1 Koorin 15 - Gooti Toolluro Yogalokwono

Krais toolluro bolo'no aiyo aiko te adukavoka tovinokwono

¹ Miyobuuravoo, nuvu Krais toolluno kuuguudo sugudo tokwe kemi me'no amodekumollajonyugono. Kuuguudo sugudo su tovino kevu kuudo nyallulo'gwonmwalpiyo. Kevu su to kuvino ilaiyo me'no amollomaropogaikikono. Aki aga kuga kuruv kuuguudo sugudo su tovi guureji porugwo'mo'na'dupudogaikikono.

² Aki kuuguudo sugudo amodekumollajo su tovi'aro Gooti tool kemi ma'no ma'nodo tovuro kirumwallo tovida'ai mollurolovekuma'dowodekono. Kuuguudo sugudo su tovino kevu kuudo uubweyodupudo tov yasuwa'nodo'maiyo. Toro kuvi kuruv sulo kuvinono ne'nonokwono. Toro tovi guureji avorugwo'mo'napi togaikullu Gooti tool kuvinono nomollurolovekumaronekono.

³ Neya duu'nyulo. Nuvu kuuguudo aguto puruv marono kemi me'no aikullabonyugono. Kuuguudo aguto su tov arokwono. Krais tool nemoro ma'no ma'nodo tonyu monekudukwopiyo'moneyokwe abwolabolokaikono. Su tov Gooti toolluro yogalo tovi me'no sakwollungiko kuvinono Krais tool abwolabolokaikono.

⁴ Toro toolluro kulako tov buuso tovi mollusoso'mno iruko pullapullu me'no abawoka toga aiyo aiko te adukavokaikono. Su tov Gooti toolluro yogalo tovi me'no sakwollungiko kuvinono sumo'nokakwono.

⁵ Lukomgu Krais tool me'no dukaino sumaiyokwe Pitallu kwiyalo'nokaikono. Toro wiyalo'nyuno sumaiyokwe lukomgu 12-pela kuurotokwe toorai kwiyalo'nokaikono.

⁶ Aki lukomgu nevuge avalo Jisasolluro a'mwo abolo pubuuro 500 tovi muunyu toru'aro tobuurai kwiyalo'nokaikono. A'mwo abolo kwiyalo'noka su tobuuravuro pun aga kuuno amwakovo. Toro kuvi kuruv pubuurono'gwowi me'no abolopogano.

⁷ Krais tool a'mwo abolo su tobuurai me'no wiyalo'nyuno sumaiyokwe lukomgu Jemsollu kwiyalo'nokaikono. Yo'no lukomgu gamoro yiuwi'nokai kuurotokwe gabovo toorai kwiyalo'nokaikono.

⁸ Toro wiyalo'nyuno sumaiyokwe aiyowo'mo tov mi abiyanyulo'nokaikono. Su toro toga nuvu a'mwono pwolbusuko imo'nodore toonyu abiyanyulo'nokalmaiyo. Toro kuvi kuruv nuvu abolo puruv kwolaiyo muudoga pulludowopiyodowodo toolbusuko kubalno imo'nodore tekwonyu abiyanyulo'nokaikono.

⁹ Toro te yiuwi'nokai Jisasolluro a'mwo kuurotokwe gabovo tooro mi nuwolo'mdupudorogano. Aki mino, kuurotokweyoloo, nyudodupudo kuvi kuruv nuvnokwe tekwonyuro kuudo to'gwowi yovo aguto su tovino ku'nonodo'mekwonyumaiyo. Su tov aro tovinokwono. Nuvu Gooti toolluro mollu'bwoto tonyu kaiyako sugollajo tovinokwono.

¹⁰ Toro kuvi kuruv aga kuurotokwe kuvinono me'no sumo'nugelamwako su tov yiuno Gooti gavnokwe toolluro yasuwa'wino sugumaluko nubweyoduke tovida'aiyokwono. Yasuwa'wino sugumaluko nubweyoduke su tokwe womdo tovi momjumovla'mdumdonyugono. Aki Gooti toolluro yasuwa'wino sugumaluko anubweyoka su tov yasuwa'no mavlavo'no sulo ton me'no ki'nodowodokwono. Su tov aro tovinokwono. Nuu womdo kaveno miyajonyugono. Toro kwonyu kuruv yiuwi'nokai kuurotokwe gabovo tooravuro womdo yodopure tonyu uuwolo'mdum guureji kuunodo amjumovlaiyajonyugono. Su tov nuvnokwenyuro jurogudo tovida'aiyo'maiyo. Toro kuvi kuruv Gooti toolluro yasuwa'wino sugumaluko anubweyoka tovida'ai to'no amjumovlaiyajonyugono.

¹¹ Toro te kevu kuuguudo sugudo su tovino kuudo me'no kuubweyopogaikikono. Su tov moro amodekumollajo tovida'aiyo'mdukono oo kuurotokwe pworavuro amodekumollajupo tovida'aiyo'mdukono. Su tov aguto'maiyo. Kevu su toro tovino kuudo kwolallo nyourukwapimwalpiyo. Toro kuvi kuruv kevu kuuguudo sugudo tovino kuudo me'no kuubweyopo su to'gwowi aguto kuunodokwono. Nevu yiuwi'nokai kuurotokwe toonol kuuguudo sugudo tovino aval'no modekumollodowadonogano.

A'mwo abolo me'no bolodupudo ton aiyo aki aiko te nodukapino tovinokwono

¹² Nevu kuuguudo aro modomollodowadonogano. Krais tool me'no aboloka toollu Gooti tool aiyo aiko te amodukavokaikono. Su toro modomollodowado kuvi kuruv kevu pworekul aro dodupudokwono. “A'mwo abolo me'no bolodupudo ton aiyo aiko te ku'nono madukapinogano.” Pworekulluro su toro modomollodupudo tov kuvimaiyo.

¹³ Kuudo neya jaullulo. A'mwo abolo me'no bolodupudo ton aiyo aiko te madukaiyo'mo'mno'juki Krais kwol kuruv aiyo aiko te madukavowo'jujukekono.

¹⁴ Aki Krais tool aiyo aiko te madukavowo'jujuko'mno'juki nevu gamino kuuguudo modomollodowado tokwe'aro kuudo uubweyodowado tokwe'aro toval yiuno yasuwa'no to'no sumo'no'bullujukovakono.

¹⁵ A'mwo pworo, “Me'no bolodupudo ton aiyo aiko te madukapinogano,” dodupudo tov kuvimaiyo. Su tov nebalo'mno'juki Krais kwol kuruv aiyo aiko te madukavowo'jujukekono. Aki Krais tool madukavowo'jujuko'mno'juki Gooti tool Krais toollu aiyo aiko te amodukavoka kuuguudo su tokwe nevu kuurotokwe toonol kuunano soukuu'nuudomollowa'jujukonogano.

¹⁶ Aki Gooti tool a'mwo pwolnodo kwollu kuruv mamoduka'mdowodolno'juki Krais kwollu kuruv aiyo aiko te mamodukavowo'jujukekono.

¹⁷ Aki Gooti tool Krais toollu aiyo aiko te mamodukavowo'jujuko'mno'juki kevu kwolluno kuudo yasuwa'no kuubweyopujukogaikikono. Aki kemi ma'no ma'nodo tonyuro jul'nyo tovi dolago tomuu kuuno amwalopujukogaikikono.

¹⁸ Aki yiuwi'nokai a'mwo abolo Krais toolluno kuudo uubweyodupu me'no bolodupudo su ton du'muudo tomuuno yiunokuudo avlavopujukogano.

¹⁹ Aki nevu Krais toolluro nekullo'mwojo'moneyokwe tovino sogwollo kinodowado tobuuronol kwako akavi aiyo kuuno mujomwekovlavowa'ji sogwollo yasuwa'no to'no amjengovlavowa'jujukonogano. Nevu su toro aingovlavowa'jujuko'mno'juki kalobuuronogano. Aki toro tobuuronolluno kalo'mo su tov yiuwi'nokai a'mwo abolo kwako akavi mwalodupudo gabovo tonyuno kalo'mo yodupudo tovi kuuwolovowo'jujukokwono.

²⁰ Toro kuvi kuruv aga yiuno nebal'no ikudumo'mokwono. Krais tool me'no aboloka toollu Gooti tool aiyo aiko te me'no amodukavokaikono. Su tov wosamujuko ton suwiyo yodopure tonyu muudu'no mulodupudo to'busuko kubalno Krais tool sumdomgu kwolda'ai adukavokaikono. Toro adukavoka su tool sumdomgu wanodowo'jure toga kwolluda'ai yiuwi'nokai a'mwo abolo me'no abollungopo ton uumjunopi aiyo aiko te noduko'moulapinogano.

²¹ Neya duu'nyulo. Yiuno a'mwo pwolnodo toolluro soka tovida'ai nevu yiuwi'nokai tonol mujobolmovla'mdowadonogano. Su toro to'busuko kubalno yiuno a'mwo pwolnodo toolluro soka tovida'ai nevu aiyo aiko te nodukawanonogano.

²² Nevu yiuwi'nokai Adamolluda'ai bodowado tonol bolmovla'mdowadonogano. Su toro to'busuko kubalno nevu yiuwi'nokai Krais toollu uuguro'mwonyodowado tonol aiyo aiko te nodukawanonogano.

²³ Toro kuvi kuruv nevu yiuwi'nokai pwolno puru'monodo tonolluro aiyo aiko te dukaiyo'moneyokwe toga'no Gooti tool me'no ajesokaikono. Aiyo aiko te nodukawano su tov Gooti toolluro me'no ajesungiko tomgu'aro neya uumjungelabwonokwono. Toro te sumdomgu Krais tool aiyo aiko te muudu'no me'no adukavokaikono. Aki lukomgu Krais tool aikomgu kwolabwo'ji toga gamoro a'mwo abolo kunol kuruv aiyo aiko te noduko'moulowanonogano.

²⁴ Su toro toga kwako akavuro aiyowo'mo imo'nonogakono. Aki su toro toga Krais tool yiuwi'nokai kuullo ma'no ma'nodo mido mollomwalokwe toorogai'aro jurogudokwe toorogai'aro yovo agutokwe toorogai'aro yiuwi'nokai su toorai kaiyako nomollounapiyonekono. Su toro me'no mollounapiyowo'ji aiyowo'mo su toga aguto kig Krais tool gamoro mido mollomwalo tov gami Ganumiyago Gooti toollu nomorubweyonekono.

²⁵ Kevu neya duu'nyulo. Gooti tool gami ikomago toorai yere muuwolo'mdowo'jure toga aguto kig Krais toolluro mido mollomwalodowodo tov neya mujo'movla'mwalonokwono.

²⁶ Gooti tool gami ikomago toorai kaiyako nomollounapiyonekono. Toro mollounapiyowo'ji ikomago aiyowo'mo pwollu kaiyako nomollounapiyonekono. Ikomago su tool bolnodo tookono.

²⁷ Gooti toolluro yogalo puruv aro sakwollungikokwono. “Krais tool yiuwi'nokai tonyu mido mollomwalmwalono'moneyokwe Gooti tool kwolluro dolago tomuu nobomorubweyonekono.” Sakwollungikokwono. Toro kuvi kuruv kevu kuudo nyau'mwakovo. Gooti gavnokwe toolno'gwowi Krais toollu dolago tomuu mamorubwenonekono.

²⁸ Toro te Gooti tool yiuwi'nokai tonyu gami Kwolaiyo toollu dolago tomuu me'no abomorubweyo'ji toga Kwolaiyo su tool gami Ganumiyago Gooti toolluro mido mollomwalo tovi dolago tomuu kuulomwalonekono. Krais gavnokwe tool Gooti toollu dolago tomuu mwalodowo'jure kubalno yiuwi'nokai noonyumwonyu ton Gooti toollu dolago tomuu yiunokuudo wo'mwalpinogano.

²⁹ Pasudo puvino kevu kuudo neya jaullulo. A'mwo abolo pun a'mwo abolo me'no bolodupudo pubuuraino kuudo yauropi wonyo uuvollunodupudogano. Toro ton, a'mwo abolo me'no bolodupudo su tobuuro aiyo aiko te nodukapinodeyo, kuudo yau'dupu uuvollunodupudogano. Toro kuvi kuruv a'mwo me'no bolodupudo tobuuro madukapino'mno'juki a'mwo abolo su ton wonyo ku'nono muuvollunopujukogano.

³⁰ Aki nevu Krais toollu guureji uumjunodowado tonollu kaiyako yanekullugolodupudonogano. Toro kuvi kuruv a'mwo abolo me'no bolodupudo tobuuro aiyo aiko te madukaiyo'mo'mno'juki nevu aro kuudo saurowa'jujukonogano. Oo nemi kaiyako nyanekullugolpiyokwe nevu Krais toollu guureji muumjungovlawanonogano. Kuudo saurowa'jujukonogano.

³¹ Mi avalobuuravoo, nebal'no ikudumo'mokwono. Yiuwi'nokai iruko tobuullu noromiyanubweyo'mo wobo toru nyodupudonyugono. Aki nebal'no su to'busuko puruv aro ikudumo'mokwono. Nemi Aguto Krais Jisasol kemoro akuuto tomuu womdo bwotonyo me'no aikulloka tovino nuvu ilaiyo bwotonyo yodumdonyugono.

³² Aki a'mwo abolo me'no bolodupudo tobuuro aki aiko te madukaiyo'mo'mno'juki nuvu Efesosda'ai a'mwo pworogai molo sunowo tov manyo'mwojowo'jujukokwono. A'mwo su tooro ibesa'aiyo kuulludaiyo toorobusuko magu'nyo imo'nodopure toorogai molo sunowonogano. Kuudo neya jaullulo. Gooti tool a'mwo abolo me'no bolodupudo tobuurai mamodukaiyo'mo'mno'juki nevu a'mwo pworavuro aro dodupudo tovi nokwo kuumjunowa'jujukonogano. “Oo bi'ai yiunokuudo nobolano tovino tov anuugwo aiyowo'mo wosamujuko togai wain wonyo togai lubullu doto bwotonyo neya yanano.” Su toro dodupudo tovi nokwo kuumjunowa'jujukonogano.

³³ A'mwo su toro dodupudo tooravuro youkuu'naikudodopure tovi kevu kaduko nuuwimwalpiyo. Neya duu'nyulo. Nevu Jisasolluro a'mwo abolo tonol sugupasudo yo'mo nekullunodowo'jure kuvi kuruv a'mwo ma'no ma'nodokwe su toorogai amjonomwekovlawa'ji tov kemoro ma'no ma'no pasudo toorai uumjunanogano. Su toro tomgu'aro nemoro sugupasudo tovi kaiyako igolanekumopinorogano.

³⁴ Neya duu'nyulo. Kemi yogalo aro mojurugolekumollumo'monyugono. Kemida'ai pugaikul Gooti toolluno kuudo ku'nono miyau'mwakovo. Toro tovino wogulo neya jubwosunyulo. Toro tovino tov kevu kuudo po'dogalo neya yauropi kemi ma'no ma'no pasudo yodupudo su toorai yiunokuudo neya dodukwopiyogaulo.

Kulako aiyo aiko te nodukawono tov judo pumgu'aro imo'nono tovinokwono

³⁵ Kevu pugaikul yamuugojo aro nodumwalpiyo. “Gooti tool a'mwo abolo me'no bolodupudo tonyu aiyo aiko te adadomgu'aro kuvinono modukawonoldukono? Aki toro adukapi tonyuro kulako ton adadomgu'aro imo'nupinodukono?” Su toro nodumwalpiyo.

³⁶ Kevu pugaikul yamuugojo su toro adupi tov junorukuudokweyogaikikono. Kevu kuudo nyau'mwakovo. Ikulsulo pullugwo kwako tovi aburaudosubi toga sumdomgu me'no bolowo'ji lukomgu aiyo aiko te nobilarowiyonokwono.

³⁷ Kevu wit sulo'mdeyo oo buro'nyo buro'nyo ikulwiyollovodeyo kuudoso'mo togaikul ikoulo togai yogudo togai maudosodupudogaikikono. Toro kugaikul kuruv ikulwiyo su tollugwo yiuno judo tollugwo kuudosodupudogaikikono.

³⁸ Aki ikulwiyo pulluno pullunodo su tollovo kemi go'no go'no kulako togai bilarowiyodupudogano. Su tov Gooti gavnokwe toolluro me'no sokwollosungiko tomgu'aro billumo'nodupudogano.

³⁹ Toro te yiuwi'nokai kulako judo'no judo'nodo ton avalou'nodonmaiyo. A'mwo abolo tonyuro kulako tov purukwono. Aki kwako tovi yomollodupudo ibesa'aiyo tooravuro kulako tov purukwono. Aki dokato tooravuro kulako tov purukwono. Aki domwoga tooravuro kulako tov purukwono. Yiuwi'nokai judo'no judo'no kulakokwe su ton kwako akaviyogano.

⁴⁰ Aki muunyu i'muuda'ai sulugumdo tovi wo'dupudo tonyuro kulako ton sugumaluko judo pumgu'aro kurukweyogano. Aki kwako akavi wo'dupudo tonyuro kulako kun kuruv sugumaluko judo pumgu'aro kurukweyogano.

⁴¹ Muunyu i'muu wo'dupudo kuujo tooke'aro lobako tooke'aro sullugabwo togai'aro tonyuro kulako ton sugumaluko judo judo'no kurukweyogano. Aki yiuwi'nokai sullugabwo go'no go'nodo tooravuro kulako ton sugumaluko judo pumgu'aro kurukweyogano.

⁴² Su toro to'busuko kubalno a'mwo abolo me'no abollungopo ton lukomgu aiyo aiko te adukapi toga aval'no su toro nyumo'nupinogano. A'mwo bwiyo pwolluro kulako tovi a'mwo buuso te mollusosodupudo su tov bwiyo yiunokuudo buuropiyodowodokwono. Toro kuvi kuruv a'mwo toolluro kulako muuduko tov aiyo aiko te nodukawono su to'gwowi bwiyo ku'nono mabuuropiyonokwono.

⁴³ Aki nemoro kulako amollusosupi akan yiuno kwoda'mol kuumwiyo to'no imo'nyo'moneyokweyogano. Toro kuvi kuruv kulako aiyo aiko te monekudukawono su tono'gwowi yiuno sugumaluko to'no imo'nyo'moneyokweyollovogano. Aki nemoro kulako amollusosupi ton yiuno wollainyo to'no imo'nyo'moneyokweyogano. Toro kuvi kuruv nemoro kulako muuduko monekudukawono su tono'gwowi jurogudo kuunodo imo'nyo'moneyokweyogano.

⁴⁴ Aki nemoro kulako amollusosupi akan yiuno kwako akavi wollo'moneyokweyogano. Toro kuvi kuruv Gooti tool gamoro Kuullo toollu'aro nemoro kulako su tonyu muuduko mollumo'nosowo'ji nomonekudukawonekono. Kulako muuduko su tono'gwowi nevu Gooti toolluro ago toru ilaiyo mwallo'moneyokweyogano. Toro te aga kwako akavi mwallo'moneyokwe kulako ma'dowado su tonbusuko kubalno lukomgu Gooti toolluro ago toru mujomwekovla'mwalano'moneyokwe kulako muuduko tov nomaranonogano.

⁴⁵ Gooti toolluro yogalo puruv aro sakwollungikokwono. “A'mwo muudu'nodo tool Adamolekono. Toro tool a'mwo aiyokwe sumo'nokaikono.” Toro sakwollungiko kuvi kuruv aiyowo'mo Adamolbusuko gabovo pwolno'gwowi a'mwo abolo tonollu aiyo nekubwemovlaiyo'moneyokwe Kuullo sumo'nokaikono.

⁴⁶ Toro te muunyu kai'muuda'ai Gooti toolluro ago toru mwallo'moneyokwe kulako tov sumdomgu ku'mda'ai mimo'nyajukokwono. Toro kuvi kuruv kwako akavi mwallo'moneyokwe kulako tov sumdomgu ku'mda'ai sumo'nokakwono. Lukomgu toga'no'gwowi muunyu kai'muuda'ai Gooti toolluro ago toru mwallo'moneyokwe kulako tov nyumo'nonokwono.

⁴⁷ A'mwo muudu'nodo sumo'noka su tool kwako akavuro sullukwako tovida'ai sumo'nokaikono. Toro kuvi kuruv a'mwo lukomguda'ai gabovo toolno'gwowi Gooti toolluro ago muunyu kai'muuda'ai abokaikono.

⁴⁸ Toro te yiuwi'nokai kwako akavida'ai a'mwo abolo ton a'mwo kwako akavida'ai sumo'noka toolbusuko kubalno aval'no imo'nodupudogano. Aki yiuwi'nokai a'mwo abolo Gooti toolluro ago toru sulomwalpi su ton a'mwo Gooti toolluro ago tomuu mwalodowodo toolbusuko kubalno aval'no nyumo'nupinogano.

⁴⁹ Toro te ne kunol kuruv kwako akavida'ai a'mwo su toolluro kula'nokakwe imo'nodowado to'busuko kubalno lukomgu a'mwo Gooti toolluro ago muunyu kai'muuda'ai mwalodowodo toolluro kula'nokakwe aval'no nyumo'nanonogano.

⁵⁰ Miyobuuravoo, nuu aro ikudumo'mokwono. A'mwo kwako akavida'ai kulakokwe pwolnodo kwol kuruv aguto kig Gooti toolluro mido mollomwalo yodowo'jure tomuu ku'nono maulomwalonekono. Aki a'mwo pwol gami kulako bwiyo buuropiyodowodo tokwe aiyo yiunokuudo mujomwekovlaiyo'moneyokwe tov ku'nono mamjomwekovlawonekono.

⁵¹ Kevu neya duu'nyulo. Yiulo yogalo puruv kemi kuu'maiyo toru'no dodoluwosumo'mokwono. Nevu yiuwi'nokai Jisasolluro a'mwo abolo tonol mabolanonogano. Toro kuvi kuruv Jisasolluro a'mwo abolo yiuwi'nokai tonol kulako muuduko marowa'ji judo pumgu'aro imo'nanonogano.

⁵² Aiyowo'mo biugel tov deko ki'nodowo'jure kuga'gwo kuuno Gooti tool a'mwo me'no bolodupudo tonyu aiyo yiunokuudo mujomwekovlaiyo'moneyokwe aki aiko te yere nomodukawonekono. Su toro amodukawo'ji tonyuro kulako muuduko ton bwiyo mabuuropimovlapinogano. Aki su toro toga nevu punol kwako akavi aiyo kuuno amwala'ji tonol kuga'gwo kuuno judo pumgu'aro imo'nowa'ji kulako muuduko ton nomaranonogano.

⁵³ Neya duu'nyulo. A'mwo pwol youro uumdo toorai modowiyodukwopiyowo'ji youro aiyo touso mollosodowodo to'busuko kubalno nevu nemi kulako bwiyo buuropiyodupudo su toorai modowiyodukwopiyowa'ji kulako bwiyo mabuuropiyo'moneyokwe muuduko tousono'gwowi nomaranonogano. Kulako muuduko marano su touso aiyo yiunokuudo mujomwekovlaiyo'moneyokwe maranousogano.

⁵⁴ Toro te nemoro kulako bwiyo buuropiyodupudo akan pumgu'aro imo'nopi bwiyo mabuuropipinogano. Aki aiyo yiunokuudo mujomwekovlaiyo'moneyokwe imo'nupinogano. Nevu kulako muuduko su ton me'no amaro'ji toga Gooti toolluro yogalo puvi suwiyo imwojonokwono. Yogalo su tov arokwono. “Gooti tool gami ikomago toorai me'no uuwolo'mdowodo su tool bolnodo kuvi kuruv yiunokuudo aromiyebuuropiyokaikono.

⁵⁵ Toro aromiyebuuropiyo'ji toga bolnodo tovuro jurogudo tov yiunokuudo yovlavowo'ji a'mwo abolo tonollu aki aiko te manekuuwolowonokwono. Aki bolnodo su tov nemi aki aiko te kaiyako miyanekullugolonokwono.” Yogalo su tov torokwono.

⁵⁶ Bolnodo tovuro nemi kaiyako yanekullugollo'moneyokwe jurogudo tov ma'no ma'no pasudo tovi wo'dowodokwono. Aki ma'no ma'no pasudo su tov Moosesolluro loowo tovi'aro jurogudo ma'dowodokwono.

⁵⁷ Toro kuvi kuruv nevu Gooti toollu, “Nenoloo,” aro tovino neya wuudumwalanonogano. Nemi Aguto Jisas Kraisollu'aro Gooti tool jurogudo nekubweyoduke tokwe uuwolo'mdowadonogano.

⁵⁸ Toro tovino tov miyobuuravoo, Gooti toollu guureji neya dogudupolarogaulo. Aki toro togaikullu buro'nyo buro'nyorodeyo pworo nyoguluptovekwapimwalpiyo. Toro kubuurekul kuruv kevu aro kuudo nyau'mwakovo. Aguto toolluro womdo tovi wiyodupudo tov yasuwa'no mavlawonokwono. Toro tovino tov yiuwi'nokai toga kevu Aguto toolluro womdo tovi guureji neya domomjumovlavogaulo.