1 Koorin 7 - Gooti Toolluro Yogalokwono

Kwolabolo yoma'nodupudo tovinokwono

¹ Sumdomgu kevu pas puruv anuwopiyabopo toga yamuugojo pugai sanumgojopogaikikono. Toro te aga kemoro yamuugojo su tonyuno ikudumo'mokwono. Neya duu'nyulo. A'mwo pwol abolo puvi muubogai'nowo'ji aki yiunokuudo mamaro'ji su tool ilaiyo yonekono.

² Toro kuvi kuruv a'mwo abolo ton kwonyalo yasuwa'no nomjumovla'mwalpiyokwe tovino tov a'mwo pwolno pwolnodo tooro kemi abolo go'no go'nodo tonyu neya amarogapuro. Aki abolo kun kuruv kemi kwolo go'no go'nodo toorai neya uuma'nogapuro.

³ Su toro me'no soma'nupi toga abolo tov gami kwolo tooke sumwonyo yo'mo winodowo'jure tovi kwolo tool, “Awiyo,” nuudumwalo'jo. Aki a'mwo tool gami abolo tokwe sumwonyo yo'mo winodowo'jure toollu abolo tov, “Awiyo,” nuudumwalo'jo.

⁴ Abolo tovuro kulako tov gami kwolo toollurokwono. Toro tovino tov abolo su tov gamoro kulako tovi mido mollomwallo'moneyokwe gami kwolo toollu neya uubweyogawono. Aki a'mwo toolluro kulako tov gami abolo tovurokwono. Toro tovino tov a'mwo su tool gamoro kulako tovi mido mollomwallo'moneyokwe abolo tovi neya uubweyogawono.

⁵ Toro tovino tov a'mwo kwolabolo su teyaul sumwonyo yo'moneyokwe tovino, “Awiyo,” maduumjuku'nomwalbulluneyaukono. Toro kuvi kuruv a'mwo kwolabolo su teyaul sumwoluko yiuno puru'mono wosuno'bullu subusu'nyogalo domwallo'moneyokwe toga aro nokwo domdukuurosubullunovakono. “Oo navu subusu'nyogalo adomwalosi toga sumwonyo mimwalosuno'makono.” Su toro me'no domdukuurosuno'bullu sumwonyo mibullu su toga'gwo subusu'nyogalo nokwo dumwalbullunovakono. Subusu'nyogalo me'no dopiyo'bullu toga sumwonyo aki aiko te nokwo ibullunovakono. Su tov aro tovinokwono. A'mwo kwolabolo su toval kevnokwe teyaulluro kulako tov pi'mwono mamollomwalnubullu tov Satanyolluro yamju pun wiyoganodowo'jure toga yere nobwolorabullukwe tovinokwono.

⁶ Kevu neya duu'nyulo. Moro kuuguudo akavi, “kevu neya duumjunyulo,” maikudadokwono. Toro kuvi kuruv kevu moro kuuguudo akavi uumjunyo'mo aikulluno'jo'mdeyo oo muumjunyo'mo aikulluno'jo'mdeyo tov yiuwi'nokai su tovallu puvi kuumjunpi tov, “nokwo'mokwono,” aikudadokwono.

⁷ Nuvu aro tovino nyunodowodonyugono. Yiuwi'nokai Jisasolluno kuudo uubweyodupudo toorekul nuvu abolo maiyo mwalodumdo toonyubusuko amjomwekovlavogapureyokwe tovino nyunodowodonyugono. Toro kuvi kuruv Gooti toolluro kemi ikullabodowodo to'gwowi aval'nodo'maiyo. Kevu pworekullu abolo mallo'moneyokwe ikullabodowodekono. Aki pworekullu judo tekwojekul mujomwekovlaiyo'moneyokwe jurogudo tov ikullabodowodekono.

⁸ Toro te a'mwo abolo yere miyoma'nodupudo togaikike'aro abekanyo togaikike'aro togaikul nuvubusuko yiuno judo to'no amjomwekovlapi tov ilaiyo ipinogaikikono.

⁹ Toro kuvi kuruv kevu kemi kulako tovuro kinuwinodowo'jure tonyu pi'mwono mamollomwalpinogaikuldeyokwe to'gwowi kwolabolo neya joma'nogaulo. Su tov aro tovinokwono. Kevu kwolabolo miyoma'nupi sumwonyo yo'mo guureji ainuwingovlapi tov ilaiyo'maiyo. Su toro tovino tov kevu kwolabolo soma'nupi to'gwowi ilaiyokwono.

¹⁰ Aki aga nuvu a'mwo kwolabolo me'no yoma'nodupudo togaikullu guureji ikudumo'mokwono. Yogalo akav nuvnokwe toonyu maikudadokwono. Toro kuvi kuruv Aguto toolno'gwowi kemi aro aikudadopiyo. Abolo pu'guu gumi kwolo toollu mabuugollu'mokalokuubinono.

¹¹ Toro kuvi kuruv abolo puruv gami kwolo toollu abuugollu'mokalokwo'ji to'gwowi abolo su tov kwolo muuduko pwollu nuuma'no'jo. Yiuno judo tov neya domjomwekovla'maiyo oo gami kwolo sumdomguda'ai toollomno plavowo'ji aki aiko te neya uuguro'mwonyonokwono. Aki su toro to'busuko kubalno guvu a'mwo pweku gumi abolo tovi miyeru'mdowapibinono.

¹² Aga a'mwo kwolabolo me'no soma'nyungopo togaikullu aro ikudumo'mokwono. Kuuguudo akav Aguto toolluro'maiyo. Toro kuvi kuruv nuvnokwe toonyu aro ikudumo'mokwono. A'mwo pweku gumi abolo tov Jisasolluno kuudo yere muubweyodowo'jure toga sumdomgu guuda'ai kuubwebi tov gumi abolo kuudo muubweyodowodo su tov guvuge mwallo'mo winodowo'jure tovi yere mamolleru'mdowapibinono.

¹³ Aki abolo pu'guu gumi kwolo tool Jisasolluno kuudo yere muubweyodowo'jure toga sumdomgu guuda'ai kuubwebi tov gumi kwolo kuudo muubweyodowodo su tool guvuge mwallo'mo winodowo'jure toollu yere mamolleru'mdowapibinono.

¹⁴ Kevu neya duu'nyulo. A'mwo pwol Jisasolluno kuudo muubwengiko kwol kuruv gami abolo Jisasolluno kuudo me'no uubweyodowodo su tovi'aro Gooti tool ilaiyo nokwo mollomaronekono. Aki abolo kuudo muubwengiko tov gami kwolo Jisasolluno kuudo me'no uubweyodowodo toollu'aro Gooti tool ilaiyo nokwo mollomaronekono. Kemi su toro maikullumo'no'ji tov kemoro kwoloraiyo tobuurai Gooti tool ilaiyo mamollomarowo'jujukekono. Toro kuvi kuruv kevu kuunum kwolabolo kuudo me'no uubweyodupudo togaikullu'aro Gooti tool kemoro kwoloraiyo su tobuurai ilaiyo molloma'dowodekono.

¹⁵ Toro kuvi kuruv a'mwoldeyo oo abolo'mdeyo puruv Jisasolluno kuudo muubwengiko tov nuugollu'meyo'mo tovino guureji kwino'ji to'gwowi a'mwo kwolabolo su teyaul nokwo yeru'mdeyapinbulluneyaukono. Su toro yeru'mdeyapino'bullu toga Jisasolluno kuudo uubweyodowodo a'mwoldeyo oo abolo'mdeyo tov nuumjukuro'jo. Nokwo wonyapino to'no neya yono. Kevu sumwoluko aval'no wosunyo'moneyokwe tovino Gooti tool me'no dekuma'dowodogaikikono.

¹⁶ Jisasolluro abolo to'guu gumi kwolo kuudo muubweyodowodo toollu kwiyo'mwojubi tov kuudo nokwo uubweyonekono. Aki Jisasolluro a'mwo tooku gumi abolo kuudo muubweyodowodo tovi kwiyo'mwojubi tov kuudo nokwo uubweyonokwono.

Gooti tool nemi muudu'no adonekumaroka to'busuko kubalno aval'no yomjomwekovla'mwalano tovinokwono

¹⁷ Nuvu yiuwi'nokai Jisasolluro mollu'bwoto go'no go'nodo tobuurai aro moruudomollodumdonyugono. Kevu a'mwo abolo pwolno puru'monodo tobuurekul Aguto Jisasolluro ajaikubwengiko tomgu'aro neya uumjungovla'mwalpinogaikikono. Aki Gooti tool kemi muudu'no adekumaroka togasuro somjomwekovlaiyajupo to'busuko kubalno aga kuga kuruv aval'no neya jomjomwekovlavogaulo.

¹⁸ A'mwo pwol gami lakulkulako me'no ado'nyungiko toollu Gooti tool adomaroka su tool aga kuga kuruv aval'no neya yomjomwekovlavogawono. A'mwo su tool gami lakulkulako me'no ado'noka su tovuro imuulo tovi modukwopiyo'mo kuudo nyauro'jo. Aki a'mwo pwol gami lakulkulako yere mado'noduke toollu Gooti tool adomaroka su to kwol kuruv aval'no neya yomjomwekovlavogawono. A'mwo su tool gami lakulkulako tov do'nyo'moneyokwe tovino kuudo nyauro'jo.

¹⁹ Toro te a'mwo tooro kemi lakulkulako ton ado'nupiyo'mdeyo oo mado'nupiyo'mdeyo kuruv yiuwi'nokai su toval aguto mimo'nodubulovakono. Toro kuvi kuruv a'mwo pwol Gooti toolluro yogalo duuwiyodowodo tonyu kuvinono kuumjuno'ji to'gwowi aguto imo'nodowodokwono.

²⁰ Toro tovino tov kevu Gooti tool kemi muudu'no adekumaroka togasuro yomjomwekovla'mdupudo to'busuko kubalno aga kuga kuruv aval'no neya jomjomwekovlavogaulo.

²¹ Guvu a'mwo pwollu ki'nato womdo wiyodore tookuji Gooti tool adogumaroka su tooku gumi ki'nato womdo me'no yodumdo su tovi imwogapiyo'mo kuudo kwolallo nyau'mwalbiyo. Toro kweku kuruv lukomgu ki'nato womdo yodumdo su tovida'ai birolo'nugolokwiyo'moneyokwe puuto kurukweyo'mno'juki yowa'no birolo'nugolokuubinekugono.

²² Neya duu'nyulo. Aguto tool guu ki'nato womdo yodore tookuji adogumaro'ji tov Aguto toolluro sumdo tovi a'mwo me'no birolo'nugolokwodowodo pwolbusuko me'no wimo'nodumdekugono. Aki su toro to'busuko kubalno Aguto tool guu me'no abirolo'nugolokwingiko tookuji adogumaro'ji to'gwowi guu tooku Krais toolluro ki'nato womdokwe pwolbusuko me'no wimo'nodumdekugono.

²³ Gooti tool mubiyo bwotonyo tokwe kemi amobiyekumarokaikono. Toro mobiyekuma'no sumaiyokwe kevu gamoro a'mwo abolo kuunodo wimo'nodupudogaikikono. Toro tovino tov kevu kwako akavida'ai a'mwo toorai ki'nato womdokwe nuuwimo'numwalpiyo.

²⁴ Mi avalobuuravoo, nevu yiuwi'nokai pwolno puru'monodo tonol muudu'no adonekumaroka togasuro amjomwekovlaiyajuuwo to'busuko kubalno aga kuga kuruv Gooti tooke aval'no amjomwekovlavogawano.

A'mwo kwolabolo yere miyoma'nodopure tonyuno kuuguudo tovinokwono

²⁵ Aga a'mwo kwolabolo yere miyoma'nodupudo tonyuno ikudumo'mokwono. Yogalo su tov Aguto tool manyabokakwono. Toro kuvi kuruv Aguto su tool kalo manekumwonyodowodo tovida'ai moro kuudo yau'dumdo tov kemi ikudumonyugono. Moro yogalo su tov yiuno nebal'no ikudumonyugono.

²⁶ Toro te nuvu aro kuudo sau'mwakono. Aga tagunyo go'no go'no bwotonyo ton sumo'nugelabadokwovo. Toro tovino tov kevu kemi agasuro amwakopo to'busuko kubalno aval'no somjomwekovlapi tov ilaiyokwono.

²⁷ Guvu a'mwo pweku abolo me'no ma'dumdo su tooku nyeru'mdeyapinyo'moneyokwe kuudo nyau'mwalbiyo. Aki a'mwo pweku abolo puru'monodo kuruv mama'dumdo su tooku abolo puvi mallo'moneyokwe a'mgono nyomollumwalbiyo.

²⁸ Kevu kwolabolo yere miyoma'nodupudo togaikul aro kuudo neya jaurogaulo. A'mwo kwolabolo me'no yoma'nodupudo ton kwako akavida'ai jul'nyo pun mo'movla'mdupudodeyo. Kuudo jaurogaulo. Toro tovino tov kevu jul'nyo su toorai irukuruwoleyo'moneyokwe adaikumul'mwojumwakono. Toro kuvi kuruv guu abolomaiyo tooku abolo tovi ama'bi tov ma'no ma'no mibinekugono. Aki sujuraiyo to'guu kwolo pwollu kuuma'nubi tov ma'no ma'no mibino'guugono.

²⁹ Mi avalobuuravoo, aga aiyowo'mo toga nobai'meyo'mo sadopiyo. Toro tovino tov iruko tobuulluno supto sumwakuuwono. Toro te a'mwo pworo abolo me'no ma'dupudo su tooro Gooti toolluro womdo yo'moneyokwe abolomaiyokwe toorobusuko neya imo'nugovlavogapuro.

³⁰ Aki Gooti toolluro womdo tovi momjumovlaiyo'moneyokwe tobuurekullu noonyumwonyu pun nekumjuku'mwalpiyo. Kalokalo yo'mo'mdeyo oo ilaiyo yo'mo'mdeyo oo kuto ivito biyomallo'mo'mdeyo yiuwi'nokai su tooro nekumjuku'mwalpiyo.

³¹ Aki a'mwo abolo pun kwako akavida'ai womdo yodupudo su ton kemi noonyumwonyu kwako akavida'ai tonyuno to'no kuudo kwolallo nyourukwapimwalpiyo. Su tov aro tovinokwono. Kwako akakwe'aro yiuwi'nokai noonyumwonyu kwako akavi wo'dupudo togai'aro su ton yere younopipinogano.

³² Nuvu kemino tov jul'nyo nyubwosunmwalpiyokwe tovino anyunadopiyo. A'mwo pwekwo abolomaiyo tool gami Aguto toollu ilaiyo igollo'mo to'no winyokwekono. Toro tekwo gami Aguto toolluro womdo tovino to'no kuudo you'movla'mdowodekono.

³³ Toro kuvi kuruv a'mwo pwol abolo kurukwe toolno'gwowi kwako akavida'ai womdo tonyuno aro kuudo yau'dowodekono. Oo mi abolo tovi adadomgu'aro ilaiyo igollo'monyudukono. Yau'dowodekono.

³⁴ A'mwo su toolluro kuudo tov puruval rojapinodubulovakono. Kuudo su toval gami Aguto tooke'aro gami abolo tokwe'aro yiuwi'nokai tovallu ilaiyo igollo'mo kuudo yau'dowodekono. Aki abolo pubuul aki aiko te kwolo muuma'nodowodo'mdeyo oo sujuraiyo'mdeyo su tobuul gami Aguto toollu ilaiyo igollo'mo to'no winyokweyokwono. Toro tobuul yiuwi'nokai toga gami Aguto toolluro womdo tovi wimovlaiyo'mo to'no kuudo yaullokweyokwono. Abolo su tov gami kuudo tokwe'aro poowokalago tokwe'aro togai Gooti toolluro womdo tovi wiyodowodokwono. Toro kuvi kuruv abolo kwolo me'no uuma'nodowodo to'gwowi gami kwolo toollu ilaiyo igollo'mo winyokweyokwono. Toro tov gami kwako akavida'ai womdo tovino kuudo yaullokweyokwono.

³⁵ Moro yogalo aikudadokwo su tov kevu kwolabolo yere miyoma'nodupudo togaikullu ikullo'mwojo'moneyokwe aikudadokwono. Aki moro yogalo su tov kevu kwolabolo yere miyoma'nadokwopo togaikullu ikumjukullo'moneyokwe maikudadokwono. Toro kuvi kuruv kevu Aguto toolluro womdo tovi mujumovla'mdopure togaikullu kwako akavida'ai noonyumwonyu pworo nekumjuku'mwalpiyo. Toro kugaikul kuruv kemi Aguto toolluro womdo tovi po'dogalo neya wimovla'mwalpureyokwe ikullo'mwojo'mo kuuguudo ton aikudadokwono.

³⁶ Toro kuvi kuruv a'mwo pwol gamiyo'moneyokwe sujuraiyo me'no ajudoubwengiko tovi yere mamarowo'ji aro kuudo sauro'ji tov, Oo nuu sujuraiyo su tovi mollomollo'mo guureji anyuno'ji tov ilaiyo'maiyo. Toro tovino tov sujuraiyo su tovi neya ma'monyugono. Toro kuudo sauro'ji tool sujuraiyo tovi nokwo maronekono. Toro amaro'ji su tool ma'no ma'no miyonekono.

³⁷ Toro kuvi kuruv a'mwo pwol gamiyo'moneyokwe sujuraiyo ajudoubwengiko tovi yere mallo'mo mwinowo'ji gami poowokalago kuunodo tokwe kuudo yauronekono. Oo nuvnokwe toonyu moro kulako tovuro winodowo'jure tovi nokwo mollomwalnumonyugono. Su toro kuudo sauro'ji tov sujuraiyo tovi yere mamaronekono. A'mwo toro so'ji su tool ilaiyo yonekono.

³⁸ Toro te a'mwo tool gamiyo'moneyokwe sujuraiyo ajudoubwengiko tovi amaro'ji tool ilaiyo yonekono. Toro kuvi kuruv a'mwo pwol gamiyo'moneyokwe sujuraiyo ajudoubwengiko tovi mamaro'ji su toolno'gwowi ilaiyo bwotonyo yonekono.

³⁹ Aki puruv abolo tov gami kwolo tool kuuno mwalodowo'jure toga abolo su tov kweke neya mujomwekovla'mwalonokwono. Toro kuvi kuruv gami kwolo su tool me'no abolo'ji toga'no'gwowi abekanyo su tobuul gami kwolo toollu dolago tomuuda'ai nobirolo'nugolokwonokwono. Yowo'ji a'mwo muuduko pwollu uuma'nyo'mo kwino'ji tov nokwo uuma'nonokwono. Toro kuvi kuruv abekanyo su tov a'mwo yasuwa'nodo pwollu nuuma'no'jo. A'mwo pwol Aguto toolluno kuudo me'no uubweyodowodo pwollu neya uuma'nonokwono.

⁴⁰ Toro kuvi kuruv nuvu aro kuudo sau'mwakono. Abekanyo su tobuul gavnokwe judo tobuul amjomwekovlawo'ji tov ilaiyo bwotonyo yonokwono. Ilaiyo bwotonyo su tov a'mwo muuduko pwollu uuma'nowo'ji ilaiyo somjomwekovlawo'jujuko tovi nuuwolowonokwono. Toro te moro kuuguudo aikudadokwo akavino nuvnokwe toonyu aro kuudo sau'mwakono. Gooti toolluro Kuullo kuulonumwalodowodo tooke amollodekubwasadokwono. Kuudo sau'mwakono.