo pun kula'nyo amollu'bworosopo kun kuruv kemi sumwoluko tov nyuto'nyo'mo supto miyajupogano.” Sakwollungikokwono.

Poolol a'mwo pworapwol toorai wagwolago Koorin'no amorapiyoka tovinokwono

¹⁶ Toro te nuvu kemi guureji mollekumwalodumdo to'busuko kubalno Taitosol kemi guureji mollekumwalono'moneyokwe kuudo tov Gooti tool gamoro poowokalago tovi me'no aulomullubweyokaikono. Toro tovino tov nuu Gooti toollu, “Nenyoo,” wuudodumdonyugono.

¹⁷ Kuudo neya jaullulo. Nevu Taitosollu aro kuudowonogano. “Oo guu Koorinda'ai Jisasolluro a'mwo abolo tobuuraiyomno neya wuuru'ma'binekugono.” Su toro kuudowo tovino Taitosol, “Oo ilaiyokwono,” anekudokaikono. Toro kuvi kuruv nevu a'mwo su toollu yere muudodowore kuga kuruv gavnokwe toolno'gwowi kemi bekuru'mallo'mo kuudo tov me'no saullajukekono.

¹⁸ Aki Jisasolluro a'mwo pwol nellugwai'yago toolbusuko nonekullumo'nodowodo toollu Taitoseke kemiyomno amekwopiyamawekono. A'mwo su tool Jisasolluno kuuguudo sugudo tokwe yiuwi'nokai tomuu modomollodowodekono. Toro toolluno tov yiuwi'nokai Jisasolluro mollu'bwoto go'no go'nodo tomuuda'ai ton a'mwo su toolluno, Oo ilaiyekono, bomjodumoulodapudogano.

¹⁹ Aki a'mwo su toollu amekwopiyamawo tov kavlo yiuno puru'monodo su tovino'maiyo. Toro kuvi kuruv yiuwi'nokai go'no go'nodo tomuuda'ai Jisasolluro mollu'bwoto ton a'mwo su toollu aro tovino'mo me'no ajesopekono. Masedooniyada'ai Jisasolluro a'mwo abolo ton Gooti toolluro yasuwa'wino sugumaluko tovuro womdo tovida'ai nuugwiyo ton me'no mollu'bworosodupudogano. Nuugwiyo mollu'bworosodupudo su tonyu nevu wagwolago Jeruusalem'no amokavlawa'ji toga a'mwo su tool nevuge nokwo plawonekono. Su toro tovino'mo me'no ajesopekono. Toro te nevu Aguto toolluro jurogudo tov kuu'maiyo toru'no bomollolupto'noso'moneyokwe nuugwiyo su'bworosopo su ton nomokavlawanonogano. Aki nevnokwe toonolluno aro wuuduuwallunyo'mokwono. Oo nevu a'mwo abolo pubuurai wiyo'mwojo'moneyokwe me'no yovrowosunodowadonogano. Wuuduuwallunyo'mokwono.

²⁰ Aki a'mwo abolo pun nemino aro kuudo nyaupiyo. Oo a'mwo su tooro nuugwiyo bwotonyo tokwe Jeruusalem'no amokavlapi tov kevnokwe tooraiyo'mo nuugwiyo pun nomapinorogano. Nemino su toro kuudo nyanekuupiyokwe tov nevu Jisasolluro mollu'bwoto go'no go'nodo tonyuro a'mwo ajesopo su tooke mokavlawanonogano.

²¹ Neya duu'nyulo. Nevu sugupasudo to'no yo'mo nekullunodowodonogano. Aki toro toonol yiuno Aguto toolluro sumdo tovino to'no sugupasudo su togai yo'mo manekullunodowodonogano. Toro kwonol kuruv a'mwo abolo tonyuro sumdo kuruv sugupasudo togai yo'mo nekullunodowodonogano.

²² Aki yiuno Taitoseke'aro a'mwo Jisasolluro mollu'bwoto tonyuda'ai ajesopo tooke'aro su tooralluno to'no mamekwopiyamawono. Toro kuvi kuruv nevu Jisasolluro a'mwo gabovo pweke'aro a'mwo su toorake'aro toorai kemiyomno amekwopiyamawono. A'mwo gabovo su tool nemi nellugwai'yago pwolbusuko nonekullumo'nodowodekono. Aki nevu a'mwo su toollu go'no go'nodo tomgu'aro yamju youroganoma'dowadonogano. Su toro youroganoma'dowado tovi'aro a'mwo su toolluno aro kinodokwopiyoma'dowadekono. Oo a'mwo su tool Aguto toolluro womdo tovi wiyo'mwojo'mo me'no yovrowosunodowodoldeyo. Su toro kinodokwopiyoma'dowadekono. Aki a'mwo su tool kemino guureji aro kuudo yaikuu'dowodekono. Oo Koorinda'ai Jisasolluro a'mwo abolo ton a'mwo abolo supto yodopure tobuurai wiyo'mwojo'mo nuugwiyo tov kuvinono mollu'bworosodupudogano. Kemino su toro kuudo me'no yaikuu'dowodo tovino tov aga kemiyomno plaiyo'mo guurejuno winodowodekono.

²³ Aki kevu Taitosolluno kuudo neya jaullulo. A'mwo su tool nuuge womdo yodowodekono. Aki kemi ikullo'mwojo'moneyokwe moro avaiwomdokwe imo'nodowolekono. Aki nemi nellugwai'yago tooralbusuko nonekullumo'nodubulo Jisasolluro a'mwo tooralluno kuudo neya jaullulo. A'mwo su toorallu Jisasolluro mollu'bwoto go'no go'no tonyuro kuurotokwe imo'nyo'mo amorapiyoporakono. Toro tooral Krais toolluno yovo tovi ilomodomoropiyo'moneyokwe womdo yodubulorakono.

²⁴ Toro te kevu a'mwo pworapwol su toorai aro tovino neya wuuduuwallupinogaikikono. Kevu a'mwo abolo pubuuraino kalo buuropino ikullunodowodo tovino neya wuuduuwallunupinogaikikono. Kevu su toro kuuduuwallunpi tov a'mwo su tooravuro mollu'bwoto tonyuda'ai a'mwo abolo ton wonopi kemino aro kuudo yaikuupinogano. Oo Koorinda'ai Jisasolluro a'mwo abolo ton a'mwo abolo pubuuraino kalo buuropino kuunodo winodupudodeyo. Aki puruv nemino aro kuudo yanekuupinogano. Oo Pooleke'aro Gooti toolluro womdokwe pworogai'aro tooro Koorinda'ai Jisasolluro a'mwo abolo tonyuno kuuguudo ilaiyo nekudodupudo tov yiuno nebal'nodo'mdeyo. Su toro kuudo nokwo yanekuupinogano. Toro tovino tov a'mwo pworapwol su tooro abekuru'mapi toga kevu kalo buuropino winyo'moneyokwe pasudo tov neya wuuduuwallunupinogaikikono.