2 Koorin 5 - Gooti Toolluro Yogalokwono

Gooti tool aiyo yiunokuudo mujomwekovlaiyo'moneyokwe kulako muuduko ton nonekullabwono tovinokwono

¹ Nevu aro kuudo nyau'mwakuuwono. Nemoro kwako akavida'ai kulako tov sel ago to'busukokwono. Sel ago su tov awo'dolopiyo'ji tov Gooti tool kulako muuduko puruv nonekullabwonekono. Kulako muuduko su tov nemi ago muuduko to'busuko nonekullumo'nonokwono. Ago muuduko su tov kwako akavida'ai a'mwo tooravuro ato togai mododupudo'maiyo. Toro kuvi kuruv Gooti gavnokwe toolluro sokwollanekubweyo'ji su tokwe gamoro mwalodowodo muunyu kai'muu aiyo yiunokuudo mujomwekovla'mwalanonogano.

² Kuudo pun jaullulo. Aga nevu sel ago tovi kuulomwalodowado tonol kumdo aro daillokwenogano. “Oo nemi muunyu kai'muuda'ai kulako muuduko tonyu youro muuduko to'busuko molloso'mo anekullunadopiyoo.” Daillokwenogano.

³ Nevu kulako muuduko su tokwe youro muuduko to'busuko amollosa'ji toga nemoro kuullo tobuuro muukanyulmaiyo tobuurobusuko mimo'numwalpinobuurogano.

⁴ Aki nevu nemi sel ago to'busuko kulako akanyu kuuno mwalodowa'jure toga jul'nyo ibwosunowa'ji kumdato daillokwenogano. Toro tonol youro mollurolodukwopiyodupudo to'busuko kubalno nemoro kulako abola'ji tov nomollurolodukwopiyo'mo tovino manekullunodowodonogano. Toro kuvi kuruv kulako muuduko tokwe to'gwowi youro to'busuko neya amollanekubweyoneyokwe tovino ilaiyo nekullunodowodonogano. Su tov aro tovinokwono. Aiyo yiunokuudo mujomwekovlaiyo'moneyokwe kulako su tov kwako akavida'ai kulako bolodowodo tovuro aiko toru nomaronokwono.

⁵ Kulako muuduko su tovi mallo'moneyokwe Gooti gavnokwe tool me'no sovrovanekubweyokaikono. Gooti toolluro kulako muuduko tovi nekullabiyo'mo subuu'yamju yodowodo su tov aga yere mama'mwakuuwo kuvi kuruv gamoro Kuullo toolno'gwowi me'no anekullabokaikono. Toro anekullaboka su tov aro tovino'mo nekuduuwallodowodokwono. “Oo kulako muuduko tovino subuu'yamju yodowodo su tov kuvinono nomarano'mdeyo.” Su toro tovino'mo nekuduuwallodowodokwono. Aki Gooti toolluro Kuullo tool nemi me'no kuulonekumwalodowodekono.

⁶ Su toro tovino yiuwi'nokai toga jurogudo danekullumwojodowodokwono. Toro tonol aro kuudo me'no yau'dowadonogano. Oo nevu kwako akavida'ai kulako akavi kuuno amwala'ji toga Aguto toolluro ago tomuu yere milai'mo'mwakuuwono. Yau'dowadonogano.

⁷ Toro tonol noonyumwonyu muunyu kaimuuda'ai tonyu nemoro kwako akavida'ai sumdo togai bekonarowa'ji tomgu'aro yomjomwekovla'mdowadonolmaiyo. Toro kunol kuruv nemi Aguto toollu kuudo uubweyodowado tomgu'aro to'gwowi yomjomwekovla'mdowadonogano.

⁸ Toro te kuuguudo me'no aikudumo su tov yiuwi'nokai toga jurogudo danekullumwojodowodokwono. Toro te nevu kwako akavida'ai kulako akanyu kuuno mwallo'moneyokwe manekullunodowodokwono. Toro kuvi kuruv nemoro kwako akavida'ai kulako akanyu wuugollu'meyo'mo to'gwowi ilaiyo nekullunodowodokwono. Aki su tov aro tovinokwono. Nemoro kulako akanyu me'no kuugollu'mowa'ji toga'no'gwowi nemi Aguto tooke gamoro ago tomuu nokwo mujomwekovla'mwalanonogano.

⁹ Toro tovino tov nevu kwako akavida'ai kulako akavi kuuno amwala'ji toga'deyo oo kulako akavi me'no kuugollu'mowa'ji kuga kuruv aro kuudo yau'dowadonogano. Oo nemi Aguto toollu ilaiyo igollo'moneyokwe pasudo tonyu neya amolludovogawano. Kuudo yau'dowadonogano.

¹⁰ Su toro neya molludo'movla'mwalano tov aro tovinokwono. Nevu yiuwi'nokai pwolno puru'monodo tonol Krais toolluro sumdollu toru nodawanonogano. Toro da'mdowa'jure tonollu Krais tool kooti yogalo danekullowo'ji nemoro pasudo tonyu jagilonekono. Nemoro agasuro kulako akakwe mwalodowa buro'nyo buro'nyo pasudo mujumovla'mdowado tonyu nojagilonekono. Me'no ajagilo'ji toga sugupasudo'mdeyo oo ma'no ma'no pasudo'mdeyo nemoro yiuwi'nokai pasudo tonyuro mubiyo tov nevnokwe go'no go'nodo tonol nomaranokwono.

Nevu Krais toolluro mago to'busuko mollodo'movlaiyo'moneyokwe womdo tov Gooti tool anekubweyoka tovinokwono

¹¹ Krais tool nemi kooti yogalo nodanekullo'jokwe tovino tov nevu Aguto su toolluno luko yodowadonogano. Toro toonol a'mwo abolo tonyu nebaikuuguudo tokwe modomollodowadonogano. Toro modomollodowa'jure tovino a'mwo abolo ton, “Oo nebalo'mdeyo,” neya adupureyokwe tovino womdo su tov yodowadonogano. Aki nemoro womdo yodowado su tovino Gooti gavnokwe tool kuudo me'no yanekuu'dowodekono. Aki kev kugaikul kuruv kemi poowokalago kuunodo tokwe nemoro womdo yodowado su tovino kuudo me'no yanekuu'dupudogaikikono. Nuu kemino su toro kuudo saikuu'mwakono.

¹² Nevu nevnokwenolluno aki aiko te ilomodomoropunyu mimwakuuwono. Toro kuvi kuruv kevno'gwowi nemoro womdo yodowa'jure tovida'ai nemino ilaiyo nokwo ilomodomoronekwopiyapinogaikikono. Su tov aro tovinokwono. A'mwo pworo kemi poowokalago tonyu noonyumwonyu womdo pun yo'mo kuullodowodo su tovino biyolo uu'mwojodupudorogano. Toro tooro yiuno kwa'mgu kulako tovida'ai womdo tonyuno to'no ilomodomoropiyodapudorogano. Toro te kevu nemoro womdo ilaiyo yodowado tovida'ai a'mwo su toorai yogalo nokwo mojurugolmwalpinogaikikono.

¹³ A'mwo pworo nemino tov, “Oo a'mwo amomo toorobusuko mujumovla'mdupudorogano,” bwolomonekumwogapiyodapudonogano. Toro abwolomonekumwogapiyapi kuvi kuruv nevno'gwowi Gooti toolluro womdo tovi kuvinono yodowadonogano. Aki kevu togaikul nemino tov, “Oo a'mwo su tooro pi'mwono mujumovla'mdupudorodeyo.” Kevu su toro kuudo sanekuupi tov ilaiyokwono. Su tov aro tovinokwono. Nemoro womdo tov kemi ikullo'mwojo'mo to'no yodowado tovinokwono.

¹⁴ Kuudo neya jaullulo. Krais tool nemino kalo buuropino winodowodekono. Krais toolluro kalo buuropino winodowodo su tov nemi mollubworonekumokavla'mdowo'jure tovi uumjunowa'ji gamoro womdo tov wiyokwenogano. Toro toonol aro kuudo youroma'dowadonogano. A'mwo pwolnodo tool yiuwi'nokai a'mwo abolo tonolluro aiko toru mallo'moneyokwe abolokaikono. Toro toolluno tov nevu yiuwi'nokai a'mwo abolo uuguro'mwonyodowado tonol me'no abollunguuwo tonolbusuko imo'nodowadonogano.

¹⁵ Aki Krais tool yiuwi'nokai a'mwo abolo tonyu wiyo'mwojo'mo aboloka su tov aro tovinokwono. Nevu Krais tooke aiyo imo'nodowado tonol nevnokwenolluro kuudo tovida'ai yomjomwekovlaiyo'moneyokweyo'maiyo. Toro kuvi kuruv Krais tool nemi nekullo'mwojo'mo bolo'no aiyo aiko te adukavoka su toolluro kuudo tovida'ai to'gwowi neya yomjomwekovla'mwalanonogano.

¹⁶ Sumdomgu nevu su toro tovino kuudo miyaullajuwonogano. Toro toga nevu Krais toolluno kwako akavida'ai kuudo toorogai to'no souroonyajuuwekono. Toro kuvi kuruv aga'no'gwowi nevu kwako akavida'ai kuudo toorai'aro Krais toollu miyouroonyokwenogano. Aki toro tonol yiuwi'nokai a'mwo abolo kunyuno kuruv kwako akavida'ai kuudo uumdo toorai'aro miyouroonyokwenogano.

¹⁷ Toro tovino tov a'mwo pwol Krais toollu me'no uuguro'mwonyodowodoldeyokwe a'mwo su tool muuduko me'no imo'nodowodekono. A'mwo muuduko imo'nodowodo su toolluro sumdomguda'ai somjomwekovlaiyajuko ton me'no yovla'mdupudogano. Toro tool Gooti toolluro muuduko sokwollosungiko toolbusuko imo'nodowodekono. Aki gamoro pasudo kun kuruv muuduko me'no imo'nodupudogano.

¹⁸ Yiuwi'nokai tono tono nonekullumo'nugelabodupudo su ton Gooti toolluda'ai to'no imo'nodupudogano. Gooti su tool Krais toolluro womdo sopiyoka tovi'aro nemi gavuge sumwoluko noullo wosunyo'moneyokwe me'no amomgurovanekubweyokanogano. Aki Gooti tool a'mwo abolo tonyu momgurowoso'moneyokwe womdo tov nemi me'no anekubweyokaikono.

¹⁹ Toro anekubweyoka toonol aro moruudodowadonogano. “Oo Gooti tool yiuwi'nokai a'mwo abolo kwako akavi aiyowomno mwalodupudo togai momgurowosunyo'moneyokwe puuto tov Krais toolluro womdo sopiyoka tovi'aro me'no soulosokaikono. Su toro tovi'aro a'mwo abolo gavuge me'no amomgurowosungiko ton Gooti tool kemoro ma'no ma'nodo tonyuro kirumwallo tonyu nomodukwopiyonekono.” Moruudodowadonogano. Toro te Gooti tool a'mwo abolo tonyu gavuge momgurowosodowodo tovino kuuguudo tokwe moruudomollo'moneyokwe womdo tov nemi me'no anekubweyokakwono.

²⁰ Toro tovino tov nevu Krais toolluro mago to'busuko molloda'mdowadonogano. Toro toonol gamoro yogalo ma'dowado tokwe aro moruudodowadonogano. “Oo nevu Krais toolluro yovo tovida'ai guureji ikudoganano'monogano. Gooti tool kemi gavuge momgurovaikubweyo'moneyokwe Krais toolluno kuuguudo tovi kevu kuudo neya duubweyogaulo.” Moruudodowadonogano.

²¹ Kuudo neya jaullulo. Krais tool ma'no ma'no puru'monodo kuruv miyajukekono. Toro kuvi kuruv Gooti tool nemi nekullo'mwojo'moneyokwe tov nemoro ma'no ma'nodo ton Krais toollu muunyu toru sulloullubweyokaikono. Toro te aga nevu Krais ma'no ma'no miyajuko su toollu me'no uuguro'mwonyodowadonogano. Toro tovino tov Gooti toolluro sumdo tovi sugudo me'no wimo'nodowadonogano.