1 Samwel 16 - Gooti Toolluro Yogalokwono

Samwelol Devitollu a'mwo aguto kig imo'nyo'mo ajesoka tovinokwono

¹ To'no'gwowi Gooti Yawel proofet Samwelollu aro kuudokaikono. “Guu a'mwo aguto kig Soololluno kalo kalo imelabodumdo kuvi kuruv aga'no'gwowi akaru'aro jumwogapiyono. Nuu a'mwo su toolluro mido mollomwalodowodo tovi me'no amodukwopiyekono. Toro tool Isuraiyolda'ai tonyu a'mwo aguto kig mwimo'nugovla'mwalonekono. Toro kuvi kuruv nuu moro a'mwo aguto kig muuduko pwolluno'gwowi me'no ajesonyugono. A'mwo ajeso su tool wagwolago Betelemda'ai Jesiyolluro muugunyo tooraida'ai pwekono. Toro te guu gumi sipsip koomwo tovi oolip munyupto tokwe kimeroso'bi Jesiyollomno domokavlavono.” Kuudokaikono.

² Toro kuudoka kuvi kuruv Samwelol aro kuudokaikono. “Nuu su toro tov adadomgu'aro kuvinono imonyudukono? Nuu a'mwo aguto kig muuduko pwollu jeso'moneyokwe pla'mdo'mure toonyuno Soolol kuu'no'ji tov noromiyanubweyonekono.” Kuudokaikono. Toro kuudoka tovi Gooti Yawel kuudokaikono. “Guu buulmokau taiyo pwollu mokavlavo'bi wagwolago Betelemda'ai a'mwo abolo tonyu duudono. “Nuu Gooti Yawellu wiroudapiyo'moneyokwe abadokwono.”

³ Toro wuudo'bi aki guu noromiroudapiyodo'bure toga guuge mwalbulluno'moneyokwe Jesiyollu dodomarono. Toro yodo'bure toga nuu gumoro yo'mo tovino nyodogubwasumonyugono. Toro yodogubwaso'mi moro aguduuwallumi toollu guu a'mwo aguto kig imo'nyo'mo dojesono.” Kuudokaikono.

⁴ Gooti Yawelluro toro kuudoka tovi Samwelol kuvinono uumjuno'no wagwolago Betelem'no avlavokaikono. Toro plaino sumaiyokwe ki'mo'mduke toga wagwolago su tovida'ai a'mwo aguto yovokwe tooro wonyuno sumaveyokwe bu'buto yo'mno abuuru'maroporogano. Toro tooro Samwelollu aro samuugojoporogano. “Gumoro sumwoluko tov nemino kavo wosodum dukobadokuuno?”

⁵ Toro samuugojopo tovi Samwelol kuudokaikono. “Tade, moro sumwoluko tov kavo wosodum Gooti Yawellu wiroudapiyo'moneyokwe abadokwono. Toro te kevnokwe toorekul Gooti Yawellu ilomoropiyo'moneyokwe kemi poowokalago ton neya yovraimwonyopi nuuge plawanorekikono.” Kuudokaikono. Toro wuujuno sumaiyokwe Samwelol Jesiyeke'aro gamoro muugunyo toorogai'aro tonumdotaino kuuwokaikono. Toro te Jesiyeke'aro gamoro muugunyo toorogai'aro tonumdoto Gooti Yawellu ilomoropiyo'moneyokwe Samwelol amollovrowosokaikono. Toro mollovrowosuno sumaiyokwe aro kuudokaikono. “Kevu romiroudapiyo'moneyokwe toru'no nuuge avlawano.” Kuudokaikono.

⁶ Toro wuujuno sumaiyokwe romiroudapiyo'moneyokwe toru'no plavo'mno ai'movoporogano. Toro ki'movo'mno da'mdopure toga Samwelol Jesiyolluro muugunyo Eliyapollu wono'no kuudo saurokaikono. “Oo a'mwo akal Gooti Yawelluro a'mwo aguto kig imo'nyo'moneyokwe ajesoka tool kwoldeyo.” Kuudo saurokaikono.

⁷ Toro kuudo sauroka kuvi kuruv Gooti Yawel Samwelollu kuudokaikono. “A'mwo aguto kig imo'nyo'moneyokwe a'mwo su toolluro kumi'yago'mdeyo oo sugumaluko'mdeyo tovi wono'bi majesubinono. Moro a'mwo ajeso tool su to kwolmaiyo. Kevu kwako tovi mwalodupudo toorekul a'mwo tooravuro kwa'mguda'ai kulako tovino to'no wonyokwerekikono. Toro kuvi kuruv nuu Gooti Yawel toonyuno'gwowi a'mwo tooravuro poowokalago kunyuda'ai wonyokwenyugono.” Kuudokaikono.

⁸ Aki Jesiyol gamoro muugunyo lukomguda'ai Abinadapollu doma'no sumaiyokwe Samwelol wononeyokweyo'mo kwolluro sumdollu toru'no amodapiyokaikono. Toro toollu Samwelol wono'no adokaikono. “Awiyo, aka kwol kuruv Gooti Yawelluro majesokaikono.” Adokaikono.

⁹ Toro juno sumaiyokwe aki Jesiyol gamoro muugunyo Sama'wollu doma'no sumaiyokwe Samwelolluro sumdollu toru'no amodapiyokaikono. Toro toollu Samwelol wonyuno sumaiyokwe adokaikono. “Awiyo, aka kwol kuruv Gooti Yawelluro majesokaikono.”

¹⁰ Aki Jesiyol gamoro 4-pela muugunyo pworai doma'no sumaiyokwe Samwelol wononeyokweyo'mo kwolluro sumdollu toru'no amodapiyokaikono. Toro toorai Samwelol wonyuno sumaiyokwe Jesiyollu kuudokaikono. “Awiyo, aka kworo kuruv Gooti Yawelluro majesokarogano.” Kuudokaikono. Jesiyolluro 7-pela muugunyo su toorai me'no wonyuno sumaiyokwe

¹¹ Samwelol Jesiyollu aro samuugojokaikono. “Gumoro yiuwi'nokai muugunyo tooro aka kworodukono?” Toro samuugojoka tovi Jesiyol kuudokaikono. “Awiyo, aiyo'wo wuullako pwol nomwallo. Toro tool sipsip toorai amoduvomwallo.” Kuudokaikono. Toro kuudoka tovi Samwelol kuudokaikono. “Gumoro muugunyo su tool abwoneyokweyo'mo guu a'mwo pwollu domodapiyono. Muugunyo su tool me'no abai'mowo'ji toga'no'gwowi Gooti Yawellu nokwo wiroudapiyanonogano.” Kuudokaikono.

¹² Toro kuudoka tovi Jesiyol gami muugunyo wuullako su toollu wuuduvo'nyo'moneyokwe a'mwo pwollu amorapiyokaikono. Toro morapino sumaiyokwe muugunyo su toollu amokabokaikono. Muugunyo su toolluro sumdomago kulako ton yiuno ilaiyo to'nodekono. Toro tool Samwelolluro sumdollu toru kuuloda'mduke toga Gooti Yawel Samwelollu kuudokaikono. “Moro ajeso tool muugunyo akal kwekono. Toro toollu jeso'moneyokwe guu oolip munyupto tokwe gami mido tovi demovobweyono.” Kuudokaikono.

¹³ Toro kuudoka tovi Samwelol oolip munyupto surosungikokwe koomwo tov malluno sumaiyokwe muugunyo su toollu gadai'yago tooro muugona'dopure toru gamoro mido tovi aimovobweyokaikono. Muugunyo aimovobweyoka su toolluno yovo tov Devitolekono. Toro toollu oolip munyupto tokwe kimovobweno sumaiyokwe Gooti Yawelluro Kuullo tool Devitollu jurogudo wimovlaiyo'moneyokwe abwolmwalokaikono. Toro abwolmwaloka togada'ai Gooti Yawelluro Kuullo su tool muugollu'mo'mdowo yiunokuudo amjomwekovlaiyajulekono. Aki Samwelol Devitollu oolip munyupto tokwe me'no kimovobweno sumaiyokwe wagwolago Rama'no aikomgu avlavokaikono.

¹⁴ Toro kuvi kuruv Gooti Yawelluro Kuullo toolno'gwowi Soolollu kuugollu'movokaikono. Toro kuugollu'movoka toga Gooti Yawel Soolollu kuullo ma'no ma'nodo pwol amoruuwopiyabokaikono. Toro amoruuwopiyaboka su tool Soolollu kaiyako amollugolameyajukekono.