2 Koorin 4 - Gooti Toolluro Yogalokwono

Kuurotokwe tooro kwa'bootool to'busuko imo'nodupudo toorai kuuguudo sugudo tov kuuluuwo'dowodo tovinokwono

¹ Gooti tool gamoro womdo su tov nemino kalo manekumwonyodowodo tovi'aro me'no anekubweyokaikono. Toro tovino tov nevu gamoro womdo su tovi imwogapiyo'moneyokwe nemi poowokalago togai burawo manekullunodowodonogano. Toro kuvi kuruv nevu womdo su tovi kuuno nomomjumovla'mwalanonogano.

² Toro te nevu womdo su tovi momjumovlaiyo'moneyokwe wogulpasudo toorogai'aro yiulpasudo toorogai'aro su toorai buulo uugunyumopiyodowadonogano. Aki joukuuromato'mo pasudorodeyo oo Gooti toolluro yogalo tovi kaiya'nodo tomgu'aro moruugunyumwojo'mo pasudorodeyo kworai kuruv miyodowadonogano. Toro kwonol kuruv Gooti toolluro sumdo tovino'gwowi yiuno nebal'no yogalo to'no kuu'maiyo toru moruudodowadonogano. Kuu'maiyo toru'no su toro moruudodowado toonolluno yiuwi'nokai a'mwo abolo ton aro kuudo yanekuu'dupudonogano. Oo a'mwo akaro nebal'no yogalo to'no dodupudorodeyo. Yanekuu'dupudonogano.

³ Toro kuvi kuruv nemoro kuuguudo sugudo moruudodowa'jure su to'gwowi a'mwo abolo punyuro kuudo tovi kuu'maiyo mabomollolupto'nubweyodowodogano. A'mwo abolo su ton du'muudo tomuuno puuto tovi pla'mwalpinogano.

⁴ Satanyol kwako akavida'ai gooti toolbusuko imo'nodowo a'mwo abolo kuudo muubwemwakopo su tobuuravuro kuudo tonyu galobu'duvolomwora'dowodekono. Toro galobu'duvolomwora'duke tovida'ai a'mwo abolo su tobuuro sumnowojokwe tonbusuko imo'nodupudogano. Aki su toro tobuuro Krais toolluno kuuguudo sugudo tovuro bako tovi ku'nono mwonodupudogano. Aki Krais su tool Gooti toolbusuko irol'mowosunodekono. Toro toolluno kuudo miyouroma'dupudekono.

⁵ Neya duu'nyulo. Nevu nevnokwenolluno mamoruudomollumwakuuwonogano. Toro kwonol kuruv aro modomollodowadonogano. “Aguto tool Jisas Kraisol kwekono.” Modomollodowadonogano. Aki nevu Jisasollu uumjunodowado toonol kemi ki'nato womdokwe toonolbusuko kemiyo'mo womdo ikullumovla'mdowadonogano.

⁶ Kuudo neya jaullulo. Gooti tool aro me'no adokaikono. “Dugumwuulo tomuuda'ai bako tov imo'nono.” Toro adoka Gooti su tool nemoro poowokalago tonyu Jisas Kraisolluro bako tov me'no anekuuwokaikono. Gooti toolluro bako bwotonyo su tov Jisas Kraisolluro sumdomago tovi'aro nevu me'no wonoma'dowadonogano. Toro te bako su tov nemoro poowokalago tonyu anakuuto tomuu me'no pwopiyodowodokwono.

⁷ Nemoro poowokalago anakuuto tomuuda'ai bako pwopiyodowodo su tov kuuguudo sugudo tovino yovekurajokwono. Kuuguudo sugudo su tov nuugwiyo bwotonyo tokwe biyoma'dupudo to'busukokwono. Kuuguudo sugudo kuulanekwo'dowodo su tovuro jurogudo tov nevnokwenolluro'maiyo. Toro kuvi kuruv yiuno Gooti toollurokwono. Toro te Gooti toolluro jurogudo su tovi kuu'maiyo toru'no wuuduuwallo'moneyokwe nevu kwa'bootool jurogudo maiyo to'busuko imo'nodowadonogano. Toro tekwojonollu gamoro kuuguudo sugudo tov kuulanekwo'dowodokwono.

⁸ Neya duu'nyulo. Jul'nyo tago tooro go'no go'nodo tomgu'aro nemi kaiyako yanekullugolodupudo kuvi kuruv jurogudo kuulanekwo'dowo'jure tokwe nemi ku'nono magurojonekuda'mdupudorogano. Aki puga nemoro kuudo tov noo'nookwo yau'dowadonogano. Toro kuvi kuruv nebaikuudo kuulanekwo'dowodo su to'gwowi ku'nono manekugollu'mo'mdowodokwono.

⁹ Aki nemi romiyanekubweyo'mo yodopure kuvi kuruv Gooti tool nekwonyapino to'no miyodowodekono. Aki iwago nekuromiyodopure tovida'ai bwolo'dowado kuvi kuruv kaiyako mamollounonekwapiyodupudonogano.

¹⁰ Toro te yiuwi'nokai toga nemoro kulako tovi'aro Jisasolluro aboloka tov mokavla'mdowadonogano. Su toro mokavla'mdowa'jure tovi a'mwo abolo ton kuu'maiyo toru'no wononekuma'dupudogano. Su tov aro tovino'mokwono. Jisasolluro aiyo adukavoka kuruv nemoro kulako tovi'aro yiuwi'nokai toga neya wonoma'mwalpino'moneyokwe tovinokwono.

¹¹ Nebalokwono, nevu aiyo imo'nodowado tonol Jisasollu womdo wiyodowado tovino tov yiuwi'nokai toga noromiyanekubweyo'mo winodupudorogano. Toro tonollu a'mwo abolo ton kuu'maiyo toru'no wononekuma'dupudogano. Aki Jisasolluro aiyo adukavoka kuruv nemoro kulako tonyu romiyanekubweyo'mo yodopure su tovi'aro kuu'maiyo toru'no wonoma'dupudogano.

¹² Toro te nevu Jisasolluro kuurotokwe toonol kuuguudo moruudomollodowado tovida'ai bollo'mo tov nemi akuuto toru womdo yodowodokwono. Toro kuvi kuruv nemoro moruudomollodowado su tovida'ai aiyo yiunokuudo mujomwekovlaiyo'moneyokwe to'gwowi kemi akuuto toru womdo me'no kuulaikullodowodokwono.

¹³ Gooti toolluro yogalo puruv aro sakwollungikokwono. “Nuu kuudo me'no kuubweyo tovino tov kuuguudo amoruudokwono.” Toro sakwollungiko to'busuko kubalno nevu kuudo me'no uubweyodowado tovino tov kuuguudo moruudodowadonogano.

¹⁴ Nevu aro kuudo me'no yau'dowadonogano. Gooti tool Aguto Jisasollu aiyo aiko te amodukavoka su tool nevu Jisasollu me'no uuguru'mwonyodowado kunollu kuruv aiyo aiko te nomonekudukawonekono. Toro monekudukavowo'ji kevuge'aro nevuge'aro yiuwi'nokai tonollu gavuge mwallo'moneyokwe nonekumokailawonekono. Su toro tovino kuudo me'no yau'dowadonogano.

¹⁵ Toro te neya duu'nyulo. Noonyumwonyu jul'nyo tago nemi baneki'mo'mdupudo ton kemi ikullo'mwojo'mogano. Toro ikullo'mwojodopure tovida'ai Gooti toolluro yasuwa'wino sugumaluko tov bomje'nugoulno bomje'nugoulno yawo'ji a'mwo abolo bwotonyago ton Gooti toollu, Nenoloo, wuudumwalpinogano. Toro kuudupi tovida'ai Gooti toolluro yovo tov aguto ilno ilno yawo'ji muunyu toru'aro nyulmwolawonokwono.

Nemoro poowokalago ton yiuwi'nokai toga aiyo aiko te imo'nugelabodupudo tovinokwono

¹⁶ Toro tovino tov gamoro womdo yodowado su tovi nemi poowokalago togai burawo'mo yowa'ji miyuu'dapimwalanonogano. Toro kuvi kuruv nevu gamoro womdo su tovi kuuno nomomjumovla'mwalanonogano. Nemoro kwa'mguda'ai kulako tov wollainyo imo'nodowo'jure kuvi kuruv nemoro anakuuto tomuuda'ai poowokalago to'gwowi yiuwi'nokai iruko go'no go'nodo tollovai aiyo aiko te kuuno imo'nugelabodowodokwono.

¹⁷ Nevu kwako akavi manyu toga mamwalanonogano. Aki nemoro agasuro jul'nyo baneki'mo'mdupudo su tobuuro kula'nyobuurogano. Toro kuvi kuruv jul'nyo baneki'mo'mupudo su tobuuro aro tov yovrovanekubweyodupudogano. Lukomgu nevu aiyo yiunokuudo mujomwekovlaiyo'moneyokwe tovi amara'ji toga Gooti tool noonyumwonyu sugumaluko tollovo nyoullanekubweyonekono. Aki Gooti toolluro sugumaluko youllanekubweyodowo'jure su tollovai nevu ku'nono majagilanonogano.

¹⁸ Toro te agasuro jul'nyo wonodowado su tobuuraino kuudo kwolallo miyourukwapiyokwenogano. Toro kunol kuruv lukomgu Gooti toolluro nonekullabwono mwonodowado su tollovaino'gwowi kuudo kwolallo neya yourukwapimwalanonogano. Su tov aro tovinokwono. Agasuro buro'nyo buro'nyo wonodowado ton yere yovla'mdupudogano. Toro kuvi kuruv buro'nyo buro'nyo nevu mwonodowado tonyuno'gwowi yiunokuudo mujo'movla'mwalpinogano.