2 Koorin 2 - Gooti Toolluro Yogalokwono

¹ Nuvu kemi iru'mato'mo yere mabekuru'maro tov aro kuudo sauronyugono. Oo nuvu kemiyo'mo jul'nyo yogalo tokwe mokabodo'mure tovino a'mwo abolo su tobuuro kalo nyubwosunpiyo. Su toro kuudo yaurono kemi yere mabekuru'maronyugono.

² Su tov aro tovinokwono. Nuu kemi jul'nyo yogalo adaikubwemi tov kevno'gwowi mi ilaiyo miyanyugolpinogaikikono.

³ Su toro tovino tov nuu pas sumdomguda'ai tov me'no sokwollekwopiyabonyugono. Pas sumdomguda'ai su tovi yakwollono aro kuudo sauronyugono. Kevu kalo subwosunopujuko'mno'juki nuu abekuru'ma'mi toga kemino ilaiyo mibwosuno'mujukonyugono. Su toro tov nyumo'no'jokwe nuu yere mabekuru'marono toga sumdomguda'ai pas tov me'no sokwollekwopiyabonyugono. Aki nuu kemino aro kuudo me'no yaikuu'dumdonyugono. Oo numoro ilaiyo yodumdo tovino a'mwo abolo su to kun kuruv avalo tovino ilaiyo nyupinodeyo. Kuudo yaikuu'dumdonyugono.

⁴ Neya duu'nyulo. Moro sumdomguda'ai pas sokwollekwopiyabo su tov kemi jul'nyo ikubweyo'moneyokwe sokwollekwopiyabonyumaiyo. Toro kuvi kuruv moro kemino kalo buuropino tov yiunokuudo mudo'dollanuwopiyodowodo tovino kevu kuudo neya youromapino'moneyokwe pas su tov sokwollekwopiyabonyugono. Toro toonyu pas su tovi sakwollo toga tabunyu bwotonyo tokwe'aro moro poowokalago jul'nyo tokwe'aro kumdaluko bwotonyago togai'aro ton nuwo'dopure toga pas su tov toro sokwollekwopiyabonyugono.

⁵ A'mwo pwol kemi akuuto toru tabunyu amolloluwosowo'jujuko'mno'juki yiuno mino to'no mamanubweyowo'jujukekono. Toro kuvi kuruv kevu yiuwi'nokai togaikulluno'gwowi tabunyu amolloluvaikubweyowo'jujukekono. Nuu su toro tovino yogalo bwotonyago maikudumonyugono.

⁶ Kemi akuuto toru tabunyu amolloluvaikubweyoka a'mwo pwolluno kuudo me'no youroma'dupudekono. Kevu bwotonyago togaikul a'mwo su toollu manyu tomuu'aro yomwalodupudogaikikono. Kemoro su toro yodupudo tovida'ai a'mwo su toollu me'no kirumwallodupudekono. Toro te a'mwo su tool kirumwallo purukwe'aro tovino supto miyadopiyo.

⁷ Toro kwol kuruv gamoro kalo kalo'mo yodowodo tov gavnokweyolluro kuudo uubweyodowodo tovi yiunokuudo nuugollu'mowo'jo. Toro tovino tov aga'no'gwowi kevu a'mwo su tekwojuro ma'no ma'nodo tonyuro kirumwallo tovi yiunokuudo modukwopiyopi gamoro tagunyo tovi dugoga neya duuwirovomokwolabogaulo.

⁸ Toro tovino tov kevu a'mwo jul'nyo aikullaboka su toollu aro neya wuuduuwallunupinogaikikono. Oo nevu gumino kalo buuropino anekullunadopiyo. Kevu su toro neya wuuduuwallunupinogaikikono.

⁹ Kevu kuudo neya jaullulo. Moro sumdomguda'ai pas aikuuwopiyabo su tov kemi yamju ikulloganyo'moneyokwe aikuuwopiyabokwono. Kevu moro yiuwi'nokai yogalo daikubweyodo'mure tonyu kuvinono uumjunpinogaikuldukono oo muumjunpinogaikuldukoneyokwe tovino sokwollekwopiyabokwono.

¹⁰ Toro te kevu a'mwo su toolluro ma'no ma'nodo tonyuro kirumwallo tovi yiunokuudo amodukwopipi toga nuu kwonyu kuruv a'mwo su toolluro ma'no ma'nodo tonyuro kirumwallo tovi yiunokuudo nomodukwopimonyugono. Moro su toro amodukwopimi su tov kev kugaikulluda'ai ikullo'mwojo'moneyokweyokwono. Nuu su tov Krais toolluro sumdo tovi kuvinono yodumdonyugono.

¹¹ Moro su toro yodumdo tov aro tovinokwono. Satanyol gamoro kuudo do'mopto tokwe nemi nekuuwolowo'ji nomolloguuronekudapiyo'jokwe tovinokwono. Nevu aro tovino kuudo nyau'mwakuuwono. Oo Satanyol gamoro kuudo do'mopto tokwe nemi kaiyako yanekullugollo'moneyokwe womdo yodowodoldeyo. Nevu su toro kuudo nyau'mwakuuwono.

Poolol wagwolago Troowas toru Taitosolluno mougurotowosi soka tovinokwono

¹² Kuudo neya jaullulo. Nuvu sumdomgu Krais toolluno kuuguudo sugudo tokwe modomollo'moneyokwe wagwolago Troowas toru ai'movonyugono. Toro ai'movo toga nuu kuuguudo sugudo tokwe womdo momjumovlaiyo'moneyokwe Aguto tool kudo'aiko ausanubweyokaikono.

¹³ Toro kuvi kuruv mi nyugwai'yago toolbusuko Taitosol wagwolago su tovi yere mai'mo'mduke tovino tov moro kuudo tov mougurotowosi to'no sajonyugono. Toro toonyu nuu wagwolago Troowasda'ai a'mwo abolo tonyu, “Oo ilaiyokwono,” dowono ajapinowonogano. Toro japinyuno sumawoneyokwe nuu wagwolago Troowas tovi wuugollu'movono kwako Masedooniya akamuuno abonyugono.

Krais toolluno kuuguudo tov wobeya sudo kuunyokwe to'busuko imo'nodowodo tovinokwono

¹⁴ Toro kuvi kuruv mi Gooti toollu, “Nenyoo,” wuujo'mo anyunadopiyo. Krais tool Satanyollu me'no kuuwolovokaikono. Nevu kunol kuruv Krais me'no uuguro'mwonyodowado toollu'aro kuuwolovowonogano. Toro te Gooti tool nevu Krais tooke me'no kuuwolo'nyuguuwo tonollu yiuwi'nokai toga mollubworonekumokavla'mdowodekono. Aki Gooti su tool nemi'aro Krais toolluno kuuguudo tov yiuwi'nokai tomuu juru'bworapiyodowodekono. Su tov yovekurajo aka'busukokwono. Wobeya sudo puruv yiuwi'nokai tomuu juru'bworopiyodowodo to'busuko kubalno Krais toolluno kuudo uubwemelabodupudo tov yiuwi'nokai tomuu bomje'nugoulodawodokwono.

¹⁵ Aki nemoro nomwallo kuruv wobeya sudokwe juto to'busuko imo'nodowodokwono. Su tov muunyu akai'muu mokailodawo Gooti toolluro subuuto tovi wobeya sudokwe to'no wimo'nodowadonogano. Aki toro tonol a'mwo abolo du'muudo tomuuda'ai abirolo'nugolokuumwakopo togai'aro aki du'muudo tovi avla'mwakopo togai'aro yiuwi'nokai su tonyu akuuto toru mwalodowadonogano. Toro tonyu nevu Krais toolluro wobeya sudo to'busuko wimo'nodowadonogano.

¹⁶ Toro te a'mwo abolo du'muudo tomuuno avla'mwakopo ton wobeya sudo su tovi wuunodupudo kun kuruv bolnodo tovida'ai buullujudo to'busuko to'no wimo'nodowodokwono. Su toro ton bolnodo tomuuno novlapinogano. Toro kuvi kuruv a'mwo abolo du'muudo tovida'ai abirolo'nugolokuumwakopo tonyuno'gwowi wobeya sudo su tov aiyokwe wuunodowo sudo ilaiyo to'no wimo'nodowodokwono. Su ton Gooti tooke aiyo yiunokuudo mujomwekovlaiyo'moneyokwe tovi kuvinono nomapinogano. Kuudo neya jaullulo. Kwako akavida'ai a'mwo pwol Krais toolluro wobeya sudo to'busuko wimo'nugovlaiyo'mo tov gavnokwe tool jurogudo nonagutekono.

¹⁷ Aki neya duu'nyulo. A'mwo ibwasokwe pworo Gooti toolluro yogalo tokwe nuugwiyo ki'noma'dupudorogano. Toro kuvi kuruv nevu ibwasokwe pwonolno'gwowi a'mwo su toorobusuko miyomjomwekovla'mdowadonogano. Gooti tool nemi amonekwopiyaboka tovino tov yiuno nebal'nodo tomgu'aro molludo'movla'mdowadonogano. Toro toonol Krais toolluro jurogudo tokwe to'no modomollodowadonogano. Toro modomollodowa'jure tovi Gooti tool nemi kuu'maiyo toru'no muugonanekwo'dowodekono.