2 Koorin 12 - Gooti Toolluro Yogalokwono

Gooti tool gamoro yiulo yogalo tonyu Poolollu kuu'maiyo toru adodolukuu'nosoka tovinokwono

¹ Nuu ilomodomoropunyu kuuguudo tovino aro kuudo yau'dumdonyugono. Oo kuuguudo su tov yasuwa'no plawonokwono. Su toro kuudo yau'dumdo kuvi kuruv ilomodomoropunyu kuuguudo pugai'aro neya dumovla'mwalmonyugono. Toro te nuu Aguto toolluro wojo to'busuko nyuduuwallodowodo togai'aro yiulo yogalo dodolukuu'nosodowodo togai'aro tonyuno ikudumo'mokwono.

² 14-pela kworomo tobuul me'no abawoka toga nuu Krais toollu uuguro'mwonyodumdo toonyu Gooti tool gamoro ago muunyu kai'muuno anumokailokanyugono. Toro numokailno sumaiyokwe sulugumdo puruvallu uuwolokailano sulugumdo naba 3 tovi sulai'movonyugono. Su toro sulai'movo toga nuu moro kulako tokwe sulai'movonyudukono oo moro kuullo tooke sulai'movonyudukono. Su toro tovino nuu kuudo miyau'mwakono. Yiuno Gooti toolno'gwowi kuudo nyau'mwallo.

^3-4 Aki Gooti tool muunyu kai'muu numokailno sumaiyokwe sullogalanyugono. Gooti toolluro ago su toru'no yovo tov Paradaisovokwono. Toro te aki aiko te nuu kulako tokwe sulanyudukono oo moro kuullo tooke sulanyudukono. Su toro tovino kuudo miyau'mwakono. Yiuno Gooti toolno'gwowi kuudo nyau'mwallo. Gooti tool mi anumokailoka su toga nuu yogalo punyu kuu'nonyugono. Yogalo su ton a'mwo abolo pubuurai mamoruujo'mogano. Aki yogalo su tonyu kwako akavida'ai a'mwo pwolnodo kwol kuruv ku'nono mamoruudonekono.

⁵ Toro te nuvnokwe tekwonyuno ku'nono milomodomoropinamonyugono. Toro kwonyu kuruv Gooti anumokailoka su toolluno'gwowi ilaiyo yo'mi ilomodomoropiyamonyugono. Aki moro wollainyo pasudo kunyuno kuruv nokwo ilomodomoropiyamonyugono.

⁶ Kuudo neya jaullulo. Nuvu nebal'no yogalo ikudodumdo toonyuno tov a'mwo kuudo maiyokwe pwolbusuko mimo'numonyugono. Nuu sulomodomoropinami toonyuno kevu aro kuudo nyanuupiyo. Oo a'mwo su tool noonyumwonyu jurogudokwe toolluno tov yovo aguto kurukweyoldeyo. Kuudo nyanuupiyo. Toro kuvi kuruv nuvu milomodomoropinami to'gwowi aro tovallu nokwo wonoma'mwalpinogaikikono. Moro pasudo ikuduuwallodo'mure tokwe'aro moro yogalo ikudodo'mure tokwe'aro su tovalluno to'no neya wonopi mino kuudo yanuu'mwalpinogaikikono.

⁷ Gooti tool gamoro yiulo yogalo tonyu kuu'maiyo toru'no dodolukuu'noso'moneyokwe mi bwotonyago toga nyuduuwallodowodekono. Toro nyuduuwallodowodo tovino Gooti tool kuudo saurokaikono. Oo Poolol yiulo yogalo bwotonyago tonyuno kuudo youroma'dowodo tovino tov ilomoropunyu nyawo'jo. Ilomoropunyu nyawo'jokweyo'mo tov dado neya ibwosunmwalonekono. Gooti tool su toro kuudo yau'no sumaiyokwe dado puruv moro kulako tovi numa'duke toga nokwo wonyapino to'no sokaikono. Dado su tov Satanyolluro kuurokadokwe pwolbusuko bino sumaiyokwe moro kulako tovi abonumarokakwono. Toro te yiuwi'nokai toga nuu dado su tovida'ai kwaru'kwarupto ibwosungovla'mdumdo su tov nuvnokwe tekwonyu ilomoropunyu nyamiyokwe tovinokwono.

⁸ Nuu Aguto toollu pugasal puga aro ajugononyugono. “Oo moro dado anuunadopiko akavi guu nokwo manyudukwopibinekudeyo?” Ajugononyugono.

⁹ Toro kuvi kuruv Aguto tool aro anyudokaikono. “Moro yasuwa'wino sugumaluko gubweyodumdo tokwe guu supto miyodumdekugono. Su tov guu jurogudo mimo'nubi toga moro jurogudo gubweyodumdo to'gwowi gumi bwotonyo nogujumo'numwalonekugono.” Aguto tool su toro anyudokaikono. Toro tovino tov nuu Krais toolluro jurogudo tov numi nonyumo'numwalono'moneyokwe nuvnokwe toonyu aro neya yainyunmwalmonyugono. Oo nuu jurogudo nonaguto imo'nodumdekwonyudeyo. Nuu jurogudo nonaguto imo'nodumdo su tovino ilaiyo bwotonyo yo'mi kuu'maiyo toru dodoluwosunmwalmonyugono. Su tov aro tovinokwono. Nuu jurogudo mimo'nodo'mure tekwonyu Krais toolluro jurogudo to'gwowi mi neya kuulonumwalono'moneyokwe tovinokwono.

¹⁰ Toro te nuu Krais toollu womdo wiyodumdo toonyu jurogudo nonagutokwe imo'nodumdekwonyugono. Su toro tovino nuu ilaiyo yodumdonyugono. Aki a'mwo pworo mino burolyogalo bwolomonumwogapiyodapudo tovino ilaiyo yodumdonyugono. Aki a'mwo pworo numi jul'nyo nubweyodupudo tovino ilaiyo yodumdonyugono. Aki a'mwo pworo nuu Krais toollu uumjunyokwe tekwonyu kaiyako yanyugolodopure tovino ilaiyo yodumdonyugono. Aki noonyumwonyu kaiyako banyumo'nodopure tonyuno ilaiyo yodumdonyugono. Moro ilaiyo yodumdo su tovino kavlo tov arokwono. Nuu wollainyo to'no sumo'numi toga Krais toolluro nyo'mwojodowo'jure tokwe jurogudo kuvinono imo'nodumdonyugono.

Poolol wagwolago Koorinda'ai Jisasolluro a'mwo abolo tonyu jurogudo aduuwimwojoka tovinokwono

¹¹ Nuu a'mwo kuudo maiyokwe pwolbusuko imo'nodumdo toonyu nuvnokwenyuno me'no aikudumokwono. Moro yogalo aikudumo tov aro tovinokwono. Kevu Gooti toolluro womdokwe toonyuno sulomonuwopiyapujuko'mno'juki ilaiyo sopujukogaikikono. Toro kuvi kuruv kevu milomonuwopiyodapudo tovino tov nuvnokwe tekwonyuno'gwowi neya ilomodomoropinamo'mokwono. Kuudo neya jaullulo. Nuu a'mwo yasuwa'no imo'nodumdo kwonyu kuruv a'mwo kuurotokwe aguto su tovoso mi ku'nono manuwolo'mdupudorogano.

¹² Nuu kevuge amwallajo toga duuwallo jurogudo judo'no judo'nodo ton kemi kuu'maiyo toru aikuduuwallunyajonyugono. Toro ikuduuwallunodore tonyu wonodupu kuudo sanuullajupogaikikono. Oo Poolol Jisasolluro kuurotokwe kuunodoldeyo. Sanuullajupogaikikono. Aki jul'nyo pworo banyumo'nodopure toga paiko tooraibusuko kaveno to'no mokavla'mno sumoneyokwe nuu kuurotokwe womdo su tovi kuuno amjumovlaiyajonyugono.

¹³ Nuu Jisasolluro mollu'bwoto go'no go'nodo tonyu akuuto toru mwalodum womdo amjumovlaiyajonyugono. Aki kevu togaikulluro akuuto toru womdo aval'no amjumovlaiyajonyugono. Toro kuvi kuruv womdo yiuno puru'monodo to'gwowi kemi akuuto toru miyajonyugono. Su tov arokwono. Nuu kemoro nuugwiyodeyo pun neya nyo'mwojupino'moneyokwe maikudoganyajonyugono. Su tov kemoro kuudo tonyu jul'nyo aikullumo'nowo'jujukokwono. Toro te nuu kuvinono miyajonyugono. Toro tovino, kalokwono, aikudumono.

¹⁴ Kevu kaduko neya donuu'nyulo. Nuu pugasal toga kemi me'no abekuru'maronyugono. Toro toonyu aga aki aiko te bekuru'mallo'moneyokwe me'no sovrowosunmwakonyugono. Aki nuu kemi jul'nyo nekubwemiyokwe aki aiko te aro maikudoganmwalmonyugono. “Oo kevu mi nyo'mwojo'moneyokwe nuugwiyo pun neya donyabilo.” Maikudoganmwalmonyugono. Su tov aro tovinokwono. Nuu kemoro kuto ivito nuugwiyo tonyu yo'mgonomallo'moneyokwe bekuru'ma'monyumaiyo. Toro kwonyu kuruv kemoro poowokalago tonyuno'gwowi yo'mgonekumallo'mo bekuru'ma'monyugono. Kuudo neya jaullulo. Kwoloraiyo tobuuro kemi kuunum kwolabolo teyaullu wiyo'mwojo'mo nuugwiyo ton mamollu'bworosodupudobuurogano. Toro kuvi kuruv kuunum kwolabolo teyaulno'gwowi kemi kwoloraiyo tobuurai wiyo'mwojo'mo nuugwiyo ton mollu'bworosodubuleyaukono.

¹⁵ Toro te nuu kemi ikullo'mwojo'moneyokwe moro yiuwi'nokai kuto ivito nuugwiyo tonyu dukwopimovla'monyugono. Aki kemi ikullo'mwojo'moneyokwe dukwogulo bwotonyo imo'naro'mi nuvnokwe tekwonyu nomorubwenumwalmonyugono. Nuu kemino kalo buuropino nyunodowodonyugono. Moro kalo buuropino nyunodowodo su tov muunyu toru'aro uuwolenodokwono. Toro tovino tov kevu kugaikul kuruv mino kalo buuropino neya aikullunogawono. Kevu mino kalo buuropino yiuno pwekwono aikulluno'ji kuruv ilaiyokwono.

¹⁶ Nebalokwono. Nuu kemoro nuugwiyo pun nyabiyo'moneyokwe maikudoganyajo tovino tov kemi jul'nyo maikubweyajonyugono. Toro kuvi kuruv kevu pugaikul mino aro nyudodupudogaikikono. “Oo Poolol nemi yourovanekubwollo'moneyokwe kuunano soukuu'nanekujajukoldeyo.” Pugaikul mino su toro dodupudo tov kuvimaiyo.

¹⁷ Kuudo pun jaullulo. Nuu moro a'mwo pworai kemiyomno amekwopiyabonyugono. Toro amekwopiyabo su tooro kemoro kuto ivito nuugwiyo punyu ai'nekumallajuporodukono? Awiyo. Mai'nekumallajuporogano.

¹⁸ Nuu Taitosollu guureji aro kuudonyugono. “Guu Koorinda'ai Jisasolluro a'mwo abolo tonyomno avla'bi tov nuu ilaiyo imonyugono.” Kuudonyugono. Aki Taitoseke plaiyo'moneyokwe a'mwo pwol nemi nellugwai'yago toolbusuko nekullumo'nodowodo toollu kemiyomno amoropiyabonyugono. Toro tooral kemi abekuru'marolo toga Taitosol kemoro kuto ivito nuugwiyo punyu ai'nekumallajukoldukono? Awiyo, mai'nekumallajukekono. A'mwo su tool nuvubusuko yiuno aval'no amjumovlaiyajukekono. Aki toro tool moro suvlomuujuko tovi yiuno aval'no kuumjungovlaiyajukekono.

¹⁹ Kevu nemino aro kuudo nyanekuupiyo. Oo a'mwo su tooro kworado jumwonyo'moneyokwe yogalo dodumwakovo. Kuudo nyanekuupiyo. Nevu kemino kalo buuropino nekullunodowodogaikikono. Toro te yiuwi'nokai yogalo su ton kemi jurogudo daikullumwojo'moneyokwe aikudumwakuuwono. Aki nevu Krais toollu me'no uuguro'mwonyodowado toonol Gooti toolluro sumdo tovi yiuno kuu'maiyo toru'no aikudumwakuuwono.

²⁰ Toro te neya duu'nyulo. Nuu aro tovino luko sumwakonyugono. Nuu kemi abekuru'ma'mi toga kemino aro kuudo nyaikuu'miyo. Oo moro yogalo me'no adapiyajo tonyu muu'nyubusuko to'no jumwakovo. Nyaikuu'miyo. Aki kevu moro yogalo tovi muu'nyubusuko supi tov nuu kemi kuudo ikuuteyo'mo abekuru'ma'mi toonyuno ilaiyo mamollonumapinogaikikono. Aki kevu pasudo aro tonyu mujumovla'mdopure togaikullu nobaikwonmiyo. Youllajunyo'mo yogalo togai'aro kwekuullu kuudo togai'aro mesubuuto togai'aro magu'nyo kuudo togai'aro burolyogalo togai'aro buulo yogalo togai'aro ilomoropunyu kuudo togai'aro kisuvolo'mo kuudo togai'aro pasudo su toorai mujumovla'mdopure togaikullu nobaikwonmiyo.

²¹ Aki aro tovino manyunodowodonyugono. Nuu kemi aiko te bekuru'maro'mi kevuge amwalmi toga moro Gooti tool mi nobwolomonumwogapiyawo'jokwe tovino manyunodowodonyugono. Aki kevu bwotonyago pugaikul ma'no ma'no pasudo aro toorai kiroungovla'mdupudogaikikono. Kaiya'no mollugolamo'nyo'mo pasudo toorogai'aro kwonyalo pasudo toorogai'aro kevnokwenyuro kulako tovi ilaiyo igollunyo'mo pasudo toorogai'aro pasudo su toorai pugaikul kuuno kiroungovla'mdupudogaikikono. Kevu pasudo su tooraida'ai yere miyouragunyumo'nodopure togaikullu nobaikwonmiyo. Nuu kuvinono abaikwonmi to'gwowi kemino wogulo ibwosuno'mi kumdaillo to'no mujumovla'monyugono.