1 Koorin 8 - Gooti Toolluro Yogalokwono

Kuunano gooti tooraino ibesa'aiyo me'no kwiroudapingiko tonyu nodupudo tovinokwono

¹ Aga ibesa'aiyo muugupto pun nodupudo tovino ikudumo'mokwono. Muugupto su tonyuda'ai pun kuunano gooti toorai ilomoropiyo'moneyokwe me'no kwiroudapingikogano. Muugupto su tonyuno nonyo'moneyokwe tovino nevu punol aro dodowadonogano. “Oo nevu yiuwi'nokai tonol su toro tovino pi'mwo kuudo kurukweyonogano.” Toro dodowado tonol ilomoropunyu nyuna'jo. Toro kunol kuruv Jisasolluro mollu'bwoto tonyu jurogudo duuwimwojo'moneyokwe to'gwowi nevu a'mwo abolo su tonyu kalo buuropino neya amollogawano.

² Toro te guvu a'mwo pweku aro kuudo sau'bi tov, Oo nuvu yiuwi'nokai pi'mwo kuudo ton me'no youroma'dumdonyugono. A'mwo su toro adubi tookujuro kuudo tov supto kuuno suwapiyadokuuno. Gooti toolluro kuudo guuteyo'moneyokwe punyu guvu yere miyouroma'dumdekugono.

³ Toro kuvi kuruv a'mwo pwol Gooti toolluno kalo buuropino winodowodo su toolluno'gwowi Gooti tool me'no wonoma'dowodekono.

⁴ Toro te kuunano gooti pworai ilomoropiyo'moneyokwe ibesa'aiyo aromiroudapingiko su tonyu nodupudo tovino aro ikudumo'mokwono. Nevu kuudokwe tonol aro me'no youroma'dowadonogano. Oo kuunano gooti su tooro kuunodoromaiyo. Gooti kuunodo toolno'gwowi bwotonyagolmaiyo. Yiuno pwolnodekono. Nevu su toro kuudo me'no youroma'dowado tonol kuunano gooti toorai ilomoropiyo'moneyokwe ibesa'aiyo aromiroudapingiko su tonyu ana'ji tov ma'no ma'nodo'maiyo.

⁵ A'mwo abolo pun kuunano gooti tooraino aro kuudo yau'dupudogano. Oo gooti bwotonyago tooro muunyu kai'muuge'aro kwako akakwe'aro tomuu domwakovo. Kuudo yau'dupudogano. Toro tooravuro bwotonyago tooraino, “Oo nemi gootekono,” dodupudogano. Aki bwotonyago pworaino, “Nemi agutekonoo,” dodupudogano.

⁶ Toro kuvi kuruv nevno'gwowi aro kuudo yaullokwenogano. Oo Nellunumiyago Gooti tool yiuno pwolnodekono. Nemi Gooti pwolnodo su tool yiuwi'nokai tonyu yokwollosuno sumaiyokwe aki yiuwi'nokai su tonyu jukwo wimo'nodowodekono. Toro toolluno yovo tov nevu ilomoropiyo'moneyokwe yomjomwekovla'mdowadonogano. Aki nemi Aguto tool yiuno pwolnodekono. Su tool Jisas Kraisol kwekono. Nemi Aguto su toollu'aro Gooti tool yiuwi'nokai tonyu sokwollosokaikono. Aki toro toollu'aro Gooti tool nemi aiyo nekullaboduke tokwe yomjomwekovla'mdowadonogano. Kuudo yaullokwenogano.

⁷ Toro kuvi kuruv Jisasolluro a'mwo abolo puno'gwowi kuudo su toro tovino po'dogalo miyouroma'dupudogano. Toro ton Jisasolluno kuudo me'no kuubweyopo kun kuruv kemi sumdomguda'ai kuunano gooti tooraino kuudo pun kuuno gudupola'dupudogano. Toro tovino tov aga kuga kuruv, Kuunodorodeyo, kuuno yau'dupudogano. A'mwo abolo su ton kuunano gooti pworai ilomoropiyo'moneyokwe sa'aiyo me'no kwiroudapingiko su tonyu anpi toga aro kuudo molla'mopto yaullokweyogano. Aiyoo, nevu kuunano gooti pworai me'no kwingiko tov anmawo tovino tov Gooti tool ilaiyo mwinadopiyo. Su toro kuudo yau'dupudo ton ilaiyo mibwosunodupudogano.

⁸ Toro te neya duu'nyulo. Nevu wosamujuko punyu ana'jo'mdeyo oo kumako amwala'jo'mdeyo kuruv Gooti toolluro sumdo tovino'gwowi sugudo wimo'nyo'moneyokwe ku'nono manekullo'mwojonokwono. A'mwo abolo pun wosamujuko anpi su ton nevu kumako amwala'ji tonollu manekuuwolo'mdupudogano. Aki nevu wosamujuko ana'ji tonol kumako amwalpi tonyu muuwolo'mdowadonogano.

⁹ Toro kuvi kuruv pugaikul aro kuudo saupi tov, Oo nevu wosamujuko akavi ana'ji tov kaiyako mamollugolanekumowonokwono. Toro tovino tov nokwo nanokwono. Kevu su toro kuudo saupi togaikul Jisasolluro a'mwo abolo jurogudo yere mimo'nodupudo pubuuro ikwonopi nobwolorapiyokwe tovino kevu wako neya dou'nogaulo.

¹⁰ Kevu kuudo kurukwe togaikul kuunano gooti pworai ilomoropiyo'moneyokwe ago tovi wosamujuko kuulonomwalodopure togaikullu a'mwo abolo jurogudo mimo'nodupudo ton nekwonmwalpiyo. Jisasolluro a'mwo abolo jurogudo mimo'nodupudo su tobuuravuro pun sa'aiyo kuunano gooti toorai me'no kwingiko tonyu nonyo'moneyokwe kumako mwalodupudogano. Toro kun kuruv kemi ikwonopi anpi to'gwowi kevnokwenyuro poowokalago tonyu kisuvolo inpinogano.

¹¹ Toro te kevu kuunano gooti su tooraino, Oo kuunodoromaiyo, kuudo me'no youroma'dupudo togaikulluro nodopure tovasuda'ai Jisasolluro a'mwo abolo jurogudo mimo'nodupudo su tobuurai kaiyako igolodupudogaikikono. Krais tool a'mwo abolo su tobuurai wiyo'mwojo'moneyokwe me'no abolokaikono. Toro tovino tov kevu a'mwo abolo jurogudo mimo'nodupudo su tobuurai kaiyako nyugolamopiyo.

¹² Kemoro tovasuda'ai Jisasolluro a'mwo abolo jurogudo mimo'nodupudo tobuuro kemi poowokalago tonyu kisuvolo sunpi su tov kevu ma'no ma'no wipinogaikikono. Aki toro togaikul Krais kwollu kuruv ma'no ma'no wipinogaikikono.

¹³ Toro te nuvu sa'aiyo kuunano gooti toorai kwiroudapingiko tovi nodumdo toonyu Jisasolluro a'mwo pwekwo nuwonowo'ji moro nodo'mure tovi'aro yello nyove'namowo'jokwe tov nuvu sa'aiyo su tovi aki aiko te manmwalmonyugono. Krais toolluda'ai mi avalo nyumo'nodowodo su tekwo nobwolorawo'jokwe tovino tov nuvu sa'aiyo su tovi yiunokuudo manmwalmonyugono.