2 Koorin 11 - Gooti Toolluro Yogalokwono

Poolol a'mwo kuurotokwe kuunano tooraino wako kuu'numwalpino'moneyokwe adumul'mwojoka tovinokwono

¹ Nuu kevu Koorinda'ai Jisasolluro a'mwo abolo togaikullu kuuguudo kula'nyo purukwe'aro ikudumo'mokwono. Moro kuuguudo su tov a'mwo kuudo maiyokwe pwolluro to'busuko sumo'no'ji kuruv kevu kaduko nonubwepino'mo anyunadopiyo. Toro te moro kuuguudo ikudumo akavi neya donuu'nyulo.

² Kuuguudo tov arokwono. Gooti tool kemino tov gami guureji neya uumjunpureyokwe tovino ilaiyo winodowodekono. Su toro to'busuko kubalno nuu kwonyu kuruv kemino tov Krais toollu neya uumjunpino'moneyokwe aval'no nyunodowodonyugono. Su tov aro to'busukokwono. Sujuraiyo kwonyalo mingiko puvi gami ganumiyago tool a'mwo pwolnodo toollu uumaso'moneyokwe me'no jesodowodekono. Su toro to'busuko kubalno kevu Krais toolluro a'mwo abolo kuunodo wimo'nyo'moneyokwe nuu kemi me'no ajaikubweyonyugono. Toro te kevu sujuraiyo kwonyalo miyodowodo to'busuko sugumaluko to'no sumo'nupi togaikullu nuu Krais toolluro ato tovi ikubweyo'mo ajudovaikubwemonyugono.

³ Toro kuvi kuruv nuu aro tovino luko yodumdonyugono. Aiyoga gabakuto tool gami pi'mwo kuudo tokwe Iviyovi soukuu'nuudoka to'busuko kubalno a'mwo pwol kemi nyoukuu'naikudo'jo. Aki kemoro kuudo jurogudo tovida'ai yiuno Krais toolluno to'no guureji uumjunodupudogaikikono. Toro togaikulluro kuudo jurogudo tovi a'mwo pwol Krais toolluda'ai manyu tomuu'aro nome'nekumovlawo'jokwe tovino nuu luko yodumdonyugono.

⁴ Moro luko yodumdo su tovino kavlo tov arokwono. Nevu sumdomgu Jisaseke'aro gamoro kuuguudo sugudo tokwe'aro Gooti toolluro Kuullo tooke'aro tonyuno pi'mwono me'no amodekumollajuuwonogano. Toro kuvi kuruv lukomgu a'mwo pworo bodupu kuunano aro tomgu'aro modekumollodupudorogano. Gabovo Jisasolluno tokwe'aro kuuguudo sugudo gabovo tokwe'aro kuullo gabovo pwolluno tokwe'aro tonyuno modekumollodupudorogano. Toro modekumollodopure tonyuno kevu ilaiyo to'no molloma'dupudogaikikono.

⁵ Kuudo pun jaullulo. Kevu a'mwo su toro modekumollodupudo tooraino dodupudogaikikono. “Oo kuurotokwe agutovosoganoo.” Kevu su toro dodupudo kuvi kuruv nuvno'gwowi aro kuudo sau'mwakono. Nuu a'mwo su toorai kwako tomuu'aro miwapiyokwenyugono. Kuudo sau'mwakono.

⁶ Nuu pi'mwono mamoruudumi kuruv Gooti toolluro kuudo aguto tovino'gwowi supto miyodumdonyugono. Yiuwi'nokai toga nevu kuurotokwe toonol kuuguudo sugudo tovuro kuudo aguto su togai kemi kuu'maiyo toru'no yodekubwasodowadonogono.

⁷ Nuu Gooti toolluro kuuguudo sugudo tokwe moruujo'mo tovino aro kuudo miyaullajonyugono. Oo yiuno a'mwo abolo nuugwiyo anubipi tonyuno to'no nokwo yodubwasumwalmonyugono. Nuu su toro kuudo miyaullajonyugono. Toro kwonyu kuruv nuu kemi ikullo'mwojo'mo Gooti toolluro kuuguudo sugudo tokwe kemi yasuwa'no sodekubwasajonyugono. Aki yasuwa'no sodekubwasajo su tomgu'aro nuvnokwe tekwonyu kwako tomuu bwolomodomoropinodam kevu togaikulluno'gwowi muunyu toru'aro sulomekwopiyajonyugono. Toro te nuu kemi ikullo'mwojo'moneyokwe womdo yasuwa'no sajo su tov kaiya'nodo'mdukono? Awiyo, nuu kaiya'no miyajonyugono.

⁸ Kuudo neya jaullulo. Nuu kemi akuuto toru womdo yo'moneyokwe kemoro nuugwiyo tov mamallajonyugono. Toro kuvi kuruv go'no go'nodo tomuuda'ai Jisasolluro a'mwo abolo tobuuravuro nuugwiyo tono'gwowi amallajonyugono. Nuugwiyo su tov Gooti toolluro womdo tovi sobanyo mollonyudaiyo'moneyokwe amallajonyugono. Toro te nuugwiyo su togai Jisasolluro mollu'bwoto punyu akuuto toru womdo miyajonyugono. Toro kuvi kuruv kemi akuuto toru'no'gwowi Gooti toolluro womdo yo'moneyokwe nuu a'mwo abolo pubuuravuro nuugwiyo tov kuuko to'busuko yodum kemi akuuto toru yasuwa'no sajonyugono.

⁹ Aki nuu kevuge amwallajo toga noonyumwonyu punyuno supto yodum kemi aro maikudoganyajonyugono. “Oo donyo'mwojulo.” Su toro maikudoganyajonyugono. Su tov kemi jul'nyo ikubweyo'mo manyunyajukonyugono. Toro kuvi kuruv su toro toga Masedooniyada'ai Jisasolluro a'mwo pworo wagwolago Koorin'no aboporogano. Su tooro nemi nellugwai'yago toorobusuko nonekullumo'nodupudorogano. Toro tooro bino sumaveyokwe moro noonyumwonyu supto yodore tonyu abonyabiyajuporogano. Toro te nuu sumdomgu kemi jul'nyo ikubweyo'mo manyunyajuko to'busuko kubalno lukomgu kuga kuruv jul'nyo maikubwemwalmonyugono. Aki nuu noonyumwonyu punyuno supto sumi kuga kuruv anyo'mwojupureyokwe kemi maikudoganmwalmonyugono.

¹⁰ Moro su toro ikullodumdo tovino yiuwi'nokai kwako Akaiya tomuu yomollo'mi ilomodomoropinmwolamonyugono. Aki Krais toolluro nebal'no yogalo tov mi me'no kuulanuwo'dowodo tovino tov nuu yogalo jurogudo aro dodumdonyugono. “Oo a'mwo pwolnodo kwol kuruv mi ku'nono madanuumjukuronekono.” Dodumdonyugono.

¹¹ Aki kevu aro kuudo nyaupiyo. “Oo Poolol nemino kalo buuropino mwinodowodo tovino tov nemi manekudoganyajukekono.” Kevu su toro kuudo nyanuupiyo. Neya duu'nyulo. Nuvno'gwowi kemino kalo buuropino kuvinono nyunodowodonyugono. Aki su toro tovino Gooti tool me'no youronuma'dowodekono.

¹² Aga kuga kuruv nuu aro maikudoganodumdonyugono. “Kevu mi nyo'mwojo'moneyokwe nuugwiyo pun donyabilo.” Maikudoganodumdonyugono. A'mwo ilomodomoropinyokwe pworo aro youkuu'nadodupudorogano. “Oo nevu Poololbusuko yodowadonogano.” Toro kuvi kuruv a'mwo su tooro nuugwiyo ki'noma'dupudorogano. Nuvno'gwowi a'mwo su toorobusuko nuugwiyo mai'noma'dumdonyugono. Toro te moro pasudo yodumdo su tov a'mwo nuugwiyo ki'noma'dupudo tooravuro mago tonyu uubuto'mdowodokwono. Aki nuu pasudo su tovi kuuno mujumovla'mwalmonyugono.

¹³ Neya duu'nyulo. A'mwo ilomodomoropunyokwe su tooro kuunano kuurotokwe imo'nodupudorogano. Su toro tooro a'mwo abolo tobuurai youkuu'nuujo'mo womdo yodupudorogano. Aki su tooro a'mwo abolo tobuuravuro sumdo tovi molloguulludapiyo'moneyokwe Krais toolluro kuurotokwe kuunodo toorobusuko wuuduuwallunodupudorogano.

¹⁴ Su toro yodupudo tooraino nevu mamorumoukuropiyokwenogano. Su tov aro tovinokwono. Satanyol gavnokwe tool Gooti toolluro bako tovi anakuuto tomuuda'ai ensel mwalodowodo pwolbusuko kuunano yalo'nowo'ji molloguuronekudapiyodowodekono.

¹⁵ Toro te Satanyolluro womdokwe kworo kuruv a'mwo sugupasudo tovuro womdokwe toorobusuko yalo'nopi molloguuronekudapiyodupudorogano. Su toro yodupudo tooraino nevu mollolokurosi nyumwala'jo. Toro yodupudo kuvi kuruv Gooti tool a'mwo ma'no ma'no pasudo yodupudo su toorai lukomgu nerumwallonorogano.

Poolol kuurotokwe womdo tovida'ai jul'nyo amallajuko tonyuno adoka tovinokwono

¹⁶ Nuu aiko te ikudumo'mokwono. Kevu mino aro kuudo nyau'mwalpiyo. Oo Poolol kuudo maiyekono. Nyanuu'mwalpiyo. Kevu pugaikul su toro kuudo sanuupi kuruv moro yogalo ikudodo'mure tovi kaduko neya duu'nyulo. Moro yogalo tov a'mwo kuudo maiyokwe pwolbusuko aikudumi kuvi kuruv nebal'no yogalo pwekwogai nuvnokwe toonyu ilomodomoropunyu to'busuko ikudumo'mokwono.

¹⁷ Moro ilomodomoropunyu to'busuko yogalo aikudumi su tov Aguto toolluro yovo tovida'ai ikudumo'mo'maiyo. Toro kuvi kuruv nuu yiuno kwako akavida'ai a'mwo kuudo maiyokwe pwonyubusuko to'no ilomodomoropinyo'moneyokwe yogalo pwekwo ikudumo'mokwono.

¹⁸ Aki a'mwo bwotonyago tooro kemi kwako akavida'ai kulako tokwe womdo sopipi tonyuno ilomodomoropinodapudorogano. Bwotonyago tooro su toro ilomodomoropinodapudo tovino tov nuu kwonyu kuruv ilomodomoropinyo'mo yogalo pwekwo ikudumo'mokwono.

¹⁹ Neya duu'nyulo. Kevnokwe togaikul aro kuudo yau'dupudogaikikono. Oo nevu pi'mwo kuudo kurukweyonogano. Su toro kuudo yau'dupudo kuvi kuruv a'mwo kuudo maiyokwe pworo kemi akuuto toru womdo kuulaikullodopure su tooraino'gwowi kevu wonyapino to'no yodupudogaikikono.

²⁰ A'mwo su tooro kemi aro tomgu'aro kaiyako yaikullugolodupudorogano. Pugaikullu ki'nato womdo'mo amerekumokovlapiyo'mdeyo oo kemoro nuugwiyo tonyu avipolekumapiyo'mdeyo oo a'mwo su tooro kevnokwero ilomoropunyu yodopureyo'mdeyo oo kemoro suuwado tonyu allukurekumollupiyo'mdeyo kemi kaiyako su toro yaikullugolodopure kuvi kuruv kevno'gwowi a'mwo su toorai nokwo wonyapino to'no yodupudogaikikono.

²¹ Sumdomgu nevu kevuge womdo sajuuwo toga nevu wollainyo toonolbusuko imo'nodowa kemi su toro tomgu'aro miyaikullugollajuwonogano. Nemoro su toro sumo'nyajuuwo su tovino nuu wogulo ibwosunmonyudukono? Awiyo, nuu wogulo mibwosunmonyugono. Toro kuvi kuruv a'mwo su toorono'gwowi ilomoropunyu pasudo tovino luko miyodupudorogano. Toro to'busuko kubalno nuu kwonyu kuruv a'mwo kuudo maiyokwe pwonyubusuko ilomoropunyu pasudo tovino luko miyodum aro ikudumo'mokwono.

²² A'mwo su tooro Hibruu a'mworodukono? Yowa'nogano. Nuu kwonyu kuruv Hibruu a'mwo pwonyugono. Aki a'mwo su tooro Isuraiyolda'aiyorodukono? Yowa'nogano. Nuu kwonyu kuruv Isuraiyolda'ai a'mwo pwonyugono. Aki a'mwo su tooro Eburaiyamolluro jukweyago kwolaiyorodukono? Yowa'nogano. Nuu kwonyu kuruv Eburaiyamolluro jukweyago kwolaiyo pwonyugono.

²³ Aki a'mwo su tooro Krais toolluro womdo tovi wiyodupudorodukono? Yowa'nogano. Nuu kwonyu kuruv Krais toolluro womdo tovi wiyodumdonyugono. Toro toonyu, Aiyoo, a'mwo amomo pwonyubusuko aro ikudumo'mokwono. Nuu a'mwo su toorai uuwolo'mdumdonyugono. Aki a'mwo su tooro womdo bwotonyo miyodupudo kuvi kuruv nuu toonyuno'gwowi womdo bwotonyo kuunodo yodumdonyugono. Aki a'mwo su toorai wuulo killo'mo ago tovi maulomerosodupudo kuvi kuruv nuu toonyuno'gwowi bwotonyago toga wuulo killo'mo ago tonyu meranubweyodupudonyugono. Aki yiuwi'nokai toga iwago nyuromiyodupudonyugono. Toro toonyu bwotonyago toga nobollo'mo wobo toru yodumdonyugono.

²⁴ Aki Juu tooro atobuul toga mi wuulo tokwe agalogunyukuuronumolloporogano. Yiuwi'nokai atobuul go'no go'nodo su toga wuulo tokwe 39-pela agalogunyukuuronumollajuponyugono.

²⁵ Aki Roomda'ai tooro kemi iwanyiko tokwe pugasal puga aromiyanubweyopekwonyugono. Aki puga'no sulo togai aluvoromiyanubweyoponyugono. Aki sip toorai ilomwalodum avlaiyajo toga sip su tooro pugasal puga kaiyako su'noporogano. Puga sip pwol kaiyako su'noka toolluda'ai nuu soolwara tovi abwoloranyugono. Toro bwolo'no sumoneyokwe surakuuto pullugwogai'aro iruko pullugwogai'aro soolwara tovi anakuuto tomuu awo'nomollonyugono.

²⁶ Aki iruko bwotonyago tollovai puuto tomuu kado somollajonyugono. Su toro somollajo toga noonyumwonyu akan nokwo aromiyanubweyopujukonyugono. Nuu wonyo tovi igo'mgu iloga'mowopiyo'mo yodore toonyu kaiyako nokwo su'no'mujukonyugono. Aki puuto tomuu kuuko tooro nokwo aromiyanubweyopujukorogano. Aki moro avalo Juu tooro nokwo aromiyanubweyopujukorogano. Aki Juu miyawosunodupudo kworo kuruv nokwo aromiyanubweyopujukonyugono. Aki wagwolago punyu wuuru'ma'dore toonyu nokwo aromiyanubweyopujukonyugono. Aki a'mwomaiyo kuu'maiyo tomuu somollajo toga nokwo abolo'mujukonyugono. Aki soolwara tovi anakuuto tomuu nokwo abolo'mujukonyugono. Aki a'mwo pworo kuunano aro youkuu'nadodupudorogano. “Oo nevu Jisasolluro a'mwo toonol kemi telludai'yago toonolbusukonogano.” Kuunano youkuu'nadodupudo su tooro nokwo aromiyanubweyopujukonyugono.

²⁷ Nuu womdo bwotonyo yodumdo toga dukwogulo sumo'nallajonyugono. Aki toro toonyu sa ilaiyo mwollajonyugono. Aki mujuko'mo bolodum wonyo'mo kuuleyaluko ailanuwopiyajukonyugono. Aki youro tonyuno supto yodum lukuuto subwosunyajonyugono.

²⁸ Aki jul'nyo su tonyu muunyu toru noonyumwonyu pugai'aro nonyumo'nodupudonyugono. Jul'nyo su tonyuro puruv arokwono. Yiuwi'nokai Jisasolluro mollu'bwoto go'no go'nodo tonyu moduvomwallo'moneyokwe womdo tov numi nuwo'dowodokwono. Toro te womdo su tovino kuudo tov yiuwi'nokai iruko tollovai jul'nyo to'busuko mokavla'mdumdonyugono.

²⁹ Jisasolluro a'mwo pwekwojuro jurogudo tov wollainyo sumo'no'ji tov nuu a'mwo su tekwojuno kalo nyunowo'ji wiyo'mwojo'moneyokwe wollainyo pwolbusuko nuuwimo'numonyugono. Aki a'mwo pworavuro kaiya'no mollubworomokavla'mdopure tovasuda'ai Jisasolluro a'mwo pwekwo ma'no ma'no yowo'ji abwolorawo'ji tov nuu a'mwo su tooravuro pasudo tovino surodo nuunmwalmonyugono.

³⁰ Nuvnokwenyuro jurogudo tovino milomodomoropiyamonyugono. Toro kwonyu kuruv moro wollainyo pasudo wuuduuwallunodumdo tonyuno'gwowi ilomodomoropinamonyugono.

³¹ Toro te nemi Aguto Krais Jisasolluro Ganumiyago Gooti tool mino aro kuudo me'no youronuma'dowodekono. Oo su tool kuunano miyoukuu'najokweyoldeyo. Kuudo youronuma'dowodekono. Gooti su toolluno nevu yiunokuudo ilomoropimwolowanekono.

³² Puga nuu wagwolago Damaskos toru amwalo toga a'mwo aguto gavona pwol mi galeronumwallo'moneyokwe wagwolago su tovi gami duuwatokwe pworai aulomolludapiyokaikono. A'mwo aguto gavona su toollu a'mwo aguto kig Aretasol me'no ajesungikekono. Toro te a'mwo aguto gavona su toolluro duuwatokwe tooro wagwolago su tovuro noullo tonyu aduvomwaloporogano.

³³ Toro duvomwalodopure kuvi kuruv nuu abirolo'nugolokwonyugono. Wagwolago su tovuro kuurupto bwotonyo tovi widoo puruv kwollajukokwono. Toro te nuu basket tovi kuulomwalodore toonyu moro ibwoto'nyo pworo wuulo tokwe widoo su tovi'aro kwolomollukwo'bworonuwopiyaponyugono. Toro toonyu a'mwo aguto gavona toolluro ato tovida'ai birolo'nugolokwino sumoneyokwe lukado avlavonyugono.