2 Koorin 10 - Gooti Toolluro Yogalokwono

Poolol gamoro womdo sajuko tovi bwolomorumwogapiyodopure toorai kworado ajumwonyoka tovinokwono

¹ Aga kemida'ai a'mwo pworekul mino aro bwolomodonumwogapiyodapudorekikono. “Oo Poolol nemoro sumdomago tovi anekwono'ji toga nemi kwako tomuu'aro nekullodowodekono. Toro kwol kuruv manyu tomuu amwalo'ji toga'no'gwowi nemi yogalo modanekurugollo'moneyokwe yogalo jurogudo tooro monekwopiyabodowodekono.” Su toro bwolomodonumwogapiyodapudorekikono. Toro kuvi kuruv nuvnokwe Poolonyu Krais toolluro pasudo kavo molludo'movla'mdowodo tokwe'aro kavo bemwojodowodo tokwe'aro pasudo su tovalluno'gwowi uumjunodum kemi guureji adaikujugonumwakono. Toro adaikujugonumwako tov arokwono.

² Kevu a'mwo nemi bwolomonekumwogapiyodapudo toorai neya doduumjukurogaulo. Aro tovinokwono. Nuu abekuru'ma'mi toga kemi yogalo nomodaikurugolmiyokwe tovinokwono. Neya duu'nyulo. Kevu pugaikul nemino kaiya'no kuudo aro yau'dupudogaikikono. Oo Pooleke'aro gavuge avalo toorogai'aro tooro kwako akavida'ai jurogudo tovi uumjunodupudorogano. Pugaikul kaiya'no kuudo su toro yau'dupudo togaikullu nuvu yogalo modaikurugollo'mo manyunodowodonyugono.

³ Neya duu'nyulo. Nevu kwako akavi mujomwekovla'mdowado kuvi kuruv molo aguto ingovla'mdowado to'gwowi kwako akavida'ai jurogudo tokwe mamjumovla'mdowadonogano.

⁴ Aki nemoro molo mollo'moneyokwe iro'mwomido ton kwako akavida'ai mama'dowadonogano. Toro kuvi kuruv nemoro molo mollo'moneyokwe iro'mwomido to'busuko ma'dowado su tono'gwowi Gooti toolluro jurogudo tovi kuula'dupudogano. Toro te nevu Gooti toolluro noonyumwonyu jurogudokwe su togai nemi ikomago tooravuro mekuurupto jurogudo tonyu kirowo'dolapiyodowadonogano.

⁵ Gooti toolluro noonyumwonyu jurogudokwe su togai nevu kuudo kaiya'nodo toorai kirowo'dolapiyodowadonogano. Kuudo pworo Gooti tooke youllajunyo'mo toorogai'aro aki Gooti toollu ga'gaivolo wiyo'moneyokwe kuudo go'no go'nodo toorogai'aro yiuwi'nokai kuudo kaiya'nodo su toorai kirowo'dolapiyodowadonogano. Aki nevu Krais toollu uumjunyo'moneyokwe tov ikomago toorai mogalerosodupudo to'busuko kubalno nevu yiuwi'nokai kuudo kaiya'no yau'dowado toorai wuulo to'busuko mogalerosodowadonogano.

⁶ Toro te nemoro Krais toolluno yiuwi'nokai kuuguudo yodubwasodowado tovi kevu pugaikul kuvinono nuumjunpinogaikikono. Toro kuvi kuruv kevu pugaikulno'gwowi yiuwi'nokai toga kisuvolo to'no yokweyogaikikono. Kisuvolo su toro yodopure toga kemi kuudo ikuuteyo'moneyokwe nevu me'no yovraimwonyodowadonogano.

⁷ Kevu yiuwi'nokai pasudo toorai jagillo'moneyokwe kevnokwe togaikulluro sumdo togai neya wonoma'mwalpinogaikikono. Toro wonomaropi a'mwo pwol gavnokweyolluno aro yainyunonekono. Oo nuu Krais toolluro kuunodonyugono. Toro sainyuno'ji su tool nemino aro kuudo neya yanekuu'mwalonekono. Oo Pooleke'aro gavuge avalo toorogai'aro kworo kuruv Krais toolluro a'mwo kuunodo wimo'nodupudorodeyo. Neya yanekuu'mwalonekono. Aki kuudo su tovino nyallulo'gwonmwalo'jo.

⁸ Neya duu'nyulo. Nevu kemi guureji yogullumwojekwapiyo'moneyokwe Aguto tool gavnokweyolluro jurogudo me'no anekubweyokaikono. Toro te nuu Aguto toolluro womdo su tovi kuvinono momjumovlavo'mi ilomodomoropunyu sami kuruv womdo anekubweyoka su tovino wogulo miyokwenyugono. Su tov aro tovinokwono. Aguto toolluro womdo su tov kemi kaiyako yaikullugollo'moneyokweyo'maiyo. Toro kuvi kuruv kemi aguto yogullumwojekwapiyo'moneyokweyokwono. Toro tovino tov nuu Aguto toolluro womdo anubweyoka su tovino wogulo mimwalmonyugono.

⁹ Toro kuvi kuruv kevu mino aro kuudo nyaupiyo. Oo Poolol nemi luko danekuro'gwollo'moneyokwe pas ton yokwollanekubweyodowodekono. Su toro kuudo nyanuupiyo. Nuvno'gwowi kemi luko daikuro'gwollo'mo manyunodowodonyugono.

¹⁰ Neya duu'nyulo. A'mwo pworo mino aro dodupudorogano. “Poolol manyu tomuu mwalowo'ji gamoro pas su tonyu'aro nemi jul'nyo nekubweyodowodekono. Aki nemi luko danekuro'gwolodowodekono. Toro kwol kuruv nevuge amwalo'ji toga'no'gwowi a'mwo jurogudomaiyokwe pwolbusuko imo'nodowodekono. Aki gamoro yogalo tov pi'mwono miyodubwasodowodo su tovino nevu biyolo to'no uu'mwojodowadekono.” Mino su toro dodupudorogano.

¹¹ A'mwo pwol su toro aikudo'ji tool nemino aro kuudo neya yauronekono. Nevu manyu tomuuda'ai pas sokwollekwopiyabowo su tovi nevnokwe toonol kuvinono nuumjunanonogano. Toro te nevu kemi me'no abekuru'mara'ji toga'no'gwowi pas su tovuro yogalo dodowo'jure tomgu'aro to'no nyaikullugolanonogano. Su toro kuudo neya yauronekono.

¹² A'mwo pworo yovo aguto mallo'moneyokwe kevnokwe tooro ilomodomoropunyu yodapudorogano. A'mwo su tooraida'ai pwol aro yonekono. Gavuge avalo pworavuro pasudo yodopure tovi'aro a'mwo su tool wonowo'ji gavnokweyolluro pasudo tovi gallainyubworonekono. A'mwo ilomodomoropunyu yodapudo tooro imgu amgu su toro gallainyubwo'nodupudorogano. Su toro gallainyubwo'nodupudo tovino tov a'mwo kuudo maiyokwe toorobusuko imo'nodupudorogano. Toro kuvi kuruv nevu kuurotokwe toonolno'gwowi a'mwo su toorobusuko ku'nono miyokwenogano.

¹³ Nevu kuurotokwe toonol Gooti toolluro womdo ajanekubweyoka su tovi kwa'mgu tomuuda'ai womdo punyuno ku'nono milomodomoropiyodowadonogano. Toro kwonol kuruv yiuno Gooti toolluro womdo tovi yo'moneyokwe ajanekubweyoka su tovino'gwowi kuvinono ilomodomoropiyodowadonogano. Aki Koorinda'ai togaikullu kumuu kuruv nevu womdo su tovi yano'moneyokwe Gooti tool nemi me'no ajanekubweyokaikono.

¹⁴ Toro te kevu kuudo neya jaullulo. Gooti toolluro womdo anekullaboka su tov kemi tomuu abu'duvolekumarokakwono. Toro te nevu manyu tomuuda'ai kuuguudo sugudo tokwe mokabowono kemi akuuto toru amodekumollowonogano. Toro amodekumollowo kwonol kuruv Gooti toolluro me'no ajanekubweyoka tovi ku'nono muuwolowonogano. Kuudo neya jaullulo. Kevu manyu tomuu mwalodopure togaikullu a'mwo gabovo pworo Krais toolluro kuuguudo sugudo tokwe kemiyomno yere mamokabiyajuporogano. Toro kuvi kuruv nevno'gwowi kuuguudo sugudo tokwe kemiyomno muudu'nodo amokabowonogano. Toro tovino tov nevu Gooti toolluro womdo ajanekubweyoka su tovino ilaiyo to'no yodowadonogano.

¹⁵ Aki nevu ilomoropunyo'mo aro manekullunyokwenogano. A'mwo gabovo pworavuro womdo yodopure tovida'ai nevu ilomoropunyu nyumwala'jo. Su toro tovino manekullunyokwenogano. Toro kuvi kuruv kemoro kuudo uubweyodupudo su to'gwowi bwotonyo yogullumovlaiyo'mo nekullunodowodonogano. Aki kemi akuuto towaida'ai nemoro womdo yodowado kuruv jurogudo yogullumovlaiyo'mo to'no nekullunodowodonogano. Su toro imo'nyo'mo tovino to'no nevu sogwollo kinodowadonogano.

¹⁶ Aki nevu kwako pumuu Gooti toolluro womdo tov yere miyodupudo su tomuu avlawa'ji toga kuuguudo sugudo tokwe moruudomollo'mo anekullunadopiyo. Kwako su ton kemoro wagwolago Koorin imgu buulo tomuu wo'dupudogano. Su toro tomuu plavowa'ji a'mwo pworavuro womdo me'no yopiyodupudo puvino nevu milomodomoropiyowanonogano. Toro kuvi kuruv nevnokwenolluro womdo yopiyodowado tovino'gwowi nokwo ilomodomoropiyowanonogano.

¹⁷ Gooti toolluro yogalo puruv aro sakwollungikokwono. “A'mwo pwol ilomodomoropiyo'mo kwino'ji su tool gavnokweyolluno nyulomodomoropinawo'jo. Toro kwol kuruv Aguto toolluno'gwowi neya ilomodomoropimwolawonekono.” Sakwollungikokwono.

¹⁸ Toro te neya duu'nyulo. A'mwo pwol gavnokweyolluno sulomoropinawo'ji toollu Aguto tool ilaiyo mamollomaronekono. Toro kuvi kuruv yiuno Aguto toolno'gwowi a'mwo pwolluro yovo tovi sulomoropiyawo'ji su toolluno to'no ilaiyo mollomaronekono.