1 Koorin 6 - Gooti Toolluro Yogalokwono

Jisasolluro a'mwo abolo ton imgu amgu kooti yogalo nyunmwalpiyokwe tovinokwono

¹ Kevu Jisasolluro mollu'bwoto togaikulluro pweku kevuge avalo pweke jul'nyo aullo'mgonoma'bullo toga a'mwo su toorakul kooti yogalo jo'moneyokwe a'mwo Gooti toolluno kuudo muubweyodupudo tooraiyomno nomokavla'mwalbullo. Kemoro jul'nyo su tovi yovo'dogallo'moneyokwe kevu a'mwo Gooti toolluro sumdo tovi sugudo mimo'nodupudo su tooraiyomno amokavlapi tov ilaiyo'maiyo. Toro kuvi kuruv kemoro jul'nyo su tovi yovo'dogallo'moneyokwe kevnokwe Gooti toolluro mollu'bwoto togaikulluda'ai a'mwo tooraiyomno neya domokavlavogaulo.

² Kevu aro tovino kuudo neya jaullulo. Nevu Gooti toolluro a'mwo abolo tonol lukomgu kwako akavuro kooti yogalo tonyu nomollomwalanonogano. Su toro toga yiuwi'nokai a'mwo abolo kwako akavi mwalodupudo tonyuro jul'nyo mokabodopure tonyu nevu nojagilmwalanonogano. Toro te kevu yiuwi'nokai a'mwo abolo kwako akavi mwalodupudo tonyuro kooti yogalo tonyu mollomwalpino togaikulluno tov agasuro kevnokwe tobuurekulluro jul'nyo kula'nyo tobuurai jagilopi nokwo domdukuurosumwalpinogaikikono.

³ Aki kuudo pun jaullulo. Nevu lukomgu ensel tooravuro yogalo kunyu kuruv nojagilanonogano. Toro tovino tov kevu kwako akavida'ai jul'nyo kula'nyo baiki'mo'mdopure su tobuuraino'gwowi kevnokwe togaikul jagilopi nokwo domdukuurosumwalpinogaikikono.

⁴ Toro te kevnokwe togaikulluda'ai pubuurekul yogalo aullajunpi tov aro nodumwalpiyo. “Oo nemoro jul'nyo akav a'mwo kwa'mguda'ai tooro nokwo yovo'dogalpinokwono.” Kevu su toro nodumwalpiyo. Toro kuvi kuruv kemoro jul'nyo su tonyu yovo'dogallo'moneyokwe to'gwowi kevnokwe Jisasolluro mollu'bwoto togaikulluda'ai tooraiyomno neya domokavlavogaulo.

⁵ Moro su toro aikudumo tov kemi wogulo dekwo'gallo'mokwono. Su tov aro tovinokwono. Kevu Jisasolluro mollu'bwoto togaikulluda'ai pubuurekul yogalo youllajunodopure tovi yovo'dogallo'moneyokwe kemida'ai a'mwo pi'mwo kuudokwe pworo nomwakovo.

⁶ Toro kuvi kuruv kevu Jisasolluro a'mwo pworakul yogalo aullajunbullu toga kooti yogalo yovo'dogallo'moneyokwe a'mwo Jisasolluno kuudo muubweyodupudo tooraiyomno mokavla'bullunorakikono. Toro toorakul a'mwo su tooravuro sumdo tovi imgu amgu yogalo aullajunbullu tov ilaiyo'maiyo.

⁷ Aki kevnokwe Jisasolluro a'mwo abolo tobuurekulluro kooti yogalo su toro duuwinodupudo tov kevnokwe togaikul kaiyako i'nodupudogaikikono. Toro te kevnokwe togaikulluda'ai Jisasolluro a'mwo pwol guvu pwekuji kaiyako sugolagumowo'ji toga guu a'mwo su toollu nokwo wonyapino to'no so'bujukekugono. Aki Jisasolluro a'mwo pwol gumoro noonyumwonyu ton supologumaro'ji toollu guvu wonyapino to'no neya jogawono.

⁸ Toro kuvi kuruv kevuge avalo Jisasolluro a'mwo abolo pubuurai kaiyako igolodupu aki kemoro noonyumwonyu ton ipoloma'dupudogaikikono. Kevu Jisasolluro a'mwo abolo me'no imo'nodupudo kunyu kuruv kaiyako su toro igolodupudo tov ilaiyo'maiyo.

⁹ Kevu aro kuudo me'no youroma'dupudogaikikono. A'mwo abolo ma'no ma'nodokwe ton aguto kig Gooti toolluro mido mollomwalo tovi anakuuto tomuu ku'nono maulomwalpinogano. Toro tovino tov a'mwo pworo aro nyoukuu'naikudupiyo. “Ma'no ma'no mujumovla'mdupudo ton aguto kig Gooti toolluro mido mollomwalo tovi nokwo kuulomwalpinogano.” Nyoukuu'naikudupiyo. A'mwo abolo kwonyalo yodupudodeyo oo kuunano gooti pworai ilomoropiyodapudodeyo oo abekuuko yodupudorodeyo oo a'mwo pworo a'mwo pworogai imgu amgu kwonyalo inodupudorodeyo oo

¹⁰ kuuko yodupudorodeyo oo noonyumwonyu punyuno kwanyu sumdo kinuwiyodupudorodeyo oo imo'wonyo bwotonyo nopi amomo yodupudorodeyo oo magu'nyo yodupudorodeyo oo noonyumwonyu a'mwo punyuro kuto ivito ki'noma'dupudorodeyo yiuwi'nokai su toro mujumovla'mdupudo tooro aguto kig Gooti toolluro mido mollomwalo tovi anakuuto tomuu ku'nono maulomwalpinorogano.

¹¹ Kevu pugaikul sumdomgu su toro sumo'nyajupogaikikono. Toro kuvi kuruv aga'no'gwowi Gooti tool kemoro ma'no ma'nodo tonyu me'no mollol'movaikudukwopiyo'no gamoro a'mwo abolo kuunodo me'no wimo'nodupudogaikikono. Toro togaikul aro tovalluda'ai gamoro sumdo tovi sugudo kwimo'nopogaikikono. Aguto Jisas Kraisolluno yovo tokwe'aro nemi Gooti toolluro Kuullo tool womdo ikulloduke tokwe'aro tovalluda'ai kevu gamoro sumdo tovi sugudo kwimo'nopogaikikono.

Nemoro kulako ton Gooti toollu ilomoropiyo'moneyokwe ago to'busuko imo'nodupudo tovinokwono

¹² Kevu pugaikul aro dodupudokwono. “Oo nevu buro'nyo buro'nyodeyo pun yo'mo nekullunodowo'jure tovi loowo tov manekumjuku'dowodo tovino tov nokwo imwalanonogano.” Kemoro su toro dodupudo tov nebal'nodo kuvi kuruv pasudo su tonyuro puno'gwowi ku'nono maikullo'mwojupinogano. Toro te kemoro aro dodupudo tov “Oo nevu buro'nyo buro'nyodeyo pun yo'mo nekullunodowo'jure tovi loowo tov manekumjuku'dowodo tovino tov nokwo imwalanonogano.” Toro adupi kugaikul kuruv aro to'gwowi neya dodogaulo. “Pasudo puruv nevu ki'nato womdo wiyo'moneyokwe mido nomollonekumwalmwalo'jo.”

¹³ Aki pugaikul aro dodupudogaikikono. “Oo wosamujuko ton nemoro sumwoluko tovino'mokwono. Aki nemoro sumwoluko tov wosamujuko tovino'mokwono.” Su toro dodupudo tov nebalokwono. Nemoro sumwoluko tov wosamujuko ton kuulomnallo'moneyokweyokwono. Toro kuvi kuruv lukomgu Gooti tool nemoro sumwoluko tokwe'aro wosamujuko tokwe'aro tovallu kaiyako nomollounapiyonekono. Kevu sumwoluko tovino su toro dodupudo kuvi kuruv aro to'gwowi nodumwalpiyo. “Nemoro kulako tov kwonyalo tovino'mokwono.” Nodumwalpiyo. Gooti tool nemoro kulako tov kwonyalo'moneyokwe sokwollanekubweyokalmaiyo. Toro kuvi kuruv nemi Aguto toollu ilomoropimwolowano'moneyokwe to'gwowi sokwollanekubweyokakwono. Aki Gooti gavnokwe tool nemoro kulako tonyu mido mollomwalmwalono'moneyokwe sakwollosokakwono.

¹⁴ Toro te Gooti tool gavnokweyolluro jurogudo tokwe nemi Aguto toollu aiyo aiko te amodukavoka to'busuko kubalno lukomgu nemoro kulako ton abolpi kunyu kuruv nomodukawonekono.

¹⁵ Kevu aro kuudo me'no youroma'dupudogaikikono. Kemoro kulako ton Krais toolluro kulako tovida'ai judo'no judo'nodo tonbusuko me'no imo'nodupudogano. Toro te Jisasolluro a'mwo pwol gamoro kulako tov Krais toolluro kulako tovi me'no uuguro'mwonyodowodokwono. A'mwo su tool gamoro kulako Krais tooke me'no kuuguro'mwonyungiko su tokwe kwonyalabolo puvuro kulako tovi yiuno puga'nodo kuruv nuuguro'mwonyo'jo.

¹⁶ Kevu kuudo nyau'mwakovo. Aiyoga Gooti toolluro yogalo puruv kwolabolo yoma'nodupudo tonyuno aro sakwollungikokwono. “Toro teyaul uuguro'mwonyo'bullu kulako puru'mono imo'nubulluneyaukono.” Sakwollungikokwono. Toro te a'mwo pwol kwonyalabolo purukwe aguro'mwonyo'ji tov yiuwi'nokai su toval kulako yiuno puru'mono imo'nubullunovakono.

¹⁷ Toro kuvi kuruv a'mwo pwol Aguto tooke aguro'mwonyo'ji to'gwowi a'mwo su toolluro poowokalago tokwe'aro Aguto toolluro poowokalago tokwe'aro toval yiuno puru'mono imo'nubullunovakono.

¹⁸ Toro tovino tov kevu kwonyalo nyumwalpiyokwe tovino lukado neya dovlavogaulo. Nemoro ma'no ma'no yodowado pun yiuno kwa'mgu kulako tovida'aiyogano. Toro kuvi kuruv a'mwo pwol kwonyalo so'ji to'gwowi gavnokweyolluro kulako su tovi kaiyako igolamo'nonekono.

¹⁹ Kevu aro kuudo me'no youroma'dupudogaikikono. Kemoro kulako tov Gooti toollu ilomoropiyo'moneyokwe ago to'busuko imo'nodowodokwono. Ago su tovi anakuuto tomuu Gooti gavnokwe toolluro Kuullo aikullaboka su tool kuulomwalodowodokwono. Toro tovino tov kemoro kulako ton kevnokweyogaikullo'mo'maiyo.

²⁰ Su tov aro tovinokwono. Gooti tool kemi me'no abiyekumarokaikono. Toro tovino tov kemoro kulako su ton Gooti toollurogano. Aki yiuwi'nokai toga Gooti tool kemoro kulako tovi'aro yovo aguto neya amarogawoneyokwe kevu sugudo to'no domjumovlavogaulo.