2 Koorin 6 - Gooti Toolluro Yogalokwono

Kuurotokwe tooro womdo mujumovla'mdopure tovida'ai jul'nyo amallajupo tovinokwono

¹ Gooti tool a'mwo abolo tonyu wiyo'mwojo'moneyokwe womdo yodowodekono. Toro te nevu kweke womdo yodowado toonol kemi guureji aro ikudano'mokwono. “Kevu Gooti toolluro yasuwa'wino sugumaluko me'no ma'dupudo tovi nyuu'dapimwalpiyo.” Ikudano'mokwono.

² Neya duu'nyulo. Aiyoga Gooti toolluro yogalo adoka puruv aro sakwollungikokwono. “Moro ajeso toga kuvinono abai'movokakwono. Toro toga, Donekullo'mwojonoo, anyudopogaikikono. Toro anyudopo tovi kaduko aikullonyugono. Aki kemi kirumwallo tovida'ai bomollurolovekumokalokwiyo'moneyokwe iruko tollugwo kuvinono bai'mo'mduke toga aikullo'mwojonyugono.” Sakwollungikokwono. Toro te neya duu'nyulo. Aga Gooti tool kemi ilaiyo yaikullugollo'moneyokwe togakono. Aki iruko akallugwoji Gooti tool kemoro ma'no ma'nodo tovuro kirumwallo tovida'ai bomollurolovekumokalokwiyo'mo kwinadopiyo.

³ Toro te nevu aro kuudo yau'dowadonogano. Nemoro womdo yodowa'jure tovida'ai a'mwo abolo punyu nuumjukura'jo. Su tov a'mwo abolo pun nemino aro nodumwalpiyokwe tovinokwono. “Oo Pooleke'aro gavuge avai womdokwe toorogai'aro tooro Gooti toolluro womdo tovi pi'mwono miyodupudorogano.” Nodumwalpiyokwe tovinokwono.

⁴ Toro te nemoro yiuwi'nokai pasudo mujumovla'mdowado tovi'aro nevnokwe toonolluno kuu'maiyo toru'no aro wuuduuwallunodowadonogano. “Oo nevu Gooti toolluro womdokwe kuunodonogano.” Wuuduuwallunodowadonogano. Toro toonollu tabunyuwuulo go'no go'nodo togai'aro aki jul'nyo bwotonyo togai'aro aki kaiyako yanekullugolodopure tovida'ai luko bwotonyo yodowado togai'aro su ton baneki'mo'mdupudonogano.

⁵ Aki nemi iwago nekuromiyodupudo togai'aro aki wuulo killo'mo ago tonyu kuulomeranekubweyodupudo togai'aro aki magu'nyokwe tooro nemi mwodovonekuma'dupudo togai'aro su ton toro baneki'mo'mdupudonogano. Aki nevu womdo bwotonyo yodowado tekwojonol sa ilaiyo mwo'dowadonogano. Aki toro toonol mujuko bolodowadonogano.

⁶ Aki nevnokwe toonol kaiya'no pasudo togai migolamo'nodowadonogano. Aki nevu Gooti toolluro kuudo tonyuno you'movla'mdowadonogano. Aki toro toonollu kaiyako sanekullugolpi tovino biyolo madou'mwonyopiyokwenogano. Toro kwonol kuruv yiuwi'nokai a'mwo abolo tobuurai yiuno ilaiyo to'no igolodowadogano. Aki Gooti toolluro Kuullo tool mollubworonekumokavla'mdowo'jure tovi nevu uumjunodowadonogano. Aki a'mwo abolo pubuuraino kalo buuropino kuunodo mollodowadonogano.

⁷ Aki toro toonol nebal'no yogalo to'no dodowadonogano. Aki yiuno Gooti toolluro jurogudo tokwe to'no momjumovla'mdowadonogano. Toro toonol nemoro anato tokwe kwonamo tokwe tovallu sugupasudo tov iro'mwomido to'busuko guureji gudupola'dowadonogano.

⁸ Aki puga nevu yovo aguto ma'dowadonogano. Toro kuvi kuruv puga'no'gwowi yovo aguto mama'dowadonogano. Aki pworo nemino yovo tov bwolomonekumwogapiyodapudorogano. Toro kuvi kuruv pworono'gwowi nemino yovo tov ilomodomoropiyodapudorogano. Aki pworo nemino aro kuudo yau'dupudorogano. Oo Pooleke tooro kuunano youkuu'nadodupudorogano. Toro kuudo yanekuu'dupudo kuvi kuruv kuvimaiyo. Nevno'gwowi yiuno nebal'no yogalo to'no jokwenogano.

⁹ Aki pworo nemi miworovonekuma'dupudo kuvi kuruv pworono'gwowi nemi me'no iworovonekuma'dupudonogano. Aki nevu nyomjobolmovlaiyo'mo yodowado kwonol kuruv aiyo kuuno mujomwekovla'mdowadonogano. Aki a'mwo pworo nemi kironekumwallodupudonogano. Toro kuvi kuruv nemi ku'nono maromiyanekubweyodupudonogano.

¹⁰ Nevu kalo nekullunodowodo kuvi kuruv nemi poowokalago togai to'gwowi yiuwi'nokai toga ilaiyo yodowadonogano. Aki nevu apoo'nyaiyo tobuurobusuko imo'nodowadonogano. Toro kwonol kuruv a'mwo abolo bwotonyago tobuurai Gooti toolluro ago muunyomda'ai sugumaluko tonyu bwotonyago neya amapureyokwe wiyo'mwojodowadonogano. Nevu kwako akavida'ai kuto ivito ton nonagutonogano. Toro kwonol kuruv Krais toollu'aro yiuwi'nokai sugumaluko tono'gwowi me'no mwora'dowadonogano.

¹¹ Oo Koorinda'ai Jisasolluro a'mwo abolobuuravoo, nemoro kuuguudo ton yiulo miyoupuurosumwakuuwono. Toro kuvi kuruv kuu'maiyo toru'no aikudumwakuuwono. Aki nemoro poowokalago ton kemi me'no kuusaikubweyodowadonogano.

¹² Toro te nevu nemi poowokalago tokwe kemi ilaiyo yaikullugolodowadonogano. Toro kuvi kuruv kevnokwe togaikulno'gwowi kemi poowokalago togai nemi ilaiyo miyanekullugolodupudogaikikono.

¹³ Toro te kevu moro kwoloraiyo tobuurekullubusuko nuvu aro ikudumo'mokwono. Nevu nemoro poowokalago ton kemino kudo'aiko me'no kuusaikubweyodowadonogano. Toro to'busuko kubalno kev kugaikul kuruv kemoro poowokalago ton nemino aval'no neya dousanekubweyogaulo.

Nevu Jisasolluro a'mwo abolo tonol Gooti toollu ilomoropiyo'moneyokwe ago to'busuko wimo'nodowado tovinokwono

¹⁴ Kevu Jisasolluro a'mwo abolo togaikul a'mwo abolo Jisasolluno kuudo muubweyodupudo tonyu nuuguro'mwonyumwalpiyo. Kuudo pun jaullulo. Kevu sugupasudo tovi yodupudo togaikul a'mwo kisuvolo yodupudo togai avaiwomdo nokwo ipinogaikuldukono? Awiyo, ku'nono mipinogaikikono. Aki puruv kevu bako tovi anakuuto tomuu mujomwekovla'mdupudo togaikul dugumwuulo tomuu kuuno kirounomollodupudo togai nokwo ibwoto'nupinogaikuldukono? Awiyo, ku'nono mibwoto'nupinogaikikono.

¹⁵ Aki Krais tool Satanyeke sumwoluko aval'no nokwo wosunbullunoldukono? Awiyo, ku'nono mwosunbullunekono. Aki kevu Jisasolluro a'mwo abolo togaikul a'mwo abolo kuudo muubweyodupudo su togai kuudo aval'no mamwora'dupudogaikikono.

¹⁶ Aki kuunano gooti pwol Gooti toollu ilomoropiyo'moneyokwe ago tovi anakuuto tomuu nokwo kuulludapiyonoldukono? Awiyo, ku'nono maulludapiyonekono. Kuudo neya jaullulo. Nevu Gooti aiyo mwalodowodo toollu ilomoropiyo'moneyokwe ago to'busuko wimo'nodowadonogano. Su toro tovino Gooti tool aro me'no adokaikono. “Nuu a'mwo abolo tonyu akuuto tomuu mwalo'mi su togai pla'mwalmonyugono. Toro toonyu kemoro Gooti kuunodo nuuwimo'numwalmonyugono. Aki su ton moro a'mwo abolo kuunodo nonyumo'numwalpinogano.” Gooti tool su toro me'no adokaikono.

¹⁷ Aki Aguto tool aiko te aro adokaikono. “Kevu a'mwo abolo kuudo muubweyodupudo tonyuro akuuto tomuuda'ai wuugollu'movopi neya jeru'mdeyomwalnogaulo. Aki kevu yiuwi'nokai kaiyako sugolamo'nyungiko tonyu nuumgu'mo'numwalpiyo. Kevu su toro supi tov nuu kemi ilaiyo nomollekuma'mwalmonyugono.

¹⁸ Aki nuu kemi Tellunumiyago ikullumo'numwalmonyugono. Aki kevu moro kwolaiyo taiyo togaikulbusuko nonyumo'numwalpinogaikikono. Nuu Aguto Jurogudo Kuunodokwe toonyu subuu'yamju toro me'no adosumono.” Adokaikono.