1 Koorin 4 - Gooti Toolluro Yogalokwono

Aguto tool gamoro womdokwe toorai jagilono tovinokwono

¹ Toro te kevu nemino aro kuudo neya jaurogaulo. Oo a'mwo su tekwojo Krais toolluro womdo tovi wiyodupudorogano. Aki toro tekwojo Gooti toolluro yiulo yogalo apuu'nallajuko tovi moduvomwalopi yiuno kuu'maiyo toru'no bomollolupto'nosodupudorogano. Nemino su toro kuudo neya jaurogaulo.

² Aki puruv kevu kuudo neya jaullulo. A'mwo aguto pwol moduvomwallo'moneyokwe womdo tovi a'mwo gabovo pwollu kwiyo'ji tov a'mwo su tool womdo tovi pi'mwono neya moduvomwalonekono.

³ Toro te womdo tovi gallainyubwollo'moneyokwe tov yiuno a'mwo aguto toolluno to'no kuuwoso. Toro tovino tov kevudeyo oo a'mwo pworodeyo mi agallainyubwopi tov nuvu kuudo kwolallo miyourukwapimonyugono. Aki moro womdo yodumdo tovino ilaiyo'mdukono oo kaiyo'nodo'mdukoneyokwe tovino nuvnokwe kwonyu kuruv ku'nono magallainyubwollokwenyugono.

⁴ Moro womdo yodumdo tonyu gallainyubwollo'moneyokwe danyono to'gwowi Aguto toollu kuuwoso. Toro te nuvnokwenyuno, Oo nuvu moduvomwallokwe toonyu kaiya'no puru'monodo kuruv miyodumdonyudeyo, kuudo yau'dumdonyugono. Toro kuvi kuruv nuvnokwenyu gallainyubwollo'moneyokwe tov mi manuwoso. Yiuno Aguto toolno mi gallainyubworowo'ji domdukuuranubweyonekono.

⁵ Toro te Aguto tool yere mabodowo'jure toga kevu a'mwo pworavuro moduvomwallo'moneyokwe womdo tovino yere nojagilmwalpiyo. Yiuno kemi Aguto tool abwo'ji toga yiuwi'nokai poowokalago tovida'ai kuudo dugumwuulo tomuu yiulo kuulopuu'na'dupudo su toorai bako tovi nobomorosonekono. Su toro abomoroso'ji toga kuu'maiyo toru'no bomollolupto'nosonekono. Aki Gooti tool yiuwi'nokai pwolno pwolnodo toonolluro womdo tonyuno kaiya'nodo'mdukono oo sugudo'mdukoneyokwe tovino kuudo me'no youroma'dowodekono. Gooti su tool a'mwo pwolluno aro ado'ji tov “Oo a'mwo akal womdo sugudo yodowodekono,” ado'ji tov Gooti tool a'mwo su toolluno yovo tovi nyulomoropiyawonekono.

Koorinda'ai Jisasolluro a'mwo abolo ton ilomoropunyu yodapudo tovinokwono

⁶ Mi avalobuuravoo, kevu kuudo po'dogalo youromapino'moneyokwe nuvu Apooloseke toonalluno kuuguudo tov aikudadokwono. Kevu namoro yodowolo su tovino kuudo youromaropi Gooti toolluro yogalo sakwollungiko tonyu kevu pi'mwono nokwo uumjunpinogaikikono. Su toro kuumjunpi toga kevu a'mwo pwolluno kuu'dello wosodupudogaikuldeyokwe a'mwo su toolluno yovo tov nyulomoropiyapiyo. Aki kevu a'mwo gabovo pwekwojuno yovo tov nobwolomorumwogapiyapiyo.

⁷ Neya duu'nyulo. Gooti tool kemi muunyu toru'aro mollekudapiyodowodo tov kevu a'mwo abolo punyu uuwoleyo'mo'maiyo. Aki kemoro yiuwi'nokai mwora'dupudo su ton Gooti toolluro ato tovida'ai to'no ma'dupudogano. Toro kuvi kuruv yiuwi'nokai su tonyu kevnokwe togaikulluro yokwollosodupudo to'busuko ilomoropunyu yodapudogaikikono. Kemoro su toro yodupudo tov ilaiyo'maiyo.

⁸ Aki kevu aro kuudo yau'dupudogaikikono. Oo nevu noonyumwonyu punyuno supto miyodowadonogano. Toro kunol kuruv muunyu kai'muuda'ai bwotonyago ton kurukwe me'no imo'nodowadonogano. Sumdomgu Pooleke tooro yere manekullo'mwojodopure kuga kuruv nevu a'mwo aguto kig toorobusuko me'no imo'nodowadonogano. Kuudo yau'dupudogaikikono. Su toro kuudo yau'dupudo kuvi kuruv kevu mido mollomwallo'moneyokwe a'mwo aguto kig toorobusuko me'no sumo'nopujuko'mno'juki ne kwonol kuruv kevuge aval'no a'mwo aguto kig toorobusuko nokwo mido amollomwalowa'jujukonogano. Nuvu su toro tovino ilaiyo nokwo so'mujukonyugono.

⁹ Toro kuvi kuruv Gooti tool nevu kuurotokwe tekwojonollu a'mwo aguto kig imo'nyo'moneyokwe majanekubweyokanogano. Toro tovino tov yiuno a'mwo yasuwa'nodo toorobusuko imo'nodowadonogano. Toro tekwojonolluno nekudodupudorogano. “Su toorai noromiyoso'morogano.” Su toro nekudodupudo tekwojonollu a'mwo abolo kwako akavi mwalodupudo ton muugonanekwo'dupudogano. A'mwo abolo togai'aro aki ensel kworogai'aro yiuwi'nokai ton muugonanekwo'dupudonogano.

¹⁰ Kuudo neya jaullulo. Kevu aro dodupudogaikikono. “Oo nevu Krais toolluro pi'mwo kuudo kurukwenogano. Aki jurogudo imo'nodowa yovo aguto mallokwenogano.” Dodupudogaikikono. Toro kuvi kuruv nevu tekwojonolno'gwowi Krais toolluro womdo wiyodowado tekwojonolluno tov a'mwo abolo tonyuro sumdo tovi a'mwo junorukuudokwe pworobusuko wimo'nodowadonogano. Aki toro tekwojonol a'mwo wollainyo pworobusuko imo'nodowa yovo aguto mamallokwenogano.

¹¹ Nevu su toro mujumo'nugelabino mujumo'nugelabino yodowa aga kuga kuruv wosa tokwe wonyo tokwe tovalluno mujuko bolodowadonogano. Aki toro tekwojonol lukuuto nya'jokwe youro tonyuno supto yodowadonogano. Toro tekwojonollu iwago nekuromiyodupudonogano. Aki nevu ago nonagutokwe tekwojonolbusuko mwolomollodowadonogano.

¹² Nevnokwenolluro ato togai womdo bwotonyo ton yodowado tovida'ai burawo nonekullunodowodekwojonogano. Toro tekwojonollu biyekuu'nyogalo nekudodopure toorai nevu yiuno yogalo sugudo tokwe to'no duuwiyodowadonogano. Aki nemi kaiyako yanekullugolodopure toga nevno'gwowi kavo mwalodowa mido mamallokwenogano.

¹³ Aki nemino kaiya'no yogalo bwolomodomonekwopiyodopure toga nevno'gwowi yogalo sugudo tokwe kaveno wuudodowadonogano. Toro tekwojonol yiuwi'nokai kwako akavida'ai a'mwo abolo tonyu yaiyo tekwojonolbusuko wimo'nodowadonogano. Nevu su toro imo'nugelabino imo'nugelabino yodowa aga kuga kuruv yiuno biyolsumdo to'no nekullodupudekwojonogano.

Wagwolago Koorinda'ai Jisasolluro a'mwo abolo ton Poololluro yodowodo kubalno neya uumjunpureyokwe tovinokwono

¹⁴ Kevu moro kwoloraiyo tobuurekulbusuko me'no nyumo'nodupudo togaikulluno kalo buuropino ikullunodumdonyugono. Toro togaikullu mollaikudo'meyo'moneyokwe nuvu puukwollo akav sakwollumwakono. Toro te kevu moro puukwollo akavino aro kuudo nyaupiyo. Oo nemi wogulo donekwo'gallo'moneyokweyokwono. Kuudo nyaupiyo.

¹⁵ Neya duu'nyulo. Kemi tellunumiyago ikullumo'nodowodo tool yiuno nuu judo toonyunodokwono. Su tov nuvu kuuguudo sugudo tokwe moruudekumollodore tovi kevu wuu'no'mno Krais Jisasolluno kuudo kuubweyopogaikikono. Su toro tovi'aro kevu moro kwoloraiyo tobuurekulbusuko me'no anyumo'nopogaikikono. Toro togaikullu a'mwo bwotonyago kuunodo tooro Krais toolluno sodekubwasupi kuruv nuvubusuko kemi tellunumiyago maikullumo'nupinorogano.

¹⁶ Toro tovino tov nuu kemi tellunumiyago ikullumo'nodumdo toonyu guureji aro ikudumo'monyugono. Kevu nuvubusuko neya bilodukovimo'nogaulo.

¹⁷ Kavlo su toro tovino nuvu Timootiyollu kemiyomno amekwopiyamono. A'mwo su tool Krais toollu guureji uumjunodowodekono. Aki toro tool nemi Aguto toollu'aro moro kwolaiyo toolbusuko nyumo'nodowodo toolluno nuvu kalo buuropino mollodumdekono. Toro te a'mwo su tool aro tovino yodekubwaso'moneyokwe mekwopiyamekono. Nuvu Krais Jisaseke uuguro'mwonyodumdo toonyu yiuwi'nokai go'no go'nodo tomuuda'ai Jisasolluro mollu'bwoto tonyu aval'no yodubwosomollodumdonyugono. Toro tool moro yodumdo su tonyuno kevu aki aiko te kuudo yaupino'moneyokwe biyodekubwasonekono.

¹⁸ Kevu pworekul ilomoropunyu yodapu aro kuudo sau'mwakoporekikono. Oo Poolol nemi yogalo nekujo'mo aikomgu mabwonoldeyo. Pworekul su toro kuudo sau'mwakoporekikono.

¹⁹ Kevu su toro sau'mwakopo kuvi kuruv nemi Aguto tool ilaiyo kwino'ji to'gwowi nuvu wobo toga kemi nobekuru'ma'monyugono. Su toro abekuru'ma'mi toga nuvu a'mwo ilomoropunyu yodapudo su tooravuro yogalo dodupudo tovino nokwo youroma'monyugono. A'mwo su tooro Gooti toolluro jurogudo tokwe momjumovla'mdupudorodukono oo mamomjumovla'mdupudorodukono? Su tovino nogallainyubwo'monyugono.

²⁰ Neya duu'nyulo. A'mwo pwol a'mwo abolo punyu aguto kig Gooti toolluro mido mollomwalo tovino wuuduuwallo'moneyokwe yiuno gamoro yogalo tokwe to'no muuduuwallonekono. Toro kwol kuruv gamoro pasudo somjomwekovlawo'ji tovino'gwowi Gooti toolluro jurogudo tov kuu'maiyo toru'no aro wuuduuwallonekono. “Oo nuvu aguto kig Gooti toolluro mido mollomwalo tomuu me'no mwalodumdonyugono.” Su toro tovino nokwo wuuduuwallonekono.

²¹ Toro te nuvu kemi abekuru'ma'mi toga nuvu iwanyiko tokwe kemi movaikugu'mwojo'mo dukekullunadopiyo oo kemino kalo buuropino nyunowo'ji kavo ikubemwojo'mo dukekullunadopiyo? Nuvu kemi adadomgu'aro biyekuru'mallo'moneyokwe tov kevnokwe togaikullu aikuuwoso.