1 Koorin 10 - Gooti Toolluro Yogalokwono

Isuraiyolda'ai ton kuunano gooti toorai sulomoropiyajupo tonbusuko kubalno nyumwala'jokwe tovinokwono

¹ Mi avalobuuravoo, nuvu kemi duudapi yogalo aro ikujo'mo anyunadopiyo. Nemi nellukweyago tonyu kwimo'noka tovino kevu kuudo nyallulo'gwonmwalpiyo. Aiyoga Moosesolluro togasuro yiuwi'nokai nemi nellukweyago ton Ijupda'ai bolokwino sumaveyokwe sulu'wo puruv su tonyu abu'duvolomallajukokwono. Gooti tool sulu'wo bu'duvoloma'duke su tovi'aro a'mwo abolo tonyu puuto tovi amollubworomokavlaiyajukekono. Toro mollubworomokovla'mno sumaiyokwe Soolwara Weyako tovi amoga'mokaulokaikono. Toro moga'mokaulno sumaiyokwe soolwara tovi igo'mgu sulomoga'movokaikono.

² Toro te a'mwo abolo su ton sulu'wo abu'duvolomallajuko tokwe'aro soolwara aga'mokaulapo tokwe'aro su tovallu wonyo to'busuko kuuvollunopogano. Su tov aro tovino nekuduuwallo'mokwono. A'mwo abolo su ton Moosesollu me'no uuguro'mwonyo'mno gamoro uumjunyokwe kwimo'nopogano. Su toro tovino nekuduuwallo'mokwono.

³ Aki Gooti tool muunyu kai'muuda'ai wosamujuko tov gavnokweyolluro jurogudo tokwe wiyoduke tovida'ai yiuwi'nokai su ton aval'no anyajupogano.

⁴ Aki muunyu kai'muuda'ai wonyo kuruv Gooti tool gavnokweyolluro jurogudo tokwe wiyoduke tovida'ai yiuwi'nokai su ton aval'no anyajupogano. Wonyo su tov muunyu kai'muuda'ai sulo bwotonyo pwol a'mwo abolo su togai somollajuko toolluda'ai ilowilovaboduke anyajupogano. Sulo su tool Krais tookono.

⁵ Toro kuvi kuruv Gooti tool a'mwo abolo bwotonyago tonyuro yodopure tovino ilaiyo mwinyajukekono. Toro tovino tov a'mwo abolo su ton kwako a'mwomaiyo kuu'maiyo su toru bolo'mno kemoro kulako bwiyo ton yiunokuudo sounopiyopogano.

⁶ Su toro kwimo'noka tov nevu wako neya kuu'numwalano tovino nekuduuwallo'mokwono. Aiyoga nemi nellukweyago ton ma'no ma'nodo toorai kiroungovlaiyo'moneyokwe ainamjajupo su tonbusuko kubalno nevu aval'no nomjumovla'mwala'jo.

⁷ Aki kuunano gooti pworai sulomoropiyajupo tonbusuko kubalno kevu kuunano gooti pworai nyulomoropimwolapiyo. Nemi nellukweyago ton kuunano gooti toorai ilomoropiyodopure tonyuno Gooti toolluro yogalo puruv aro sakwollungikokwono. “A'mwo abolo ton buulmokau taiyo toolbusuko kula'nokai toolluno lubullu doto yanyo'moneyokwe ton kemi wosamujuko togai wonyo togai sonomwalopogano. Toro yonomwalno sumaveyokwe kwonyalo yo'mo ton lupuro lupuropto sopogano.” Sakwollungikokwono.

⁸ Toro te a'mwo abolo su tonyuro pun kwonyalo sopo tonbusuko kubalno nevu kwonyalo aval'no nyumwala'jo. Aiyogasuro kwonyalo sopo su ton iruko avalo pullugwoji 23,000 a'mwo abolo ton bolodopure toga Gooti tool nokwo wonyapino to'no sokaikono.

⁹ Aki nemi nellukweyago tonyuro pun Aguto toollu yamju kwiyoganyajupogano. Su toro wiyoganodopure toga gabakuto bulaptokwe tooro tuko do'mdopure tovida'ai bwotonyago ton abollajupogano. Toro te aga kuga kuruv nevu su tonbusuko Krais toollu yamju nuuwiyoganmwala'jo.

¹⁰ Aki nemi nellukweyago pun Gooti toollu burolyogalo domuugona'dopure tonyu Gooti su tool noromiyebuuropiyo'moneyokwe ensel pwollu amoropiyabokaikono. Toro te ensel su tool yiuwi'nokai burolyogalo kuujajupo tonyu aromiyebuuropiyokaikono. Aki aga kuga kuruv aiyogasuro burolyogalo kuujajupo tonbusuko kubalno nevu Gooti toollu aval'no nuudumwala'jo.

¹¹ Yiuwi'nokai su toro kwimo'nugelabiyajupo su ton nevu wako neya kuu'numwalano tovino nekuduuwallo'moneyokweyogano. Aki su toro tonyuno puukwollo sokwollosungiko su ton nevu aiyowo'mo do'gwapi tomuu amwakuuwo tonollu yodonekubwosumovlaiyo'moneyokwe sokwollosungikogano.

¹² Toro te pweku pu'guu aro kuudo sau'bi tov, Oo nuvu jurogudo me'no da'mdumdo tovino tov kisuvolo ku'nono mimonyugono. Su toro kuudo sau'bi tov nobwolorabiyokwe wako neya dou'nogawono.

¹³ Guu ma'no ma'no yo'moneyokwe kuudo pworo abagi'mowo'ji su ton yiuwi'nokai a'mwo abolo kun kuruv aval'no bwi'mo'mdupudorogano. Kuudo su ton gumi abagi'mowo'ji kuvi kuruv Gooti toolno'gwowi aro dodowodekono. “Nuuwiyo'mwojumonyugono.” Toro dodowodo tovi kuvinono kinamjodowodekono. Toro tool gavnokweyolluro jurogudo tokwe nokwo ikullo'mwojumwalonekono. Aki jurogudo ikubweyodowo'jure su tokwe kevu guureji nokwo da'mwalpinogaikikono.

¹⁴ Oo mi ibwoto'nyo kuunodobuuravoo, moro kuuguudo me'no aikudumo su tovino tov kevu neya duu'nyulo. Kevu kuunano gooti toorai nyulomoropiyapiyokwe tovino tov manyu tomuu'aro neya domwalogaulo.

¹⁵ Kevu kuudo ilaiyo yau'dupudo togaikullu nuvu kuuguudo pwekwo ikudumo'monyugono. Moro kuuguudo aikudumi su tov kuunano'mdukono oo nebalo'mdukoneyokwe tovino kevnokwe togaikul nokwo jogilomapinokwono.

¹⁶ Nevu Aguto toolluro wosamujuko tovi ana'ji toga wain wonyo surosungiko kapwo tov marowa'ji Gooti toollu, “Nenyoo,” subusu'nyogalo wuudodowadonogano. Su tov aro tovino nekuduuwallodowodokwono. Krais toolluro mujako abwoloka tovino tov nevu kweke me'no kuuguro'mwonyowonogano. Aki bret buudo'mdowado tov aro tovino nekuduuwallodowodokwono. Krais toolluro kulako kaiyako su'noka su tovino tov nevu kweke me'no kuuguro'mwonyowonogano. Su toro tovino nekuduuwallodowodokwono.

¹⁷ Nevu bret tovi buudovonomwalodowado toga yiuwi'nokai tonol bret yiuno pwolnodo toolluda'ai nodowadonogano. Bret pwolnodo su tool aro tovino nekuduuwallodowodokwono. Nevu Jisasolluro a'mwo abolo bwotonyago tonol imo'nodowado kuvi kuruv kulako to'gwowi yiuno puru'monodo to'busuko imo'nodowadonogano.

¹⁸ Kevu Isuraiyolda'ai a'mwo abolo tonyuno kuudo pun jaullulo. A'mwo abolo su ton Gooti toollu ilomoropiyo'moneyokwe dukwagupto tovida'ai sa'aiyo aromiroudapiyajupo pun amanyajupogano. Su toro manodopure toga Gooti tooke guro'mwonyodupu kwolluno sulomoropiyajupogano.

¹⁹ Moro su toro aikudumo tovino kevu kaiya'no kuudo puruv aro nyau'mwalpiyo. Oo wosamujuko pun kuunano gooti pworai aromiroudapingiko ton kavlo aguto kurukwe wimo'nodupudodeyo. Aki kuunano gooti tooro nebal'nodorodeyo. Kuudo nyau'mwalpiyo.

²⁰ Nuvu su toro tovino maikudadokwono. Toro kuvi kuruv aro aikudumwakono. A'mwo abolo gabovo su tonyuro aromiroudapiyajupo su tov Gooti toollu kwiroudapiyajuponmaiyo. Toro te nuvu kemino tov aro anyunadopiyo. Kuullo ma'no ma'nodo tooraino sa'aiyo aromiroudapingiko tovi anpi tov kevu kuullo ma'no ma'nodo su toorai uuguro'mwonyopi kworaino nyulomoropimwolapiyo.

²¹ Kevu Aguto toolluno kuudo yaullo'moneyokwe wain wonyo kapwo tovi surosungiko tokwe'aro aki kuullo ma'no ma'nodo tooraino kuudo yaullo'moneyokwe wain wonyo kapwo tovi surosungiko tokwe'aro su tovallu avalo toga nonumwalpiyo. Aki kevu Aguto toolluno kuudo yaullo'moneyokwe wosamujuko tokwe'aro kuullo ma'no ma'nodo toorai ilomoropiyo'moneyokwe wosamujuko tokwe'aro tovallu avalo toga nonumwalpiyo.

²² Nevu Aguto tooke'aro kuullo ma'no ma'nodo toorogai'aro toorai avalo toga su toro sulomoropiyowa'ji tov Aguto toollu surodo i'gwolanonogano. Surodo wuunodowo'jure su toolluro jurogudo tovi nevu ku'nono muuwolowanonogano. Toro tovino tov kevu Aguto toollu surodo nyu'gwolmwalpiyokwe tov kuunano gooti tooraino nyulomoropimwolapiyo.

Nemoro buro'nyo buro'nyodeyo sa'ji tovida'ai Gooti tool yovo aguto neya ma'mwalono tovinokwono

²³ Kevu Jisasolluro a'mwo abolo pugaikul aro dodupudogaikikono. “Oo nevu buro'nyo buro'nyodeyo yo'mo anekulluno'ji tov nokwo yanonogano.” Su tov nebal'no dodupudogaikikono. Toro kuvi kuruv nemoro sa'ji pun ku'nono manekullo'mwojupinogano. Aki nemoro sa'ji pun nevu Jisasolluro a'mwo abolo tonollu jurogudo ku'nono miyogullumwojonekwapipinogano.

²⁴ Toro te kevu kevnokwe togaikullu ilaiyo igollunyo'mo to'no kuudo nyau'mwalpiyo. Toro kuvi kuruv kevu a'mwo abolo pubuurai ilaiyo igollo'mo tovino kuudo neya jaurogaulo.

²⁵ Toro te kevu aro nokwo imwalpinogaikikono. Maket toruda'ai yiuwi'nokai sa'aiyo wosodupudo ton kevu nokwo biyomaropi nonumwalpinogaikikono. Su toro tovino kevu aro kuudo kwolallo nyourukwapimwalpiyo. Oo sa'aiyo akav kuunano gooti pworai me'no kwiroudapingiko'mdukono? Nuvu su toro tovi anmi tov Gooti toollu surodo i'gwolmonyugono. Kevu su toro tovino kuudo kwolallo nyourukwapimwalpiyo. Toro kugaikul kuruv sa'aiyo su tov nokwo numwalpinogaikikono.

²⁶ Su toro tovino Gooti toolluro yogalo puruv aro sakwollungikokwono. “Kwako akakwe'aro yiuwi'nokai noonyumwonyu kwako akavi wo'dupudo kugai'aro ton Aguto toollurogano.” Sakwollungikokwono.

²⁷ Toro te a'mwo Jisasolluno kuudo muubweyodowodo pwol wosamujuko ton me'no yovrowosowo'ji gavuge nomwallo'moneyokwe kemi adekumaro'ji tov kevu a'mwo su tooke nokwo nomwalpinogaikikono. Su toro nomwalopi toga kevu wosamujuko su tonyuno kuudo kwolallo miyourukwapiyopi aki yamuugojo nuudoganmwalpiyo. Toro kugaikul kuruv buro'nyo buro'nyo wosamujuko aikullabwo'ji su tonyu nokwo nonumwalpinogaikikono.

²⁸ Toro kuvi kuruv a'mwo pwol duudapi yogalo aro aikudo'ji tov, “Oo wosamujuko su tov kuunano gooti pworai me'no kwiroudapingikokwono.” Su toro aikudo'ji to'gwowi kevu wosamujuko su tovi manpinono. Su tov aro tovinokwono. A'mwo aikudo'ji su toollu kevu kaiyako nyugolpiyokwe tov manpinono.

²⁹ Kevnokwe togaikul wosamujuko su tovino kuudo kwolallo miyourukwapipi kuvi kuruv a'mwo aikudo'ji su toolno'gwowi kemino aro kuudo nyaikuuro'jo. Oo a'mwo abolo wosamujuko anadokwopo su ton kaiya'no sadokwovo. Kuudo nyaikuuro'jo. Neya duu'nyulo. Kevu aro kuudo me'no youroma'dupudogaikikono. Oo yiuwi'nokai wosamujuko ton nokwo nanonogano. Su toro kuudo yau'dupudo togaikul wosamujuko ton yasuwa'no nokwo nupino kuvi kuruv a'mwo kuudo kwolallo yourukwapiyodowodo toolluno kuudo yauropi wosamujuko su tonyu nonumwalpiyo.

³⁰ Su tov aro tovinokwono. Nuvu wosamujuko tonyuno Gooti toollu, “Nenyoo,” me'no wuudo'mi anmi tov a'mwo kuudo kwolallo yourukwapiyodowodo tool nuwonowo'ji aro donekono. “Awi, wosamujuko anadopiko su tov ilaiyo'maiyo.” Su toro dowo'ji mino kaiya'no yogalo nobwolomonumwogapiyawo'jo.

³¹ Toro te kevu wosamujuko ton anpiyoga'deyo oo wonyo ton anpiyoga'deyo oo buro'nyo buro'nyo womdodeyo ton supiyoga'deyo yiuwi'nokai su ton Gooti tool yovo aguto mallo'moneyokwe to'no neya jogaulo.

³² Aki Juu a'mwo abolo togai'aro Juu tooravuro miyawosunodupudo togai'aro Gooti toolluro mollu'bwoto togai'aro tonyu kevu kaiya'no puru'monodo kuruv nyugolmwalpiyo.

³³ Toro kuvi kuruv nuvu yiuwi'nokai a'mwo abolo tonyu ilaiyo to'no igollo'moneyokwe mujumovla'mdumdo toonyubusuko kubalno kev kugaikul kuruv aval'no neya jogaulo. Nuvnokwe toonyu ilaiyo igollunyo'moneyokwe kuudo miyau'dumdonyugono. Toro kwonyu kuruv Gooti tool a'mwo abolo bwotonyago tonyu kemi ma'no ma'nodo tovuro kirumwallo tovida'ai neya bomollurolovomokalokwono'moneyokwe su toro mujumovla'mdumdonyugono.