1 Pita 4 - Gooti Toolluro Yogalokwono

Nemoro ma'no ma'no pasudo amjumelabiyajuuwo toorai neya yuu'dapimwalano tovinokwono

¹ Krais tool gamoro kulako tovi dado pun me'no amallajukekono. Toro to'busuko kubalno kev kugaikul kuruv kemoro kulako togai dado pun noma'mwalpinogaikikono. Toro tovino kevu neya jovrowosunogaulo. Kevu jurogudo imo'nyo'moneyokwe Krais toolluro kuudo saullajuko aval'nodo tomgu'aro neya jaurogaulo. Neya duu'nyulo. A'mwo pwol Krais toollu me'no uuguro'mwonyodowodo tovida'ai gamoro kulako tovi dado amaro'ji tool ma'no ma'no pasudo amjumelabiyajuko toorai me'no yuu'dapiyodowodekono.

² Toro yuu'dapiyodowodo su tool gamoro kulako tokwe aiyo kuuno amjomwekovlawo'ji toga kulako su tovuro ilaiyo igollunyo'moneyokwe toorai aki aiko te nuumjungovla'mwalo'jo. Toro kwol kuruv Gooti toolluro ilaiyo winodowodo tovino'gwowi neya uumjungovla'mwalonekono.

³ Sumdomgu a'mwo abolo Gooti toollu kuudo muubwemwakopo tonyuro pasudo kiroungovla'mdupudo su toorai kevu aval'no airoungelabiyajupo tov neya jumwogapilo. Kemoro pasudo airoungelabiyajupo judo'no judo'nodo su tooraino neya duu'nyulo. Kwonyalo pasudo toorogai'aro kulako tovuro kwanyu kinuwiyo'moneyokwe pasudo toorogai'aro imo'wonyo bwotonyago nopi tovida'ai amomo pasudo toorogai'aro yasuwa'no luverounomollo'moneyokwe pasudo toorogai'aro lubullu doto kaiya'nodo toorogai'aro kuunano gooti pworai ilomoropiyo'moneyokwe pasudo toorogai'aro pasudo su toro toorai me'no airoungelabiyajupogaikikono.

⁴ Aki a'mwo abolo kuudo muubwemwakopo su ton kemi ikwonopi kuudo yaupinogano. Oo aga'no'gwowi nevuge kirovanyuvanyu kuuno mairoungovla'mdupudodeyo. Kuudo yaikuupinogano. Su toro kuudo yauropi kev togaikulluro pasudo muuduko tovino luko morumoukuropipinogano. Su toro tovino tov kemino burolyogalo to'no bwolomodomorekumwogapiyodapudogano.

⁵ A'mwo abolo kuudo muubwemwakopo su ton lukomgu Gooti toolluro sumdollu toru nodapinogano. Gooti su tool yiuwi'nokai tonyu kooti yogalo duuwiyowo'ji nojainyubwollo'moneyokwe tov me'no sovraimwonyomwallajukekono. Toro tool a'mwo abolo aiyo kuuno mwalodupudo togai'aro aki a'mwo abolo me'no bolodupudo togai'aro yiuwi'nokai tonyu jainyubwollo'moneyokwe kooti yogalo noduuwiyonekono. Toro aduuwiyo'ji toga yiuwi'nokai su ton kemoro pasudo mujumovla'mdupudo tooraino kavlo tov yiuno kuu'maiyo toru'no dodowiyoku'bworosunpinogano.

⁶ Toro kuvi kuruv a'mwo abolo me'no bolodupudo su ton yere mabolodopure toga Gooti toolluro a'mwo womdokwe pworo Jisasolluno kuuguudo sugudo tokwe me'no amoruudomollajuporogano. Kuuguudo sugudo moruudomollodopure su tovi a'mwo abolo kuudo uubweyodupudo ton lukomgu bolmelabodupudogano. Kemoro kulako tov kirumwallo tovida'ai bolmelabodupudo kuvi kuruv Gooti toolluro Kuullo toolluno'gwowi me'no uuguro'mwonyodupudogano. Toro uuguro'mwonyodupudo tovino tov Kuullo su toolluro jurogudo tokwe Gooti toolbusuko aiyo yiunokuudo mujomwekovla'mwalpinogano. Su toro tovino'mo kuuguudo sugudo tov a'mwo abolo mujobolmelabodupudo tonyu amoruudomollajupokwono.

Gooti toolluro yasuwa'wino nekullabodowodo togai Jisasolluro a'mwo abolo pubuurai neya wiyo'mwojumwalano tovinokwono

⁷ Aga kwako akavuro aiyowo'mo tov nobai'meyo'mo sadopiyo. Toro tovino tov kevu Gooti toollu subusu'nyogalo wuudumovla'mwalpino'moneyokwe kevnokwe togaikulluro pasudo tonyu neya mollomwalnopi aki kemoro kuudo kun kuruv neya jovraimwonyogaulo.

⁸ Kevu yiuwi'nokai Jisasolluro a'mwo abolo tonyuno kalo buuropino imgu amgu neya domollogaulo. Pasudo su tov aguto kuunodokwono. Aro tovinokwono. Kalo buuropino pasudo su tokwe amomjumovlapi toga a'mwo abolo punyuro ma'no ma'no pasudo yaikullugolodopure bwotonyago tonyu nobu'duvolosumwalonokwono.

⁹ Aki a'mwo abolo pubuuro kemoro ago tomuu abekuru'mapi tov wosamujuko'mdeyo oo sa wollo'mo'mdeyo supto supi tobuurai kevu pi'mwono neya domollomwalogaulo. Aki kevu a'mwo abolo su tobuurai amollomwalpi tovino biyekuu'nyogalo noduu'mwojumwalpiyo.

¹⁰ Gooti tool kevu Jisasolluro a'mwo abolo pwolno puru'monodo togaikullu gamoro yasuwa'wino sugumaluko tov me'no aikullabokaikono. Toro ikullabino sumaiyokwe kevu Gooti toolluro womdo imwalpino'moneyokwe yasuwa'wino judo'no judo'nodo tonyuda'ai pun aikullabokaikono. Yasuwa'wino aikullaboka su ton Jisasolluro a'mwo abolo pubuurai womdo wimwalpino'moneyokweyogano. Toro te kevu yiuwi'nokai Jisasolluro a'mwo abolo togaikul imgu amgu womdo pi'mwono neya jungovlavogaulo.

¹¹ Toro te kemida'ai a'mwo pwol moruudomollo'moneyokwe yasuwa'wino su tovi amaro'ji tov a'mwo su tool Gooti toolluro mago tovida'ai mollodavowo'ji gamoro mago tokwe neya moruudomollumwalonekono. Aki kemida'ai a'mwo pwol a'mwo abolo pubuurai womdo wiyo'moneyokwe yasuwa'wino su tovi amaro'ji tov a'mwo su tool Gooti toolluro jurogudo uubweyodowo'jure tokwe a'mwo abolo pubuurai womdo guureji neya wimwalonekono. Su tov aro tovinokwono. Kemoro yiuwi'nokai judo'no judo'no womdo amjumovlapi su ton Jisas Kraisollu'aro Gooti toolluno yovo tovi kuvinono ilomoropiyapinogaikikono. Jisas Kraisol Gooti toolluro bako bwotonyo pwopiyodowodo tovi anakuuto tomuu mwalodowo aki yiuwi'nokai tonyu mido mollomwalodowodekono. Toro toolluno nevu yiuwi'nokai toga yiunokuudo neya ilomoropimwolowanekono. Nebalokwono.

Krais toolluno yovo tovida'ai nevu tagunyo amara'ji tovino ilaiyo neya imwalano tovinokwono

¹² Mi ibwoto'nyobuuravoo, tabunyuwuulo bwotonyo pun duko nosodupudo to'busuko kemi abaiki'mo'mwakopo tonyuno kevu mollolokurosi yopi aro nodumwalpiyo. “Oo tabunyuwuulo bwotonyo akav buro'nyo kavlo tovino dukonekullumo'nadopiyo?” Su toro nodumwalpiyo. Gooti tool kemoro kuudo uubweyodupudo tovi yamju ikulloganyo'moneyokwe tabunyuwuulo su ton ikullumo'nodupudogano.

¹³ Kevu Krais toollu me'no uuguro'mwonyodupudo togaikul gamoro tabunyuwuulo amaroka to'busuko kubalno aga tabunyuwuulo pun ama'mwakopogaikikono. Toro ama'mwakopo tovino ilaiyo to'no jubwosunogaulo. Kevu ilaiyo ibwosunmwalpino su tov kavlo aro tovinokwono. Lukomgu Krais tool gamoro bako bwotonyo tokwe kuu'maiyo toru abiyalo'no'ji toga kevu kwollu me'no uuguro'mwonyodupudo togaikul bako su tovi anakuuto tomuu nouloonomollupinogaikikono. Su toro toga kemoro ilaiyo ibwosunpino tov maluko'nyo'maiyo. Ilaiyo bwotonyo nyubwosunpinogaikikono.

¹⁴ Toro tovino tov Krais toolluno yovo tovida'ai a'mwo abolo pun kemi burolyogalo abwolomekumwogapiyapi tov ilaiyo nokwo imwalpinogaikikono. Su tov aro tovinokwono. Gooti toolluro Kuullo jurogudo kuunodokwe tool kevuge me'no mwalodowodekono.

¹⁵ Toro te kemida'ai a'mwo pwolnodo kwol kuruv ma'no ma'no pasudo so'ji tovida'ai tabunyuwuulo pun nomaro'jo. Toro kuvi kuruv kemida'ai a'mwo pwol tabunyuwuulo kuvinono amaro'ji to'gwowi ma'no ma'no pasudo aro tooraida'ai wimo'nonekono. Romiyosokwe pasudo'mdeyo oo kuuko pasudo'mdeyo oo kirovanyuvanyu pasudo'mdeyo oo a'mwo abolo pubuuravuro yomjomwekovla'mdopure tovino kuuguudo luvomollo'moneyokwe pasudo'mdeyo pasudo su toro toorai so'ji tovida'ai tabunyuwuulo amaro'ji su tov ilaiyo'maiyo.

¹⁶ Toro kuvi kuruv kevu Kristenovo dodupudo togaikulluda'ai a'mwo pwol Krais toolluno yovo tovida'ai tabunyuwuulo amaro'ji su toolno'gwowi wogulo nyubwosunmwalo'jo. Toro kwol kuruv Krais toolluno yovo tovida'ai tabunyuwuulo amaro'ji su tovino Gooti toolluno yovo tovi neya ilomoropimwolawonekono.

¹⁷ Neya duu'nyulo. Nevu a'mwo abolo Gooti tooke mwalodowado tobuuronollu gamoro kuudo nekuuteyo'moneyokwe tov me'no abai'mo'mwallukokwono. Toro te gamoro a'mwo abolo tonollu tagunyo togai sumdomgu anekuutemwallo. Gooti tool gamoro a'mwo abolo tonollu me'no nekuuteyodowodo tovino tov a'mwo abolo Gooti toolluro kuuguudo sugudo tovi kisuvolo wiyodupudo kunyu kuruv kuvinono nuuteyonekono. Aki su tonyuro jul'nyo mapino to'gwowi bwotonyo kuunodokwono.

¹⁸ Su toro tovino Gooti toolluro yogalo sakwollungiko puruv aro dodowodokwono. “A'mwo abolo Gooti toolluro sumdo tovi sugudo wimo'nodupudo tobuurai ma'no ma'nodo tovuro kirumwallo tovida'ai bomollurolovomokalokwiyo'moneyokwe womdo tov kavenodo'maiyo. Toro tovino tov a'mwo abolo Gooti toollu muumjunodupu ma'no ma'no mujumovlaiyokwe su tonyuno'gwowi Gooti tool mabomollurolovomokalokwonogano.” Dodowodokwono.

¹⁹ Toro te Gooti toolluro ilaiyo winodowo'jure tovida'ai kev togaikulluro a'mwo abolo pun tagunyo amapi tov kemoro kwako akavida'ai aiyo mwallo'moneyokwe tov Gooti toolluro ato tovi neya uubweyogapuro. Neya duu'nyulo. Gooti tool a'mwo abolo su tonyu me'no sokwollosokagano. Toro sokwollosoka su tonyu pi'mwono mollomwalmwalonekono. Toro te a'mwo abolo su ton tagunyo amapi kuga kuruv sugupasudo kuuno neya amjumovlavogapuro.