2 Koorin 1 - Gooti Toolluro Yogalokwono

¹ Nuvu Poolonyugono. Toro toonyu Krais Jisasolluro kuurotokwe imo'nyo'moneyokwe Gooti gavnokwe tool ilaiyo wino'no mi me'no ajanubweyokanyugono. Aki a'mwo pwol nemi nellugwai'yago toolbusuko nonekullumo'nodowodo tool nuvuge akaru amwallo. A'mwo su toolluno yovo tov Timootiyolekono. Toro toonal pas akav saikuukwollumwakuuwolo. Kevu wagwolago Koorinda'ai Gooti toolluro mollu'bwoto togaikike'aro aki Gooti gavnokwe toolluro a'mwo abolo yiuwi'nokai proovins Akaiya tomuu mwalodupudo kugai'aro togaikullomno pas akav sokwollopiyamono.

² Toro te nemi Nellunumiyago Gooti tooke'aro Aguto Jisas Kraiseke'aro tonumdalluro yasuwa'wino sugumaluko tovida'ai pun kemi nokwo ikubwemwalbullunonumdakono. Aki kemoro sumwoluko ton kavo wosungovlaiyo'moneyokwe nekullo'mwojumwalbullunonumdakono.

Gooti tool nemoro sumwoluko tonyu dugoga irovonekumokwolabodowodo tovinokwono

³ Oo nemi Aguto Jisas Kraisolluro Ganumiyago Gooti toolluno ilomoropiyowano. Ganumiyago su toolluda'ai yiuwi'nokai kalo mamwonyo'moneyokwe pasudo ton lokabodupudekono. Aki Ganumiyago su tool yiuwi'nokai a'mwo abolo jul'nyo bwimo'nodowo'jure tobuurai piyarupto mokwolabiyokwekono.

⁴ Toro tool nevu a'mwo abolo noonyumwonyu jul'nyo baneki'mo'mdowo'jure tobuuronollu piyarupto nekumokwolabodowodekono. Toro tovino tov nevu a'mwo abolo jul'nyo bwi'mo'mdowo'jure pubuurai nokwo wiyo'mwojumovla'mwalanonogano. Gooti toolluro nemi nekullo'mwojodowodo su tokwe a'mwo abolo su tobuurai aval'no nokwo wiyo'mwojumwalanonogano.

⁵ Kuudo neya jaullulo. Krais tool danyu'nyuwuulo subwosunyajukekono. Toro toollu kuumjunmwakuuwo kunol kuruv Krais toolbusuko danyu'nyuwuulo bwotonyo nyubwosunmwalanonogano. Toro subwosuna'ji toga Gooti tool piyarupto nekumokwolabiyo'moneyokwe Krais toollu'aro jurogudo bwotonyo danekullumwojumwalonekono.

⁶ Toro te nemoro tagunyo wuulo amara'ji tov yasuwa'nodo'maiyo. Toro kuvi kuruv kemoro sumwoluko tonyu dugoga irovekumokwolabiyo'moneyokweyokwono. Aki kemi ma'no ma'nodo tovuro kirumwallo tovida'ai birolo'nugolokuupino'moneyokweyokwono. Aki su to'busuko kubalno nemoro sumwoluko ton dugoga surovonekumokwolabwo'ji tov yasuwa'nodo'maiyo. Toro kuvi kuruv kemoro sumwoluko kunyu kuruv dugoga irovekumokwolabiyo'mokwono. Kevu nevubusuko danyu'nyuwuulo subwosunpi toga kevu kaveno to'no domollukwovogaulo. Toro amollukwopi toga kemoro sumwoluko tov dugoga nokwo irovekumokwolamwalonokwono.

⁷ Nevu kemino tov aro kuudo yau'dowadonogano. Oo nemoro danyu'nyuwuulo ibwosunodowado to'busuko a'mwo abolo su to kubuuro kuruv danyu'nyuwuulo aval'no ibwosunodupudodeyo. Toro tobuurai Gooti tool nemoro sumwoluko tonyu dugoga irovonekumokwolabodowodo to'busuko kubalno a'mwo abolo jul'nyo abwi'mo'mwalluko su tobuurai dugoga aval'no irovomokwolabwonekono. Kemi su toro ikullumo'nono tovino sogwollo guureji to'no kinodowadonogano.

⁸ Miyobuuravoo, neya duu'nyulo. Nevu Esiya tomuu somollajuuwo toga tagunyo wuulo pworo amallajuwonogano. Kevu su toro tooraino kuudo nonagutokwe nyumo'numwalpiyo. Kuudo neya jaullulo. Tagunyo abaneki'meyajupo su tooro nemoro jurogudo tovi nekuuwolovo'mno bwotonyo imo'nodopure su toorai ku'nono mamokavlavowonogano. Toro toonol aro kuudo to'no saurowonogano. Oo nevu nobolanonoldeyo. Su toro kuudo to'no saurowonogano.

⁹ Aki toro toonol aro kuudo saurowonogano. Oo nemi yiuno'no noromiyanekubwepinonoldeyo. Saurowonogano. Aki su toro tovino aro adowonogano. “Kuvinono nonekullumo'nonoldeyo.” Adowonogano. Toro kuvi kuruv jul'nyo abaneki'meyajupo su tooraino kavlo tov arokwono. Nevu aro kuudo nyau'mwala'jo. Oo nevnokwenolluro jurogudo tokwe nokwo wiyo'mwoju'nanonogano. Kuudo nyau'mwala'jo. Toro kuvi kuruv Gooti toolno'gwowi a'mwo abolo me'no abollungopo tobuurai aiyo aiko te moduka'mdowodekono. Gooti su toolluno aro kuudo neya uubweyogawano. Yiuno Gooti su toolno nokwo nonekullo'mwojonoldeyo. Su toro kuudo neya uubweyogawaneyokwe tovino jul'nyo su tooro abaneki'meyajuponogano.

¹⁰ Toro te nemi noromiyanekubweyo'mo yodopure su tooraida'ai Gooti tool me'no abomollurolovonekumokalokwokaikono. Aki lukomgu kuga kuruv Gooti su tool kuuno nobomollurolovonekumokalokuumwalonekono. Toro te Gooti su toolluno aro kuudo uubweyodowadonogano. Oo yiuno Gooti su tool aiko te nobomollurolovonekumokalokuumwalonoldeyo. Kuudo to'no uubweyodowadonogano.

¹¹ Aki kevu nemi nekullo'mwojo'moneyokwe Gooti toollu subusu'nyogalo neya duudogaulo. Kevu bwotonyago togaikul kuudoganpi tov Gooti tool kuvinono ikuu'nonekono. Toro ikuu'nowo'ji nemi nonekullo'mwojonekono. Toro nekullo'mwojodowo'jure tovi a'mwo abolo bwotonyago ton muugonaropi Gooti toollu, Nenoloo, nokwo wuudumwalpinogano. Toro tovino tov kevu nemiyo'mo subusu'nyogalo neya duudogaulo.

Poolol Koorinda'ai a'mwo abolo tobuurai kuunano yogalo miyoukuu'nuudoka tovinokwono

¹² Toruda'ai nevu aro tovino ilaiyo bwotonyo yodowadonogano. Nevu nemi poowokalago tovi me'no kuulanekwo'dupudo tonyu kuvinono uumjunyokwenogano. Aki kwako akavida'ai a'mwo abolo tonyuro sumdo tovi nemi me'no kuulanekwo'dupudo su tollovogai nevu pi'mwono molludo'movla'mdowadonogano. Aki nevu Gooti gavnokwe toolluro pasudo tonyu yiuno nebal'nodo tomgu'aro uumjunodowadonogano. Toro toonol a'mwo abolo togai'aro kev kugaikike'aro togaikullu yaikullugollo'moneyokwe tov kwako akavida'ai pi'mwo kuudo tovi muumjunodowadonogano. Toro kuvi kuruv nevu Gooti toolluro yasuwa'wino sugumaluko tovino'gwowi uumjunodowadonogano. Toro tovino tov yiuwi'nokai a'mwo abolo tonyu nevu ilaiyo to'no igolodowadonogano. Aki kemino'gwowi nemoro ilaiyo tov muunyu toru'aro guureji yaikullugolodowadonogano.

^13-14 Toro te nemoro pas akavi yiulkuudo pugai miyokwollaikubwemwakuuwono. Toro kuvi kuruv pas akavida'ai yogalo ton yiuno kuu'maiyo toru'no sokwollaikubwemwakuuwono. Toro tonyu kevu mojagilopi kavlo tovino kuudo nokwo youromapinogaikikono. Kevu neya duu'nyulo. Aga kevu yiuwi'nokai kavlo ton miyouroma'mwakopogaikikono. Toro kuvi kuruv lukomgu yogalo akavuro kavlo ton kevu yiunokuudo nyouromapinogaikikono. Su toro tovino nuvu sogwollo to'no kinodumdonyugono. Kevu kavlo ton yiunokuudo souromapi tov lukomgu nemi Aguto Jisasol aikomgu kwolabwo'ji toga nevu kemino ilaiyo ilomodomorekwopiyowanonogano. Aki kev kugaikul kuruv nemino ilaiyo aval'no ilomodomoronekwopiyapinogaikikono.

¹⁵ Toro te nuvu aro kuudo saullajonyugono. Oo moro kuudo togai'aro yogalo togai'aro tonyuno kevu ilaiyo me'no youronuma'dupudogaikikono. Kuudo saullajonyugono. Toro tovino tov sumdomgu nuvu kemi iru'mato'mo anyunyajukonyugono. Su tov aro tovinokwono. Moro iru'mato aikullumi su tovi'aro Gooti tool gamoro yasuwa'wino sugumaluko tov kemi aki aiko te nokwo ikubweyonekono. Toro ikubweyodowo'jure toga kevu yasuwa'wino sugumaluko su tovi pugasal nokwo mapinogaikikono. Su toro aikullumo'noneyokwe nuu kemi iru'mato'mo anyunyajukonyugono.

¹⁶ Aki toro toonyu aro kuudo saullajonyugono. Nuu kwako Masedooniya tomuu pla'monyugono. Toro toonyu puuto tomuu kuuno plavo'mi kemi nobekuru'ma'monyugono. Toro bekuru'maro'mi lukomgu Masedooniya tomuuno pla'monyugono. Toro plavo'mi Masedooniya tomuu ki'movamonyugono. Toro toonyu lukomgu Masedooniya tomuu wuugollu'movo'mi aki aiko te nobekuru'ma'monyugono. Toro abekuru'ma'mi toga iru'mato me'no mwalowa'ji nuu kwako Juudiya tomuuno pla'monyugono. Toro avla'mi toga kevu puuto tomuu nokwo yonuwopiyapinogaikikono.

¹⁷ Toro te nuu kemi iru'mato ikullo'moneyokwe me'no adomdukuurosonyugono. Moro sumdomguda'ai yogalo adomdukuuroso su tovi nuu kuvinono muumjunodore tovino aro kuudo nyanuupiyo. Oo kuudo noullo maullo sau'mwallo. Toro tool kwako akavida'ai a'mwo abolo tonbusuko youkuu'nanekudodowodoldeyo. Mino su toro kuudo nyanuupiyo. Kuudo neya jaullulo. Kwako akavida'ai a'mwo abolo ton kemoro mido togai, Awiyo, kuudo yauropi kun kuruv kemoro mago tokwe, “Tade,” jokweyogano.

¹⁸ Toro kuvi kuruv Gooti toolno'gwowi gamoro yogalo tov yiuwi'nokai toga kuvinono uumjunyokwekono. Toro toolbusuko ne kwonol kuruv nemoro yogalo ikudodowado tovi kuvinono uumjunodowadonogano. Toro te nevu, Awiyo, kuudo yaurowa'ji nemoro mago tokwe, “Tade,” miyoukuu'naikujokwenogano.

¹⁹ Kuudo neya jaullulo. Sumdomgu nuuge'aro Sailaseke'aro Timootiyeke'aro toonol Gooti toolluro Kwolaiyo Jisas Kraisolluno kemi me'no amodekumollowonogano. Jisas Krais su tool gamoro mido tokwe, Awiyo, kuudo yaurowo'ji gamoro mago tokwe, “Tade,” miyoukuu'najokwekono. Toro kwol kuruv yiuwi'nokai toga, “Tade,” to'no dowo'ji kuvinono uumjunyokwekono.

²⁰ Su tov aro tovida'aiyokwono. Krais Jisasol yiuwi'nokai Gooti toolluro subuu'yamju tonyuno, “Tade,” to'no jokwekono. Toro dodowo'jure tovi'aro Gooti toolluro subuu'yamju su tonyu suuwiyo imwojodowodogano. Toro te Gooti toollu subusu'nyogalo modojuguroso'mo toga, “Nebalokwonoo,” dodowadonogano. Nemoro modojugurosodowado su tov yiuno Krais Jisasollu'aro kuvinono dodowadonogano. Aki toro dodowa'jure tovida'ai Gooti tool yovo aguto ma'dowodekono.

²¹ Toro te yiuno Gooti su toolno nevuge'aro kevuge'aro tonollu Krais toollu anakuuto tomuu guureji yiunokuudo moguro'mwojanekubweyodowodekono. Aki yiuno Gooti su toolno gamiyo'moneyokwe me'no janekubweyodowodekono.

²² Aki Gooti tool gavnokweyolluro duuwallo tov nemi aro nekubweyodowodekono. Gamoro Kuullo tool nemoro poowokalago tonyu kuulonekumwalodowodekono. Toro te nevu Kuullo su toollu sumdomgu me'no ma'dowadonogano. Sumdomgu kwolda'ai ma'dowado su tov aro tovino nekuduuwallo'mokwono. Lukomgu nevu Gooti toolluro yiuwi'nokai nonekullabiyo'mo subuu'yamju yodowodo su to kunyu kuruv kuvinono nomaranonogano. Su toro tovino nekuduuwallo'mokwono.

Poolol wagwolago Koorin'no yere mavlavoka kavlo tovinokwono

²³ Nuu nebal'no ikudumo'mokwono. Nuu wagwolago Koorin'no aki aiko te yere mabumwako tov kemi yogalo modaikurugollo'mo manyunodowodo tovinokwono. Gooti tool moro poowokalago tovi me'no nuwonodowodekono. Toro tool moro nyunodowodo su tovi kemi kuu'maiyo toru nokwo dodoluvaikubweyonekono.

²⁴ Nemoro kuudo uubweyodowado tovi kevu neya uumjunpino'moneyokwe madaikumuurolo'mwakuuwono. Toro tovino kevu nemino kaiya'no kuudo miyanekuupinono. Toro kuvi kuruv kevnokwe togaikulno'gwowi Krais Jisasolluno kuudo me'no uubweyodupudogaikikono. Aki kuudo uubweyodupudo su tovi muunyu toru guureji to'no da'mdupudogaikikono. Toro te kemoro poowokalago tonyu ilaiyo tov kuullo'movaikwopiyono'moneyokwe womdo yodopure tovi nevu sobanyo molluulowa'ji kevuge avaiwomdo mujumovla'mdowadonogano.