1 Koorin 9 - Gooti Toolluro Yogalokwono

Poolol kuurotokwe womdo sajuko tovino nuugwiyo mamallajuko tovinokwono

¹ Kevu kuudo neya jaullulo. Nuvu buro'nyo buro'nyo womdodeyo pun yo'mo nyunodowo'jure tovi noonyumwonyu pworo wuulo ku'nono manugullupinonyugono. Nuu nemi Aguto Jisasollu me'no kwono toonyu gamoro kuurotokwe imo'nodum gamoro womdo tovi mujumovla'mdumdonyugono. Aguto toolluro womdo mujumovla'mdore su tovida'ai kevu gamino kuudo me'no kuubweyopogaikikono.

² A'mwo pworo mino aro kuudo yanuu'dupudorogano. Oo Poolol Jisasolluro kuurotokwe kuunodolmaiyo. A'mwo pworo mino su toro kuudo yanuu'dupudo kuvi kuruv kevno'gwowi aro kuudo youroma'dupudogaikikono. Oo Poolol nemi akuuto toru mwalodowo Aguto toolluro womdo tovi momjumovla'mduke tovida'ai nevu nemi Aguto su toolluro a'mwo abolo kuunodo kwimo'nowonogano. Toro tovino tov Poolol Krais Jisasolluro kuurotokwe kuunodekono. Kevu mino tov kuu'maiyo toru'no su toro kuudo me'no youronuma'dupudogaikikono.

³ Toro te a'mwo pworo mino tov, Oo a'mwo su tool kuurotokwe kuunodolmaiyo, gallenyubworonuma'dupudo su toorai nuvu aro wuudodumdonyugono.

⁴ “Nuvuge'aro Banabaseke'aro toonalluro womdo aguto mujumovla'mdowolo tovino tov aro nokwo dumwalosunonakono. Namoro womdo yodowosure tovida'ai mubiyo tov wosamujuko togai wonyo togai nokwo nakubimwalpinonakono.” Navu su toro nokwo wuudumwalosunonakono.

⁵ Aki kuurotokwe pworogai'aro nemi Aguto toolluro gagwai'yago toorogai'aro Pitaike'aro tooro Gooti toolluro kuuguudo sugudo tokwe moruudomollodupudo toga kemi abolo togai mokavla'mdupudorogano. Su toro to'busuko kubalno navu kwonal kuruv abolo Jisasolluno kuudo kuubwengiko puruvallu amarowosujuko'mno'juki nokwo amokavlavowosujukonakono.

⁶ A'mwo womdokwe pworo Gooti toolluro womdo su tovi yodupudo tovida'ai nuugwiyo ma'dupudorogano. Toro tooro nuugwi womdo gabovo punyu mamjumovla'mdupudorogano. Su toro to'busuko kubalno nuvuge'aro Banabaseke'aro toonal Gooti toolluro womdo yodowolo tovida'ai nuugwi mallo'mo anakullunowo'jujuko'mno'juki kuvinono nokwo amarowosujukonakono.

⁷ Kevu neya duu'nyulo. A'mwo mollurogudo pwol gavnokweyolluro nuugwiyo tovida'ai mamjonomwekovla'mdowodo kwol kuruv a'mwo pworavuro uubiyodopure tovida'ai to'gwowi mujonomwekovla'mdowodekono. Aki wain womdo yoburaudodowodo tool wain ikulsulo ai'no'ji tovida'ai muudonugovla'mdowodekono. Aki a'mwo sipsip moduvomwallokwe tool gami sipsip tooravuro amuunallo pun mujonugovla'mdowodekono. Su toro to'busuko kubalno Gooti toolluro womdokwe tooro kemi womdo mujumovla'mdopure tovida'ai nokwo mujonomwekovla'mwalpinorogano.

⁸ Yogalo su tov nuvu kwako akavida'ai a'mwo pworavuro kuudo tovi uumjunodum maikudadokwono. Toro kuvi kuruv kevu kuudo pun jaullulo. Gooti toolluro loowo Moosesollu kwiyoka puruv yogalo su to'busuko aval'no dodowodokwono.

⁹ Gooti toolluro loowo Moosesollu kwiyoka su tov aro sakwollungikokwono. “Buulmokau pwol wit sulo tollovai lojodavowo'ji nonyo'mo yodowo'jure toollu gamoro mago tovi wuulo tokwe mamoweyopipinono.” Sakwollungikokwono. Yogalo su tov Gooti tool yiuno buulmokau tooraino to'no kuudo yauro'no adoka'mdukono? Awiyo.

¹⁰ Ne kunollunoda'ai kuudo yau'no sumaiyokwe Gooti tool yogalo su tov toro adokaikono. Yogalo su tov aro tovinokwono. A'mwo womdo tovi ilsowiyaiyodowodo tooke'aro wit sulo tollovai lojo'moneyokwe gurojodowodo tooke'aro su tooral womdo yasuwa'no miyodubulorakono. Toro kworal kuruv kemi wosamujuko tobuuro yomoranyo'moneyokwe womdo su tov yodubulorakono.

¹¹ Su toro to'busuko kubalno nevu kemi akuuto toru mwalowono Gooti toolluro yogalo tokwe kemoro poowokalago tonyu ikulsulo to'busuko avlollaikubweyajuwonogano. Toro toonol nemi womdo sajuuwo su tovida'ai kwako akavida'ai wosamujuko ton neya yomoranumwalanonogano. Su tov aro tovinokwono. A'mwo pwol gami womdo tovida'ai wosamujuko ton mulomarowo'ji yonugovla'mdowodekono. Su toro to'busuko kubalno ne kwonol kuruv kemoro kwako akavida'ai noonyumwonyu tobuurogai nekullabodopure tonyu marowa'ji nokwo yomjonomwekovla'mwalanonogano.

¹² Kevu a'mwo kuuguudo sugudo tokwe yodekubwasodupudo pworai nomjonomwekovla'mwalpino'moneyokwe pun wiyodupudogaikikono. Lukomguda'ai a'mwo su tooro kemoro noonyumwonyu ton su toro ma'dupudo kuvi kuruv nevno'gwowi sumdomgu kemi akuuto toru womdo sajuuwo toonolluno tov kemoro noonyumwonyu ton guureji nokwo amo'movlavowa'jujukonogano. Nevnokwe toonol yonugovlaiyo'moneyokwe kemoro pun su toro nokwo amarowa'jujuko kwonol kuruv yiuno puru'monodo kuruv mamallajuwonogano. Su tov aro tovinokwono. Nevu Krais toolluno kuuguudo sugudo bomje'nugouloduke tovi nuumjukura'jokwe tov buro'nyo buro'nyodeyo nemi baneki'mo'mdopure kuga kuruv mimwogapiyajuwonogano.

¹³ Kevu aro tovino kuudo nyau'mwakovo. Gooti toollu ilomoropiyo'moneyokwe ago tovida'ai a'mwo womdo kuullodupudo tooro kemoro womdo su tovida'ai nomwekovla'mdupudorogano. Toro tooro a'mwo abolo punyuro wosamujuko ton Gooti toollu wiyo'moneyokwe mokabodopure su tonyuda'ai ma'dupu yonugovla'mdupudorogano. Aki Gooti toollu wiroudapiyo'moneyokwe dukwagupto toru womdo kuullodupudo kworo kuruv romiroudapiyo'moneyokwe sipsiporodeyo mokabodopure su tooraida'ai ma'dupu yonugovla'mdupudorogano.

¹⁴ Su toro to'busuko kubalno Aguto tool aro me'no aduuwiyokaikono. “A'mwo tooro a'mwo abolo punyu kuuguudo sugudo tokwe amoruudomollupi tov a'mwo abolo kuuguudo sugudo su tovi amapi ton kevnokwenyuro ato tovida'ai noonyumwonyu pugai a'mwo nomoruudomollodopure su toorai neya uubimwalpinogano.” Aduuwiyokaikono. Toro te a'mwo kuuguudo sugudo tokwe amoruudomollupi su tooro su toro tomgu'aro nokwo yonugovla'mwalpinorogano.

¹⁵ Toro tovino tov nuvu su toro nokwo amaro'mujuko kwonyu kuruv yiuno puru'monodo kuruv mamallokwenyugono. Aki nuvu a'mwo pwolnodo kwollu kuruv aro muudodumdonyugono. “Oo moro womdo yodumdo tovino mubiyo tov donyabono.” Muudodumdonyugono. Aki aga kuga kuruv kemi pas akav yakwollodum aro maikudadokwono. “Oo nuvu sumdomgu kemi akuuto toru womdo sajo tovino tov mubiyo neya donyulo.” Maikudadokwono. Aki kuuguudo sugudo tokwe moruudomollodo'mure tovida'ai a'mwo pwol mubiyo anubiyo'ji tov noma'miyokwe neya abolmo. Su tov aro tovinokwono. Nuu kuuguudo sugudo tokwe moruudomollodo'mure tovino mubiyo ton mama'dumdonyugono. Su toro yodumdo tovino ilomoropiyodamdonyugono.

¹⁶ Toro kuvi kuruv nuvu kuuguudo sugudo tokwe amoruudomollumi tovino'gwowi nuvnokwe toonyuno ilomoropunyu mimwolamonyugono. Su tov aro tovinokwono. Gooti gavnokwe tool gamoro kuuguudo sugudo tokwe moruujo'moneyokwe womdo tov anubweyokanyugono. Toro tovino tov nuu kuuguudo sugudo tokwe mamoruudo'mujuko'mno'juki moro poowokalago tovi jul'nyo bwotonyo subwosuno'mujukonyugono.

¹⁷ Kevu kuudo pun jaullulo. Nuvnokwenyuro kuudo tovida'ai womdo tovi senyubworomaro'mujuko'mno'juki womdo su tovuro mubiyo tov nokwo amaro'mujukonyugono. Toro kuvi kuruv Gooti gavnokwe toolno'gwowi womdo su tovi yenyubworomaro'no mi anubweyokaikono. Toro anubweyoka su tovino to'no mujumovla'mdumdonyugono.

¹⁸ Toro te nuvu womdo su tovida'ai mubiyo puruv noma'monyudukono? Tade. Mubiyo to'busuko puruv noma'monyugono. Su tov arokwono. Nuu a'mwo abolo tonyu kuuguudo sugudo tokwe yasuwa'no moruudomollodumdo tovino tov moro poowokalago tovi ilaiyo bwotonyo ibwosunodumdonyugono. Ilaiyo bwotonyo ibwosunodumdo su tov moro mubiyo to'busuko nyumo'nodowodokwono. Toro tovino tov nuu kuuguudo sugudo tokwe moruudomollodo'mure tovida'ai nuugwiyo anubiyopujuko kuruv ku'nono mama'dumdonyugono.

¹⁹ A'mwo pwol mi mubiyo nubiyodowo'jure'mno'juki nuvu a'mwo su toolluro mido mollomwalo su tovi dolago tomuu ki'naro'mi gamoro womdo su tovi nokwo kwimovlavo'mujukonyugono. Nuvu su toro tomgu'aro ku'nono miyodumdonyugono. Toro kwonyu kuruv a'mwo abolo bwotonyago tonyu Krais toollomno mollubworomokavlaiyo'moneyokwe womdo su to'gwowi nuvu yiuwi'nokai a'mwo abolo tonyuro ki'nato womdokwe pwolbusuko wimo'nodumdonyugono.

²⁰ Toro te Juu a'mwo abolo tobuuro Krais toolluno kuudo neya uubwepino'moneyokwe nuvu Juu a'mwo abolo togai amwalmi toga Juu kuunodo pwolbusuko imo'nodumdonyugono. Aki nuu loowo tovi dolago tomuu mamwallokwenyugono. Toro kwonyu kuruv a'mwo abolo loowo tovi dolago tomuu mwalodupudo togai amwalmi toga nuu kwonyu kuruv loowo tovi dolago tomuu mwalodowodo pwolbusuko imo'nodumdonyugono. Toro te a'mwo abolo loowo tovi dolago tomuu mwalodupudo su to kubuuro kuruv Krais toolluno kuudo neya uubwepino'moneyokwe nuvu loowo tovi dolago tomuu mwalodowodo pwolbusuko imo'nodumdonyugono.

²¹ Aki a'mwo abolo Moosesolluro loowo nonagutokwe su togai amwalmi toga nuu kwonyu kuruv loowo nonagutokwe pwolbusuko imo'nodumdonyugono. Toro kwonyu kuruv Gooti toolluro loowo tovi kwa'mgu tomuu mamwalodumdonyugono. Su tov aro tovinokwono. Nuvu Krais toolluro loowo tovi dolago tomuu me'no mwalodum uumjunodumdonyugono. Toro tovino tov nuvu a'mwo abolo loowo nonagutokwe togai amwalmi toga su to kunbusuko imo'nodumdonyugono. A'mwo abolo su to kubuuro kuruv Krais toolluno kuudo neya uubwepino'moneyokwe su toro yodumdonyugono.

²² Aki a'mwo abolo jurogudo mimo'nodupudo togai amwalmi toga nuu kwonyu kuruv jurogudo mimo'nodowodo pwolbusuko imo'nodumdonyugono. A'mwo abolo su to kubuuro kuruv Krais toolluno kuudo neya uubwepino'moneyokwe nuvu su toro yodumdonyugono. Toro te nuvu yiuwi'nokai a'mwo abolo judo'no judo'nodo su tonbusuko aval'no imo'nodumdo tov aro tovinokwono. A'mwo abolo su tonyuro pun Krais toolluno kuudo kuubwepi tonyu Gooti tool ma'no ma'nodo tovuro kirumwallo tovida'ai bomollurolovomokalokwono'moneyokwe yodumdonyugono.

²³ Aki moro yiuwi'nokai yodumdo su tov kuuguudo sugudo tov neya bomje'nugoulawono'moneyokwe yodumdonyugono. Kuuguudo sugudo su tov bomje'nugoulodowo'jure tovi a'mwo abolo kuudo kuubwepi tonyo'mo Gooti tool gamoro sugudo pun me'no yovroubweyodowodekono. Toro yovroubweyodowodo su ton amapi toga nuu kwonyu kuruv aval'no nomaranonyugono. Moro yodumdo tov su toro tovinokwono.

A'mwo resis tovi uuwolo'mdowodo toolbusuko kubalno nevu Gooti toolluro womdo tovi guureji mujumovla'mwalano tovinokwono

²⁴ Kevu kuudo neya jaullulo. A'mwo pworo resis tovi yopi toga yiuwi'nokai tooro kano kano pla'mdupudorogano. Toro kuvi kuruv yiuno pwolnodo tool uuwolowo'ji mubiyo tov ma'dowodekono. Toro te a'mwo pwol resis tovida'ai mubiyo mallo'mo kwino'ji tool nuuwoleyo'moneyokwe yogudo guureji yonekono. Su toro to'busuko kubalno kevu Aguto toollu guureji neya duumjunogaulo.

²⁵ A'mwo resis tovi yodupudo tooro kevnokweravuro kulako tonyu pi'mwono mollomwallunyokwerogano. Su toro yodupudo tooro kwako akavida'ai resis tovuro mubiyo mallo'mo winodupudo su tov kaiyako yere i'nopiyodowodokwono. Toro kuvi kuruv nemoro muunyu kai'muuda'ai mubiyo mallo'mo nekullunodowodo su to'gwowi kaiyako yere mi'nopiyowo'ji yiunokuudo mujo'movlaiyo'moneyokweyokwono. Mubiyo su tollugwo mallo'mo anekulluno'ji tov nemi Aguto toollu pi'mwono neya uumjunmwalanonogano.

²⁶ Aki a'mwo pwol resis tovuro aiyowo'mo do'gwapi tomuu kuulai'meyo'mo tool sumdo yasuwa'nodo tomuu miyenomollowo'ji yiuno ido'nyuno kano kano kuulawonekono. Su toro toolbusuko kubalno nuvu Gooti toollu po'dogalo uumjunodumdonyugono. Aki a'mwo pworal sumwonyo yo'moneyokwe kemi ato tokwe molo sunbullu toga yasuwa'nodo tomuu maromiyodubulorakono. Toro kuvi kuruv a'mwo pwol a'mwo pwollu kinamjowo'ji iwago yiuno'no romiyodowodekono. Su toro to'busuko kubalno nuu Gooti toolluro womdo nubweyodowodo tovi kuvinono kinomjumovla'mdumdonyugono.

²⁷ Aki toro toonyu aro kuudo yau'dumdonyugono. Nuvu a'mwo abolo punyu kuuguudo sugudo tokwe me'no amoruudumi toga lukomgu Gooti tool gamoro womdo su tovida'ai mubiyo ma'mo tov nomanyudukwopiyo'jo. Toro tovino tov a'mwo pwol resis tovi uuwolo'mdowodo toolbusuko kubalno moro kulako tekwo nuvnokwenyuro kuudo tovi neya uumjunoneyokwe tovino yogudo guureji yodumdonyugono.