2 Koorin 3 - Gooti Toolluro Yogalokwono

Subuu'yamju Muuduko tovino kuuguudo moruudomollodowado tovinokwono

¹ Toro te kevu yogalo aikudumwakuuwo akanyu wonopi nemino aro kuudo nyanekuupiyo. Oo a'mwo su tooro kevnokwero aki aiko te ilomoropunyu jadokwovo. Nemino su toro kuudo nyanekuupiyo. Aki kuudo neya jaullulo. A'mwo pworo kemoro womdo sugudo tovino bomollolupto'noso'moneyokwe pas punyuno supto yodupudorogano. Toro kuvi kuruv nevno'gwowi nemoro womdo sugudo tovino bomollolupto'noso'moneyokwe pas punyuno supto miyodowadonogano. Toro tovino tov nemoro womdo tovino pas purukwe'aro kemi ikwopiyabiyo'mo'mdeyo oo kevu a'mwo pworai uuwapiyo'mo'mdeyo tovino supto miyodowadonogano.

² Su tov aro tovinokwono. Kevu Koorinda'ai Jisasolluro a'mwo abolo togaikul nemoro pas to'busuko nonekullumo'nodupudogaikikono. Pas su tov puukwollikwiyo tovi miyakwollungiko kuvi kuruv nemoro poowokalago tonyuno'gwowi me'no sokwollosungikokwono. Kevu su toro to'busuko nonekullumo'nodupudogaikikono. Toro te yiuwi'nokai a'mwo abolo ton kemi ikwonopi nemino aro kuudo yanekuupinogano. Oo Pooleke tooro womdo sugudo sajuporodeyo. Yanekuupinogano.

³ Aki kevu aro tovino kuu'maiyo toru wuuduuwallodupudogaikikono. Kevu Krais toolluro pas sokwollopiyaboka to'busukogaikikono. Pas su tov nemoro ato tovi'aro sokwollopiyabokakwono. Pas su tov pen tokwe puukwollo sakwolloka'maiyo. Toro kuvi kuruv aiyo mujomwekovla'mdowodo Gooti toolluro Kuullo tooke to'gwowi sakwollokakwono. Aki pas su tov Moosesolluro loowo to'busuko sulbweko tousi puukwollo sakwolloka'maiyo. Toro kuvi kuruv a'mwo abolo tonyuro poowokalago tomuuno'gwowi me'no yokwollubweyodowodokwono.

⁴ Su toro tovi yo'moneyokwe tov Gooti tool Krais toollu'aro nemi me'no ajanekubweyokaikono. Toro tovino tov nevu aro kuudo guureji yau'dowadonogano. Oo nevu gamoro womdokwe kuunodo wimo'nodowadonoldeyo. Kuudo yau'dowadonogano.

⁵ Neya duu'nyulo. Nevu aro kuudo miyaullokwenogano. Oo nevnokwenolluro jurogudo tokwe Gooti toolluro womdo tovi jumwakuuwono. Miyaullokwenogano. Toro kwonol kuruv aro kuudo to'no yaullokwenogano. Oo yiuno Gooti gavnokwe toolluro jurogudo nekubweyoduke tokwe womdo su tov kuvinono yodowadonoldeyo. Kuudo yaullokwenogano.

⁶ Toro te nevu gamoro jurogudo nekubweyodowo'jure tokwe subuu'yamju muuduko tovino kuuguudo to'gwowi nokwo moruudomollanonogano. Subuu'yamju muuduko su tov loowo tovida'ai puukwollo to'busuko sokwollopiyabingiko'maiyo. Toro kuvi kuruv Gooti toolluro Kuullo toolluda'ai abingikokwono. Kuudo neya jaullulo. Loowo tov a'mwo abolo tonyu romiyosodowodo kuvi kuruv Gooti toolluro Kuullo toolno'gwowi aiyo yiunokuudo mujomwekovlaiyo'moneyokwe tov wiyodowodekono.

⁷ Gooti tool Moosesollu loowo kwiyoka su tov aro nekuduuwallodowodokwono. Kevu nobolpinogaikikono. Toro nekuduuwallo'moneyokwe loowo su tovuro yogalo ton sulbweko tovallu puukwollo sokwollosungikokwono. Kuudo neya jaullulo. Loowo su tov, “Kevu nobolpinogaikikono,” nekujo'moneyokwe kuvi kuruv Gooti tool Moosesollu kwiyoka toga gamoro bako bwotonyo kurukwe'aro kwiyokaikono. Toro kwiyoka toga Moosesolluro sumdomago tovi bako su tov awopiyajukokwono. Aki Gooti toolluro bako bwotonyo pwopiyoduke su toga Isuraiyolda'ai a'mwo abolo ton Moosesolluro sumdomago tovi ku'nono mwonyajupogano. Lukomgu loowo tovuro bako bwotonyo su tov piyarupto imo'no'no me'no sovlavokakwono.

⁸ Toro tovino tov aga'no'gwowi Gooti tool gamoro Kuullo toollu'aro womdo kwiyo'ji su to'gwowi Gooti toolluro bako bwotonyo tovino guurejuno bomollolupto'nosonokwono. Bako su tov aiyogasuro bako kula'nyo Moosesollu awopiyajuko su tovi uuwolowo'ji Gooti toolluro jurogudo tovino kuu'maiyo bomollolupto'nosonokwono.

⁹ Aiyoga loowo tov a'mwo abolo kisuvolo wiyodopure tonyu kooti yogalo aro adubweyajukokwono. “Oo kemi nerekumwallo'mogaikikono,” to'no adubweyajukokwono. Aiyoga loowo su tov Gooti toolluro jurogudo tovino wuuduuwallo'moneyokwe bako tokwe abomollolupto'nosajukokwono. Toro kuvi kuruv Gooti toolluno kuudo kuubwepi ton gamoro sumdo tovi sugudo wimo'nyo'moneyokwe puuto to'gwowi aiyogasuro loowo su tovi uuwolo'mdowodokwono. Toro uuwolowo'ji bako bwotonyo tokwe Gooti toolluro jurogudo kuunodo tovino nekuduuwallunonokwono.

¹⁰ Su tov kuvi kuunogano. Aiyoga Moosesolluro loowo su tovuro jurogudo tov Gooti toolluro bako tovi'aro kuu'maiyo kuuduuwallajukokwono. Toro kuvi kuruv aga'no'gwowi loowo su tov bako nonaguto imo'nodowodokwono. Toro kuvi kuruv Gooti toolluro womdo muuduko sadopiko to'gwowi bako to'busuko nekuduuwallodowodokwono. Muuduko su tov aiyogasuro loowo tovuro jurogudo tovi uuwolo'mdowodokwono.

¹¹ Kuudo neya jaullulo. Moosesolluro loowo su tov Gooti toolluro jurogudo tovida'ai bako tokwe amokabokakwono. Toro amokaboka su tov yiunokuudo wollo'mo'maiyo. Toro kuvi kuruv Gooti toolluro womdo muuduko sadopiko to'gwowi yiunokuudo mujo'movla'mwalonokwono. Yiunokuudo mujo'movla'mwalono tovino tov gamoro bako kuruv uuwolowo'ji muunyu toru'aro guureji pwopimovla'mwalonokwono.

¹² Lukomgu Gooti toolluro bako bwotonyo su tov nemi yiunokuudo novanekwopiyono tovino sogwollo to'no kinodowadonogano. Toro novanekwopiyono tovino tov nevu kuuguudo sugudo tokwe moruujo'moneyokwe luko miyowa'ji kuu'maiyo toru neya amoruudogawano.

¹³ Aki toro tonol Moosesolluro sajuko to'busuko miyokwenogano. Moosesol aro sajukekono. Isuraiyolda'ai a'mwo abolo ton gamoro sumdomago tovida'ai Gooti toolluro bako pwopiyodowodo tovi noonpiyokweyo'mo tool gami sumdomago tovi youro tokwe abwososajukekono. Bako su tov piyarupto wolluno wolluno sumaiyokwe nyebuulopiyo'mo yoduke tovi a'mwo abolo ton noonpiyokwe youro tokwe abwososajukekono.

¹⁴ Toro kuvi kuruv Isuraiyolda'ai a'mwo abolo tonyuro kuudo tov lumdo to'no aulopiyajupogano. Aki aga kuga kuruv subuu'yamju uumdo tovida'ai mojagilodupudo toga kemoro kuudo tovi youro to'busuko kuuno bwososodupudorogano. Youro bwososodupudo su tovi Gooti tool yiuno Krais toollu'aro modosodukwopiyodowodokwono.

¹⁵ Toro te yiuwi'nokai iruko sumo'nugelabiyajupo tollovogai'aro aki aga kugake'aro a'mwo abolo tobuuro Moosesolluro loowo tovi mojogilmelabodupudogano. Tadeyoo, su toro mojogilmelabodupudo toga youro kudo'aiko pwekwo kemoro poowokalago tonyu kuuno wuulluku'dowodokwono. Toro te kavlo tovino ku'nono miyouroma'dupudogano.

¹⁶ Toro kuvi kuruv a'mwo pwol Aguto toollomno kuudo souragunyumo'no'ji to'gwowi Gooti tool youro kudo'aiko wuulluku'dowodo su tovi nokwo modosodukwopiyonekono.

¹⁷ Neya duu'nyulo. Aguto su tool Gooti toolluro Kuullo tool kwol kuunogano. Toro te Aguto toolluro Kuullo su tool a'mwo pwollu aulomwalo'ji toga a'mwo su tool youro kudo'aiko wuulluku'dowodo su tomuuda'ai me'no birolo'nugolokwodowodekono.

¹⁸ Toro te Gooti tool nevu yiuwi'nokai Jisasolluro a'mwo abolo tonolluro sumdomago tovida'ai youro kudo'aiko nekulluku'dowodo su tovi me'no modosanekudukwopiyodowodonogano. Toro modosanekudukwopiyodowodo tonol Aguto toolluro bako bwotonyo tovi me'no wonodowadonogano. Toro tonol a'mwo abolo gabovo punyu bako su to'busuko pwopiyodowadonogano. Su tov nevu Jisasolbusuko imo'nano'moneyokwe Aguto toolluro Kuullo tool yiuwi'nokai toga mollumo'nanekubweyodowodonogano. Toro mollumo'nanekubweyoduke tovi'aro nevu Aguto su toolbusuko irol'mowosuno imo'nyokwenogano.