1 Timooti 1 - Gooti Toolluro Yogalokwono

¹ Nuu Poolonyugono. Toro toonyu Krais Jisasolluro kuurotokwe pwonyugono. Nuu kuurotokwe kuvinono imo'nyo'moneyokwe Gooti tooke'aro Krais Jisaseke'aro tooral me'no ajanubweyolonyugono. Gooti su tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Aki Krais Jisasol aikomgu wolabwono toolluno sogwollo kinodowadekono.

² Toro ajanubweyolo toonyu pas akav guu Timootekujomno saguukwollumono. Nuu Krais Jisasolluno kuuguudo sugudo moruudomollodore tovi kuudo me'no kuubweyodekugono. Toro tookujuno tov moro kwolaiyo kuunodo toolbusuko nyumo'nodumdekugono. Toro tookujuno aro nyunodowodonyugono. Nemi Nellunumiyago Gooti tooke'aro nemi Aguto Krais Jisaseke'aro tooral aro nokwo gubwemwalbullunorakono. Kemoro yasuwa'wino sugumaluko tokwe'aro gumino kalo mamwonyodubulo tokwe'aro sumwoluko kavo wosungovlaiyo'moneyokwe tokwe'aro su ton nokwo gubwemwalbullunekugono.

Kuunano ibwasokwe toorai duumjukullo'moneyokwe tovinokwono

³ Nuu sumdomgu Masedooniya'no avlavo toga gumi guureji aro me'no agudekugono. “A'mwo kuunano yodubwasodupudo toorai duumjukullo'moneyokwe guu wagwolago Efesos tovi kuuno neya domwalogawono.

⁴ Aki a'mwo kanoga kuuguudo jokwe toorogai'aro aki kemi kwikweyago tooraino yovokwe kuuguuwipuuto toorogai'aro toorai nodumwalpiyokwe tovino neya doduumjukurogawono.” Agudekugono. Kuuguudo su to kworaino a'mwo abolo ton yogalo youllajunodupudogano. Aki kuuguudo su tooro Gooti toolluro womdo tovi wimovlaiyo'moneyokwe ku'nono maikullo'mwojupinorogano. Toro kuvi kuruv yiuno Gooti toolluno kuudo kuubwemovlapi su to'gwowi gamoro womdo tovi wimovlaiyo'moneyokwe nokwo ikullo'mwojonokwono.

⁵ Guu a'mwo kuunano ibwasodopure toorai duumjukullo'moneyokwe aro neya jodubwasogawono. Yiuwi'nokai Jisasolluro a'mwo abolo ton a'mwo abolo pubuuraino kalo buuropino neya winogapuro. Kalo buuropino winyo'moneyokwe pasudo su tov puruvapuruv tonyuda'ai lokabodowodokwono. Muudu'nodo tov kemoro poowokalago me'no sal'mo'nyungiko tovida'ai lokabodowodokwono. Aki puruv kemi poowokalago tovida'ai kuudo sugudo me'no kuuluuwo'dowodo tovi kuvinono uumjunodowo'jure tovida'ai lokabodowodokwono. Aki puruv Gooti toolluno kuudo kuvinono uubweyodopure tovida'ai lokabodowodokwono.

⁶ A'mwo pworo pasudo su toro tonyu sukwo me'no sumwakoporogano. Toro tooro Gooti toolluro yogalo ibwaso'moneyokwe tonyu buulo uugunyumopiyodupu yiuno yasuwa'yogalo to'no yajunodupudorogano.

⁷ Aki Moosesolluro loowo tonyu ibwasokwe imo'nyo'mo winodupudo kworo kuruv kevnokwe tooro kuuguudo tovuro kavlo tov kuudo po'dogalo miyouroma'dupudorogano. Aki kemoro kuuguudo guureji moruudodupudo kunyuno kuruv kavlo tovino noo'nookwo to'no yodupudorogano.

⁸ Nevu kuudo me'no youroma'dowadonogano. Loowo tovuro womdo yo'moneyokwe tov aiyoga Gooti tool me'no ajesokaikono. Toro te a'mwo pwol loowo tovuro womdo su tovi po'dogalo uumjunowo'ji sodubwaso'ji tov loowo su tov sugudo imo'nonokwono.

⁹ Aki aro tovino kuudo neya yau'mwalanonogano. Gooti tool a'mwo abolo sugudo mujumovla'mdupudo tonyomno gamoro loowo tov amoropiyabokalmaiyo. Toro kuvi kuruv a'mwo abolo kisuvolo wiyodupudo tonyuno'gwowi loowo su tov amoropiyabokaikono. Aki a'mwo abolo pun Gooti toollu kaduko mwiyodupudo togai'aro Gooti toolluno kuudo miyau'dupudo togai'aro a'mwo abolo ma'no ma'no yodupudo togai'aro aki a'mwo abolo Gooti toolluro kuunodo mwimo'nodupudo togai'aro aki a'mwo abolo pun Gooti toolluro kuunodo imo'nodopure tobuurai bwolomorumwogapiyodapudo togai'aro aki a'mwo abolo pun kemi kuunum kwolabolo tonyu romiyosodupudo togai'aro aki pworo a'mwo abolo pubuurai romiyosodupudo toorogai'aro

¹⁰ aki a'mwo abolo kwonyalo yodupudo togai'aro aki a'mwo tooro a'mwo pworogai kwonyalo inodupudo toorogai'aro aki ki'nato womdo neya ipureyokweyo'mo a'mwo abolo pubuurai ipolomokabodupudo toorogai'aro kuunano yogalo youkuu'nadodupudo toorogai'aro aki kooti yogalokwe toga kuunano youkuu'nadodupudo toorogai'aro aki kuuguudo idopto'nodo ibwasodopure tovi molo wiyodupudo toorogai'aro yiuwi'nokai su tooraiyomno Gooti tool gamoro loowo tov amoropiyabokaikono.

¹¹ Kuuguudo idopto'nodo su tov kuuguudo sugudo tovida'ai bodowodokwono. Kuuguudo sugudo su tov muunyu kai'muuda'ai jurogudo kurukweyokwono. Aki Gooti ilomoropiyodowado tool gamoro kuuguudo sugudo su tovi yodubwaso'moneyokwe mi me'no amonuwopiyabokaikono.

Poolol Gooti toolluro kalo winodowodo tovino, “Nenyoo,” kuudoka tovinokwono

¹² Nemi Aguto Krais Jisasol gamoro womdo akavi momjumovlaiyo'moneyokwe mino aro kuudo me'no souromarokaikono. Oo moro womdo tov nokwo uubwemwalmekono. Su toro kuudo me'no youronuma'no sumaiyokwe ajanubweyokaikono. Yo'no aki womdo su tovi momjumovlaiyo'moneyokwe jurogudo tov nubweyodowodekono. Toro tovino tov nuu, “Nenyoo,” wuudodumdonyugono.

¹³ Sumdomgu nuu Krais Jisasollu bwolomorumwogapiyo'moneyokwe kaiya'no yogalo ajajonyugono. Aki toro toonyu gamoro a'mwo abolo tobuurai kaiyako igolodum magu'nyo kwiyajonyugono. Nuu Aguto Krais Jisasolluno kuudo muubweyajo toga kuudo maiyokwe tekwonyu su toro sajonyugono. Toro sajo kuvi kuruv nuu kuudo maiyokwe tekwonyuno tov Gooti tool mino kalo manumwonyodowo kavo to'no anubemwojajukekono.

¹⁴ Nemi Aguto su tool sumdomgu me'no aironumwallowo'jujuko kwol kuruv yiuno gavnokweyolluro yasuwa'wino sugumaluko tovida'ai to'no ilaiyo sanyugolokaikono. Toro tool Krais Jisasolluno kuudo guureji uubweyo'moneyokwe tokwe'aro kwolluda'ai kalo buuropino winyo'moneyokwe tokwe'aro su toval moro kuudo tovi neya kuullo'mowopimwalbulluno'moneyokwe anyabokaikono.

¹⁵ Kuuguudo ikudumo'mo akav yiuno nebal'nodokwono. Toro tovino nevu, “Oo nebalo'mdeyo,” dowa'ji kaduko kuvinono neya wiyogawano. Nebal'no yogalo su tov arokwono. Krais Jisasol yiuwi'nokai a'mwo abolo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe kwako akavi kwolabokaikono. Nebaikuuguudo tov su torokwono. Neya duu'nyulo. Ma'no ma'no pasudo yo'moneyokwe tov nuu yiuwi'nokai a'mwo abolo tonyu uuwolo'mdumdonyugono.

¹⁶ Nuu ma'no ma'no bwotonyokwe toonyu Jisas Kraisol mubiyo kaiya'nodo tov nokwo anubiyowo'jujukekono. Toro kwol kuruv mino kalo amanumwonyokaikono. Su toro amanumwonyoka tov Krais tool gavnokweyolluno aro tovino wuuduuwallunyo'mekono. Lukomgu a'mwo abolo ma'no ma'nodokwe ton aiyo yiunokuudo mujomwekovlaiyo'moneyokwe tovi mallo'moneyokwe Jisas Kraisolluno kuudo kuubwepi tonyu kalo aval'no mamwonyonekono. Gavnokwe toolluno su toro wuuduuwallunyo'moneyokwe sumdomgu numi kalo to'no amanumwonyokaikono.

¹⁷ Toro tool Aguto Kig yiunokuudo imo'nyo'moneyokwekono. Aki mabollo'moneyokwekono. Aki Gooti mwonodowado su tool yiuno pwolnodekono. Toro toolluno yiuwi'nokai toga yovo aguto wiyowa'ji yiunokuudo ilomoropimwolowanekono. Nebal'nodokwono.

Timootiyol ma'no ma'no pasudo toorai uuwoleyo'moneyokwe molo po'dogalo neya mujumovla'mwalono tovinokwono

¹⁸ Timootiyoloo, moro muugunyo tookubusuko nyumo'nodumdekugono. Toro tookujuno a'mwo pworo proofet yogalo tokwe aro me'no agujajupekugono. “Oo Timootiyol Gooti toolluro womdokwe wimo'nowo'ji Jisasolluno kuuguudo tokwe moruudomollonekono.” Gumino su toro me'no agujajupo tovi guu kuvinono neya uumjunmwalbino'moneyokwe nuu guureji adagubwemono. Guu su toro tomgu'aro kuumjungovla'bi tov a'mwo mollurogudo pwolbusuko ma'no ma'no pasudo toorogai molo po'dogalo mujumovla'mwalbinekugono.

¹⁹ Gumoro Krais toolluno kuudo uubweyodumdo tovi guureji neya dogudupolarogawono. Aki gumi poowokalago tovida'ai gudodowo'jure tonyu ilaiyo to'no neya duumjunogawono. Neya duu'nono. A'mwo pworono'gwowi kemi poowokalago tovi kuudo me'no kuuluuwo'dupudo tonyu kisuvolo wiyodupudorogano. Toro tovino tov kemoro kuudo uubweyodupudo kuruv kaiyako me'no i'nopiyodupudorogano.

²⁰ A'mwo su toro i'nopiyodupudo pworalluno yovo tov Himeneyoseke Aleksadaike toorakono. Toro toorallu kuudo wuuteyo'moneyokwe nuu Satanyolluro ato tovi me'no amorubweyorakono. Su toro amorubweyo tov aro tovino'mokwono. A'mwo su tooral Gooti toolluno aki aiko te kaiya'no yogalo nobwolomorumwogapimwolabullokwe tovino kuudo wuuteyo'mokwono.