1 Koorin 2 - Gooti Toolluro Yogalokwono

Poolol yiuno Krais tool i'noguropte tovi aboloka tovino to'no kuuguudo amoruudomolloka tovinokwono

¹ Nuugebuuravoo, nuu muudu'nodo toga Gooti toolluro yiulo yogalo tovino kuu'maiyo toru bomollolupto'naikubweyo'moneyokwe abiyodekubwasajonyugono. Yogalo su tokwe toro sodekubwasajo toga kemi nojolukuulovekumallo'moneyokwe yogalo pugai'aro kwako akavida'ai pi'mwo kuudo pugai'aro togai abonyumaiyo.

² Toro toonyu aro kuudo sauronyugono. Oo nuvu kwako akavida'ai kuudo toorogai mamoruudumonyugono. Toro kwonyu kuruv yiuno Jisas Kraiseke'aro aki gami i'noguropte tovi aromiyoguroptowosopo tovino kuuguudo tokwe'aro tovake to'gwowi neya moruudumwalmonyugono. Kuudo sauronyugono.

³ Nuvu su toro kuudo yau'no sumoneyokwe kemi abekuru'maronyugono. Toro bekuru'ma'no sumoneyokwe nuvnokwe toonyu jurogudo nonaguto sumo'nyajonyugono. Toro toonyu a'mwo wollainyo pwolbusuko kevuge amwallajonyugono. Toro mwalodum luko bu'buto sajonyugono.

⁴ Toro toonyuro kuuguudo amodekumollajo tov a'mwo pi'mwo kuudokwe tooravuro yogalo bwotonyago togai mado'nekumallajonyugono. Toro kwonyu kuruv nuu kuuguudo modekumollodore toga Gooti toolluro Kuullo toolno'gwowi gavnokweyolluro jurogudo tov kemi kuu'maiyo toru'no aikuduuwallajukekono.

⁵ Toro ikuduuwalloduke tovi wono'mno, “Oo nebalo'mdeyo,” adopogaikikono. Toro do'mno Krais toolluno kuudo kuubweyopogaikikono. Kemoro kuudo kuubweyopo su tov kwako akavida'ai a'mwo pworavuro pi'mwo kuudo tovida'ai kuubweyopogaikulmaiyo. Toro kuvi kuruv Gooti toolluro jurogudo ikuduuwalloduke tovida'ai to'no kuudo kuubweyopogaikikono. Kevu yiuno Gooti toolluro jurogudo tovino to'no kuudo yau'mwalpino'moneyokwe nuu su toro tomgu'aro sodekubwasajonyugono.

Gooti toolluro Kuullo tool yonekubwasodowo'jure tovida'ai pi'mwo kuudo ton youroma'dowado tovinokwono

⁶ Nuu toro sodekubwasajo kwonyu kuruv a'mwo abolo pun aguto me'no gullodopure su tonyuno'gwowi nuvu pi'mwo kuudo purukwe kuuguudo moruudodumdonyugono. Toro kuvi kuruv pi'mwo kuudo su to'gwowi kwako akavida'aiyo'maiyo. Aki kwako akavida'ai mido mollomwalokwe tooravuro'maiyo. Kevu kuudo neya jaullulo. Kwako akavida'ai a'mwo mido mollomwalokwe su tooro yere yovlaiyokwerogano.

⁷ Toro kuvi kuruv Gooti toolluro pi'mwo kuudo moruudodumdo su to'gwowi yiulo yogalo kwollajukokwono. Aiyoga kwako akav yere mimo'nyoduke togada'ai Gooti tool nemi nekullo'mwojo'moneyokwe pi'mwo kuudo su tov me'no sovrovanekubweyokaikono. Toro sovrovanekubweyoka su tov yiulo kwollajukokwono.

⁸ Toro te pi'mwo kuudo su tovino kwako akavida'ai mido mollomwalokwe pwolnodo kwol kuruv ku'nono miyouromallajuporogano. A'mwo mido mollomwalokwe su tooro Gooti toolluro pi'mwo kuudo su tovino kuudo po'dogalo souromaropujuko'mno'juki nemi Aguto jurogudo kuunodokwe toollu i'noguropte tovi mamovoromiyoguroptowosopujukorogano.

⁹ Su toro tovino Gooti toolluro yogalo puruv aro sakwollungikokwono. “Gooti toolluro ilaiyo kuunodo ton me'no sovrowosokaikono. Toro sovrowosoka su tonyuno a'mwo pwolnodo kwol kuruv gami sumdo tokwe ku'nono mwonodowodekono. Aki gami kaduko tokwe muu'nodowodekono. Aki gami poowokalago tokwe kuudo ku'nono miyouroma'dowodekono. Gooti toolluro ilaiyo kuunodo su ton a'mwo abolo gamino kalo buuropino winodopure tonyu wiyo'moneyokwe sovrowosokagano.” Toro sakwollungikokwono.

¹⁰ Toro kuvi kuruv nevno'gwowi su toro tonyuno kuudo me'no youroma'dowadonogano. Su tov Gooti tool gavnokweyolluro Kuullo toollu'aro nemi kuu'maiyo toru'no bomollolupto'nanekubweyodowodekono. Aki Gooti toolluro Kuullo su tool yiuwi'nokai tonyuno po'dogalo jagilodowo Gooti toolluro yiulkuudo kunyuno kuruv nemi kuu'maiyo toru'no bomollolupto'nanekubweyodowodekono.

¹¹ Kuudo neya jaullulo. A'mwo pwolnodo kwol kuruv a'mwo gabovo pwolluro kuudo yau'dowo'jure tonyu ku'nono miyouroononekono. Toro kuvi kuruv yiuno gavnokwe toolluro kuullo toolno'gwowi gamoro kuudo tonyuno nokwo youroma'dowodekono. Su toro to'busuko kubalno Gooti toolluro kuudo tonyu yiuno gavnokweyolluro Kuullo toolno nokwo youroma'dowodekono.

¹² Aki Gooti toolluro Kuullo su tool nemi me'no anekullabokaikono. Kuullo su tool kwako akavida'aiyolmaiyo. Toro kwol kuruv Gooti toolluda'ai amarowekono. Gooti toolluro Kuullo su tool nevu Gooti gavnokwe toolluro noonyumwonyu yasuwa'wino nekullabodowo'jure tonyuno youroma'mwalano'moneyokwe amarowekono.

¹³ Toro te nevu Gooti toolluro yasuwa'no nonekullabodowodo su tonyuno kwako akavida'ai pi'mwo kuudo tokwe miyodubwasokwenogano. Toro kuvi kuruv Gooti toolluro Kuullo tool nebaikuuguudo yodonekubwasodowo'jure togai to'gwowi kevu gamoro Kuullo kurukwe togaikullu kuu'maiyo toru'no yodekubwasodowadonogano.

¹⁴ Toro kuvi kuruv a'mwo abolo Gooti toolluro Kuullo tool nonagutokwe ton Gooti toolluro yasuwa'no nonekullabodowodo su tonyu ku'nono mamallokweyogano. A'mwo abolo su ton aro kuudo yau'dupudogano. Oo kuuguudo su tov a'mwo junoruko pworavurokwono. Kuudo yau'dupudogano. Aki nebaikuuguudo su tonyuno kavlo tov yiuno Gooti toolluro Kuullo toollu'aro nokwo jagilpinogano. Toro tovino tov Gooti toolluro Kuullo tool nonagutokwe su ton kavlo tovino ku'nono miyouroma'dupudogano.

¹⁵ Toro kuvi kuruv nevu Gooti toolluro Kuullo kurukwe tonolno'gwowi yiuwi'nokai nebaikuuguudo su tonyuro kavlo tov me'no youroma'dowadonogano. Aki a'mwo yasuwa'no pwolnodo kwol kuruv nevu Gooti toolluro Kuullo kurukwe tonollu ajanekigilpi kuruv nemino kuudo po'dogalo miyouronekumapinogano.

¹⁶ Su toro tovino Gooti toolluro yogalo puruv aro sakwollungikokwono. “Aguto toolluro kuudo yau'dowo'jure tovi youromallo'moneyokwe a'mwo pwolnodo kwol kuruv nonagutomuugono. Toro te a'mwo pwolnodo kwol kuruv Aguto toollu ku'nono mibwasonekono.” Su toro sakwollungiko kuvi kuruv nevno'gwowi Krais toolluro kuudo ton me'no ma'dowadonogano. Toro ma'dowado tonol gavubusuko nokwo you'movla'mwalanonogano.