1 Timooti 4 - Gooti Toolluro Yogalokwono

A'mwo kuunano kuuguudo yodubwasokwe tooraino wako neya kuu'numwalpino tovinokwono

¹ Gooti toolluro Kuullo tool aro tovino kuu'maiyo toru'no dodowodekono. Aiyowo'mo toga a'mwo abolo pun kuudo me'no uubweyodupudo tovi buulo nuugunyumopipinogano. Toro ton kuunano youkuu'najokwe kuullo toorai uumjunopi aki kuullo ma'no ma'nodo tooravuro ibwaso kunyu kuruv nuumjunpinogano.

² A'mwo ibwasodupudo su tooro kuunano yojolukuulovoma'dupudorogano. Toro kworo kuruv kevnokwe tooro kuuguudo su tovi ku'nono muumjunpinorogano. Toro tooravuro kuudo ton yiuno dogaipo'nyo kuumwiyorogano. Aki a'mwo su tooro yiuwi'nokai ma'no ma'no pasudo supi tonyuno kemi poowokalago tonyu jul'nyo mibwosunodupudorogano. A'mwo su tooro kwolabolo yoma'nyo'moneyokwe

^3-4 tovino, “Kumakokwono,” duumjuku'dupudorogano. Aki puruv wosamujuko punyu nonyo'mo tovino, “Kumakokwono,” duumjuku'dupudorogano. Toro kuvi kuruv Jisasolluro a'mwo abolo nebaikuuguudo tovi me'no youroma'dowado tonolno'gwowi yiuwi'nokai wosamujuko ton nokwo mujonugovla'mwalano'moneyokwe Gooti tool sokwollanekubweyokagano. Toro sokwollanekubweyoka toollu, “Nenoloo,” wuudowa'ji nokwo nugovla'mwalanonogano. Aki yiuwi'nokai wosamujuko su tonyu Gooti tool yiuno sugudo to'no sokwollosokagano. Toro tovino tov nevu wosamujuko su tonyuno kwoda'molo sumdo yowa'ji nomolluduvolmwala'jo. Toro kuvi kuruv wosamujuko su tonyuno Gooti toollu, “Nenoloo,” kuuda'ji to'gwowi ilaiyo nokwo nonanonogano.

⁵ Su tov aro tovinokwono. Gooti toolluro yogalo tokwe'aro aki nevu Gooti toollu subusu'nyogalo kuuda'ji tokwe'aro su tovallu'aro yiuwi'nokai wosamujuko ton Gooti toolluro sumdo tovi sugudo imo'nodupudogano.

Timootiyol Krais Jisasolluro womdokwe ilaiyo neya imo'numwalono'moneyokwe tovinokwono

⁶ Oo Timootiyoloo, guu Jisasolluro a'mwo abolo avalo tobuurai moro kuuguudo agudumo su tonyuno sodubwasubi tov Krais Jisasolluro a'mwo womdokwe sugudo imo'nubinekugono. Toro tookuji Gooti toolluro yogalo tovi kuudo uubweyowado su ton gumi aguto nokwo yogullumwojogwapimwalpinogono. Aki kuuguudo idopto'nodo ilaiyo tokwe yodubwasodowado tovi guu me'no uumjungelabodumdo su to kuruv gumi aguto nokwo yogullumwojogwapimwalonokwono.

⁷ Toro te kanoga kuuguudo toorai buulo neya duuguunyumopiyogawono. Kanoga kuuguudo su tooro Gooti toolluda'ai bodupudoromaiyo. Toro kuvi kuruv Gooti toolluro ilaiyo winodowodo tovi uumjunyo'moneyokwe tovino'gwowi guvnokwe tooku neya jubwasunogawono.

⁸ Kuudo neya jaurono. Nemoro kulako tovi jurogudo imo'nyo'moneyokwe sumwonyo pun guureji ino ino sa'ji tov yiuno pwekwonodo to'no nonekullo'mwojodowodokwono. Toro kuvi kuruv Gooti toolluro ilaiyo winodowo'jure tovi uumjunyo'mo yogudo amjumovlawa'ji su to'gwowi yiuwi'nokai tonyuno nonekullo'mwojonokwono. Su tov nemoro aiyo amwakuuwo akagake'aro lukomgu aiyo yiunokuudo mujomwekovla'mwalano kugake'aro yiuwi'nokai su toga yiuno ilaiyo to'no nekullo'mwojumwalonokwono.

⁹ Kuuguudo aikudumo su tov yiuno nebal'nodokwono. Toro tovino nevu, “Oo nebalo'mdeyo,” dowa'ji kaduko kuvinono neya wiyogawano.

¹⁰ Toro te nevu womdo bwotonyo imo'na'dowa guurejuno mujumovla'mdowadonogano. Su tov aro tovinokwono. Nevu Gooti aiyo mujomwekovla'mdowodo toolluno sogwollo kinodowadonogano. Gooti su tool yiuwi'nokai a'mwo abolo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe tookono. Toro toolluno kuudo me'no uubweyodowado tonollu kuvinono bomollurolovonekumokalokwodowodekono.

¹¹ Kuuguudo su tonyuno yodubwaso'bi aro neya duudogawono. “Kevu kuuguudo su tonyu neya duumjunogaulo.” Duudogawono.

¹² Guu muugunyo tookujuno biyolsumdo gujopi gumino aro kuudo nyau'mwalpiyo. Oo yiuno muugunyekono. Kuudo nyau'mwalpiyo. Toro kuvi kuruv gumoro somjomwekovla'bi tovi'aro Jisasolluro a'mwo abolo tonyu ilaiyo neya wuuduuwallunumwalbinekugono. Aki gumoro yogalo dodumdo tokwe'aro gumoro yomjomwekovla'mdumdo tokwe'aro gumoro kalo buuropino gujunodowodo tokwe'aro gumoro kuudo uubweyodumdo tokwe'aro guu kaiya'nodo tonyu manyu toru mwalodumdo tokwe'aro yiuwi'nokai su togai ilaiyo neya duuduuwallunogawono.

¹³ Nuu yere mabai'mo'mdo'mure toga guu Jisasolluro mollu'bwoto su'bwo'nupi tonyuro akuuto toru Gooti toolluro yogalo tokwe neya domomjojogilmovlavogawono. Aki kemoro poowokalago tonyu jurogudo neya duuwimwojo'bi jubwosumovlavogawono.

¹⁴ Aki toro tooku Gooti toolluro womdo tovi yo'moneyokwe Gooti toolluro Kuullo tool yasuwa'wino to'busuko me'no agujabokaikugono. Su toro agujaboka tovi mwonyubusuko nyumwalbiyo. Toro kweku kuruv me'no agujaboka su tovino kuudo guureji yauro'bi womdo pi'mwono domomjumovlavogawono. Yasuwa'wino agubweyoka su tov gumino proofet yogalo amodomollopo tovi'aro amarodekugono. Su tov guu Gooti toolluro womdo imwalbino'moneyokwe a'mwono moduvomwallokwe tooro kemoro ato togai gumi agubogai'nopo toga kuvinono amarodekugono. Toro tovino kuudo neya jou'movlavogawono.

¹⁵ Toro te guu womdo su tonyu pi'mwono yo'moneyokwe yiuwi'nokai toga yamju yamju neya domomjumovlavogawono. Gumoro womdo su tonyu yo'moneyokwe anakuuto tomuu yiunokuudo neya doulolukumowopiyogawono. Guu su toro subi tov aguto to'busuko gullubinekugono. Aki yiuwi'nokai a'mwo abolo ton gwonopi aro nyourogumapinogano. Oo akal jurogudo dogullumelabadopiyo. Kuudo nyourogumapinogano.

¹⁶ Aki gumoro pasudo yodumdo tokwe'aro nebaikuuguudo yodubwasodumdo tokwe'aro tovalluno guvnokwe tooku wako neya dou'nogawono. Su toro tonyu nyumwogapibiyokwe kuvinono neya domomjumovlavogawono. Guu su toro somjomwekovla'bi tookuge'aro a'mwo abolo gumi guu'nodupudo togai'aro togaikul kemi ma'no ma'nodo tovuro kirumwallo tovida'ai nobirolo'nugolokuupinogaikikono.