Yunus 3 - Alkitab bahasa Selaru

Yunus tyoha haret a Hulasokwe

¹ Kdi a kla-ruake ma Hulasokwe byu ti Yunus de byohe,

² “Yunus o, mbwai Niniwe nus lan so, ti mtwanuk haret kutanuk ti oare ti sir.”

³ Lemade Yunus tyoha haret Hulasokwe itanukare ma byai Niniwe. Niniwe neke nus lan de lanke ma kolnye tlakut tosy hnuke lulkwe ma tbai hnuke lyakwe neke kyal sekwe enatelw (3).

⁴ Yunus inait nus desy bonyo, syukar ode lyakut a sekwe sasam ma yarasik hnuke kditlanke, desikeo nenmo yatela de byohe, “E mtyomolu haret manosy Hulasokwe. Ana sekwe hean-at (40) bonyo, Niniwe neke kiskyui-kiskyay.”

⁵ Lemade ratomolu maktei bonyo iry Niniwe desikre mumu rtohak Hulasokwe tun itanuk desy ma rbuma lema raknam o renw, ode lan o kakan o enmosw o amosw rhonak kadutare ma klyosu ohe rasal ti Hulasokwe. Ktela ne kdi ti kolnye kali:

⁶ Sew desike Raja Niniweke itomolu tun Yunus itanukare bonyo, yorw toha wasi kaderke, ode yonuk wasi rabit a kmata lanke, maktei o yal kadutke ma hyonak, ode tyaklulw ti ahkwe kralake ma klyosu ohe isal ti Hulasokwe.

⁷ Dendye yal haretke ti nuske ktem desy de byohe, “Haret neke kbyetik toha Raja Niniweke yor wasi Melare ma rohut kolnye: Iry o heal o nam nekre myas mumu, ma kete miknam o myenw.

⁸ Ode miktemtem a mtyabal heal o nam nekre mhyonak kadutare mumu, kbuanke o taktemtem tasal ti Hulasokwe. Dendye taktemtem a tsambayan ti Hulasokwe neke tal ity ralat a kralanare bain-bain ma kete kyalamo tala tot atyatare de.

⁹ Esei hye ohe ana Hulasokwe Ralake kyulak i ma lema kyeyer a ity ode lema tyabahunw o yah a ity.”

¹⁰ Lemadendye Niniwe desikre mumu rtoha haret desy, ode Hulasokwe yatos o iry desikre rotuk wait totnyo yabit atyatare ba de. Dendye Hulasokwe lyobak sir ma lema byuma tyabahunw a sir ma ktyoha tun itanuk mamunake.