1 Tesaloonaika 3 - Gooti Toolluro Yogalokwono

Poolol wagwolago Tesaloonaikada'ai Jisasolluro a'mwo abolo tonyu jurogudo duuwimwojo'mo Timootiyollu amorapiyoka tovinokwono

¹ Toro te nevu kemino kuudo kwolallo sourukwapiyajuwonogano. Toro yourukwapino sumawoneyokwe adowonogano. “Mekono. A'mwo abolo su tonyu wonyo'mo guureji anekullunadopiyo. Toro tovino tov sogwollo purukwe'aro nengovla'mwala'jo.” Su toro juno sumawoneyokwe aro adomdukuurosowonogano. Sailaseke navu judo toonal wagwolago Atens toru neya mwalosunonakono. Adomdukuurosowonogano.

² Toro domdukuurosuno sumawoneyokwe Sailaseke navu Timootiyollu kemiyomno yere amekwopiyabowolonakono. Timootiyol nemi nellugwai'yago toolbusuko nekullumo'nodowo Gooti toolluro womdo tovi aval'no yodowadonogano. Aki toro tool Krais toolluno kuuguudo sugudo tokwe aval'no modomollodowadekono. Toro toollu kemiyomno amekwopiyabowolekono. Su tool kemoro kuudo uubweyodupudo tovino guureji gudupola'mwalpino'moneyokwe daikullumwojonekono.

³ Su tov aro tovinokwono. Nevu tabunyuwuulo ton mallo'moneyokwe Gooti tool me'no ajanekubweyokaikono. Kevnokwe togaikul su toro tovino kuudo me'no youroma'dupudogaikikono. A'mwo amekwopiyabowolo su tool kemi jurogudo daikullumwojumwalonekono. Toro me'no adaikullumwojo'ji togaikul noonyumwonyu tabunyuwuulo amapi toga kemoro kuudo kuubwemwakopo tovi buulo nuugunyumopipiyo. Su toro tovino'mo jurogudo daikullumwojumwalonekono.

⁴ Sumdomgu nevu kevuge kuuno amwallajuuwo toga aro me'no aikujajuwonogano. “Nevu yiuwi'nokai Jisasolluro a'mwo abolo tonollu tabunyuwuulo pun nobaneki'mopinonogano.” Su toro me'no aikujajuuwo kuvinono kevu tabunyuwuulo pun me'no ma'dupudogaikikono. Su toro tovino kevnokwe togaikul kuudo nyau'mwakovo.

⁵ Toro kuvi kuruv nuu kemino tov aro tovino luko sonyugono. “Oo a'mwo abolo su ton Satanyolluro yamju wiyoganoduke tovi nobwolorapiyo. Kuvinono abwolorapi tov kemi akuuto toru mwalowono nemoro womdo sajuuwo su tov yiuno yasuwa'no to'no plawonokwono.” Su toro tovino luko sonyugono. Toro tovino tov nuu kemino kuudo yourekumallo'moneyokwe sogwollo kuuno mainomwalodumdonyugono. Toro te tabunyuwuulo ton baiki'mo'mdopure toga kemoro kuudo uubweyodupudo tovi kevu buulo me'no uugunyumopiyodupudogaikuldukono oo muugunyumopiyodupudogaikuldukono? Su toro tovino nuu kuudo yourekumallo'mo tov Timootiyollu kemiyomno me'no amekwopiyabonyugono.

Timootiyol Tesaloonaikada'ai tonyuno kuuguudo tokwe Poolollomno aikomgu kuumokaboka tovinokwono

⁶ Toro kuvi kuruv Timootiyol kemi tomuu yagwoto ilekwonyogalabo'no aga nevuge akaru me'no abai'mo'mwa'jukekono. Toro tool kemino kuuguudo tokwe nekumokabo'no anekudumwa'jukekono. Toro nekudoduke tovi wuu'nowono ilaiyo sumwa'juwonogano. Kemino kuuguudo tov aro anekudumwa'jukekono. Kemoro Krais toolluno kuudo uubweyodupudo tokwe'aro a'mwo abolo punyuno kalo buuropino mollodupudo tokwe'aro tovallu kevu guureji kuuno gudupola'dupudogaikikono. Aki yiuwi'nokai toga nemino ilaiyo kuudo to'no yanekuu'dupudogaikikono. Aki nevu kemi ikwonyo'mo nekullunodowodo to'busuko kubalno kev kugaikul kuruv nemi nekwonyo'mo ikullunodowodogaikikono. Su toro tovino anekudumwa'jukekono.

⁷ Nemiyobuuravoo, nemoro amwakuuwo akaruda'ai pworo nemi kaiyako yanekullugolodopure tovida'ai tabunyuwuulo togai'aro danyu'nyuwuulo togai'aro ton ama'mwakuuwonogano. Toro ma'dowore kuvi kuruv kemoro kuudo gudupola'dupudo tovino kuu'numwa'juuwo toga nevu yiuno paiko to'no subwosunmwa'juwonogano.

⁸ Kevu Aguto toolluno kuudo uubweyodupudo tovi guureji avorugwo'mo'na'mwakopo tovino tov nemoro yomjomwekovla'mdowado tovi me'no amoduko'bworonekwapiyadopikokwono.

⁹ Neya duu'nyulo. Nevu kemino kuudo yaikuu'dowado tovino tov Gooti toolluro sumdo tovi nemi poowokalago togai ilaiyo bwotonyo yodowadonogano. Toro toonol kemino tov Gooti toollu, “Nenoloo,” to'no subusu'nyogalo wuujokwenogano.

¹⁰ Aki nevu kemoro sumdomago toru bekuru'mallo'mo nekullunodowodo tovino tov surakuuto togake'aro iruko togake'aro toga subusu'nyogalo wuudoganodowadonogano. Toro abekuru'mara'ji toga kemoro Jisasolluno kuudo kuubwemwakopo tovi yogullumwojekwapiyo'moneyokwe noonyumwonyu kuudo tonyuno supto yodopure togai nevu yodekubwaso'mo anekullunadopiyo. Su toro sodekubwasa'ji togai aguto yiunokuudo nokwo yogullumovla'mwalpinogaikikono. Nevu su toro tovino subusu'nyogalo wuudoganodowadonogano.

Gooti tool puuto youlubweyono'moneyokwe tovino Poolol subusu'nyogalo kuudoganoka tovinokwono

¹¹ Toro te aga nevu kemiyomno bekuru'mallo'moneyokwe puuto tov nemi Nellunumiyago Gooti gavnokwe tooke'aro nemi Aguto Krais Jisaseke'aro tooralno nokwo youlanekubwebullunokwono.

¹² Aki kevu a'mwo abolo punyuno kalo buuropino guurejuno ikullungovla'mwalono'moneyokwe tov nemi Aguto toolno aikullo'mwojono. Toro ikullo'mwojodowo'jure tokwe kevu Gooti toolluro a'mwo abolo togai'aro yiuwi'nokai a'mwo abolo kugai'aro tonyuno kalo buuropino nokwo wingovla'mwalpinogaikikono. Kalo buuropinodo su tov guureji yogullumovla'mno yogullumovla'mno yowo'ji kemi akuuto toru bwotonyo nokwo ikullumo'numwalonokwono. Su toro aikullumo'no'ji tov nevu kemino kalo buuropino nekullunodowodo to'busuko kubalno kev kugaikul kuruv aval'no nokwo mujumovla'mwalpinogaikikono.

¹³ Aki Aguto tool kemoro poowokalago tonyu jurogudo adaikullumwojogawono. Toro daikullumwojodowo'jure tovida'ai kevu nemi Nellunumiyago Gooti toolluro sumdo tovi gavnokweyolluro kuunodo wimo'nopi aki a'mwo abolo kaiya'nodomaiyokwe nokwo wimo'numwalpinogaikikono. Su toro kwimo'nupi togaikul lukomgu nemi Aguto Jisasol gami a'mwo abolo kuunodo togai kwolabwo'ji toga ilaiyo nokwo wuuru'mapinogaikikono. Gooti tool su toro daikullumwojumwalono tovino nevu subusu'nyogalo wuudoganodowadonogano. Nebal'nodokwono.