1 Koorin 13 - Gooti Toolluro YogalokwonoA'mwo abolo tonyuno kalo buuropino winyo'moneyokwe tovinokwono 1 Kalo buuropino winyo'moneyokwe pasudo tov aguto kuunodokwono. Toro te nuvu a'mwo abolo pubuuraino kalo buuropino manyuno'ji tov ilaiyo mimonyugono. Toro toonyu a'mwo abolo gabovo tonyuro yogaljo togai'aro ensel tooravuro yogaljo togai'aro tonyuda'ai amoruudumi kuruv yiuno kwako akavida'ai beloowo'mdeyo oo gullugu gulluguto ki'nodowodo to'busuko deko yasuwa'no to'no dumonyugono. 2 Aki nuvu Gooti toolluro proofet yogalo tokwe kuurokado amoruudumiyo'mdeyo oo yiuwi'nokai yiulo yogalo tonyu kuu'maiyo toru'no adodowiyoku'bworosumiyo'mdeyo oo yiuwi'nokai noonyumwonyu kuudo aguto togai amoruudumi kwonyu kuruv a'mwo abolo pubuuraino kalo buuropino manyuno'ji to'gwowi a'mwo yasuwa'nodo pwolbusuko imo'numonyugono. Aki nuvu Gooti toolluno kuudo guureji kuubwemi tovida'ai muumuudo pworai pumgu amodogulptowapimi kwonyu kuruv nuvu a'mwo abolo pubuuraino kalo buuropino manyuno'ji to'gwowi moro womdo su tov yasuwa'no plawonokwono. 3 Aki puruv moro yiuwi'nokai kuto ivito nuugwiyo ton a'mwo abolo apoo'nyaiyo tobuurai kwimi kwonyu kuruv nuvu kalo buuropino manyuno'ji to'gwowi Gooti toolluro mubiyo sugudo puru'monodo kuruv mama'monyugono. Aki moro kulako tovi romiyanubweyo'moneyokwe nuvnokwe toonyu a'mwo pworavuro ato tovi amorubwenumi kuruv kalo buuropino manyuno'ji to'gwowi moro womdo su tov yasuwa'no plawonokwono. 4 A'mwo pwol kalo buuropino kwino'ji su tool a'mwo pwolluro jul'nyo uubweyodowo'jure tovi paiko tovibusuko mokavlawonekono. Aki toro toollu ilaiyo to'no igolmwalonekono. Aki toro tool a'mwo abolo tonyuno kwekuullu kuudo miyauronekono. Aki gavnokweyolluno ilomodomoropunyu miyawonekono. 5 Aki a'mwo pwol a'mwo abolo punyuno kalo buuropino kwino'ji su tool a'mwo abolo tobuurai wogulo iwo'gallo'moneyokwe pasudo ton miyonekono. Aki toro tool gavnokweyolluro kuudo tovi uumjungovlaiyo'mo mwinmwalonekono. Aki a'mwo su tool sumwoluko su'mno yere mimo'nowo'ji a'mwo abolo punyuro kaiya'no igolodopure tonyuno aki aiko te kuudo miyau'mwalonekono. 6 Aki a'mwo pwol a'mwo abolo punyuno kalo buuropino kwino'ji su tool kemoro ma'no ma'no kiroungovla'mdopure tovino ilaiyo mwinonekono. Toro kwol kuruv nebaikuuguudo jo'mo tovino'gwowi ilaiyo imwalonekono. 7 Aki a'mwo pwol kalo buuropino kwino'ji su tool a'mwo pwolluro buro'nyo buro'nyo jul'nyodeyo uubweyodowo'jure su tonyu yiunokuudo mollukwo'mwalonekono. Aki toro tool yiuwi'nokai toga Gooti toolluno kuudo uubweyowo'ji yiuno Gooti toolluno sogwollo to'no kingovla'mwalonekono. Aki toro toollu buro'nyo buro'nyodeyo kwimo'no'ji kuga kuruv kalo buuropino winodowodo su tov yiunokuudo wingovla'mwalonokwono. 8 Toro te kalo buuropino winyo'moneyokwe pasudo su tov yiunokuudo mimwogapiyonokwono. Proofet yogalo moruujo'moneyokwe womdo tov puga yiunokuudo nyumwogapiyonokwono. Aki a'mwo abolo punyuro yogaljo togai moruujo'moneyokwe womdo kuruv nyumwogapiyonokwono. Aki yiuwi'nokai noonyumwonyu kuudo aguto togai moruujo'moneyokwe womdo su to kuruv puga yiunokuudo nyumwogapiyonokwono. Toro kuvi kuruv kalo buuropino winyo'moneyokwe su to'gwowi yiunokuudo mimwogapiyonokwono. 9 Toro te kevu neya duu'nyulo. Nemoro agasuro kuudo youroma'dowado tov yiuno pwekwonodokwono. Aki nemoro proofet yogalo kuruv yiuno pwekwonodo tokwe moruudodowadonogano. 10 Aga pwekwono pwekwonodo ton toro wo'dupudogano. Toro kuvi kuruv lukomgu kuunodo ton me'no sumo'nupi toga'no'gwowi agasuro pwekwono pwekwonodo su ton nyounopipinogano. 11 Su tov aro to'busukokwono. Nevu aiyoga kula'nyo amwallajuuwo toga nemoro kuuguudo ton kwoloraiyo tobuurobusuko ajajuwonogano. Aki nemoro kuudo kun kuruv kwoloraiyo tobuurobusuko yau'dowa ajainyubwollajuwonogano. Su toro sajuuwo kuvi kuruv aguto me'no agullowo toga'no'gwowi nemoro kwoloraiyo tonbusuko pasudo amjumelabiyajuuwo su tonyu me'no sumwogapiyowonogano. 12 Aki puruv aga nevu Gooti toollu yainyunyo po'dogalo miyalo'nodowodo tovibusuko ilaiyo neya mamuugona'dowadonogano. Toro kuvi kuruv lukomgu toga'no'gwowi Gooti toolluro sumdomago tovi ilaiyo to'no muugonarowa'ji imgu amgu nyainyunumwalanonogano. Su toro to'busuko kubalno aga nuvu kuudo yiuno pwekwonodo tekwojaino youroma'dumdonyugono. Toro kuvi kuruv lukomgu Gooti toollu me'no kuuru'ma'mi toga'no'gwowi Gooti tool mi yiunokuudo nuwonopiyodowodo to'busuko kubalno nuu kwonyu kuruv yiuwi'nokai kuudo tonyuno nyouroma'monyugono. 13 Toro te aga nevu pasudo puruvapuruv tonyu neya momjumovla'mwalanonogano. Pasudo puruvapuruv su ton arogano. Gooti toolluno kuudo uubweyo'moneyokwe tokwe'aro lukomgu Gooti toolluro ago toru nekumokailawono tovino sogwollo kingovlaiyo'moneyokwe tokwe'aro aki nevu a'mwo abolo punyuno kalo buuropino winyo'moneyokwe tokwe'aro pasudo puruvapuruv su ton yiuwi'nokai toga neya momjumovla'mwalanonogano. Toro kuvi kuruv pasudo puruvapuruv su tonyuro puruv yiuwi'nokai puruvallu uuwolo'mdowodokwono. Su tov a'mwo abolo tonyuno kalo buuropino winyo'moneyokwe pasudo tokwono. |
© 2022: Ethnos360 Sanford, Florida
New Tribes Mission