1 Koorin 12 - Gooti Toolluro Yogalokwono

Gooti toolluro Kuullo tool Jisasolluro a'mwo abolo tonyu womdo go'no go'nodo ton yasuwa'no wiyodowodo tovinokwono

¹ Mi avalobuuravoo, Gooti toolluro yasuwa'wino judo'no judo'nodo tollovaino ikudumo'mokwono. Toro tollovai Gooti toolluro Kuullo tool marowo'ji ikullabodowodollovogano. Toro tollovaino kevu kuudo maiyokwe nyumo'numwalpiyo.

² Aro tovino kuudo me'no youroma'dupudogaikikono. Kevu Aguto toolluno kuudo yere muubweyajupo toga a'mwo pworo kuunano gooti toorai ilomoropiyapino'moneyokwe kemi ame'nekumokavlaiyajuporogano. Kuunano gooti su tooro yogalo majokwe kworai kuruv kevu kuumjunyajupogaikikono.

³ Toro te aga nuvu aro aikudadokwono. Gooti toolluro Kuullo tool a'mwo pwollu mollubworomokavla'mdowo'jure tovi kuumjuno'ji tov a'mwo su tool Jisasolluno bwolomorumwogapiyo'moneyokwe kaiya'no yogalo puru'monodo kuruv madonekono. Aki a'mwo yasuwa'no pwolnodo kwol kuruv nemi Aguto Jisasolluno ku'nono milomodomoropiyawonekono. Toro kuvi kuruv yiuno Gooti toolluro Kuullo tool jurogudo uubweyodowo'jure tokwe to'gwowi a'mwo su tool aro nokwo donekono. “Oo nemi Aguto tool Jisasol kwekono.” Donekono.

⁴ Gooti toolluro Kuullo tool Jisasolluro a'mwo abolo tonyu yasuwa'wino judo'no judo'nodo tollovo me'no wiyodowodekono. Yasuwa'wino wiyodowodo su tollovo judo'no judo'nodollovogano. Toro kuvi kuruv Kuullo avalo toolluro wiyodowodogano.

⁵ Aki su toro tollovogai nevu go'no go'nodo tomgu'aro womdo imovla'mdowado kuvi kuruv yiuno Aguto avalo toolluno to'no womdo wiyodowadonogano.

⁶ Aki nevu yiuwi'nokai Gooti toolluro womdo go'no go'nodo su tonyu momjumovlaiyo'moneyokwe jurogudo go'no go'nodo ton ma'dowado kuvi kuruv Gooti yiuno avalo toolluda'ai to'no ma'dowadonogano.

⁷ Nevu yiuwi'nokai Jisasolluro a'mwo abolo tonol imgu amgu wiyo'mwoju'numwalano'moneyokwe Gooti toolluro Kuullo tool womdo judo'no judo'nodo ton pwolno puru'monodo tonollu nekubweyodowodekono.

⁸ Toro te kevu neya duu'nyulo. Gooti toolluro Kuullo tool a'mwo pwollu pi'mwo kuudo tokwe dumul'mwojo'moneyokwe womdo tov wiyodowodekono. Aki puruv, kuudo aguto tokwe moruujo'moneyokwe womdo tov Gooti toolluro Kuullo tool a'mwo pwollu wiyodowodekono.

⁹ Aki puruv, a'mwo pwollu Gooti toolluno kuudo me'no uubweyodowodo tovi gudupolallo'moneyokwe womdo tov wiyodowodekono. Aki puruv, Gooti toolluro Kuullo tool yiuno gamoro jurogudo tokwe to'no nobollo tovi ikullo'moneyokwe womdo tov a'mwo pwollu wiyodowodekono.

¹⁰ Aki Kuullo su tool a'mwo pwollu duuwallo jurogudo ton wuuduuwallumwalono'moneyokwe womdo tov wiyodowodekono. Aki puruv, a'mwo pwollu Gooti toolluro proofet yogalo moruujo'moneyokwe womdo tov wiyodowodekono. Aki puruv, a'mwo pwollu Gooti toolluro Kuullo toolluda'aiyo'mdukoneyokwe tovino pi'mwono jagillo'moneyokwe womdo tov wiyodowodekono. Aki puruv, a'mwo pwollu yogaljo judo'no judo'nodo tonyuda'ai kuuguudo moruujo'moneyokwe womdo tov wiyodowodekono. Aki puruv, yogaljo judo'nodo su tonyuda'ai moruudodopure tovino kavlo ton mollovodo'mwojajo'moneyokwe womdo tov a'mwo pwollu wiyodowodekono.

¹¹ Yiuwi'nokai womdo go'no go'nodo su togai Jisasolluro a'mwo abolo pwolno puru'monodo tonyu yado uumwodeyodowodo su tool Gooti toolluro Kuullo avalo pwolnodo tookono. Kuullo su tool gavnokweyolluro kuudo tovi uumjunowo'ji womdo go'no go'nodo ton yado uumwodeyodowodekono.

Nevu yiuwi'nokai Jisasolluro a'mwo abolo tonol kulako tovida'ai judo'no judo'nodo tonbusuko imo'nodowado tovinokwono

¹² Neya duu'nyulo. A'mwo toolluro kulako tov yiuno puru'monodokwekono. Toro kuvi kuruv kulako puru'monodo tovida'ai suvlatodeyo judo'no judo'nodo bwotonyago ton kurukweyokwono. Su toro to'busuko kubalno Krais toolluro kulako tov yiuno puru'monodo kuvi kuruv gami suvlatodeyo tonbusuko judo'no judo'nodo tono'gwowi bwotonyago kurukweyokwono.

¹³ Toro te Gooti toolluro Kuullo tool kulako puru'monodo su tovi moguro'mwojanekubweyo'moneyokwe nemi wonyo to'busuko mogalanekuvollodowodekono. Su toro me'no moguro'mwojanekubweyodowodo tonol nevu kulako su tovuro suvlatodeyo judo'no judo'nodo tonbusuko imo'nodowadonogano. Nevu Juuwonoldeyo oo Juu tooravuro miyanekuuwosunodupudonoldeyo tonogai'aro aki ki'nato womdo yodowadonoldeyo oo ki'nato womdo tovida'ai me'no birolo'nugolokwodowadonoldeyo nevu yiuwi'nokai tonollu Gooti toolluro Kuullo avalo pwolnodo su tool me'no kuulonekumwalodowodonogano.

¹⁴ Kevu neya duu'nyulo. A'mwo pwolluro kulako tovi yiuno suvlo'mdeyo oo ato'mdeyo judo to'no mwo'dowodokwono. Toro kuvi kuruv a'mwo su toolluro kulako tovuro suvlatodeyo judo'no judo'nodo bwotonyago ton wo'dupudogano.

¹⁵ Aki suvlo tool aro ado'ji, “Oo nuvu ato mimo'nodumdo tovino tov kulako tovida'aiyonyumaiyo.” Suvlo tool su toro ado'ji kuvi kuruv suvlo su tool kulako tovi kuuno woronekono.

¹⁶ Aki kaduko tool aro ado'ji tov, “Oo nuvu sumdo mimo'nodumdo tovino tov kulako tovida'aiyonyumaiyo.” Kaduko tool su toro ado'ji kuvi kuruv kulako tovino'gwowi kuuno woronekono.

¹⁷ Aki a'mwo pwolluro kulako tovi yiuno sumdo judo toolno so'mowopiyo'ji tov a'mwo su tool noonyumwonyu yogalo tonyu ku'nono muu'numwalonekono. Aki a'mwo pwolluro kulako tovi yiuno kaduko judo toolno so'mowopiyo'ji tov a'mwo su tool buro'nyo buro'nyo sudo tonyu ku'nono muunmwalonekono.

¹⁸ Nemoro kulako tovi su toro sumo'nowo'jujuko'mno'juki nevu ilaiyo mimo'nowa'jujukonogano. Toro kuvi kuruv Gooti tool gavnokweyolluro kuudo tovi uumjuno'no nemoro kulako tovida'ai yiuwi'nokai suvlatodeyo judo'no judo'nodo ton sokwollomunyutovanekubweyokaikono.

¹⁹ Nemoro kulako tovi yiuno suvlo'mdeyo oo ato'mdeyo to'no so'mowopiyowo'jujuko'mno'juki kulako kuunodo mimo'nowo'jujukokwono.

²⁰ Toro kuvi kuruv nemoro kulako puru'monodo su tovi suvlatodeyo judo'no judo'nodo bwotonyago ton kurukweyokwono.

²¹ Toro tovino tov sumdo tool ato toollu yogalo aro muudonekono. “Nuvu gumino supto mimwakono.” Aki mido tool suvlo toollu yogalo aro muudonekono. “Nuvu gumino supto mimwakono.”

²² Toro kuvi kuruv nemoro kulako tovida'ai pubuuro jurogudo neya mimo'nodupudo su tobuuro nonaguto'mno'juki nemoro kulako tov ilaiyo mimo'nowo'jujukokwono. Aki nemoro kulako tovida'ai pubuuro wollainyo imo'nodopure kubuuraino kuruv kulako to'gwowi supto bwotonyo yodowodokwono.

²³ Toro te nemoro kulako tovida'ai pubuuraino a'mwo abolo pun aro kuudo yau'dupudogano. Oo womdo aguto maiyorogano. Su toro kuudo yau'dupudo kuvi kuruv su tobuurai nevu po'dogalo mollomwallo'moneyokwe tov youro togai wiropiyodowadonogano. Su tonyuno wogulo nyubwosuna'jokwe tovino yiulo tomuu po'dogalo bu'duvolosodowadonogano.

²⁴ Toro kuvi kuruv nemoro kulako tovida'ai punyuno wogulo mibwosunodowadonogano. Su toro tonyuno'gwowi nevu youro tousogai mabu'duvolosodowadonogano. Gooti tool nemoro kulako tovida'ai tonyu tono tono yokwollanekubweyodowodogano. Su toro yokwollanekubweyodowodo pubuuro aguto manekullumo'nodupudogano. Toro kunyu kuruv nevu neya mollomwalano'moneyokwe Gooti tool yokwollanekubweyodowodogano.

²⁵ Gooti toolluro su toro yokwollosodowodo tov aro tovinokwono. Nemoro kulako tovuro yiuwi'nokai suvlatodeyo judo'no judo'nodo su ton go'no go'no nomdukuu'nupiyo. Toro kuvi kuruv yiuwi'nokai kulako tovida'ai ton sumwoluko aval'no wosunopi imgu amgu neya domollomwalnogaulo.

²⁶ Toro te nemoro kulako tovida'ai puruv danyu'nyuwuulo amaro'ji tov yiuwi'nokai kulako tovida'ai judo'no judo'nodo kun kuruv danyu'nyuwuulo aval'no ibwosungoulapinogano. Aki nemoro kulako tovida'ai puvi ilaiyo toru sulomorumwallupi tov yiuwi'nokai kulako tovida'ai judo'no judo'nodo kun kuruv ilaiyo aval'no ipinogano.

²⁷ Yovekurajo su tovino kavlo tov arokwono. Kevu yiuwi'nokai togaikul Krais toolluro kulako to'busuko imo'nodupudogaikikono. Aki yiuwi'nokai pwolno puru'monodo togaikul kulako su tovida'ai suvlatodeyo judo'no judo'nodo tonbusuko imo'nodupudogaikikono.

²⁸ Toro te Gooti tool gamoro mollu'bwoto tonyu aro ajesokaikono. Muudu'nodo tooro kuurotokwe toorogano. Su toorai iwapi tooro proofet toorogano. Aki lukomguda'ai tooro ibwasokwe toorogano. Aki toruda'ai Gooti tool gamoro mollu'bwoto tonyu yasuwa'wino pun kwiyokaikono. Pworo duuwallo jurogudokwe toorogai'aro nobollo tonyu ikullokwe toorogai'aro a'mwo abolo pubuurai wiyo'mwojokwe toorogai'aro mido mollomwalokwe toorogai'aro a'mwo abolo gabovo tonyuro yogaljo tonyu moruudodupudo toorogai'aro yiuwi'nokai su toorai Gooti tool yasuwa'wino kwiyokaikono.

²⁹ Yiuwi'nokai Jisasolluro mollu'bwoto tooro kuurotokwe mimo'nodupudorogano. Aki yiuwi'nokai tooro proofet mimo'nodupudorogano. Aki yiuwi'nokai tooro ibwasokwe mimo'nodupudorogano. Aki yiuwi'nokai tooro duuwallo jurogudokwe mimo'nodupudorogano.

³⁰ Aki Gooti toolluro yasuwa'wino tovida'ai yiuwi'nokai tooro nobollo tovi ikullo'moneyokwe mimo'nodupudorogano. Aki yiuwi'nokai tooro a'mwo abolo gabovo tonyuro yogaljo tonyu jo'moneyokwe mimo'nodupudorogano. Aki yogaljo su tovi kuu'maiyo toru'no mollovodo'mwojajo'moneyokwe yiuwi'nokai tooro mimo'nodupudorogano.

³¹ Kevu yasuwa'wino su tollovai mallo'mo ikullunodowodo kuvi kuruv Gooti toolluro Kuullo tool yasuwa'wino judo'no judo'nodo nekullabodowodo tonyuda'ai pullovono'gwowi yiuwi'nokai punyu uuwolo'mdupudogano. Su toro tollovaino kevu aro kuudo neya jaurogaulo. Oo nevu yasuwa'wino su tollovai neya amarano. Kuudo jaurogaulo. Aki puuto nuumjungovla'mwalano puruv Gooti toolluro yiuwi'nokai judo'no judo'no nekullabodowodo su tollovai uuwolo'mdowodokwono. Puuto sugudo kuunodo su tovino aga ikuduuwallumo'mokwono.