Titus 3 - Núúboòd Gú'dúgke Puu Sambə́ Nwɔŋú bìá

Nɛɛ̀n aa nɛ́b bagké bəd dá kuùm dú roó

¹ Sèl ǹ zá' nɛ́b bagké bəd gə́ kóólé, boò ləə gààd bərá, bít kə̀ gɔ̀mnà bərá. Boò ləə bə̀ kúnú, bít boò náŋ tù' sɔ̀ɔ̀n bəd ma'ǹmbə̀ sí.

² Ǹ bàà bə̀ gə́, boò gám nwɔŋ vaksə́ nɛ́ŋə̀ nə́ŋ̀má yílə́ sí. Boò mà' álsɛ̀l sí. Zá boò ì' yíl boò nɛ́ŋə̀ sɔ̀ɔ̀ná, bít boò dìì tɛ́m ɔ̀gke boò i'ǹmbə̀ kə̀ nɛ́b bəd gə́ kóólé.

³ Kàandə, nyàamdoorú rə, bə́n kə̀ ingabké naà gá, bə́n ləə̀n Vɛnɛ́b sé, bə́n kuùmmà kə̀ nɛ́b kam bəraa bɔ̀bə́l lə kíni. Bə́n kuùm inlɛ'kè vaksə́ kɔ̀sá, kə̀ í'ǹmbə̀ in bəraa zɔ̀ŋə yɛ́b bərə kóólé. Bə́n kuùmmà invaksə́ rú, kə̀ kisɛ̀lú. Bə́n zeèn nɛ́b kam bərá, nɛ́b kambəd kɔ̀ bə̀ zèè bə́n kúnú.

⁴ Zá sɛŋ aa Vɛnɛ́b Nɛ́d Nɛ́ŋə̀ bə̀ Súùn bə́n ì' nɛ́b bəd sɔ̀ɔ̀nkè oò, kə̀ í'sɛ̀l oò tə́ rə,

⁵ súú bə́n də, kə̀ tù' wɔ̀ɔ̀lə̀ bəraa mà' bə́n bɛ́'ǹ də gá. Zá kàandə, ɛ̀g bé' bə́n búúrá. Bít súú bə́n kə̀ wəl aa bə́n nyiŋ̀ kə̀ Nwul Gìdń aa pii bə́n lɛbké puu, bít kə̀ gɔ̀ŋsə́ puu roó.

⁶ Kàandə, Nwul Gìdń aa Vɛnɛ́b náŋà obə́n yílə́ yérə, kə̀ Krístù Nɛ́d Nɛ́ŋə̀ bə̀ Súùn bə́n da.

⁷ Kə̀ pə̀dkè aa Krístù mà' bə́n doó, bə́n bíìl taà nɛ́ŋə̀ wɔ̀ɔ̀lə̀ Vɛnɛ́b númú. Báan gɔ̀ŋsə́ aa bɛ́d bə gá rə bɔbàá, kìínmbə̀ valligə̀ kíin, kə̀ tɛ́m zígke bə́n da.

⁸ Nwɔŋ aa yée, də́ŋì tɛ́m zígǹmbə̀ ba. Mə́ í' rə, ǹ dìì kíìn nwɔŋ aa bə sɔ̀ɔ̀nkè. Kàandə, bɔ̀b nɛ́b aa tə́ Vɛnɛ́b bagǹ də, boò pii yíl boò kə̀ tù' sɔ̀ɔ̀n ma'ǹmbìá. Aarə in sɔ̀ɔ̀ná, bít dá sə̀n nɛ́b bəd láŋ̀ ba.

⁹ Zá nùù ǹ dàà pìrə̀ tɛdń bəraa nɛ́b bəd tə́ yi'ǹ doó. Ìì dìì pìrə̀ yi'ǹmbə̀ dam bəd nə́gə́l gádǹmbə̀ bə sí, álsɛ̀l bərá, bít kə̀ nə́gə̀raa Musa indaŋ̀mbə̀ yílə́ roó. In bəraa rə, bə̀ láŋ nɛ́ŋə̀ gá, bít bə̀ kə̀ pɛ̀sə́ naà sé.

¹⁰ Nɛ́ŋə̀ aa tə́ Vɛnɛ́b insánke pɛdǹ də, ǹ álə̀ sɛŋ iira; kè' n síngə́, ǹ wál kə̀ oò tə́ sɔ̀ŋ sí.

¹¹ Ń gàb yàá, nɛ́ŋə̀ luùm aarə, zá' dàà Vɛnɛ́b kpaŋ̀ yàá, gàb yàá bəǹ mà' invaksə́ yàá. Bít invaksə́ oò bəd ì' gə́, oò pí'ì fágə́nú.

Nwɔŋ aa dùg kə̀ bòd doó, kə̀ dɔ̀msɛ̀lá

¹² Sɛŋ aa máánnà Artemas sínkɔ̀ Tikikus tuùmmà, bɔ̀b dáá oò pɛ́ɛn kíìn də, mə́ í' ɛ̀m yaà ǹ bɔ̀b mə́ kə̀ báŋ, Nikopolis bìlú. Mə́ í' nwùm sɛŋ dáá oò mà' mə́ wərà.

¹³ Ǹ láŋ Zenas ba. Zenas də, nɛ́d nɛ́ŋə̀ bə̀ láŋ̀ bə fágə́n zɔ̀ŋ bə kə̀ váàndoá; bít ǹ láŋ Apolos ba, bɔ̀b sɛ̀ɛ́n kpaŋ̀ boò oò kùm sɔ̀ɔ̀nkèá; ǹ mà' bɔ̀b in nə́ŋ̀má oò kpán bə̀ sí.

¹⁴ Nɛ́b bagké bəd kɔ̀, boò dìì tù' sɔ̀ɔ̀n ma'ǹmbìá, boò láŋ nɛ́b kam in aa bə̀ ɔ̀d kə̀ vɛ́nà rə ba. Bə̀ mà' kàan síngə́, gɔ̀ŋsə́ boò kə̀ pɛ̀sə́ naà sé.

¹⁵ Nɛ́b aa bə̀ tə́ kə̀ máá tə́ rə kóólé, bə̀ dɔ̀m m yàá. Ǹ dɔ̀m ɔ̀dzéd bə́ tɛ́mbagké rú bə̀ bərá. Pə̀dkè Vɛnɛ́b bə̀ oò kùm kə̀ aí tə́ kóólé.