1 Pita 5 - Gooti Toolluro Yogalokwono

Kevu a'mwono moduvomwallokwe toorekul Jisasolluro a'mwo abolo tobuurai neya moduvomwalmwalpino tovinokwono

¹ Kevu Jisasolluro mollu'bwoto tovida'ai a'mwono moduvomwallokwe toorekullu kuuguudo pun ikudumo'monyugono. Nuu kwonyu kuruv kevu moduvomwallokwe toorekulbusuko Jisasolluro mollu'bwoto tovi moduvomwallokwenyugono. Toro toonyu nuvnokwe toonyuro sumdo tokwe Krais toolluro dado ma'duke tovi me'no kwononyugono. Krais su tool gamoro jurogudo tovuro bako bwotonyo tokwe kuu'maiyo toru bomollolupto'nosowo'ji gamoro sugumaluko ton wiyodowo'jure toga nuu kwonyu kuruv pun noma'monyugono. Toro te nuu kevu moduvomwallokwe toorekulbusuko imo'nodumdo toonyu kemi guureji aro ikudumo'monyugono.

² Kevu Gooti toolluro a'mwo abolo sipsip tobuurobusuko imo'nodupudo su tobuurai pi'mwono neya domollomwalogaulo. Gooti tool a'mwo abolo su tobuurai mollomwalmwalpino'moneyokwe womdo tov kemi me'no aikubweyokaikono. Toro te a'mwo abolo su tobuurai moduvomwallo'moneyokwe kevu biyolo nuu'mwojumwalpiyo. Toro kuvi kuruv Gooti toolluro ilaiyo winodowo'jure tovi kuvinono uumjunopi Jisasolluro mollu'bwoto su tovi moduvomwallo'moneyokwe womdo su tovino ilaiyo neya domjumovlavogaulo. Aki kevu moduvomwallo'moneyokwe womdo su tovi mujumovlavopi yiuno nuugwiyo ki'nomallo'moneyokwe to'no kuudo nyau'mwalpiyo. Toro kuvi kuruv kevnokwe toorekul Jisasolluro mollu'bwoto su tovi moduvomwalpino'moneyokwe tovino ilaiyo neya aikullunogawono. Su toro tovino tov womdo guureji neya jogaulo.

³ Aki kevu a'mwo abolo su tobuurai nomoduvomwalmwalpino'moneyokwe Gooti tool kemoro ato tovi me'no ikubweyodowodekono. Toro ikubweyodowodo su tobuurai kevu kwako akavida'ai a'mwo aguto toorobusuko guurejuno nogalagu'mwojumwalpiyo. Toro kworekul kuruv Jisasolluro a'mwo abolo sipsip tobuurobusuko imo'nodupudo su tobuurai Gooti toolluro sugupasudo tokwe neya duuduuwallogaulo. Toro wuuduuwallodopure toorekullu a'mwo abolo su tobuuro ikwonopi nokwo ikumjunmwalpinogano.

⁴ Aki a'mwo abolo sipsip tobuurobusuko su tobuuravuro moduvomwallo'moneyokwe Aguto kuunodo Jisasol kuu'maiyo toru nobiyalo'nonekono. Su toro abiyalo'no'ji toga a'mwo resis tovi kuuwolopi tooravuro mubiyo sugudo ma'dupudo to'busuko kubalno kevu aval'no nomapinogaikikono. Mubiyo su tov Gooti tool gamoro bako bwotonyo tovi anakuuto tomuu yiunokuudo mujomwekovla'mwalpino tov ikullabwonekono. Aki toro aikullabwo'ji su tov kaiyako ku'nono migolamo'nonokwono.

Nevu Gooti su toolluro ato tovi nemoro yiuwi'nokai jul'nyo tagunyo ton neya wuudukwopimwalano tovinokwono

⁵ Toro to'busuko kubalno kevu a'mwo muugunyunodo kworekul kuruv a'mwono moduvomwallokwe toorai kwako tomuu'aro neya duuwiyogaulo. Aki kevu yiuwi'nokai a'mwo pwolno pwolnodo toorekul kevnokwerekulluno bwolomoropinapi kemida'ai a'mwo go'no go'nodo toorai kwako tomuu'aro to'no neya duuwimovlavogaulo. Su toro tovino Gooti toolluro yogalo puruv aro sakwollungikokwono. “Gooti tool a'mwo ilomoropunyu yodapudo toorai molo wiyokwekono. Toro kuvi kuruv a'mwo bwolomoropinodapudo tooraino'gwowi gamoro yasuwa'wino sugumaluko tov wiyokwekono.” Su toro sakwollungikokwono.

⁶ Toro te kevu kevnokwe toorekulluno bwolomorumwogapinapi Gooti jurogudo kuunodokwe toollu kwako tomuu'aro neya duuwimovlavogaulo. Kevu su toro bwolomorumwogapinapi Gooti toollu kwako tomuu'aro kwipi tov aro tovino'mokwono. Gooti tool gavnokwelluro iruko ajesungiko tollugwo abai'mowo'ji toga kemi muunyu toru'aro nyulomollekumwallonorekikono.

⁷ Gooti tool kemi mollekumwalodowodekono. Toro tovino tov kevu Gooti su toolluro ato tovi kemoro yiuwi'nokai jul'nyo tagunyo ton neya duudukwopiyogaulo.

⁸ Kevu neya yovraimwonyugovlavopi kemi ikomago Satanyolluno wako neya dou'nogaulo. Satanyol aro to'busuko yokwekono. Laiyon pwol ibesa'aiyo pwollu dovanyo'moneyokwe dukuu'nyu dukuu'nyu yomollowo'ji deko bwotonyo dumovla'mdowodekono. Su toro to'busuko kubalno Satanyol a'mwo pworai kaiyako mollugolameyo'mo yo'mgonomollokwekono.

⁹ Toro te Satanyolluro yogalo tovi kaduko mwipinono. Toro kworekul kuruv kemi Krais toolluno kuudo uubweyodupudo tovino'gwowi guureji gudupolaropi jurogudo dodavogaulo. Kevu aro tovino kuudo me'no youroma'dupudorekikono. Kevu tabunyuwuulo ma'dupudo to'busuko kubalno yiuwi'nokai Jisasolluro a'mwo abolo kwako akavi mwalodupudo kubuuro kuruv tabunyu aval'no ama'mwakopogano. Toro tobuuraino kevu kuudo neya jou'movlavogaulo.

¹⁰ Gooti tool yiuwi'nokai toga gamoro yasuwa'wino sugumaluko tov nekullabiyokwekono. Aki Gooti tool kevu Krais Jisasollu uuguro'mwonyodupudo su toollu'aro gamoro bako su tovi anakuuto tomuu yiunokuudo mujomwekovlaiyo'moneyokwe kemi me'no adekumarokaikono. Toro tovino tov kemoro tabunyuwuulo amo'movla'mwakopo su ton manyu toga guureji mamjo'movla'mwalpinogano. Yiuno kula'nyo toga'gwono mokavlavopi kevu sugudo imo'nupino'moneyokwe Gooti tool aki aiko te yere yekuvo'dogalmwalonekono. Toro yekuvo'dogalowo'ji kemi sobanyo mollekuda'mwalonekono. Toro mollekudavowo'ji aki jurogudo yogullumwojekwapimwalonekono. Aki kemi jurogudo nomekudapimwalonekono. Gooti tool kemi tono tono yaikullugolmwalonekono.

¹¹ Gooti su tool yiuwi'nokai tonyu mido momjomwekovla'mdowodekono. Toro toolluno nevu yiuwi'nokai toga yiunokuudo neya ilomoropimwolowanekono. Nebalokwono.

Kuuguudo aiyowo'mo tovinokwono

¹² Nuu a'mwo Sailasolluno aro kuudo yau'dumdekono. Oo Jisasolluro a'mwo su tool mi nyugwai'yago pwolbusuko nyumo'nodowodoldeyo. Toro tool Krais toollu guureji uumjunyokweyoldeyo. Kuudo yau'dumdekono. Pas kula'nyo akav kemi yokwollekwopiyabiyo'moneyokwe a'mwo su tool mi anyo'mwojokaikono. Nuu pas akavi'aro kemi jurogudo daikullumwojumo'monyugono. Aki kuu'maiyo toru'no aro dodoluwosumo'mokwono. Kemoro tabunyuwuulo ama'mwakopo su ton yiuno Gooti toolluro yasuwa'wino sugumaluko tovida'ai to'no ikullumo'nodupudogano. Toro te kevu Gooti toolluro yasuwa'wino sugumaluko su tovi akuuto tomuu guureji neya doulodavogaulo.

¹³ Wagwolago Bebeloonda'ai a'mwo abolo Krais toolluro mollu'bwoto ton kemi, “Ilaiyokwono,” adekwopiyamapogano. Krais tool kemi me'no ajaikubweyoka to'busuko kubalno kwako Bebeloon tomuuda'ai a'mwo abolo su to kubuurai kuruv me'no ajesokagano. Aki Mak kwol kuruv kemi, “Ilaiyokwono,” adekwopiyamokaikono. A'mwo su tool mi kwolaiyo pwolbusuko nonyumo'nodowodekono.

¹⁴ Kevu Jisasolluro a'mwo abolo tobuurai kuuru'mapi toga kalo buuropino mollo'mo tov kemoro suuwado tonyu molluduuduulo duuwiyogaulo. Aki yiuwi'nokai Krais toollu uuguro'mwonyodupudo tobuurekul sumwoluko kavo wosunmwalpino'moneyokwe tov Gooti tool nokwo ikubwemwalonekono.