2 Koorin 7 - Gooti Toolluro Yogalokwono

¹ Miyobuuravoo, Gooti toolluro subuu'yamju su ton me'no adanekubweyokaikono. Toro tovino tov nevu nemi kulako tokwe'aro kuudo tokwe'aro tovallu yiuwi'nokai kaiyako mollugolanekumo'mdupudo pasudo toorai neya amollol'movodukwopinogawano. Aki toro tonol kaiya'no nyumwala'jokwe tovino Gooti toollu kwako tomuu'aro neya amwalogawano. Toro tonollu Gooti gavnokwe toolluro sugupasudo tollovo yiunokuudo neya aullo'movanekwopiyogapuro.

Koorinda'ai Jisasolluro a'mwo abolo ton kuudo souragunyumo'nopo tonyuno Poolol ilaiyo soka tovinokwono

² Kevu kemoro poowokalago ton nemi neya dousanekubweyogaulo. Nevu yiuwi'nokai pwolno puru'monodo togaikullu ma'no ma'no miyaikullugolodowadonogano. Aki nevu yiuwi'nokai pwolno puru'monodo togaikullu kaiyako mamollugolaikumeyokwenogano. Aki nevu yiuwi'nokai pwolno puru'monodo togaikulluro noonyumwonyu punyu mai'nekumallokwenogano. Toro kwonol kuruv kemi yiuno ilaiyo to'no yaikullugolodowadonogano.

³ Moro yogalo aikudumo akav kemi bwolomodomekumwogapiyo'mo'maiyo. Toro kuvi kuruv nuu aro me'no aikudumokwono. “Kevu nemoro poowokalago tovi anakuuto tomuu me'no kuuloda'mdupudogaikikono.” Toro te nevu kemino kalo buuropino nekullunodowodo su tov mimwogapiyonokwono. Nevu aiyo amwala'joga'deyo oo abola'joga'deyo buro'nyo buro'nyo anekullumo'no'ji kuga kuruv kevu nemoro kalo buuropino tovi anakuuto tomuu kuuno mujomwekovla'mwalpinogaikikono.

⁴ Nuu kemino aro kuudo yaikuu'dumdonyugono. Kevu moro yogalo tovi kuvinono uumjunodupudodeyo. Yaikuu'dumdonyugono. Toro togaikulluno tov kemi kuuguudo ikujo'moneyokwe luko miyodumdonyugono. Toro kwonyu kuruv kemi kuu'maiyo toru'no mollovo'dogalaikudodumdonyugono. Aki toro toonyu kemino ilaiyo bwotonyo yokwenyugono. Aki kemoro jurogudo danyumwojodopudo tov mi aiyowomno yo'movanuwopiyodowodokwono. Toro toonyu yiuwi'nokai jul'nyo go'no go'no banyu'mo'mdopure kuga kuruv nuu ilaiyo bwotonyo to'no yodumdonyugono. Aki moro ilaiyo yodumdo su tov bwotonyo bilowakuu'nowo'ji bwolouro'bwo'nodawodokwono.

⁵ Nevu kwako Masedooniya toru abai'movowo toga nemoro kwa'mgu kulako ton iruko ku'nono mamwalowonogano. Toro kuvi kuruv go'no go'nodo tomuuda'ai tabunyuwuulo tooro amallajuwonogano. Nemoro kwa'mguda'ai kulako ton a'mwo tabunyuwuulo nekubweyodopure su toorogai jumapollunyo sajuwonogano. Aki nemoro anakuuto tomuuda'ai kuudo kun kuruv luko sajuwonogano.

⁶ Toro kuvi kuruv Gooti toolno'gwowi a'mwo abolo mougurotowosi yodopure tobuuravuro jul'nyo tonyu dugoga wireyokwekono. Gooti su tool Taitosolluro abai'movoka tovi'aro nemoro jul'nyo tonyu dugoga to'no anekirovokaikono. Toro tovino tov jul'nyo su toorai nevu paiko to'no subwosunowonogano.

⁷ Nevu paiko subwosunowo su tov yiuno Taitosolluro abai'movoka tovida'ai to'no subwosunowonolmaiyo. Toro kuvi kuruv aro kunyuda'ai kuruv paiko subwosunowonogano. Sumdomgu kevu Taitosolluro jul'nyo amaroka toga kevu dugoga kwirovopogaikikono. Kevu su toro kwirovopo tovi Taitosol uumjunyuno sumaiyokwe lukomgu nemoro jul'nyo tonyu dugoga anekirovokaikono. Aki puruv Taitosol nemi aro anekudokaikono. “Oo Koorinda'ai Jisasolluro a'mwo abolo ton Poolollu wuuru'mallo'mo guureji winodupudogano. Toro ton Poolollu kaiyako me'no sugologopo tovino kalo winodupu Pooleke aki aiko te uuguro'mwonyo'moneyokwe kuudo guureji sau'mwakopogano.” Taitosolluro kemino su toro anekudoka tovi wuu'nyuno sumawoneyokwe nuvu ilaiyo sonyugono. Moro ilaiyo bwotonyo su tov kuuno ibwosungelabodumdonyugono.

⁸ Su tov aro tovinokwono. Moro sumdomguda'ai pas sokwollekwopiyabo tovi kemi yogalo amodaikurugolonyugono. Su toro amodaikurugolo tovida'ai kevu jul'nyo amaropo kuvi kuruv nuu kalo manyunadopiyo. Sumdomgu nuvu aro kuudo me'no souromaronyugono. Oo moro sumdomguda'ai pas sokwollapiyo tovida'ai Koorinda'ai a'mwo abolo ton jul'nyo nomapinodeyo. Su toro kuudo sauro toga'gwono kalo anyunokanyugono. Toro kuvi kuruv kemoro jul'nyo amaropo su tov yiuno kula'nyo toga'gwono kworokakwono.

⁹ Toro te aga'no'gwowi nuvu ilaiyo bwotonyo sumwakono. Moro ilaiyo bwotonyo sumwako su tov kevu jul'nyo amaropo tovino'maiyo. Toro kuvi kuruv kevu jul'nyo amaropo toga kemi ma'no ma'nodo tonyuno yainyuno sumaveyokwe Gooti toollomno kuudo souragunyumo'nopo tovinokwono. Kuudo neya jaullulo. Nuu kemi yogalo amodaikurugolo su tovi kevu Gooti toolluro ilaiyo winodowodo tomgu'aro uumjunyuno sumaveyokwe kemi ma'no ma'no pasudo tonyuno kalo aikullunokagaikikono. Toro tovino tov nevu kemi kaiyako puru'monodo kuruv miyaikullugolowonogano.

¹⁰ Neya duu'nyulo. A'mwo abolo pun Gooti toolluro ilaiyo winodowodo tomgu'aro uumjunyo'mo winodupudogano. Toro ton kemi ma'no ma'no pasudo tooraino jul'nyo ibwosunopi Gooti toollomno kuudo youragunyumo'nodupudogano. Aki a'mwo abolo su ton Gooti toollomno kuudo souragunyumo'nupi tovi'aro Gooti tool kemoro ma'no ma'nodo tovuro kirumwallo tovida'ai bomollurolovomokalokwiyokwekono. Aki a'mwo abolo su ton Gooti toollomno kuudo souragunyumo'nupi su tovino aki aiko te kuudo mabwolloullokweyogano. Toro kuvi kuruv kwako akavida'ai a'mwo abolo tono'gwowi kemi ma'no ma'no pasudo molludo'movla'mdupudo tooraino kalo wingovla'mdupudogano. Toro kalo wingovla'mdupudo kuvi kuruv kemi ma'no ma'no pasudo su toorai ku'nono miyuu'dapiyodupudogano. Toro ton kemi pasudo molludo'movla'mdupudo su toorogai yiunokuudo nomabolpinogano.

¹¹ Kevu kuudo neya jaullulo. Aga'no'gwowi Gooti toolluro womdo ikullodowo'jure tovida'ai kevu kemi kaiya'no pasudo mujumovla'mdupudo tonyuno jul'nyo ibwosunodupudogaikikono. Jul'nyo ibwosunodupudo su tov kemi ikuduka'bwo'dowo'jure tovida'ai kevu kuudo guureji aro yau'dupudogaikikono. Oo nevu ma'no ma'no pasudo toorai manyu tomuu neya amodukwopiyogawano. Su toro kuudo yauropi kevnokwe togaikul kworado jumwonyo'moneyokwe kevu guureji dodowiyoku'bworosodupudogaikikono. Aki kevu kaiya'no pasudo puvino surodo ikuunodowodogaikikono. Aki kevu Gooti toollu kwako tomuu'aro wiyodupudogaikikono. Aki nuu kemi bekuru'mallo'moneyokwe tovino guureji ikullunodowodogaikikono. Aki kevu sugupasudo molludo'movlaiyo'mo ikullunodowodo togaikulluno tov womdo guureji yodupudogaikikono. Aki kevu kaiya'no pasudo tovi kirumwallo'moneyokwe kuudo me'no saullajupogaikikono. Kemoro yiuwi'nokai su toro mujumovla'mdupudo tov kuu'maiyo toru'no aro nekuduuwallunodupudogaikikono. Nevu sugudo to'no yodowadonogano. Su toro nekuduuwallunodopure togaikullu me'no wonekuma'dowadonogano.

¹² Toro te nuvu kemi pas puruv me'no sokwollekwopiyabonyugono. Pas su tov a'mwo kaiyako amolloluwosoka tooke'aro a'mwo kaiyako su'namovoka tooke'aro toorallu yovo'dogallo'moneyokwe sokwollekwopiyabonyumaiyo. Toro kuvi kuruv kevu kuurotokwe toonollu sobanyo guureji mollonekuda'mdupudo tovino Gooti toolluro sumdo tovi kuu'maiyo toru bomollolupto'naikubweyo'moneyokwe nuvu pas su tov me'no sokwollekwopiyabonyugono.

¹³ Toro te nevu kemino aro kuudo saikuu'mwa'juwonogano. Oo yiuno sugupasudo yo'mo to'no winodupudodeyo. Su toro kuudo saikuu'mwa'juwo tov nemi jurogudo danekullumwojodowodokwono. Aki kevu Taitosollu jurogudo aduuwimwojopo tovino tov Taitosol ilaiyo subwosunokaikono. Taitosolluro ilaiyo soka su tovino ne kwonol kuruv wuu'nowono ilaiyo bwotonyo sumwa'juwonogano. Nemoro ilaiyo su tov sumdomguda'ai nemi jurogudo adanekullumwojumwa'juko tovi uuwolo'mdowo bwotonyo sulmwolokakwono.

¹⁴ Nuvu sumdomgu kemi ilomodomorekwopiyo'moneyokwe Taitosollu aro me'no kuudonyugono. “Oo Koorinda'ai Jisasolluro a'mwo abolo ton ilaiyo to'no yodupudogano.” Kuudonyugono. Toro te a'mwo su tool kemi abekuru'maroka toga kevu kuvinono yodopure togaikullu aikwonokaikono. Toro tovino tov nuu kemi ilomodomorekwopiyo'moneyokwe yogalo ado su tovino wogulo mibwosunmonyugono. Aki yiuwi'nokai kuuguudo me'no aikujajuuwo ton nebal'nodogano. Aki kuuguudo pun kemino kuudowo kun kuruv kuunano'maiyo. Toro te Taitosol kemi aikwonoka toga, Oo Koorinda'ai su tonyuno kuuguudo tov nebalo'mdeyo. Kuudo me'no souromarokaikono.

¹⁵ Aki Taitosol kemino aro kuudo yaikuu'dowodekono. Oo Koorinda'ai Jisasolluro a'mwo abolo ton moro yogalo tovi ilaiyo to'no uumjunodupudodeyo. Aki toro ton luko tokwe bu'buto tokwe mi ilaiyo to'no amollonumaropodeyo. Kemino su toro kuudo yaikuu'dowodekono. Toro tovino tov Taitosol kemino kalo buuropino winodowodekono. Aki kalo buuropino winodowodo su tov muunyu toru'aro bwotonyo sulmwolaiyo.

¹⁶ Nuu kwonyu kuruv kemino ilaiyo bwotonyo sumwakono. Su tov aro tovinokwono. Nuu kemino aro kuudo me'no yaikuu'dumdonyugono. Oo Koorinda'ai su ton sugupasudo tovi kuvinono uumjunodupudodeyo. Su toro kuudo yaikuu'dumdo tovino tov ilaiyo bwotonyo sumwakono.