1 Joon 5 - Gooti Toolluro Yogalokwono

Gooti toolluro Kwolaiyo toolluno kuudo uubweyodupudo ton kwako akavida'ai jurogudo toorai uuwolo'mdupudo tovinokwono

¹ A'mwo abolo pun aro kuudo uubweyodupudogano. “Oo Jisasol Gooti toolluro amonekwopiyaboka Krais tool kwekono.” Yiuwi'nokai su toro kuudo uubweyodupudo ton Gooti toolluro kwoloraiyo wimo'nodupudogano. Aki yiuwi'nokai a'mwo abolo su ton kemi Kuunumiyago toolluno kalo buuropino winodupudogano. Toro winodupudo su ton kemi Kuunumiyago toolluro kwoloraiyo kubuuraino kuruv kalo buuropino winodupudogano.

² Kuudo neya jaullulo. Nevu Gooti toolluno kalo buuropino nekullunowo'ji gamoro yogalo adanekulloka tonyu kuvinono kuumjungovlawa'ji tovi'aro kuu'maiyo aro yainyunanonogano. Nevu Gooti toolluro kwoloraiyo tobuuraino kalo buuropino kuvinono mollodowadonogano. Su toro tovino yainyunanonogano.

³ Nevu Gooti toolluno kalo buuropino nekullunodowodo tonol gamoro yogalo adanekulloka kunyu kuruv kuvinono uumjunmwalanonogano. Aki gamoro yogalo adanekulloka su tonyu kuvinono uumjungovlaiyo'moneyokwe tov jul'nyo to'busuko manekullumo'numwalpinogano.

⁴ Su tov aro tovinokwono. Yiuwi'nokai Gooti toolluro kwoloraiyo tonol noonyumwonyu kwako akavida'ai pasudo tooravuro jurogudo tonyu me'no uuwolo'mdowadonogano. Aki yiuno nemoro kuudo uubweyodowado tovi'aro kwako akavida'ai tooravuro jurogudo tonyu uuwolo'mdowadonogano.

⁵ Toro te kwako akavida'ai tooravuro jurogudo tovi uuwoleyo'mo tov aro tomgu'arokwono. A'mwo pwol aro kuudo uubweyonekono. Oo Jisasol Gooti toolluro Kwolaiyekono. Yiuno a'mwo su toro kuudo kuubweyo'ji toolno kuvinono uuwolowonekono.

Gooti tool gamoro Kwolaiyo toolluno yogalo kuu'maiyo adodoluwosoka tovinokwono

⁶ Jisas Kraisol kwako akavi me'no abiyalo'nokaikono. Toro abiyalo'noka su tov yiuno gamoro wonyo kuuvollunoka to'no anekuduuwallokalmaiyo. Toro kwol kuruv pasudo puruval tovake anekuduuwallokaikono. Pasudo puruv Jisas Kraisolluro wonyo kuuvollunoka tokwono. Aki puruv gamoro mujako abwoloka tokwono. Pasudo su tovalluno Gooti toolluro Kuullo tool kuu'maiyo toru'no adodoluwosokaikono. Gooti toolluro Kuullo su tool yiuno nebal'no yogalo to'no jokwekono. Toro toolluro yogalo adodoluwosoka tov Jisasolluro pasudo su tovalluno kuu'maiyo toru'no nekuduuwallodowodokwono.

⁷ Kuudo neya jaullulo. Jisasol Gooti toolluro Kwolaiyekono. Toro toolluno kavlo puruvapuruv ton yogalo to'busuko kuu'maiyo toru dodoluwosodupudogano.

⁸ Kavlo su ton arogano. Gooti toolluro Kuullo tooke'aro wonyo kuuvollunoka tokwe'aro gamoro mujako abwoloka tokwe'aro yiuwi'nokai kavlo puruvapuruv su ton yogalo yiuno puru'monodo to'busuko kuu'maiyo toru dodoluwosodupudogano.

⁹ Nevu a'mwo abolo punyuro yogalo kuu'maiyo dodoluwosodopure toorai kuudo uubweyokwenogano. Toro kuvi kuruv Gooti toolluro yogalo to'gwowi a'mwo abolo su tonyuro dodoluwosodopure toorai uuwolo'mdowodokwono. Toro tovino tov Gooti toolluro yogalo dodoluwosodowodo su tovino kuudo neya uubweyogawano. Gooti toolluro yogalo kuu'maiyo dodoluwosodowodo su tov gami Kwolaiyo toollunokwono.

¹⁰ Toro te a'mwo pwol Gooti toolluro Kwolaiyo toolluno kuudo kuubweyo'ji su tool Gooti toolluro Kwolaiyo toolluno yogalo dodoluwosodowodo su tov gamoro poowokalago tovi me'no kuuluuwo'dowodokwono. Toro kuvi kuruv a'mwo pwol Gooti toolluro Kwolaiyo toolluno yogalo su tovi kuudo muubweyo'ji toolno'gwowi Gooti toollu aro to'busuko mojokuu'nosonekono. “Oo guu Gooti tooku kuunanekugono.” Mojokuu'nosonekono. Su tov aro tovida'aiyokwono. A'mwo su tool Gooti toolluro yogalo gami Kwolaiyo toolluno adodoluwosoka su tovino kuudo muubweyo'ji tovida'aiyokwono.

¹¹ Aki Gooti toolluro yogalo kuu'maiyo adodoluwosoka tov arokwono. Gooti tool aiyo yiunokuudo mujomwekovlaiyo'moneyokwe tov anekullabokaikono. Aki aiyo yiunokuudo mujomwekovlaiyo'moneyokwe su tov Gooti toolluro Kwolaiyo toollu uuguro'mwonyodowa'jure tovi'aro ma'dowadokwono.

¹² A'mwo pwol Gooti toolluro Kwolaiyo su toollu kuuguro'mwonyo'ji tov Gooti tooke aiyo yiunokuudo mujomwekovla'mwalonekono. Toro kuvi kuruv a'mwo pwol Gooti toolluro Kwolaiyo toollu muuguro'mwonyo'ji su toolno'gwowi aiyo yiunokuudo ku'nono mamjomwekovla'mwalonekono.

Pas sokwollapiyoka akavuro kavlo tovinokwono

¹³ Kevu Gooti toolluro Kwolaiyo toolluno yovo tovino kuudo me'no kuubwemwakopo togaikul aiyo yiunokuudo mujomwekovlaiyo'moneyokwe tovi me'no ma'dupudogaikikono. Kevu aiyo ma'dupudo su tovino kuudo you'movla'mwalpino'moneyokwe nuu kuuguudo akan puukwollo sokwollekwopiyamwakono.

¹⁴ Aki nevu Gooti toollu subusu'nyogalo wuudoganyo'mo tovino luko miyodowadonogano. Luko miyodowado su tovino kavlo tov arokwono. Nevu buro'nyo buro'nyodeyo Gooti toolluro ilaiyo winodowo'jure tovino kuudogana'ji tov kaduko nekullodowodekono.

¹⁵ Aki nevu aro kuudo yauranonogano. Oo Gooti tool nemi kaduko nekullodowodoldeyo. Kuudo saura'ji tov aro kuvino kuruv kuudo nyouromaranogano. Oo nemoro yamuugojo Gooti toollu kuudogana'ji ton kuvinono nonekullabwonoldeyo. Su toro kuudo nyouromaranogano.

¹⁶ Jisasolluro a'mwo pwekwo ma'no ma'no pasudo puruv yodowo'jure toollu gami avalo Jisasolluro a'mwo gabovo pwol kwono'ji tov subusu'nyogalo neya wuudoganonekono. Su toro kuudogano'ji tovi'aro a'mwo su tekwo aiyo mujomwekovlaiyo'moneyokwe tov Gooti tool nokwo wiyonekono. Aki a'mwo su toolluro ma'no ma'no pasudo tov yiunokuudo mabollo'mo'mno'juki Gooti tool aiyo mujomwekovlaiyo'moneyokwe tov kuvinono nuubweyonekono. Toro kuvi kuruv ma'no ma'no pasudo pworono'gwowi yiunokuudo nobollo'moneyokweyorogano. Toro te kevu a'mwo yiunokuudo bollo'moneyokwe ma'no ma'no pasudo yodowo'jure su toollu wiyo'mwojo'mo Gooti toollu subusu'nyogalo nuudumwalpiyo.

¹⁷ Neya duu'nyulo. Yiuwi'nokai kaiya'no pasudo tooro ma'no ma'no pasudorogano. Toro kuvi kuruv ma'no ma'no pasudo pworono'gwowi yiunokuudo mabollo'moneyokwerogano.

¹⁸ Nevu aro tovino kuudo me'no youroma'dowadonogano. Yiuwi'nokai a'mwo abolo aiyo imo'no'mno Gooti toolluro kwoloraiyo me'no wimo'nodupudo ton ma'no ma'no pasudo toorai kuuno miyomjomwekovla'mdupudogano. Toro kuvi kuruv yiuwi'nokai a'mwo abolo su ton Gooti toolluro kwoloraiyo me'no wimo'nodupudo tonyu Gooti tool yellukuromollomwalodowodekono. Aki Gooti toolluro a'mwo abolo yellukuromollomwalodowo'jure su tonyu kirovanyuvanyokwe Satanyol kaiyako mollugolameyo'mo ato puru'monodo kuruv ku'nono muubogai'nonekono.

¹⁹ Nevu aro tovino kuudo me'no youroma'dowadonogano. Yiuwi'nokai kwako akavida'ai a'mwo abolo ton kirovanyuvanyokwe Satanyolluro jurogudo tovi dolago tomuu kuuno mujomwekovla'mdupudogano. Toro kuvi kuruv nevno'gwowi Gooti toolluro kwoloraiyo kuunodo me'no wimo'nodowadonogano.

²⁰ Aki nevu aro tovino kuudo me'no youroma'dowadonogano. Gooti toolluro Kwolaiyo tool kwako akavi me'no abwolomwalokaikono. Toro bwolomwalno sumaiyokwe Gooti kuunodo su tool gavnokweyolluno kuudo youromallo'moneyokwe tov nemi me'no anekullabokaikono. Toro te nevu Gooti kuunodo su toolluro Kwolaiyo Jisas Kraisollu uuguro'mwonyodowadonogano. Jisas Krais su tool Gooti kuunodekono. Aki yiuno Jisas Kraisollu'aro nevu aiyo yiunokuudo mujomwekovla'mwalanonogano.

²¹ Mi kwoloraiyobusukobuuravoo, kevu kuunano gooti tooraino'gwowi manyu tomuu'aro neya jurukuruwolovogaulo.