2 Joon 1 - Gooti Toolluro Yogalokwono

Joonolluro yogalo muudu'no kuudoka tovinokwono

¹ Nuu Jisasolluro mollu'bwoto tovida'ai a'mwono moduvomwallokwe pwonyugono. Toro toonyu guu abolo Gooti toolluro me'no ajesungiko to'guuji pas akav sokwollogwopiyamono. Guuge'aro aki gumi kwoloraiyo tobuurobusuko gujumo'nodupudo kubuurogai'aro togaikullomno pas akav sokwollekwopiyamono. Nuu gumino kalo buuropino kuunodo nyunodowodonyugono. Aki yiuno nuu judo toonyuno to'no gumino kalo buuropino nyunodowodo'maiyo. Toro kuvi kuruv yiuwi'nokai a'mwo abolo Gooti toolluro nebal'no yogalo tovino kuudo me'no youroma'dupudo kun kuruv gumino kalo buuropino winodupudogano.

² Guu nuvubusuko Gooti toolluro nebal'no yogalo tovino kuudo uubweyodumdo tovino tov nuu gumino kalo buuropino nyunodowodonyugono. Gooti toolluro nebal'no yogalo su tov nami me'no kuulonakwo'dowodokwono. Aki nebal'no yogalo su tov yiuwi'nokai toga nami yiunokuudo manakugollu'mo'mwalonokwono.

³ Oo nami Nallunumiyago Gooti tooke'aro gamoro Kwolaiyo Jisas Kraiseke'aro tooralluro nebal'no yogalo tokwe'aro kalo buuropino pasudo tokwe'aro toval nami me'no kuulonakwo'dubulovakono. Toro tovalluda'ai yasuwa'wino sugumaluko tokwe'aro kalo mamwonyo'mo tokwe'aro sumwoluko kavo wosunyo'mo tokwe'aro yiuwi'nokai su ton nami nokwo nakwo'mwalpinogano.

Nevu nebal'no yogalo tokwe'aro kalo buuropino pasudo tokwe'aro tovake neya yomjomwekovla'mwalano tovinokwono

⁴ Nuu a'mwo abolo gumoro kwoloraiyo tobuurobusuko gujumo'nododupudo pubuuraino ilaiyo bwotonyo sumwakonyugono. A'mwo abolo su tobuuraino aro souroma'mwakonyugono. Oo a'mwo abolo su tobuuro nebal'no yogalo tovi kuvinono uumjunodupudodeyo. Nebal'no yogalo su tovi neya uumjunmwalpino'moneyokwe tovino sumdomgu togasuro nemi Nellunumiyago Gooti tool me'no adanekulloka tomgu'aro kuvinono uumjungovla'mdupudodeyo. Toro me'no souroma'mwako tobuuraino nuu ilaiyo bwotonyo sumwakonyugono.

⁵ Toro te aga nuu abolo to'guuji nuumjunyo'mo yogalo akav aro agudoganmono. Nemida'ai yiuwi'nokai a'mwo abolo tobuuraino imgu amgu kalo buuropino neya domollogaulo. Yogalo agudoganmo su tov muuduko'maiyo. Toro kuvi kuruv pasudo su tovino Krais tool muudu'nodo togada'ai me'no sodonekubwosumelabiyajukekono. Toro yodonekubwosumelaboduke su tovi nevu me'no wuu'nugelabodowadokwono.

⁶ Kalo buuropino winyo'moneyokwe pasudo su tov arokwono. Nevu Gooti toolluro yogalo adanekulloka tomgu'aro kuvinono neya ainamjumovlavogawano. Kalo buuropino pasudo tov torokwono. Toro te Gooti toolluro yogalo adanekulloka su tovino kevu muudu'nodo togada'ai me'no wuu'nugelabodupudogaikikono. Toro wuu'nugelabodupudo su tovi kevu neya denamjogaulo.

Nevu Krais toolluro yogalo tovi guureji neya gudupola'mwalano tovinokwono

⁷ Neya duu'nyulo. A'mwo kuunano youkuu'najokwe bwotonyago tooro kwako akavi yomollodupudorogano. Toro tooro a'mwo abolo pubuurai ki'nomallo'moneyokwe aro modomollodupudorogano. “Jisas Kraisol a'mwo kulako kuunodokwe pwolbusuko mimo'nokaikono.” Modomollodupudorogano. Yiuwi'nokai yogalo su tokwe amodomollupi tooro kuunano youkuu'najokwe to'no imo'nyokwerogano. Aki toro tooro Krais toollu ikomago wimo'nyokwerogano.

⁸ Toro te kevu wako neya dou'nogaulo. Nevu kemi akuuto toru womdo bwotonyo me'no sajuwonogano. Aki nevu kuuguudo sodekubwasajuuwo tovida'ai kevu nebal'no yogalo tov me'no amaropogaikikono. Toro amaropo su tovi nyounosumwalpiyo. Toro kuvi kuruv yogalo su tovi guureji kuumjungovlapi to'gwowi lukomgu Gooti tool muunyu kai'muuda'ai mubiyo sugudo pun nekullabwonekono.

⁹ A'mwo pwol Krais toolluno kuuguudo sodekubwasajuuwo tovi ku'nono magudupolaro'ji tov Gooti tool a'mwo su tooke mamwalodowodekono. Toro kuvi kuruv a'mwo pwol Krais toolluno kuuguudo sodekubwasajuuwo tovi kuvinono agudupolaro'ji toolno'gwowi Gooti Ganumiyago tooke'aro gamoro Kwolaiyo tooke'aro yiuwi'nokai tooral a'mwo su tooke mwalodubulorakono.

¹⁰ A'mwo pwol Krais toolluro kuuguudo su tokwe mamokabowo'ji kemi ago tonyu abekuru'maro'ji tov kevu a'mwo su toollu ilaiyo mamollomapinono. Aki a'mwo su toollu ilaiyo mollomallo'mo yogalo pun muudupinono.

¹¹ Su tov aro tovinokwono. Kemida'ai pwol a'mwo toro toollu ilaiyo mollomallo'mo yogalo pun kuudo'ji tov a'mwo su toolluro kirovanyuvanyu womdo mujumovla'dowo'jure tovi sobanyo nomolluulo'jokwe tovinokwono.

Yogalo aiyowo'mo tovinokwono

¹² Nuu kemiyomno yogalo bwotonyago ton nokwo aikwopiyabo'mujuko kwonyu kuruv pas tovi'aro yokwollekwopiyabiyo'mo manyunadopiyo. Toro kuvi kuruv nuvnokwe toonyu kemi bekuru'maro'mi kemoro sumdomago kuunodo tovi ikwono'mi ikujo'mo anyunadopiyo. Su toro tovi'aro ilaiyo kuunodo tov nevu yiuwi'nokai tonolluro poowokalago tonyu nokwo kuullo'movanekwopiyonokwono.

¹³ Oo abolo Gooti toolluro me'no ajesungiko tov gumi junabwiyago to'busukokwono. Aki Jisasolluro a'mwo abolo pun abolo su tovuro kwoloraiyo tobuurobusuko imo'nodupudogano. Toro tobuuro gumi, “Ilaiyokwono,” aguuwopiyamavo.