1 Koorin 16 - Gooti Toolluro Yogalokwono

Wagwolago Koorinda'ai Jisasolluro a'mwo abolo ton Jeruusalemda'ai Jisasolluro a'mwo abolo tonyu wiyo'mwojo'moneyokwe nuugwiyo pun i'bworoso'mo kwinopo tovinokwono

¹ Kevu Gooti toolluro a'mwo abolo Jeruusalemda'ai pubuurai wiyo'mwojo'moneyokwe nuugwiyo ton i'bworoso'mo me'no ikullunodowodogaikikono. Toro tovino nuvu yogalo pwekwo ikudumo'mokwono. Sumdomgu nuvu Galesiyada'ai Jisasolluro mollu'bwoto go'no go'nodo tonyu nuugwiyo pun i'bworoso'moneyokwe kuuguudo pun me'no adumul'mwojonyugono. Toro adumul'mwojo tomgu'aro kev kugaikul kuruv aval'no neya duumjunogaulo.

² Yiuwi'nokai Sande toga kevu yiuwi'nokai pwolno puru'monodo togaikul kemoro nuugwiyo ma'dupudo su tonyuda'ai pun judo pumgu neya dodovorojosogaulo. Aki toro tonyu kuuno domollu'bworosogaulo. Neya duu'nyulo. Lukomgu nuvu kemi me'no abekuru'ma'mi toga kevu wiyo'mwojo'moneyokwe nuugwiyo ton a'mgono ku'nono mipinogaikikono. Toro kugaikul kuruv nuvu yere mabekuru'ma'do'mure akagada'ai nuugwiyo ton neya ju'bworosumelabogaulo.

³ Toro te lukomgu nuvu abekuru'ma'mi toga kemoro nuugwiyo amollu'bworosupi su togai Jeruusalem'no nokwo mokavlapinokwono. Kemoro nuugwiyo amollu'bworosupi su togai mokavlaiyo'moneyokwe kevnokwe togaikulluda'ai a'mwo pworai nokwo jesupinogaikikono. Toro ajesupi su toorai nuvu pas puruv wiyo'mi nomorapimonyugono. Pas su tovi aro yakwollumonyugono. “Oo Koorinda'ai Jisasolluro a'mwo abolo tobuuro nuugwiyo ton mollu'bworosodupu nomokavlaiyo'moneyokwe a'mwo akarai ajesumapogano.” Yakwollumonyugono.

⁴ Aki su toro toga nuu kwonyu kuruv a'mwo su toorogai Jeruusalem'no plaiyo'mo kuudo sau'mi tov nuvu a'mwo su toorogai novla'monyugono.

Poolol wagwolago Koorinda'ai Jisasolluro a'mwo abolo tonyu wuuru'mallo'mo kwinoka tovinokwono

⁵ Toro te nuvu kemi ikwonyo'mo nyunoduke kuvi kuruv sumdomgu proovins Masedooniya tomuu'aro plavo'mi a'mwo abolo su tomuuda'ai tonyu wonomollumonyugono. Su tomuu'aro me'no yomollo'mi toga lukomgu kemi bekuru'ma'monyugono.

⁶ Su toro abekuru'ma'mi toga nuvu iruko pubuul kevuge mwalmonyudukono. Aki dole'manollo tov kuuno imo'nugovla'mdowo'jure toga kevuge kuuno mwalmonyudukono. Nuvu kevuge me'no mwalo'mi buro'nyomuudeyo tomuu plaiyo'mo toga kevu yonuwapipinogaikikono. Aki nonugovlaiyo'moneyokwe noonyumwonyu ton kevu nonyo'mwojupinogaikikono.

⁷ Su tov aro tovinokwono. Nuvu kemi abekuru'ma'mi toga kevuge iruko pwekwono mwalo'mi yere ikugollu'meyo'mo manyunadopiyo. Toro kuvi kuruv Aguto tool kudo'aiko ausanubweyo'ji to'gwowi nuvu manyu toga kevuge nokwo mwalmonyugono.

⁸ Toro kuvi kuruv iruko Pentikoos tollugwo yere mabawodowo'jure toga nuvu wagwolago Efesos akavi kuuno mwalmonyugono.

⁹ Su tov aro tovinokwono. Wagwolago akavi mi ikomago bwotonyago tooro mwalodupudorogano. Toro kuvi kuruv wagwolago akavi anakuuto tomuu womdo bwotonyo yo'moneyokwe Gooti tool mi kudo'aiko me'no ausanubweyokaikono. Toro tovino tov nuvu akawai mwalo'mi womdo me'no sopimi toga'no'gwowi lukomgu ago pumuuno nokwo pla'monyugono.

¹⁰ Aki Timootiyol wagwolago Koorin toru abaiki'mowo'ji toga a'mwo su tool kemino luko nyo'jokwe tovino kevu a'mwo su toollu kwako tomuu'aro neya wipinogaikikono. Su tov aro tovinokwono. Nuvu Aguto toolluro womdo tovi yodumdo toonyubusuko kubalno a'mwo su to kwol kuruv womdo aval'no yodowodekono.

¹¹ Toro toolluno tov kevu pugaikul a'mwo su toolluno nobwolomorumwogapiyapiyo. Aki a'mwo su tool kevuge me'no mwalowo'ji novlaiyo'mo toga sumwoluko kavo neya wosunowo'ji plawonekono. Aki toro toollu nonugovlaiyo'moneyokwe punyuno supto nyo'jokwe tov kevu wiyo'mwojopi ilaiyo to'no neya domollapilo. Su tov aro tovinokwono. Nuvu a'mwo su tooke'aro Jisasolluro a'mwo pwekwojogai'aro tooraino sogwollo kinmwalmonyugono.

¹² Aki nemi avalo Apoolosolluno kuuguudo tov arokwono. Nuvu Apoolosollu guureji aro adumul'mwojonyugono. “Guvu Jisasolluro a'mwo pworogai plavo'bi wagwolago Koorinda'ai Jisasolluro a'mwo abolo tonyu neya duuru'marogawono.” Toro adumul'mwojo kuvi kuruv a'mwo su tool aga novlaiyo'mo mwinadopiyo. Toro kuvi kuruv lukomgu puuto ilaiyo ausubweyo'ji toga'no'gwowi kemi nobekuru'maronekono.

Pas akavuro aiyowo'mo yogalo tovinokwono

¹³ Kevu wako neya kuu'nomwalopi kemi Jisasolluno kuudo uubweyodupudo su tovi muunyu toru guureji neya dodavogaulo. Aki a'mwono luko miyodupudo toorobusuko kubalno kevu luko miyopi jurogudo neya jumo'nogaulo.

¹⁴ Aki kemoro yiuwi'nokai mujumovla'mwalpino tov a'mwo abolo tonyuno kalo buuropino ikullunodowodo tokwe to'no neya domjumovlavogaulo.

¹⁵ Mi avalobuuravoo, kevu aro tovino kuudo me'no youroma'dupudokwono. Proovins Akaiya tomuuda'ai a'mwo Stefanaseke'aro gami ago tovi kuulomwalodupudo togai'aro tonumdoto Krais toolluno kuudo muudu'no kuubweyoponumdotogano. Proovins su tovida'ai yiuwi'nokai a'mwo abolo ton kuudo yere muubweyodopure kuvi kuruv a'mwo su tonumdotono'gwowi kuudo muudu'no kuubweyopogano. Toro tonumdoto Gooti toolluro a'mwo abolo tonyu wiyo'mwojo'moneyokwe womdo guureji yodupudogano. Toro te nuvu kemi guureji aro ikudumo'monyugono.

¹⁶ Kevu Stefanaseke su tonumdotai kwako tomuu'aro neya duuwiyogaulo. Aki a'mwo su tonumdotobusuko a'mwo abolo pun womdo aval'no guureji mujumovla'mdupudo kunyu kuruv kwako tomuu'aro neya duuwiyogaulo.

¹⁷ Aki a'mwo Stefanaseke Footuunatoseke Akaikoseke a'mwo pworapwol su tooro miyomno me'no abonyuru'maropo su tooraino ilaiyo sumwakonyugono. A'mwo su tooro kevu akawai mamwalodopure togaikulluro aiko toru ma'dupu mi nonyo'mwojodupudorogano.

¹⁸ Toro tooro kemoro poowokalago tonyu jurogudo daikullumwojodupudo to'busuko kubalno nuu kwonyu kuruv ilaiyo kuunodo danyumwojodupudorogano. Toro te a'mwo su toorogai'aro aki a'mwo su toorobusuko gabovo pworogai'aro tooro Gooti toolluro womdo guureji mujumovla'mdupudo tooraino tov kevu kaduko neya duuwiyogaulo.

¹⁹ Proovins Esiyada'ai Jisasolluro mollu'bwoto go'no go'nodo ton kemiyomno, “Ilaiyokwonoo,” adopiyamapokwono. Aki Akwila'weke Prisilakwe teyauke'aro kemoro ago tovi i'bwo'nodupudo Jisasolluro mollu'bwoto togai'aro ton Aguto toolluro yovo tovida'ai kemiyomno “Ilaiyokwonoo” bwotonyo adekwopiyamapokwono.

²⁰ Aki akawaida'ai yiuwi'nokai Jisasolluro a'mwo abolo kemi avalo ikullumo'nodupudo kun kuruv “Ilaiyokwonoo” adekwopiyamapogano. Kevu Jisasolluro a'mwo abolo togaikul imgu amgu iru'mato sunpi toga kemi poowokalago togai wiyo'moneyokwe suuwado tonyu molluduuduulo neya duuwiyogaulo.

²¹ Nuvu Poolonyu nuvnokwenyuro ato tokwe pas akavi sakwollomwako toonyu kemi, “Ilaiyokwonoo,” adekwopiyamono.

²² Oo nemi Aguto tool yere abwoneyokwe anekullunadopiyo. A'mwo pwol nemi Aguto su toolluno kalo buuropino mwino'ji tov yiunokuudo nerumwallo'mekono.

²³ Oo nemi Aguto Jisasolluro yasuwa'wino sugumaluko tov kemi nekubwemwalonekono.

²⁴ Aki Krais Jisasollu'aro nuu kwonyu kuruv kevu yiuwi'nokai togaikulluno kalo buuropino nyunodowodonyugono.