1 Koorin 5 - Gooti Toolluro Yogalokwono

Wagwolago Koorinda'ai Jisasolluro a'mwo abolo tonyu anakuuto tomuuda'ai kwonyalo sumo'noka tovinokwono

¹ Nuvu kuuguudo pworo aro tovi kuu'numwakonyugono. Kemi anakuuto tomuuda'ai kwonyalo pumgu'aro pworo sumo'nadokwoporogano. Kuuguudo su toro tovino nyudodopure tovi me'no kuu'numwakonyugono. Kwonyalo pumgu'aro sumo'nadopiko su tov kirovanyuvanyu pasudo kuunodokwono. Aki kaiya'no pasudo su tov a'mwo abolo Gooti toolluno kuudo muubweyodupudo ton miyodupudokwono. Toro kuvi kuruv kemida'ai pworono'gwowi kaiya'no pasudo su tovi me'no sadokwopokwono. Kwonyalo pumgu'aro su tov arokwono. Kevu Jisasolluro mollu'bwoto togaikulluda'ai a'mwo pwol gami ganuwawiyo tovi ma'dowo amollomolladopikekono.

² Su toro yomollodole tovino kevu kumdato dopi wogulo nokwo subwosunopujukogaikikono. Aki kevu Jisasolluro mollu'bwoto togaikulluda'ai a'mwo su toollu nokwo amodovomjapiyopujukogaikikono. Toro kuvi kuruv kevnokwe togaikul ilomoropunyu yodapu kwonyalo pasudo su tovi nokwo wonyapino to'no sadokwopogaikikono.

³ Nebalokwono. Moro kulako tov manyu toru wo'dowodo kuvi kuruv moro poowokalago kuullo toolno'gwowi kevuge me'no mwalodumdonyugono. Toro te nuvu kevuge me'no mwalodumdo toonyubusuko a'mwo kaiya'no pasudo sadopiko su toolluno me'no adomduukuurosumwakonyugono.

⁴ Toro te nemi Aguto Jisasolluno yovo tovida'ai kevu neya ju'bwo'nyulo. Toro i'bwo'nodopure toga nemi Aguto Jisasolluro jurogudo tokwe'aro moro poowokalago kuullo tokwe'aro kevuge nomwalanokwono.

⁵ Kevu su toro su'bwo'nupi toga a'mwo ma'no ma'no pasudo sadopiko su toollu neya domodukwopilo. Toro amodukwopipi su toolluro kulako tovi Satanyol kaiyako igolmwalono'moneyokwe gamoro ato tovi neya domorubweyulo. Su tov a'mwo toolluro kuullo tool kaiyako yiunokuudo nomollounapiyo'jokwe tovino tov yiuno gamoro kulako to'no kaiyako i'numwalonekono. Su toro tovino kevu a'mwo toollu neya domodukwopilo. Lukomgu nemi Aguto tool kooti yogalo aduuwiyo'ji toga a'mwo su toolluro kuullo toolluno'gwowi ma'no ma'nodo tovuro kirumwallo tovida'ai nokwo bomollurolovomokalokwonekono.

A'mwo kirovanyuvanyu yodowo'jure toollu neya movomjapimwalpino tovinokwono

⁶ Kevu ma'no ma'nodo su tovi wonyapino to'no yodupudo tovino ilomoropunyu sadokwopo su tov ilaiyo'maiyo. Kemoro su toro yodupudo tovino yovekurajo puruv arokwono. Flauwa tovi munyo'moneyokwe yis tov yiuno pwekwono kworo'ji kuvi kuruv yis su tov yiuwi'nokai tomuu kuullo'mowopiyowo'ji flauwa tov nomunonokwono. Su toro to'busuko kubalno kemida'ai yiuno pwolnodo kwol kuruv ma'no ma'no mujumovla'mdowo'jure toollu wonyapino supi tov kevu yiuwi'nokai Jisasolluro mollu'bwoto togaikullu aiyowomno noullo'movaikwopiyonokwono.

⁷ Kevu yis maiyokwe flauwa aiyo to'busuko me'no imo'nodupudogaikikono. Toro togaikul yiuno sugudo to'no mujumovla'mwalpino'moneyokwe tov a'mwo pwol ma'no ma'no yodowo'jure toollu kevu yis uumdo tovi modukwopiyodupudo to'busuko kubalno neya domodovomjapiyogaulo. Toro toollu amodovomjapipi toga kevu bret yis maiyokwe aiyo to'busuko imo'nupinogaikikono. Kevu su toro me'no imo'nodupudo togaikulluno kuudo nyau'mwakono. Neya duu'nyulo. Krais tool nemoro aiko toru mallo'moneyokwe nemi sipsip muugunyo pwolbusuko nekullumo'nodowodekono. Aiyoga Gooti tool Muunyu Toru'aro Surukuruwolovoka lubullu doto tovi yanyo'mo sipsip muugunyo toorai aromiroudapiyajupo toorobusuko kubalno nekullumo'nodowodo toollu me'no aromiyosopekono.

⁸ Toro tovino tov a'mwo abolo ton Gooti tool Muunyu Toru'aro Surukuruwolovoka tovino kuudo yaullo'moneyokwe lubullu doto su tovi yanyo'mo toga yis tovi modukwopiyodupudo to'busuko kubalno nemoro ma'no ma'no pasudo sajuuwo toorai aval'no neyo amodukwopiyogawano. Yiuwi'nokai ma'no ma'no pasudo toorogai'aro kirovanyuvanyu pasudo toorogai'aro su tooro bret munyo'moneyokwe yis uumdo tooraibusuko yiunokuudo neya amodukwopiyogawano. Yowa'ji yiuno nebal'no pasudo togai'aro nebal'no yogalo jo'mo togai'aro su tono neya amomjumovlavogawano. Nevu su toro sa'ji tov bret aiyo yis maiyokwe to'busuko imo'numwalanonogano.

⁹ Nuvu sumdomgu pas puruv kemi yokwollekwopiyabono aro me'no aikudonyugono. “Kevu a'mwo abolo kwonyalo yodupudo togai ibwoto'nyo miyomwalpinono.”

¹⁰ Moro su toro me'no aikudo tov yiuwi'nokai kwako akavida'ai a'mwo abolo Jisasolluno kuudo muubweyodupudo tonyuno aikudonyumaiyo. A'mwo abolo su ton kwonyalo yodupudodeyo oo kwanyu sumdo kinuwiyodupudodeyo oo a'mwo abolo punyuro kuto ivito ki'noma'dupudodeyo oo kuunano gooti toorai ilomoropiyodapudodeyo su toro yodupudo tonyuno aikudonyumaiyo. Su tov aro tovinokwono. A'mwo abolo su toro yodupudo tonyu kevu ku'nono mirukuruwolopinogaikikono. Nuvu sumdomgu su tovino aikudo'mujuko'mno'juki kevu neya bolopi kwako akavi yiunokuudo kuugollu'movopujukogaikikono. Puuto puru'monodo su tomgu'aro to'no a'mwo abolo su tonyu nokwo surukuruwolovopujukogaikikono.

¹¹ Toro kuvi kuruv moro kuuguudo sokwollekwopiyabo su tovino kavlo tov arokwono. A'mwo abolo pun kevnokwe tonyuno aro dodupudogano. “Oo nevu Jisasolluno kuudo kuubwemwakuuwono.” Toro dodupudo kun kuruv kwonyalo yodopureyo'mdeyo oo kwanyu sumdo kinuwiyodopureyo'mdeyo oo kuunano gooti toorai ilomoropiyodopureyo'mdeyo oo magu'nyo imo'nodopureyo'mdeyo oo imo'wonyo bwotonyo nopi amomo yodopureyo'mdeyo oo a'mwo abolo punyuro kuto ivito ki'noma'dopureyo'mdeyo su toro yodopure togai kevu ibwoto'nyo nyomwalmwalpiyo. Aki su toro togai kevu wosamujuko kuruv avalo toru manomwalpinono.

^12-13 Neya duu'nyulo. A'mwo abolo kwa'mguda'ai tonyuro pasudo tovi gallainyubwollo'moneyokwe tov mi manuwoso. Yiuno Gooti toolno'gwowi Jisasolluro mollu'bwoto tovida'ai kwa'mgu mwalodupudo su tonyu nokwo gallainyubworonekono. Toro kuvi kuruv Jisasolluro mollu'bwoto tovi anakuuto tomuu kuulomwalodupudo tonyuro pasudo tovi gallainyubwollo'moneyokwe tov kemi aikuuwoso. Toro tovino tov a'mwo pwol kirovanyuvanyu yodowo'jure toollu kwonomapi tov kevnokwe togaikul a'mwo su toollu kwa'mgu tomuuno neya domovomjapiyogaulo.